விவிலிய விதைகள் - Biblical Seeds - Tamil Sunday Homily - தமிழ் ஞாயிறு மறையுரைகள் - தவக்காலம் 5-ஆம் ஞாயிறு - (ஆண்டு- A) - 26-03-2023 - ஞாயிற்றுக்கிழமை

 

🌱விவிலிய விதைகள்🌱

தவக்காலத்தின் 5-ஆம் ஞாயிறு

தமிழ் திருவழிபாட்டு மறையுரை

(26 மார்ச் 2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: எசேக்கியேல் 37: 12-14

இரண்டாம் வாசகம்: உரோமையர் 8: 8-11

நற்செய்தி: யோவான் 11: 1-45

உயிர்ப்பு என்னும் புதுவாழ்வு

'உயிர்ப்பு என்னும் புதுவாழ்வு' இது திருவருகைக் காலத்தின் 5-ஆம் ஞாயிற்றுக் கிழமை நம் உள்ளத்தில் விதைக்கும் மையச் சிந்தனையாகும். இன்றைய இறைவார்த்தை வழிபாடு மூன்று வகையான உயிர்ப்பை பற்றி எடுத்துரைக்கிறது.

1. அடிமையிலிருந்து உயிர்ப்பு

மீட்பின் வரலாற்றில் இறைவனை மறந்து நெறிகெட்டு போன யூதநாட்டு மக்கள் பாபிலோனுக்கும், இஸ்ராயேல் மக்கள் அசீரியாவுக்கும் நாடு கடத்தப்பட்டார்கள். அங்கு அவர்கள் அனைத்தையும் இழந்து இறந்து கொண்டிருந்தார்கள். இன்றைய முதல் வாசகத்தில் இந்த மக்களின் அடிமை வாழ்வு பள்ளத்தாக்கில் கிடந்த உலர்ந்த எலும்புகளுக்கு இணையாக இருப்பதாக ஆண்டவர் எசேக்கியலுக்கு கனவில் காட்சி தந்து தெரிவிக்கிறார். மேலும், நீ கனவில் கண்டதை இஸ்ராயேல் மக்களுக்கு போய் எடுத்துரை என்றும், 'இதோ நான் உங்கள் கல்லறைகளைத் திறக்கப் போகிறேன். உங்களை உங்கள் கல்லறைகளினின்று மேலே கொண்டு வருவேன். என் ஆவியை உங்கள்மீது பொழிவேன். நீங்களும் உயிர் பெறுவீர்கள்' (எசேக் 37:12,14) என்றும் எடுத்துரைத்து அடிமை வாழ்வு என்னும் இறப்பிலிருந்து புதுவாழ்வு என்னும் உயிர்ப்பை அவர்களுக்கு தருவேன் என்கிறார்.

2. பாவத்திலிருந்து உயிர்ப்பு

கிறிஸ்தவர்களாகிய நாம் ஒவ்வொருவரும் பாவத்தால் இறந்து கல்லறையில் புதைக்கப்பட்டிருக்கின்றோம் என்பதை உணர்ந்து அதிலிருந்து புதுவாழ்வு பெற அழைப்பு பெறுகின்றோம். பாவம் நம்மை சுய இயல்புக்கு ஏற்ப வாழ வைத்து கடவுளிடமிருந்து விலக்கி வைக்கிறது. இதைத்தான் இன்றைய இரண்டாம் வாசகம் 'பாவத்தின் விளைவாக உங்கள் உடல் செத்ததாயினும், கிறிஸ்து உங்களுள் இருந்தால், நீங்கள் கடவுளுக்கு ஏற்புடையவர்கள் ஆக்கப்படுவீர்கள்; அதன் பயனாகத் தூய ஆவி உங்களுக்குள் உயிராய் இருக்கும்' (உரோமையர் 8:10) என்கிறது. ஆக நாம் பாவம் என்னும் இறப்பிலிருந்து உயிர்ப்பு பெற இறைமகன் இயேசு கிறிஸ்து அருளும் தூய ஆவியால் நிரப்பப்பட வேண்டும், அப்போது புதுவாழ்வு நம் ஒவ்வொருவருக்கும் சொந்தமாகும்.

3. இறப்பிலிருந்து உயிர்ப்பு

இன்றைய நற்செய்தியில் இயேசு இலாசரின் கல்லறைக்கு சென்று அவரின் இறந்த உடலுக்கு உயிர் கொடுப்பதை வாசிக்கிறோம். மனிதர்களாகிய நாம் ஒவ்வொருவரும் ஒரு நாள் நிச்சயம் இறப்போம் என்பதை அறிந்திருந்தாலும் கிறிஸ்தவர்களாகிய நம் ஒவ்வொருவரையும் இறைமகன் இயேசு கிறிஸ்து உயிர்த்தெழ செய்வார் என்பதை இந்நிகழ்வின் மூலம் அறிந்து கொள்கிறோம். “உயிர்த்தெழுதலும் வாழ்வும் நானே. என்னிடம் நம்பிக்கை கொள்பவர் இறப்பினும் வாழ்வார்" என்னும் இயேசுவின் வார்த்தைகள் இதற்கு சான்றாக உள்ளது.

இன்று நாம் சாகவில்லை என்று கூறலாம், ஆனால் இவ்வுலக வாழ்வின் துன்பங்களால், சோதனைகளால், பாவங்களால் மற்றும் இறைவனை விட்டு பிரிந்து உலக ஆசைகளில் அடிமை வாழ்வால் நாம் அனைவரும் இறந்திருக்கின்றோம். 'இதோ நான் உங்கள் கல்லறைகளைத் திறக்கப் போகிறேன்' என்னும் இறைவார்த்தைக்கு ஏற்ப இறந்து அடக்கம் செய்யப்பட்ட நம் வாழ்வின் இத்தகைய துன்பம் மற்றும் பாவம் என்னும் கல்லறைகள் இரண்டு விதங்களில் திறக்கப்படுகிறது.

1. ஆவியால் உயிர்ப்பு
2. நம்பிக்கையால் உயிர்ப்பு

நம் அனைவருக்கும் ஆவியாலும் நம்பிக்கையாலும் உயிர்ப்பு என்னும் புதுவாழ்வு தரப்படும் என்று இன்றைய இறைவார்த்தை வழிபாடு எடுத்துரைக்கிறது.

1. ஆவியால் உயிர்ப்பு

இன்றைய இரண்டாம் வாசகத்தில் 'இறந்த இயேசுவை உயிர்த்தெழச் செய்தவரின் ஆவி உங்களுள் குடிகொண்டிருந்தால், கிறிஸ்துவை உயிர்த்தெழச் செய்த அவரே உங்களுள் குடிகொண்டிருக்கும் தம் ஆவியினாலே சாவுக்குரிய உங்கள் உடல்களையும் உயிர் பெறச் செய்வார்' (உரோமையர் 8:11) என்னும் பவுலடிகளாரின் வார்த்தைகள் கிறிஸ்தவர்களாகிய நமக்கு ஆவியாலே உயிர்ப்பு என்பதை உறுதிப்படுத்துகிறது. நம் திருமுழுக்கின் வழியாக நாம் அனைவரும் தூய ஆவியால் கிறிஸ்துவில் பிறப்படைந்தோம், உறுதிப்பூசுதலின் வழியாக தூய ஆவியால் மீண்டும் நாம் உறுதிப்படுத்தப்பட்டோம், அதே தூய ஆவி நாம் பாவம் மற்றும் துன்பம் என உள்ளத்தால் இறந்தாலும், மேலும் இவ்வுலக வாழ்வை விட்டு உடலால் இறந்தாலும் நமக்கு உயிர்ப்பு என்னும் நிலையான புதுவாழ்வை அளிப்பார்.

2. நம்பிக்கையால் உயிர்ப்பு

"உறுதியாக உங்களுக்குச் சொல்கிறேன்; என்னை நம்புவோர் நிலைவாழ்வைக் கொண்டுள்ளனர்" (யோவான் 6:47) என்னும் இயேசுவின் வார்த்தைகள் நம்பிக்கையாலே வாழ்வு என்பதை எடுத்துரைக்கிறது. இன்றைய நற்செய்தியில் வெவ்வேறு நிலைகளில் பலரால் நம்பிக்கையாலே புதுவாழ்வு என்பது உறுதிப்படுத்தப்படுகிறது.

அ. சீடர்களும் நம்பிக்கையும்

இயேசு தன் சீடர்களிடம் பேசும்போது, “இலாசர் இறந்து விட்டான்” என்று வெளிப்படையாகச் சொல்லி விட்டு, “நான் அங்கு இல்லாமல் போனதுபற்றி உங்கள் பொருட்டு மகிழ்கிறேன்; ஏனெனில், நீங்கள் என்னை நம்புவதற்கு இது ஒரு வாய்ப்பாகிறது. அவனிடம் போவோம், வாருங்கள்” (யோவான் 11: 14-15) என்று சீடர்கள் நம்பிக்கை பெறுவதற்காக அவர் இறந்த இலாசரை உயிர்த்தெழத் செய்யப் போவதை முன்னரே அறிவிக்கிறார். மேலும் அவர் கல்லறை முன்பு நின்று கொண்டிருந்தபோது கூட இறைவனிடம், "நீர் எப்போதும் என் வேண்டுதலுக்குச் செவிசாய்க்கிறீர் என்பது எனக்குத் தெரியும். எனினும் நீரே என்னை அனுப்பினீர் என்று சூழ்ந்து நிற்கும் இக்கூட்டம் நம்பும் பொருட்டே இப்படிச் சொன்னேன்” (யோவான் 11:42) என்று என்று ஜெபிக்கிறார். ஆக இயேசு இறந்த இலாசாரை உயிர்த்தெழச் செய்தது சீடர்களும் அவரை சுற்றியிருந்த அனைவரும் நம்பிக்கையில் வளர வேண்டும் என்பதற்காகவே ஆகும்.

ஆ. மார்த்தாவும் நம்பிக்கையும்

இயேசு வந்துகொண்டிருப்பதை கேள்விப்பட்டு மார்த்தா அவரிடம் சென்று “ஆண்டவரே, நீர் இங்கே இருந்திருந்தால் என் சகோதரன் இறந்திருக்க மாட்டான். இப்போதுகூட நீர் கடவுளிடம் கேட்பதை எல்லாம் அவர் உமக்குக் கொடுப்பார் என்பது எனக்குக் தெரியும்”(யோவான் 11: 20-22) என்று எடுத்துரைத்தது அவர் இயேசு மீது கொண்ட ஆழ்ந்த நம்பிக்கையின் அடையாளமாக திகழ்கிறது. மேலும் இயேசு மார்த்தாவிடம், “உயிர்த்தெழுதலும் வாழ்வும் நானே. என்னிடம் நம்பிக்கை கொள்பவர் இறப்பினும் வாழ்வார். உயிரோடு இருக்கும் போது என்னிடம் நம்பிக்கைகொள்ளும் எவரும் என்றுமே சாகமாட்டார். இதை நீ நம்புகிறாயா?” என்று கேட்டார். மார்த்தா அவரிடம், “ஆம் ஆண்டவரே, நீரே மெசியா! நீரே இறைமகன்! நீரே உலகிற்கு வரவிருந்தவர் என நம்புகிறேன்” என்றார் (யோவான் 11: 25-27). இந்த வார்த்தைகள் அனைத்தும் உயிர்ப்பு என்னும் புதுவாழ்வுக்கு நம்பிக்கையே அடித்தளம் என்பதை ஆணித்தரமாக எடுத்துரைக்கிறது. இயேசு கல்லறை முன்னிருந்து “கல்லை அகற்றி விடுங்கள்” என்றார். அப்போது மார்த்தா அவரிடம், “ஆண்டவரே, நான்கு நாள் ஆயிற்று; நாற்றம் அடிக்குமே!” என்கிறார். இயேசு மீண்டும் அவரிடம், “நீ நம்பினால் கடவுளின் மாட்சிமையைக் காண்பாய் என நான் உன்னிடம் கூறவில்லையா?” (யோவான் 11: 39-40) என்று நம்பிக்கையே புதுவாழ்வின் பாதை என்பதை உறுதிப்படுத்துகிறார்.

இ. மரியாவும் நம்பிக்கையும்

இயேசு அங்கு வந்தபோது, அவர் இருந்த இடத்திற்கு மரியா வந்து, அவர் காலில் விழுந்து, “ஆண்டவரே, நீர் இங்கே இருந்திருந்தால் என் சகோதரன் இறந்திருக்க மாட்டான்” (யோவான் 11: 32) என மார்த்தா கூறிய அதே வார்த்தைகளை எடுத்துரைத்து அவரும் இயேசுவின் மீது ஆழ்ந்த நம்பிக்கை கொண்டிருந்தார் என காட்டினார்.

ஆக இயேசு இலாசரை உயிர்ப்பித்த இந்த நிகழ்வில் மார்த்தாவும், மரியாவும், சீடர்களும் மற்றும் அங்கிருந்த அனைவரும் நம்பிக்கையே புதுவாழ்வு என்பதை உணர்ந்து கொண்டனர். "படைகளின் ஆண்டவரே! உம்மை நம்பும் மானிடர் நற்பேறுபெற்றோர்!" (திருப்பாடல் 84 :12) என்னும் திருப்பாடலுக்கு ஏற்ப நாமும் ஆண்டவரில் உயிர்ப்பு என்னும் புதுவாழ்வு பெறுவதற்கு நம்பிக்கையே அடித்தளம் என்பதை உணர்ந்து கொள்வோம்.

பிறந்தோம், வாழ்ந்தோம், இறந்தோம் என நம் வாழ்க்கை கண்ணிமைக்கும் நேரத்தில் முடிந்துவிடுகிறது. இறப்பு என்பது வாழ்வு முடிந்த பிறகு வருவதல்ல மாறாக வாழும் போதும் நாம் பலமுறை இறந்து கொண்டு தான் இருக்கின்றோம். கிறிஸ்தவர்களாகிய நாம் ஒவ்வொரு முறையும் பாவம் செய்யும் பொழுதும், மனித உரிமைக்கு எதிராக நடக்கும் பொழுதும், வாழ்வின் துன்பங்களையும் சவால்களையும் சோதனைகளையும் எதிர்கொள்ளும் பொழுதும் இறந்து கொண்டிருக்கின்றோம். இத்தகைய இறப்புக்குப் பிறகும் உயிர்ப்பு என்னும் புதுவாழ்வு உண்டு அது நாம் கொள்ளும் நம்பிக்கையாலும் மற்றும் ஏற்றுக்கொள்ளும் ஆவியாலும் முழுமையாக நமக்கு வந்து சேரும் என்பதை நம்மில் உணர்ந்து வாழ்வோம். ஆண்டவரில் உயிர்ப்போம், புதுவாழ்வு பெறுவோம். இறைவன் நம் ஒவ்வொருவரையும் ஆசிர்வதிப்பார்.

விவிலிய விதைகள் - Biblical Seeds - Tamil Sunday Homily - தமிழ் ஞாயிறு மறையுரைகள் - தவக்காலம் 4-ஆம் ஞாயிறு - (ஆண்டு- A) - 19-03-2023 - ஞாயிற்றுக்கிழமை

 

🌱விவிலிய விதைகள்🌱

தவக்காலத்தின்4-ஆம் ஞாயிறு

தமிழ் திருவழிபாட்டு மறையுரை

(19 மார்ச் 2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்:1 சாமுவேல் 16: 1b, 6-7, 10-13a

இரண்டாம் வாசகம்: எபேசியர் 5: 8-14

நற்செய்தி: யோவான் 9: 1-41

பார்வையற்ற நம் வாழ்வு

எடிசன் வாழ்ந்த காலத்தில் வீதிகளில் எண்ணெய் விளக்குகள் மட்டுமே பயன்படுத்தப்பட்டு வந்தன. அக்காலத்தில், தான் வசித்து வந்த நியூயார்க் நகரத்தில் மின்சார விளக்குகள் எரிய வேண்டும் என்பது எடிசனின் இலட்சியமும் ஆசையுமாக இருந்தது. ஆனால் கேஸ் மற்றும் எண்ணெய் விளக்குகள் மட்டுமே பயன்படுத்தப்பட்டு வந்த அந்த காலத்தில் மின்சார விளக்குகள் வருமென்று எடிசனைத் தவிர வேறு யாரும் நம்பவில்லை. 1879-ஆம் ஆண்டு 40 மணி நேரம் தொடர்ந்து எரியக்கூடிய மின்சார விளக்கை எடிசன் உலகிற்கு அறிமுகம் செய்து வைத்தார். உலகிலேயே மின்மயமாக்கப்பட்ட முதல் நகரமாக நியூயார்க் மாறியது. ஒரு தனி மனிதனின் உழைப்பு, முயற்சி மற்றும் நம்பிக்கையால் இருளில் இருந்த நகரம் ஒளிக்கு மாறியது. ஒரு தனி மனிதனால் இருள் நிறைந்த உலகை வெளிச்சத்திற்கு கொண்டுவர முடியுமானால் வானத்தையும் பூமியையும் படைத்த இறைவனால் பாவம், மற்றும் நம்பிக்கையற்ற இருளிலிருந்து நம் ஒவ்வொருவருக்கும் ஒளியை தர முடியும். தவக்காலத்தின் நான்காவது ஞாயிற்றுக்கிழமை இறைவார்த்தை வழிபாடு இருளாக பார்வையற்று இருக்கும் நம் வாழ்வை இயேசு தருகின்ற ஒளியால் புது வாழ்வு பெற அழைக்கிறது.

இன்றைய நற்செய்தி பார்வையற்றவராக பிறந்தவரைப் பற்றியும், "நானே உலகின் ஒளி" (யோவான் 8:12) என்று கூறிய இயேசு அவரை குணமாக்குவதைப் பற்றியும் எடுத்துரைக்கிறது. இங்கு பார்வையற்றவருக்கு கிடைத்தது வெறும் கண் பார்வை மட்டுமல்ல மாறாக நம்பிக்கையின் பார்வையாகும். "அவரிடம் வாழ்வு இருந்தது; அவ்வாழ்வு மனிதருக்கு ஒளியாய் இருந்தது." (யோவான் 1:4) என்னும் இறைவார்த்தைக்கு ஏற்ப பிறவியிலிருந்தே பார்வையற்று இருந்தவருக்கு ஒளி கொடுத்து புது வாழ்வை தருகிறார் இறைமகன் இயேசு. அங்கு பார்வையற்றவரின் பெற்றோர் உண்மையை எடுத்துரைக்கவில்லை (9:20). ஆனால், பார்வையற்றவர் தன் நம்பிக்கையால் இயேசுவுக்கு சான்று பகர்கிறார். இவரது நம்பிக்கைக்கு இரண்டு காரணங்களை குறிப்பிடலாம்.

1. தொடுதல்:

இயேசு நினைத்திருந்தால் தன் வார்த்தைகளாலே அவருக்கு பார்வை கொடுத்திருக்கலாம், ஆனால் அவர் அவரை தொட்டார். இயேசு உமிழ்நீரைச் சேற்றில் கலந்து அவர் கண்களைத் தொட்டுப் பூசினார். தாய் தன் பிள்ளையை தொடுவது போல தொடுகிறார். இயேசுவின் இறைத்தொடுதல் அவருக்கு கண் பார்வையை மட்டும் தரவில்லை மாறாக நம்பிக்கையின் ஒளியையும் தருகிறது.

2. அனுப்புதல்:

இயேசு உமிழ்நீர் கலந்த சேற்றை அவர் கண்களில் பூசியது மட்டுமல்லாது அவரை சிலோவாம் குளத்தில் கழுவ அனுப்புகின்றார். (இங்கு சிலோவாம் என்றால் அனுப்பப்படுதல் என்பது பொருள்) அனுப்பப்படுதல் இறையழைப்பை ஏற்று, தான் பெற்ற ஒளியை பிறருக்கும் தருவதன் அடையாளமாகும். இதனால் தான் தன்னை குணப்படுத்தியவர் நிச்சயமாக ஒரு இறைவாக்கினர் என தனது நம்பிக்கையை வெளிப்படுத்துகிறார்.

ஆன்மீக குருடர்கள்

பிறவிக்குருடர் பார்வை பெற்று இயேசு யார் என்ற உண்மையை கண்டு கொண்டார். ஆனால் பரிசேயர்களோ நம்பிக்கை கொண்டிருக்கவில்லை. அவர்களின் அவநம்பிக்கை இயேசு தான் குணமாக்கினார் என்பதை ஏற்றுக் கொள்ள மறுக்க செய்தது. ஒய்வு நாளை மீறிய செயலாகவே பார்க்க செய்தது. இவர்கள் இயேசுவிலிருந்த இரக்கத்தை, நன்மைத்தனத்தை மற்றும் பிறரது துன்பத்தைப் போக்கும் நல் மனதைக் காண தவறியவர்கள். பார்வையோடு இருந்த பரிசேயர்கள் அதனை கண்டுணராமல் சபிக்கவும், சட்டத்தை மீறவும் மற்றும் இயேசுவை துன்புறுத்தவும் முயன்றனர். இதுவே இவர்களை ஆன்மீகக் குருடர்களாக மாற்றியது. இன்றைய முதல் வாசகத்திலும் ஆண்டவரின் பார்வையில் தாவீது அழைக்கப்படுகின்றார். இஸ்ராயேல் மக்களை வழிநடத்த முழு நம்பிக்கையோடு அவரது கையில் ஒப்படைக்கின்றார். ஆண்டவர் தாவீதையும் மற்றும் பார்வையற்றவரையும் பார்த்ததை போல நம் ஒவ்வொருவரையும் பார்க்கிறார். அப்பார்வையற்றவரை போல நாமும் குருடர்களாக இல்லாமல் இருக்கலாம். ஆனால் பல வேளைகளில் பரிசேயர்களை போல இறைவன் மீது நம்பிக்கையின்றி ஆன்மீக குருடர்களாக இருக்கிறோம்.

பார்வையற்ற நம் வாழ்வு

இன்றைய இரண்டாம் வாசகம் நம்பிக்கையாளர்கள் ஒளி பெறுவதைப் பற்றியும், ஒளியாய் இருப்பதை பற்றியும் எடுத்துரைக்கிறது. இன்றைக்கு நம்முடைய வாழ்க்கையிலும் நாம் நம்பிக்கையற்று உண்மையை எடுத்துரைக்காமல் பார்வையற்றவர்களாக இருளில் இருக்கின்றோம். கிறிஸ்தவர்களாக இருந்தும் இயேசுவுக்கு நமது வார்த்தையாலும், செயலாலும் மற்றும் வாழ்வாளும் சான்று பகராமல் பார்வையற்றவர்களாக இருக்கின்றோம். சாட்சியமும் நம்பிக்கையும் மற்றும் தூய்மையும் ஆண்டவரில் ஒளி பெற்றவர்களாக நம்மை வாழ வைக்கிறது. நாம் உடலளவில் பார்வையுள்ளவர்களாக இருந்தாலும், நம்பிக்கையின்மையால், பாவ வாழ்வால் மற்றும் சான்று பகராமையால் நமது உள்ளத்தில் மற்றும் ஆன்மீக வாழ்வில் பார்வையற்றவர்களாக இருக்கின்றோம். இயேசுவினுடைய பணி பார்வையற்ற நமக்கு ஒளி தந்து வாழ்வு கொடுப்பதாகும். இதைத்தான் “வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை" என்னும் இயேசுவின் வார்த்தைகள் எடுத்துரைக்கின்றன. (யோவான் 14:6) கடலில் தத்தளிக்கும் கப்பல் கலங்கரை விளக்கை நோக்கி செல்வது போல நாமும் இயேசு என்னும் ஒளியை நோக்கி பயணிப்போம். நம் கிறிஸ்தவ வாழ்வை புதுப்பிப்போம். இறைவன் நம் ஒவ்வொருவரையும் ஆசீர்வதிப்பார்.

விவிலிய விதைகள் - Biblical Seeds - Tamil Sunday Homily - தமிழ் ஞாயிறு மறையுரைகள் - தவக்காலம் 3-ஆம் ஞாயிறு - (ஆண்டு- A) - 12-03-2023 - ஞாயிற்றுக்கிழமை

 

🌱விவிலிய விதைகள்🌱

தவக்காலத்தின் 3-ஆம் ஞாயிறு

தமிழ் திருவழிபாட்டு மறையுரை

(12 மார்ச் 2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: விடுதலைப் பயணம் 17: 3-7

இரண்டாம் வாசகம்: உரோமையர் 5: 1-2, 5-8

நற்செய்தி: யோவான் 4: 5-42

நிலைவாழ்வு தரும் தண்ணீர்

ஒருவர் பணம் எடுப்பதற்காக வங்கிக்கு சென்றார். அங்கிருந்த பணம் கொடுப்பவரிடம் சீட்டு எழுதிக் கொடுத்து பணத்தைப் பெற்று, அதை எண்ணிய போது ஒரு தாள் குறைவாக இருப்பது போல் தோன்றியது. அப்போது அவர் பணம் கொடுப்பவரிடம் இதை இன்னொரு முறை இயந்திரத்தில் எண்ணி கொடுக்கும்படி கேட்டார். அதற்கு அவரோ ஏன் ஒரு தாள் குறைவாக இருக்கிறதா? இப்பொழுது அதற்கெல்லாம் நேரமில்லை, நீங்களே சரியாக எண்ணுங்கள் என்று கூறினாராம். அதற்கு அந்த நபர் இல்லை ஒரு தாள் கூட இருப்பது போல் தெரிகிறது என்று சொல்ல, உடனே பணம் கொடுப்பவர் அதை வேகமாக வாங்கி ஒரு முறைக்கு நான்கு முறை இயந்திரத்திலும் கையிலும் எண்ணி கொடுத்தாராம். இதிலிருந்து நாம் தேவையான இடத்தில் சரியான வார்த்தைகளை பேசினால் நிச்சயம் மாற்றமிருக்கும் என்பதை உணர்கிறோம். இன்றைய நற்செய்தியிலும் இயேசு சமாரியப் பெண்ணோடு சரியான வார்த்தைகளை பேசி அவருடைய தாகங்களுக்கு வாழ்வு தரும் தண்ணீரைத் தந்து மாற்றத்தை ஏற்படுத்துவதை பார்க்கின்றோம்.

இயேசுவும் சமாரியர்களும்

இயேசு தன்னுடைய மூன்று ஆண்டு பணி வாழ்வில் பல்வேறு சூழல்களில் சமாரியர்களை சந்தித்திருக்கிறார். லூக்கா 10: 25-37 வசனங்களில் இயேசு தன்னுடைய சீடர்களுக்கு நல்ல சமாரியர் உவமையை எடுத்துரைக்கிறார். உயிருக்காக போராடிக் கொண்டிருந்தவரை அதாவது குருவும் மற்றும் லேவியரும் கைவிட்டுப் போனவரை சமாரியர் ஒருவர் காப்பாற்றுவதை எடுத்துரைக்கிறார். அதுமட்டுமல்ல லூக்கா 17 :11 -17 வசனங்களை வாசிக்கின்ற பொழுது 10 தொழுநோயாளர்கள் இயேசுவிடம் வருகின்றார்கள். எல்லோரும் இயேசுவின் வார்த்தையை கேட்டு குருவிடம் சென்று குணமடைந்த போது, ஒரு நபர் மட்டும் அதாவது சமாரியர் மட்டும் இயேசுவிடம் நன்றி கூற வருவதை பார்க்கிறோம். இன்றைய நற்செய்தியில் இயேசு கிணற்று அருகிலிருந்த சமாரிய பெண்ணை சந்திப்பதை வாசிக்கிறோம். இவ்வாறு இயேசு பல வேளைகளில் சமாரியர்களை சந்தித்திருந்தாலும், நற்செய்தியில் சமாரியப் பெண்ணோடு உரையாடி அவர் தாகத்திற்கு வாழ்வு தரும் தண்ணீரை தருவது புது அனுபவமாக அமைகிறது. இன்றைக்கு அதே அனுபவத்தை நாமும் பெற்று இயேசு தரும் வாழ்வின் தண்ணீரை நமதாக்க அழைக்கப்படுகின்றோம். சமாரியப் பெண்ணுக்கு இரண்டு

விதமான தாகங்கள் இருந்தது.

1. சமுதாய தாகம்

கிமு 722-லிருந்து யூதர்களுக்கும் சமாரியர்களுக்கும் எப்போதும் பகைமையுணர்வு இருந்து வந்தது. யூதர்கள் உயர்ந்தவர்கள், அறிவாளிகள் மற்றும் ஞானிகள் என்ற ஒரு நிலைப்பாடும், சமாரியர்கள் தாழ்த்தப்பட்டவர்கள் மற்றும் ஒடுக்கப்பட்டவர்கள் என்ற ஒரு நிலைப்பாடும் இருந்த சூழல் அது. அதுமட்டுமல்லாது யூதருக்கும் சமாரியருக்கும் இடையே பல்வேறு நிகழ்வுகளால் உறவு சீர்குலைந்து இருந்தது. அவர்கள் ஒருவர் மற்றவரை வெறுத்தனர், அவர்களிடையே பகைமை இருந்தது. அதனால் தான் யூதர்கள் எருசலேமுக்கு செல்லுகின்ற பொழுது சமாரியாவின் வழியாக செல்லாமல், யோர்தான் நதியை கடந்து 'பெரேயா' வழியாக அதாவது இரு மடங்கு தூரம் அதிகமாக பயணித்தார்கள். அதனால்தான் இயேசு குடிக்க தண்ணீர் கேட்கின்ற போது, நீர் யூதர்; நானோ சமாரியப் பெண். நீர் என்னிடம் குடிக்க தண்ணீர் கேட்பது எப்படி? என கேட்கிறார். அது மட்டுமல்லாது இயேசு வாழ்ந்த காலத்தில், ஆண்கள் சமூகத்தில் அதிக ஆதிக்கம் செலுத்தி பெண்களை இரண்டாம் தர குடிமக்களாக கருதினார்கள். இந்த சமுதாயம் எங்களை ஏற்றுக் கொள்ளவில்லை என்ற ஒரு தவிப்பும் தாகமும் இந்த சமாரிய பெண்ணில் இருந்தது.

2. சமய தாகம்

இயேசுவின் காலத்தில் பாலஸ்தீன நாட்டை அதாவது இஸ்ராயேலை மூன்று பகுதிகளாகப் பிரித்திருந்தார்கள். வடக்கே கலிலேயா தெற்கே யூதேயா, கலிலேயோவுக்கும் யூதேயாவுக்கும் நடுவே சமாரியா இருந்தது. அந்தச் சமாரியா பகுதியில் சிக்கார் என்னும் ஊர் இருந்தது, இது பழைய ஏற்பாட்டு மரபுகளில் மைய இடமாகவும் சமாரியர்களின் வழிபாட்டுத் தலமாகவும் இருந்தது. சமாரியர்களின் நம்பிக்கையின் மையமான சிக்காரில் சமாரியப் பெண் சமய தாகத்தோடு இருக்கிறார். அந்த ஊரிலே ஈசாக்கின் மகன் யாக்கோபு அவருடைய மகன் யோசேப்புக்குக் கொடுத்த கிணறு இருந்தது. அதன் நீர் சுவையாக இருந்ததால் ஊர் மக்கள் எல்லோரும் அதில் தண்ணீர் எடுக்க வருவார்கள். அப்படி தனது உடல் தாகத்தைப் போக்க நினைத்த சமாரியப் பெண்ணின் உள்ளத்தில் சமய தாகமும் இருந்தது. ஆம், ஐந்து கணவர்கள் இருந்தார்கள் என இயேசு சொல்வது சமாரியர்கள் ஆசீரிய நாடு கடத்தலுக்கு பின் வழிபட்டு வந்த ஐந்து பிற இனத்து (அதாவது பாபிலோன், ஊத்தா, அவ்வா, ஆமாத்து, செபர்வயிம் நகரத்து தெய்வங்களை) வழிபட்டதை குறிப்பதாக இருக்கிறது. (2 அரச 17: 24 தொ) ஏனெனில் 'பாகால்' என்கிற எபிரேய வார்த்தைக்கு கணவர் மற்றும் பிற இனத்து கடவுள் என்று இரு பொருள் இருந்தது. ஆக இவ்வாறு சமாரியர்கள் பிற தெய்வங்களை வழிபட்டு சமய தாகத்தில் இருந்தனர். எனவேதான் இறைமகன் இயேசு கிறிஸ்து உம்முடன் இருப்பவர் உன் கணவர் அல்ல என கூறுகிறார். இது சமாரியப் பெண் வழிபடும் கடவுள் உண்மை கடவுள் இல்லை என்பதை காட்டுகிறது.

இவ்வாறு இயேசு சந்தித்த சமாரியப் பெண் சமய மற்றும் சமுதாய தாகங்களில் தவித்திருந்தாள். இதை இயேசு குடிக்க கொஞ்சம் தண்ணீர் கொடுங்கள் என்னும் வார்த்தையில் தொடங்கி தன் உரையாடலின் வழியாய் உணர வைத்து வாழ்வு தரும் தண்ணீரை கொடுத்து புது வாழ்வை தருகிறார்.

வாழ்வு தரும் தண்ணீர்

நேர்மையாளர்களை அல்ல பாவிகளையே மனம் திரும்பி வாழ அழைக்க வந்தேன் என இயேசு எடுத்துரைத்ததற்கு ஏற்ப பாவியான சமாரிய பெண்ணின் சமுதாய மற்றும் சமய தாகத்தை வாழ்வு தரும் தண்ணீரைத் தந்து போக்குகிறார். பழைய ஏற்பாட்டில் வாழ்வு தரும் தண்ணீர் தூய ஆவியாக சுட்டிக்காட்டப்படுகிறது. "நான் தூய நீரை உங்கள்மேல் தெளிப்பேன். நீங்கள் உங்கள் எல்லா அழுக்கிலிருந்தும் துய்மையாவீர்கள்; உங்கள் எல்லாச் சிலைவழிபாட்டுத் தீட்டையும் அகற்றுவேன். நான் உங்களுக்குப் புதிய இதயத்தை அருள்வேன். புதிய ஆவியை உங்களுக்குள் புகுத்துவேன். உங்கள் உடலிலிருந்து கல்லாலான இதயத்தை எடுத்துவிட்டு, சதையாலான இதயத்தைப் பொருத்துவேன்."(எசே 36:25-26) மற்றும் "தாகமுற்ற நிலத்தில் நீரை ஊற்றுவேன்; வறண்ட தரையில் நீரோடைகள் ஓடச் செய்வேன்; உன் வழிமரபினர் மீது என் ஆவியைப் பொழிவேன்; உன் வழித்தோன்றல்களுக்கு நான் ஆசி வழங்குவேன்" (எசாயா 44:3) மேலும் யோவான் நற்செய்தி 7வது அதிகாரம் 37 & 39 இறைவார்த்தைகளில் இயேசு எழுந்து நின்று உரத்த குரலில், “யாரேனும் தாகமாய் இருந்தால் என்னிடம் வரட்டும்; என்னிடம் நம்பிக்கை கொள்வோர் பருகட்டும். தம்மிடம் நம்பிக்கை கொண்டிருப்போர் பெறப்போகும் தூய ஆவியைக் குறித்தே அவர் இவ்வாறு சொன்னார். என ஆவியாரே வாழ்வு தரும் தண்ணீர் என மிகத் தெளிவாக எடுத்துரைக்கப்பட்டிருக்கிறது." இயேசு சமாரியப் பெண்ணோடு உரையாடுகையில் அவர் சிறிது சிறிதாக இயேசுவின் மீது நம்பிக்கையில் வளர்வதைப் பார்க்கின்றோம். அதனால்தான் 'ஐயா' என்று மரியாதையுடன் அழைக்கத் தொடங்கிய (11:5) சமாரியப் பெண் இயேசுவை ஒரு இறைவாக்கினராகப் பார்க்கத் தொடங்குகிறார் (19). அவரது நம்பிக்கை இன்னும் அதிகமாக, இயேசுவை அவர் மெசியா எனக் கண்டு கொள்கிறார். இறுதியாக அவரை உலக மீட்பராக ஏற்றுக் கொண்டு சாட்சியும் பகர்கிறார். இவ்வாறு இயேசு சமாரியப் பெண்ணுக்கு வாழ்வு தரும் தூய ஆவியை தருகிறார்.

நம் வாழ்வின் தாகங்கள்

இயேசு தந்த வாழ்வு தரும் தண்ணீரைப் பெற்ற சமாரியப் பெண் இயேசுவே மெசியா என உலகிற்கு அறிக்கையிட்ட முதல் நற்செய்தியாளர் ஆகிறார். இந்த நற்செய்தி அறிவிப்பு தான் இவர் பாவ வாழ்விலிருந்து புது வாழ்வுக்கு கடந்த சென்றதன் அடையாளமாகிறது. இன்றைக்கு கிறிஸ்தவர்களாகிய நாம் ஒவ்வொருவருமே சமாரியப் பெண்ணை போல பல்வேறு தாகங்களுக்கு உட்பட்டிருக்கிறோம். சமய, சமுதாய, இன, மொழி, குடும்ப மற்றும் எண்ணற்ற உள்ளத்து தாகங்கள் அன்றாடம் நம்மை நிலைவாழ்வு தருகின்ற நீருக்காக ஏங்க வைத்துக் கொண்டிருக்கிறது. நம் ஒவ்வொருவருக்குமே வாழ்வு தருகின்ற தண்ணீரை தருபவராக இறைமகன் இயேசு இருக்கின்றார். இதைத்தான் இன்றைய இரண்டாம் வாசகமும், "நாம் பெற்றுள்ள தூய ஆவியின் வழியாய்க் கடவுளின் அன்பு நம் உள்ளங்களில் பொழியப்பட்டுள்ளது." (உரோமையர் 5:5) என்கிறது. நம்பிக்கையோடு அவர் பாதம் சரணடைகின்ற ஒவ்வொருவருக்கும் நிலைவாழ்வு தரும் தண்ணீரால் புது வாழ்வை அவர் தருவார். கல்வாரி மலையில் திருச்சிலுவையில் தாகமாய் இருக்கிறது என்று இவ்வுலகின் பாவமென்னும் தாகத்தை தீர்த்து துணையாளராம் தூய ஆவியின் வழியாய் நிலைவாழ்வு தரும் தண்ணீரை தந்த இயேசு நம் ஒவ்வொருவருக்கும் அதை என்றும் தர காத்திருக்கிறார். நம்பிக்கையோடு அவரிடம் செல்வோம், புது வாழ்வு பெறுவோம். இறைவன் ஒவ்வொருவரையும் ஆசீர்வதிப்பார்.

விவிலிய விதைகள் - Biblical Seeds - Tamil Sunday Homily - தமிழ் ஞாயிறு மறையுரைகள் - தவக்காலம் 2-ஆம் ஞாயிறு - (ஆண்டு- A) - 05-03-2023 - ஞாயிற்றுக்கிழமை

 

🌱விவிலிய விதைகள்🌱

தவக்காலத்தின் 2-ஆம் ஞாயிறு

தமிழ் திருவழிபாட்டு மறையுரை

(05 மார்ச் 2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: தொநூ 12: 1-4a

இரண்டாம் வாசகம்:  2 திமொ 1: 8b-10

நற்செய்தி: மத் 17: 1-9

மாற்றம் பெற்று வாழ...

மகாத்மா காந்தியின் மகனான மணிலாள் காந்தி தென் ஆப்பிரிக்காவிலுள்ள டர்பன் நகர் அருகேயிருந்த ஒரு கிராமத்தில் தன் குடும்பத்தோடு தங்கியிருந்தார். ஒரு நாள் அவர் தன் மகன் அருண் காந்தியோடு டர்பன் நகருக்கு ஒரு கருத்தரங்கிற்காக காரில் சென்றார். செல்லும் வழியில் கார் பழுதானது, எனவே மணிலாள் காந்தி தன் மகன் அருன் காந்தியிடம் காரை சரிபார்த்து கருத்தரங்கு நடைபெறும் இடத்திற்கு கொண்டு வர சொன்னார். பல நாட்களாக அருன் காந்திக்கு திரையரங்கு சென்று திரைப்படம் பார்க்க வேண்டுமென்று ஆசை, ஆனால் அதற்கு தன் தந்தை அனுமதிக்கமாட்டார் என உணர்ந்த அவர், காரை பழுது பார்க்க கொடுத்த இடத்தின் அருகேயிருந்த திரையரங்கிற்கு சென்று திரைப்படம் பார்த்துவிட்டு வந்தார் ஆனால் அதற்குள் நேரமாகிவிட்டது. அவசர அவசரமாக காரை எடுத்துக்கொண்டு கருத்தரங்கு நடைபெற்ற இடத்திற்கு சென்றார். அங்கு அவருடைய தந்தை மணிலாள் காந்தி அவருக்காக காத்திருந்தார். அவர் கேட்பதற்கு முன்பே அருண் காந்தி தன் தந்தையிடம் 'காரில் பெரிய பிரச்சனை இருந்ததால் சரி செய்ய இவ்வளவு நேரமாகி விட்டது' என்று கூறினார். உடனே அவருடைய தந்தை, 'சரி நான் இன்று வீட்டிற்கு நடந்தே வருகிறேன், நீ கார் எடுத்துக்கொண்டு வீட்டிற்கு செல்' என்று கூறினார். உடனே அருண் காந்தியோ, 'ஏன் நடந்து வருகிறீர்கள்?' என்று கேட்டதற்கு அவரது தந்தை 'நான் இன்னும் என்னுடைய மகனை நேர்மையோடு இருக்கவும் மற்றும் உண்மையைப் பேசவும் கற்றுக் கொடுக்கவில்லை எனவே எனக்கு நானே தண்டனை கொடுத்துக் கொள்கிறேன்' என்று கூறினார். மேலும் 'கருத்தரங்கு முடிந்தவுடன் அதாவது இரண்டு மணி நேரத்திற்கு முன்பே, நான் கார் பழுது பார்க்குமிடத்திற்கு தொலைப்பேசி மூலம் தொடர்பு கொண்டு கேட்ட போது கார் தயாராகி விட்டது என்றார்கள்' என்று சொன்னார். அன்று மணிலாள் காந்தி தனக்கு கொடுத்துக் கொண்ட தண்டனை அருண் காந்திக்கு புது மாற்றத்தை கொடுத்தது, வாழ்நாள் முழுவதும் நேர்மையோடும் வாழ வகுத்தது. இதைப் போலத்தான் இறைமகன் இயேசு நாம் ஒவ்வொருவரும் பாவத்திலிருந்து மனமாற்றம் பெறுவதற்கு தன்னில் சிலுவை என்னும் பெரும் துன்பத்தை ஏற்றுக்கொண்டார்.

நாம் பயணிக்கும் இந்த தவக்காலம் இருளிலிருந்து ஒளிக்கு மாறவும், பழையதிலிருந்து புதுமைக்கு மாறவும், நிழலிலிருந்து நிஜத்திற்கு மாறவும் மற்றும் பொய்மையிலிருந்து உண்மைக்கு மாறவும் அழைப்பு தருகிறது. ஆக தவக்காலம் என்னும் மாற்றத்தின் காலம் நமக்கு தரும் அழைப்பையேற்று நாமும் நம் வாழ்வை மாற்றுவோம். இன்றைக்கு நாம் அடியெடுத்து வைத்திருக்கின்ற தவக்காலத்தின் இரண்டாம் ஞாயிற்றுக்கிழமை இறைவார்த்தை வழிபாடும் கிறிஸ்தவர்களாகிய நம் ஒவ்வொருவரையும் மாற்றம் பெற்று வாழ அழைப்பு தருகிறது. முதல் வாசகம் இறைவன் ஆபிரகாமை அழைத்ததையும் மற்றும் அவருக்கு கொடுத்த வாக்குறுதியையும் எடுத்துரைக்கிறது. ஆபிரகாம் நாடு மற்றும் வீடு இவைகளை விட்டுவிட்டு அறியாத புதியதொரு இடத்திற்கு செல்ல அதாவது புதுவாழ்வு என்னும் மாற்றத்தை பெற அழைக்கப்பட்டார். நற்செய்தி வாசகம் இயேசு தாபோர் மலையில் உருமாற்றம் பெற்றதை எடுத்துரைக்கிறது. இவ்விரண்டு நிகழ்விலும் இன்றைய மாற்றம்தான் நாளைய வாழ்வாக மாறும் என்பது சுட்டிக்காட்டப்படுகிறது. இயேசுவின் உருமாற்றம் நம் வாழ்வு மாற்றம் பெறுவதற்கு அழைப்பு தருகிறது. இயேசுவின் உருமாற்றம் இரண்டு உண்மைகளை புரிந்து கொள்ளவும் அதனால் நம் வாழ்வு மாற்றம் பெற்றிடவும் அழைப்பு தருகிறது.

1. இறைச்சாயலை அறிந்து கொள்ள...

இறைவனின் மகிமையை மற்றும் மாட்சியை இயேசுவின் உருமாற்றம் வெளிக்கொணர்ந்தது. இயேசுவோடு உடன் வாழ்ந்த சீடர்களான பேதுரு, யாக்கோபு மற்றும் யோவான் அவர் ஜெபிப்பதையும், அற்புதங்கள் செய்வதையும் மற்றும் பல்வேறு இடங்களில் நற்செய்தியை அறிவிப்பதையும் பார்த்தவர்கள், ஆனால் முதல் முறையாக அவருடைய இறைச்சாயலை வெளிப்படுத்தும் உருமாற்றத்தை அதாவது மகிமையை கண்டுணறுகிறார்கள். இதைத்தான் இன்றைய நற்செய்தி வாசகமும் "அவர்கள்முன் அவர் தோற்றம் மாறினார். அவரது முகம் கதிரவனைப் போல் ஒளிர்ந்தது. அவருடைய ஆடைகள் ஒளிபோன்று வெண்மையாயின." (மத்தேயு 17:2). என வாசிக்கின்றோம். சீடர்கள் இயேசுவிடம், “சிலர் திருமுழுக்கு யோவான் எனவும் வேறு சிலர் எலியா எனவும் மற்றும் சிலர் இறைவாக்கினருள் ஒருவர் எனவும் சொல்கின்றனர்” இது வெறும் மக்களின் கூற்று மட்டுமல்லாது சீடர்களிடமும் அவ்வபோது எழுந்த சந்தேகங்களாகும். இவையனைத்து கேள்விகளுக்கும் பதில் தான் இயேசுவின் உருமாற்றம், இயேசு அவர்கள் நினைப்பது போல திருமுழுக்கு யோவானோ, எலியாவோ அல்லது இறைவாக்கினர்களுள் ஒருவரோ அல்ல மாறாக அவர் இறைமகன். இறைச்சாயலை கொண்டு மனித உருவில் வாழ்ந்து கொண்டிருப்பவர் என்பதை அவர்களுக்கு இது உணர்த்தியது, அதனால்தான் இறைச்சட்டங்களின் அடையாளமாக மோசேயும், இறைவாக்கினர்களின் அடையாளமாக எலியாவும் இயேசுவின் உருமாற்றத்தில் தோன்றிய போது அச்சீடர்கள் முகங்குப்புற கீழே விழுந்து, இயேசு ஒரு சாதாரண மனிதர் அல்ல மாறாக இறைமகன் என்பதை உணர்ந்தார்கள். இயேசுவின் உருமாற்றம் சீடர்களை மட்டுமல்ல அது நம் ஒவ்வொருவரையும் இறைவன் தந்த இயேசுவை, நம் உள்ளங்களிலும் வாழ்விலும் ஏற்றுக்கொண்டு வாழ்ந்து கொண்டிருக்கின்றோமா? மற்றும் அதை உணர்ந்திருக்கின்றோமா? என சிந்தித்துப் பார்க்க அழைப்பு தருகிறது. சீடர்கள் இயேசுவின் உருமாற்றத்தில் அவரை கண்டு கொண்டது போல இன்றைக்கு நாமும் திருவருட்சாதனங்களிலும் குறிப்பாக நற்கருணையிலும் தன்னையே உருமாற்றி வெளிப்படுத்திக் கொண்டிருக்கும் இயேசுவை உணர மற்றும் வாழ்வாக்க அதனால் மாற்றம் பெற அழைப்பு பெறுகின்றோம். "உங்கள் கண்களோ பேறுபெற்றவை; ஏனெனில் அவை காண்கின்றன. உங்கள் காதுகளும் பேறுபெற்றவை; ஏனெனில் அவை கேட்கின்றன." (மத்தேயு 13:16,17) என்னும் இறைவார்த்தைக்கு ஏற்ப இறைவனை நம்முடைய வாழ்வில் கண்டுகொண்டு அவரில் பேறுபெற்றவர்களாக வாழ நாமும் மனமாற்றம் பெறுவோம்.

2. இறைப்பணியை அறிந்து கொள்ள...

"மோசே, எலியா என்னும் இருவர் அவரோடு பேசிக் கொண்டிருந்தனர். மாட்சியுடன் தோன்றிய அவர்கள் எருசலேமில் நிறைவேறவிருந்த அவருடைய இறப்பைப் பற்றிப் பேசிக் கொண்டிருந்தார்கள்." (லூக்கா 9:30,31) என லூக்கா நற்செய்தியாளர் எடுத்துரைக்கும் இயேசுவின் உருமாற்ற நிகழ்வில் எருசலேமில் நிறைவேறவிருந்த இறப்பைப் பற்றி அவர்கள் பேசிக் கொண்டிருப்பது அவரின் பணி வாழ்வை அதாவது மீட்பு திட்டத்தை நிறைவேற்றுவதற்காக மனித உருவெடுத்ததை மற்றும் தன்னுயிர் அளிப்பதை சீடர்கள் அறிந்து கொள்ளவும், அவர் விட்டுச் செல்கின்ற இறையாட்சியின் விழுமியங்களை அதாவது பணி வாழ்வை தொடர்ந்தாற்ற அழைப்பு தருகிறது. பழைய ஏற்பாட்டில் விடுதலைக்காய் இஸ்ராயேல் மக்கள் தொடர்ந்த பாலைவன பயணத்தைப் போல இறைமகன் இயேசுவும் நம் ஒவ்வொருவருக்கும் மீட்பு தருவதற்காக சிலுவையின் வழியாய் கல்வாரி மலை நோக்கி தன் பணிவாழ்வில் பயணிக்கிறார். இது அவரது உயிர்ப்பின் வழியாக நம் ஒவ்வொருவருக்கும் நிறை வாழ்வு என்னும் இறையாட்சியை தரும். இயேசுவின் உருமாற்றத்தை அதாவது அவரது மாட்சியை பார்த்த பேதுரு நாம் இங்கேயே இருப்பது நல்லது என்று எடுத்துரைப்பது அவர் கண்ட அந்த மாட்சிமையிலும் மகிழ்ச்சியிலுமே திளைத்திருக்க ஆசை கொள்கிறார் என்பதை எடுத்துரைக்கிறது. ஆனால் இறைமைந்தன் இயேசு நாம் எப்போதும் இம்மகிழ்ச்சியிலே திளைத்திருக்க முடியாது. இம்மகிழ்ச்சியில் மட்டுமல்லாது வாழ்வில் துன்பத்தையும் ஏற்றுக் கொள்ள வேண்டும் என சொகுசு நிலையிலிருந்து வாழ்வின் கஷ்டங்களையும், துன்பங்களையும் மற்றும் சிலுவைகளையும் சுமக்கின்ற மாற்றம் பெறுவதற்கு இயேசு தன் உருமாற்றத்தின் வழியாக அழைப்பு தருகிறார். எனவேதான் தம் சீடரைப் பார்த்து, “என்னைப் பின்பற்ற விரும்பும் எவரும் தன்னலம் துறந்து தம் சிலுவையைத் தூக்கிக் கொண்டு என்னைப் பின்பற்றட்டும்." (மத்தேயு 16:24) மற்றும் "கோதுமை மணி மண்ணில் விழுந்து மடியா விட்டால் அது அப்படியே இருக்கும். அது மடிந்தால்தான் மிகுந்த விளைச்சலை அளிக்கும் என உறுதியாக உங்களுக்குச்சொல்கிறேன்." (யோவான் 12:24) என்கிறார். இயேசுவின் உருமாற்றம் சீடர்கள் அவருடைய இறப்பை மற்றும் பணி வாழ்வை அறிய வேண்டும் என்பதற்காக மட்டுமல்லாது, அவர் சுமந்த சிலுவையை சுமந்து பணி வாழ்வை தொடர வேண்டும் என்பதற்காக ஆகும், இன்றைக்கு அதே அழைப்பு நம் ஒவ்வொருவருக்கும் தரப்படுகிறது.

மாற்றம் இல்லாமல் முன்னேற்றம் சாத்தியமற்றது. முன்னேற்றம் வேண்டுமெனில், மாற்றம் நம்மிலிருந்து ஆரம்பிக்க வேண்டும். மாற்றங்கள் நம்மை முன்னேற்றப் பாதையில் இட்டுச் செல்கின்றன. நமக்கு புதிய தேடல்கள், புதிய வாய்ப்புகளை அறிமுகம் செய்து வைக்கின்றன. இறைமைந்தன் இயேசுவை கண்டுணர்ந்து, வாழ்வின் சிலுவைகளை ஏற்று அவர் பணியை தொடர்ந்தாற்றுகின்ற கிறிஸ்தவர்களாக வாழ மனமாற்றம் பெறுவோம். இறைவன் நம் ஒவ்வொருவரையும் ஆசீர்வதிப்பார்.

விவிலிய விதைகள் - Biblical Seeds - Tamil Sunday Homily - தமிழ் ஞாயிறு மறையுரைகள் - தவக்காலம் 1-ஆம் ஞாயிறு - (ஆண்டு- A) - 26-02-2023 - ஞாயிற்றுக்கிழமை

 

🌱விவிலிய விதைகள்🌱

தவக்காலத்தின் 1-ஆம் ஞாயிறு

தமிழ் திருவழிபாட்டு மறையுரை

(26 பிப்ரவரி  2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: தொநூ 2: 7-9; 3: 1-7

இரண்டாம் வாசகம்: உரோ  5: 12-19

நற்செய்தி: மத் 4: 1-11

சோதனைகளை சாதனைகளாக்க...

ஒரு கப்பலில் சிலர் பயணித்துக் கொண்டிருந்தனர். அப்போது எதிர்பாராத விதமாக அந்த கப்பலில் கோளாறு ஏற்பட்டு கடலில் மூழ்கியது. அதில் பயணம் செய்தவர்களில் ஒருவனை தவிர மற்ற அனைவரும் இறந்து போனார்கள். அவன் சில நாட்கள் நீந்தி ஒரு தீவை வந்தடைந்தான். ஆளே இல்லாத அந்த தீவில் இவனுக்கு என்ன செய்வதென்றே தெரியவில்லை. தன்னை அழைத்து செல்ல இந்த தீவிற்கு யாரையாவது அனுப்பி வைக்கும்படி இறைவனிடம் வேண்டினான். நாட்கள் கடந்தன ஆனால் அவனை தேடி யாரும் வரவில்லை. அந்த தீவில் இருந்த சிலவற்றை கொண்டு அவன் அங்கு ஒரு குடிசையை கட்டி அதில் தங்க ஆரம்பித்தான். உடைந்த கப்பலின் பாகங்கள் அவ்வப்போது கரை ஒதுங்க ஆரம்பித்தது அதோடு அவனது சில உடமைகளும் கரை ஒதுங்கியது. அதை வைத்துக்கொண்டு அங்கு அவன் வாழ தொடங்கினான். ஆனால் இறைவனிடம் வேண்டுவதை மட்டும் அவன் நிறுத்தவே இல்லை. என் மனைவி பிள்ளைகளை பிரிந்து வெகு நாட்கள் ஆகிவிட்டது. என்னை எப்படியாவது அவர்களோடு சேர்த்துவிடு, ஏன் இந்த சோதனை இறைவா? என மீண்டும் ஜெபித்தான். அவன் பிராத்தனையை இறைவன் செவி கொடுத்து கேட்டதாக தெரியவில்லை. ஒரு நாள் திடீரென அவன் கட்டிய குடிசை தீப்பற்றி எரிய ஆரம்பித்தது. அவனால் அதை தடுக்க முடியவில்லை. அவன் அத்தனை நாள் சேர்த்த அனைத்தும் தீயில் கருகியது. என்ன செய்வதென்று தெரியாமல் அவன் கதறினான். சோதனைக்கு மேல் சோதனையா! என அவன் இறைவனிடம் மன்றாடினான். அழுதுகொண்டே அன்றிரவை அவன் கழித்தான். அடுத்தநாள் காலையில் அவன் வாழும் தீவை நோக்கி ஒரு கப்பல் வந்துகொண்டிருந்தது. அதை பார்த்து அவன் மகிழ்ச்சியில் குதித்தான். கப்பலில் இருந்தவர்கள் அவனை வந்து அழைத்து சென்றனர். அப்போது அவன், நான் இங்கு இருப்பது உங்களுக்கு எப்படி தெரியும் என்று கேட்டான். இந்த பகுதில் ஏதோ தீப்பற்றி எரிந்து புகை மூட்டமாக இருந்தது. அதனால் இங்கு யாரேனும் உள்ளார்களா என்று பார்க்கவே வந்தோம் என்றார்கள். அவன் குடிசையை எறியச்செய்து சோதனைக்கு மேல் சோதனை கொடுத்த இறைவன் அதிலே புது வழியையும் காட்டினார் என்பதை அவன் உணர்ந்தான்.

தவக்காலத்தின் முதல் ஞாயிற்றுக்கிழமையில் கிறிஸ்தவர்களாகிய நாம் ஒவ்வொருவரும் வாழ்வின் சோதனைகளை சாதனைகளாக மாற்ற அழைக்கப்படுகின்றோம். விவிலியத்தில் இரண்டு விதமான குழுக்களை பார்க்கிறோம். ஒரு குழுவினர் தங்கள் வாழ்வில் ஏற்ப்பட்ட எல்லா சோதனைகளையும் சாதனையாக்க தவறியவர்கள். மற்றொரு குழுவினர் சோதனைகளை எதிர் கொண்டு சாதனையாக்கி புது வாழ்வு பெற்றவர்கள்.

1. சாதனையாக்க தவறியவர்கள்:

நம் முதல் பெற்றோர்களான ஆதாமும் ஏவாளும் சோதனையை சாதனையாக்க தவறியவர்கள். (தொநூ. 3:1-13) இறைவன் பாலை நிலத்தில் இஸ்ராயேல் மக்களை சோதித்தார். உணவு மற்றும் தண்ணீரின்றி சோதனைக்கு உள்ளானார்கள். (விப 15: 22-26, 17: 1-7) ஆனால் அவர்கள் அதை சாதனையாக மாற்றவில்லை மற்றும் இறைவனிடம் மன்றாடவில்லை. ஒவ்வொரு முறையும் அவர்கள் சோதனைக்குள்ளாகும் போது சிலை வழிபாட்டை தொடங்கினார்கள், ஆண்டவரிடம் ஆற்றல் இல்லை என்று நினைத்தார்கள் மற்றும் இறைவனை விட்டு பிரிந்து சென்றார்கள். எனவே வாழ்க்கையில் தோல்வி அடைந்தார்கள்.

2. சாதனையாக்கி வாழ்ந்தவர்கள்:

"உன் மகனை எனக்கு பலியாக கொடு" என இறைவன் ஆபிரகாமிடம் கேட்டு அவருக்கு கொடுத்த சோதனையை அவர் சாதனையாக மாற்றினார். (தொநூ. 22:1) யோபுவும் சோதனையை சாதனையாக்க முயன்றார். (யோபு 1:12) ஆண்டவருக்காக தன்னுடைய உடமைகளை, உறவுகளை மற்றும் உடலை இழந்து சோதனையை சாதனையாக்கினார். இறைமகன் இயேசு தன்னுடைய மூன்று ஆண்டு பணி வாழ்வில் பலமுறை மற்றும் பல வகைகளில் சோதனைக்கு உட்பட்டிருக்கிறார். குறிப்பாக இன்றைய நற்செய்தியில் வாசிப்பது போல இயேசு பாலைவனத்தில் நாற்பது நாட்கள் இரவும் பகலும் நோன்பிருக்க சென்றபோது அலகையினால் மூன்று முறை சோதிக்கப்பட்டார். ஒவ்வொரு முறையும் இயேசு தனது சோதனையை சாதனையாக்கி அதிலே வெற்றி கொண்டார். இறைவனின் மீட்பு திட்டத்தில் தன் உயிரைத் தந்து நம் ஒவ்வொருவருக்கும் மீட்பை தந்தார்.

இயேசுவின் மூன்று சோதனைகள்

1. கற்கள் அப்பமாகும்படிக் கட்டளையிடும். (மத் 4:3)

நாற்பது நாட்கள் உண்ணாமல் நோன்பிருந்த இயேசுவுக்கு முதல் சோதனை அடிப்படை தேவையான உணவு சார்ந்ததாகும். இது அவரின் மனிதச் சாயலில் உடல் சார்ந்த தேவையாகவும் மற்றும் பொருள் வகை சார்ந்த சோதனையாகவும் கருதப்படுகிறது. இச்சோதனை நாம் நம் உடல், உணவு மற்றும் உடமை சார்ந்தவற்றை எவ்வாறு சந்திக்கின்றோம் என சிந்திக்க அழைப்பு தருகிறது.

2. நீர் இறைமகன் என்றால் கீழே குதியும். (மத் 4:6)

இது இயேசுவின் இறைச்சாயலை கேள்விக்குறியாக்கும் சோதனையாகும். தன் சுயஅடையாளத்தை வெளிப்படுத்த மற்றும் புதுமைகள் செய்து மக்களை மயக்க எழும் சோதனையாகும். இச்சோதனை சுயநலத்தோடு சுயஅடையாளத்தை வெளிப்படுத்துகிறவர்களாக அல்லாது, பொதுநலத்தோடு வாழ்வதற்கும் மற்றும் நம்மில் எழும் சோதனைகளை சந்திக்க அழைப்பு தருகிறது.

3. என்னை வணங்கும் (மத் 4:9)

இயேசுவின் மூன்றாவது சோதனை பதவி ஆசையை தூண்டும் வகையில் அமைகின்றது. மேலும் இது ஒரு ஆன்மீக சோதனை அதாவது நம் நம்பிக்கைக்கு எதிராக சந்திக்கும் சவால்களை எதிர்கொள்ள அழைப்பு தருகிறது.

புத்தர் சொல்வதைப் போல் நம்முடைய ஆசையே எல்லா துன்பத்திற்கும் அதாவது சோதனைக்கும் காரணம். இன்றைக்கு நம்முடைய வாழ்க்கையில் ஊடகங்களின் வழியாக, குறிப்பாக இணைய வர்த்தகத்தின் வழியாக, காட்சிப்படுத்துதலின் வழியாக நம்மை கவர்ந்திழுத்து, ஆசைக்குள்ளாக்கி அதாவது சோதனைக்கு உட்படுத்தி கொண்டிருக்கிறது இன்றைய நவநாகரீக உலகம். வாங்கும் சம்பளம் அனைத்தும் நொடிப்பொழுதில் செலவு செய்ய வரும் அழைப்புகள், ஆசையான வார்த்தைகள், கவர்ச்சியான உடைகள், சொக்க வைத்து அடிமைப்படுத்தும் போதைப் பொருட்களும் மற்றும் மதுவும் என எல்லாமே நமக்கு சோதனைதான். நம் வாழ்வில் நாம் எதிர்கொள்ளும் சோதனைகள் நம்மை சுய ஆய்வுக்கு உட்படுத்த உதவுகிறது, அதாவது நம் நிலையை அறிய உதவுகிறது மற்றும் இறை நம்பிக்கையில் நம்மை வளர்க்கிறது என்பதை உணர்ந்து சோதனைகளை சாதனையாக்குவோம். இறைவன் ஒவ்வொருவரையும் ஆசீர்வதிப்பார்.

விவிலிய விதைகள் - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலத்தின் 7-ஆம் ஞாயிறு - (ஆண்டு- A)- 19-02-2023- ஞாயிற்றுக்கிழமை

 

🌱விவிலிய விதைகள்🌱

பொதுக்காலத்தின் 7-ஆம் ஞாயிறு

தமிழ் திருவழிபாட்டு மறையுரை

(19 பிப்ரவரி  2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: லேவியர் 19: 1-2, 17-18

இரண்டாம் வாசகம்: 1 கொரிந்தியர் 3: 16-23

நற்செய்தி: மத்தேயு 5: 38-48

தீமைக்கு நன்மை...

1998- ஆம் ஆண்டு டாடா மோட்டார்ஸ் நிறுவனம் டாடா இண்டிகா என்னும் தங்களுடைய முதல் பயணிகள் காரை அறிமுகம் செய்தார்கள். ஆனால் இதில் பல குறைபாடுகளை கண்டு பலரும் இந்த காருக்கு பெரும் வரவேற்பை தரவில்லை. இதனால் இந்த நிறுவனம் பெரும் பொருளாதார இழப்பை சந்தித்தது ஒரு கட்டத்தில் டாடா மோட்டார்ஸ் நிறுவனத்தை விற்று விடலாம் என முடிவு செய்து, அமெரிக்காவின் ஃபோர்டு நிறுவனத்திடம் பேச்சுவார்த்தையில் ஈடுபட்டார்கள். ஆனால் அந்நிறுவனத்தின் தலைவர் பில்ஃபோர்டு 'ஒரு காரை முறையாக வடிவமைக்க தெரியாதவர்களுக்கெல்லாம் எதற்கு கார் தயாரிக்கும் நிறுவனம்' என்று அவர்களை அவமானப்படுத்தினார். அங்கிருந்த டாட்டா மோட்டார்ஸ் உரிமையாளர் ரத்தன் டாடா இதைத்தான் விற்கப்போவதில்லை என்று முடிவு எடுத்து அந்த காரில் இருந்த அனைத்து குறைகளையும் நிவர்த்தி செய்து சில ஆண்டுகளிலே மினி டாடா இண்டிகா என்னும் மற்றொரு காரை வடிவமைத்து வெளியிட்டார். இது இந்தியாவில் மட்டுமல்லாது உலகெங்கும் பெரும் வரவேற்பை பெற்றது. 2008 ஆம் ஆண்டு அமெரிக்க நாடுகள் கடும் பொருளாதார வீழ்ச்சியை சந்தித்தபோது அமெரிக்காவின் ஃபோர்டு நிறுவனமும் பாதிப்புக்குள்ளானது. எனவே அந்நிறுவனம் தங்களது விலை மதிப்புள்ள கார் நிறுவனங்களான Jaquar மற்றும் Lan Rover -யை விற்க முடிவு செய்தது. ஆனால் அதை யாருமே வாங்குவதற்கு முன் வரவில்லை. அச்சூழலில் அந்நிறுவனங்களை வாங்கி ஃபோர்டு நிறுவனத்திற்கு மாபெரும் உதவியாக இருந்தது டாடா மோட்டார்ஸ் உரிமையாளர் ரத்தன் டாடா. தன்னையும் தன்னுடைய நிறுவனத்தையும் அவமானப்படுத்தி தனக்கு தீமை செய்தவருக்கு நன்மை செய்த ரத்தன் டாடாவை போல நாமும் நம்முடைய வாழ்க்கையில் தீமை செய்தவருக்கு தீமையை அல்லாது நன்மையை செய்ய அழைப்பு கொடுக்கிறது என்று நாம் அடி எடுத்து வைத்துள்ள பொதுக்காலத்தின் ஏழாவது ஞாயிற்றுக்கிழமை திருவழிபாட்டு வாசகங்கள்.

1. தீமைக்கு தீமை:-

"முள்ளை முள்ளால் எடுக்க வேண்டும்" என்னும் பழமொழிக்கு ஏற்ப பழைய ஏற்பாட்டில் 'கண்ணுக்கு கண் பல்லுக்கு பல்' என பல சட்டங்கள் இருந்தது. விவிலியம் இத்தகைய சட்டங்களை எடுத்துரைக்கலாமா? பழிவாங்குதல் சரியா? ஏன் மோசே இத்தகைய சட்டங்களை தர வேண்டும்? என நம்மில் பல கேள்விகள் எழலாம். மோசே வாழ்ந்த காலத்திலிருந்த மக்கள் கொடூரமான சட்டத்தினை செயல்படுத்தி வந்தனர். அதன்படி ஒருவர் மற்றொருவரின் கையை வெட்டினால் கூட பதிலுக்கு அவனுடைய உயிரை எடுக்கக்கூடிய பழக்கம் இருந்தது. இந்த பின்னணியில்தான் மோசே "உயிருக்கு உயிர்,கண்ணுக்குக் கண்; பல்லுக்குப் பல்; கைக்குக் கை; காலுக்குக் கால்;சூட்டுக்குச் சூடு; காயத்துக்கு காயம்; கீறலுக்குக் கீறல் என நீ ஈடுகொடுப்பாய்."(விடுதலைப் பயணம் 21:23-25) மற்றும் (லேவியர் 24:20 & இணைச் சட்டம் 19:21) என்னும் சட்டத்தை தருகிறார். உண்மையில் இங்கு தீமைக்கு தீமை என்பது பழிவாங்குதலையும் வன்முறையையும் கட்டுப்படுத்துவதே ஆகும். இதைத்தான் இன்றைய நற்செய்தியில் இயேசு "‘கண்ணுக்குக் கண்’, ‘பல்லுக்குப் பல்’ என்று கூறப்பட்டிருப்பதைக் கேள்விப்பட்டிருக்கிறீர்கள்." (மத்தேயு 5:38) என சுட்டிக்காட்டி தீமைக்கு தீமை என்பதை மாற்றி தீமைக்கு நன்மை என்னும் அன்பின் கட்டளையை தருகிறார்.

2. தீமைக்கு நன்மை:-

இன்னா செய்தாரை ஒறுத்தல் அவர்நாண

நன்னயம் செய்து விடல்.

அதாவது நமக்கு தீமை செய்தவர் வெட்கப்படும் அளவுக்கு நாம் அவருக்கு நன்மையைச் செய்வதுடன் அவர் செய்த தீமையையும் தாம் செய்த நன்மையையும் மறந்து விடுதலே தமக்குத் தீங்கு செய்தாரைத் தண்டிக்கும் சிறந்த முறை என்கிறது வள்ளுவரின் குறள். இன்றைய இறைவார்த்தை வழிபாடும் கிறிஸ்தவர்களாகிய நாம் ஒவ்வொருவரும் தீமைக்கு நன்மை என்னும் அன்பின் கட்டளையை ஏற்று வாழ அழைப்பு தருகிறது. இன்றைய முதல் வாசகம் "பழிக்குப் பழியென உன் இனத்தார்மேல் காழ்ப்புக் கொள்ளாதே. உன் மீது நீ அன்புகூர்வதுபோல் உனக்கு அடுத்திருப்பவர் மீதும் அன்பு கூர்வாயாக! (லேவியர் 19:18) என்று கூறுகிறது. ஒரு யூதனுக்கு இன்னொரு யூதன்தான் அடுத்திருப்பவர், எனவே யூதர்களுக்கு மற்றொரு யூதனை அன்பு செய்தாலே போதும். அதனால்தான் இன்றைய நற்செய்தியில் இயேசு "தீமை செய்பவரை எதிர்க்க வேண்டாம்." (மத்தேயு 5:39a) மற்றும் "உங்கள் பகைவரிடமும் அன்பு கூருங்கள்." (மத்தேயு 5:44a) என தீமைக்கு தீமை என்னும் பழிவாங்குதல் குணத்தை மாற்றி தீமைக்கு நன்மை என அடுத்திருப்பவரை மட்டுமல்லாது பகைவரையும் அன்பு செய்கின்ற குணத்தை நம்மில் வளர்த்துக் கொள்ள அழைப்பு தருகிறார். இதைத்தான் திருத்தூதர் பவுல் "தீமைக்குப் பதில் தீமை செய்யாதீர்கள்; எல்லா மனிதரும் நலமெனக் கருதுபவை பற்றியே எண்ணுங்கள்." (உரோமையர் 12:17) என்கிறார். பகைவரை அன்பு செய்ய இன்றைய நற்செய்தியில் இயேசு நான்கு செயல்பாடுகளை எடுத்துக்காட்டாக தருகிறார்.

a)- உடல் வலியை ஏற்றுக்கொள்ளுதல்

"உங்களை வலக் கன்னத்தில் அறைபவருக்கு மறுகன்னத்தையும் திருப்பிக் காட்டுங்கள்." (மத்தேயு 5:39b) இது நம் உடலுக்கு வலியை கொடுத்தவருக்கு பதிலுக்கு வலியை தராமல், அவருக்கு மறு கன்னத்தையும் காட்டி அதாவது உடல் வலியை ஏற்று பகைவரை அன்பு செய்து வாழ அழைப்பு பெறுவதாகும்.

b)- உடை இழப்பை ஏற்றுக்கொள்ளுதல்

"ஒருவர் உங்களுக்கு எதிராக வழக்குத் தொடுத்து, உங்கள் அங்கியை எடுத்துக்கொள்ள விரும்பினால் உங்கள் மேலுடையையும் அவர் எடுத்துக் கொள்ள விட்டு விடுங்கள்." (மத்தேயு 5:40) இங்கு உங்கள் உடையை அபகரித்து தீங்கு செய்ய நினைப்பவரிடம் உடை இழப்பை ஏற்றுக்கொண்டு பகை நினைத்தவரை அன்பு செய்து வாழ அழைப்பு பெறுவதாகும்.

c)- கட்டாய வலியை ஏற்றுக்கொள்ளுதல்

"எவராவது உங்களை ஒரு கல் தொலை வரக் கட்டாயப்படுத்தினால் அவரோடு இரு கல் தொலை செல்லுங்கள்." (மத்தேயு 5:41) இங்கு ஒரு கல் தொலைவு நடப்பதே நம்மை கட்டாயப்படுத்தி தருகின்ற வலியாகும். ஆனால் இறைமகன் இயேசு கிறிஸ்து அவ்வலியை ஏற்று அவரோடு இன்னொரு கல் தொலை நடந்து தீமைக்கு நன்மை செய்வதற்கு அழைப்பு தருகிறார்.

d)- இறைவனிடம் மன்றாடுங்கள்

தீமைக்கு நன்மை என்பதற்கு மற்றொரு செயல் வடிவமாக "உங்களைத் துன்புறுத்துவோருக்காக இறைவனிடம் வேண்டுங்கள்." (மத்தேயு 5:44b) என்னும் மிக உயர்ந்த செயல்பாட்டு அழைப்பை தருகிறார் இயேசு.

தீமைக்கு நன்மை என பகைவரை அன்பு செய்வதன் மூலம் நமது வாழ்வு மாறுபடுகிறது. இங்கு எண்ணற்ற நன்மைகளை கிறிஸ்தவர்களாகிய நாம் ஒவ்வொருவரும் சுவைப்போம்.

i)- நல்ல ஆரோக்கியம்

முதலாவதாக நாம் நமக்கு தீங்கு செய்தவரை மன்னித்து அன்பு செய்வதன் மூலமாக நல்ல உடல் ஆரோக்கியத்தை பெறுகிறோம். இன்றைக்கு மனிதரின் அதிகமான நோய்களுக்கு 92% காரணமாக அமைவது Psychosomatic என்னும் அவர்களுடைய மனநலம் பாதிக்கப்படுவதே என்கின்றனர் உளவியலாளர்கள். பழிவாங்குதலும் பகையுணர்வும் நம் மன நலத்தை பாதித்து உடல் நலத்தையும் கெடுக்கும். எனவே இன்றைக்கு நம்முடைய வாழ்வில் நமக்கு தீங்கு செய்தவர்களை மன்னித்து அன்பு செய்வதன் மூலமாக நாம் நல்ல உடல் ஆரோக்கியத்தோடு வாழலாம்.

ii)- இறைவனின் திருமுகம்

இரண்டாவதாக நாம் நம் பகைவர்களை மன்னித்து தீமைக்கு நன்மை என்னும் அன்பை காட்டுகின்ற போது இறைவனின் திருமுகத்தைப் பெறுகின்றோம். இங்கு இறைவனின் திருமுகம் என்பது அன்பையும் பாசத்தையும் இரக்கத்தையும் அமைதியையும் தன்னகத்தே கொண்டிருக்கின்ற முகமாகும். பழைய ஏற்பாட்டில் தன் தந்தையிடமிருந்து ஆசீரை ஏமாற்றி வாங்கிய தன் சகோதரன் யாக்கோபுவை ஏசா மன்னித்து அன்பை காட்டினார். அதனால் தான் யாக்கோபு ஏசாவை பார்த்து, "உமது முகத்தைக் காண்பது கடவுளின் முகத்தைக் காண்பதுபோல் இருக்கிறது." (தொடக்க நூல் 33:10) என்கிறார். அதேபோல ஸ்தேவான் தான் இறக்கும் தருவாயிலும் முழந்தாள்படியிட்டு உரத்த குரலில், “ஆண்டவரே, இந்தப் பாவத்தை இவர்கள் மேல் சுமத்தாதேயும்” என்று சொல்லி உயிர்விட்டார். (திருத்தூதர் பணிகள் 7:60) தன்னை கொன்றவர்களையும் மன்னித்து அவர்களுக்காக இறைவனிடம் வேண்டிய ஸ்தேவான் இறை முகத்தை கொண்டிருந்தார். அதனால் தான் "தலைமைச் சங்கத்தில் அமர்ந்திருந்த அனைவரும் அவரை உற்றுப் பார்த்தபோது அவரது முகம் வானதூதரின் முகம்போல் இருக்கக் கண்டனர்." (திருத்தூதர் பணிகள் 6:15) இங்கு தீமைக்கு நன்மை என்னும் குணம் இறைவனின் திருமுகத்தை ஏசாவுக்கும் ஸ்தேவானுக்கும் தந்தது.

iii)- இறைவனின் பிள்ளை

"கடவுள் தம் உருவில் மானிடரைப் படைத்தார்." (தொடக்க நூல் 1:27) என்னும் இறைவார்த்தையின் அடித்தளத்தில் இறைச்சாயலாக படைக்கப்பட்ட நாம் ஒவ்வொருவரும் இறைவனின் பிள்ளைகள் என்னும் முழுமையான உரிமையை பெற அவர் வழியில் நடக்க வேண்டும். இறைமகன் இயேசு, “தந்தையே, இவர்களை மன்னியும். ஏனெனில் தாங்கள் செய்வது என்னவென்று இவர்களுக்குத் தெரியவில்லை” என்று சொன்னார். (லூக்கா 23:34) தீமைக்கு நன்மையை செய்தார், அவர் வழியில் வாழும் கிறிஸ்தவர்களாகிய நாம் இயேசுவின் பிள்ளைகளாக அவரைப் போல் பகைவரையும் அன்பு செய்து தீமைக்கு நன்மை செய்பவர்களாக மாறுவோம்.

"பழி வாங்கினால் எதிரிக்கு நிகராவோம். அலட்சியம் செய்தால் எதிரியைவிட உயர்ந்தவராவோம்." என தாமஸ் புல்லரும் "பழிவாங்குதல் என்பது மனிதப் பண்புக்கு விரோதமானதோர் மொழியாகும்." என ஸெனீக்காவும் எடுத்துரைத்த கூற்றுக்கு ஏற்ப இன்றைக்கு நமக்கு எதிராக தீமை செய்த ஒவ்வொருவரையும் குறிப்பாக நம் குடும்பத்தாரையும் மற்றும் உறவினர்களையும் எதிரிகளாக நினைக்காமல் யாவரையும் அன்பு செய்து அவர்களுக்காக ஜெபித்து தீமைக்கு நன்மை செய்யும் உயர்ந்த குணத்தில் வளர்வோம். இறைவன் ஒவ்வொருவரையும் ஆசீர்வதிப்பார்.