🌱விவிலிய விதைகள்🌱
கிறிஸ்துவின் திருவுடல் திருஇரத்த பெருவிழா
தமிழ் திருவழிபாட்டு மறையுரை
கிறிஸ்துவின் திருவுடல் திருஇரத்தம்
ஒரு அன்பின் உடன்படிக்கை
தாயாம் திருஅவையானது இன்று கிறிஸ்துவின் திருவுடல் திருஇரத்த பெருவிழாவை கொண்டாடி மகிழ்கின்றது. கிறிஸ்துவின் திருவுடலும், திருஇரத்தமும் இயேசு தன் சீடர்களுக்கு அளித்த அன்பின் உடன்படிக்கையாகும். இந்த அன்பின் உடன்படிக்கையை பின்பற்றி அவர் அன்பில் இணைந்திருக்க இவ்விழா நமக்கு அழைப்பு தருகிறது.
எகிப்தில் அடிமைத்தனத்திலிருந்து தம் மக்களான இஸ்ராயேலை விடுவித்த போது இறைவன் சீனாய் மலையில் ஏற்படுத்தியது பழைய உடன்படிக்கை. பாவத்தின் அடிமைத்தனத்திலிருந்து நம்மை விடுவிக்க நிலை வாழ்வை தரும் வாக்குறுதியை குறிப்பிட இயேசுவின் இந்த புதிய உடன்படிக்கை. திருப்பலியில் அர்ப்பணிக்கப்படும் கோதுமை அப்பமும், திராட்சை இரசமும் கிறிஸ்துவின் உண்மையான உடலும் இரத்தமுமாக நம் வாழ்வில் இறைவனோடு புதிய உடன்படிக்கையாகுகிறது. "கோதுமை அப்பம் எடுக்கப்படுகிறது, ஆசீர்வதிக்கப்படுகிறது மற்றும் உடைக்கப்படுகிறது". இந்த மூன்று செயல்களிலும் கிறிஸ்து திருஅவையின் வாழ்வில் நிரப்பப்படுகின்றார் மற்றும் புதிய உடன்படிக்கையை ஏற்படுத்துகின்றார்.
உடன்படிக்கை என்பது இரு தரப்பினருக்கும் இடையிலான ஒரு உறுதியான ஒப்பந்தமாகும், இது ஒருவரின் கடமைகள் மற்றும் நன்மைகளை விவரிக்கிறது. கடவுளுக்கும் அவருடைய மக்களுக்கும் இடையிலான உடன்படிக்கைகளை விவிலியம் நமக்கு எடுத்தியம்புகிறது. முதலாவது நோவாவுடன் இருந்தது, அவரையும், அவரது குடும்பத்தினரையும் பேழையில் நுழைத்து வெள்ளத்தின் நீரிலிருந்து காப்பாற்றும்படி அழைத்தார். "உன்னுடனோ, என் உடன்படிக்கையை நிலைநாட்டுவேன். உன் புதல்வர், உன் மனைவி, உன் புதல்வரின் மனைவியர் ஆகியோருடன் நீ பேழைக்குள் செல்."(தொடக்க நூல் 6:18) அடுத்த உடன்படிக்கை தொடக்க நூல். 12: 1–9-ல் விவரிக்கப்பட்டுள்ளபடி ஆபிரகாமுடன்; 15: 1–21; 17: 1–27. அப்பொழுது ஆண்டவர் ஆபிராமை வெளியே அழைத்து வந்து, “வானத்தை நிமிர்ந்து பார். முடியுமானால், விண்மீன்களை எண்ணிப்பார். இவற்றைப் போலவே உன் வழிமரபினரும் இருப்பர்” என்றார்.(தொடக்க நூல் 15:5). விருத்தசேதனம் என்பது இவ்வுடன்படிக்கையின் அடையாளமாக இருந்தது. ஈசாக்கு மற்றும் யாக்கோபுடனான உடன்படிக்கையை கடவுள் புதுப்பித்தார். (தொடக்க நூல் 26: 1–5; 28; 10–22).
கடவுளுக்கும் அவருடைய மக்களுக்கும் இடையில் சீனாய் மலை மீது ஏற்படுத்தப்பட்ட உடன்படிக்கை குறிப்பாக முக்கியமானது. (விடுதலைபயணம்.19) மலையில் இறைவன் மோசேயின் வழியாய் தன் மக்களுக்கு பத்து கட்டளைகளை தந்து உடன்படிக்கை செய்து கொண்டார். மோசே இரத்தத்தை எடுத்து மக்கள்மேல் தெளித்து, “இவ்வனைத்து வார்த்தைக்குமிணங்க, ஆண்டவர் உங்களோடு செய்துள்ள உடன்படிக்கையின் இரத்தம் இதோ” என்றார் (விடுதலைப் பயணம் 24:8). இந்த இரத்தம் தெளிப்பது கடவுளுக்கும் அவருடைய மக்களுக்கும் இடையிலான உடன்படிக்கையை குறிக்கிறது; அவர்கள் 'இரத்த சகோதர சகோதரிகள்' ஆனார்கள். கடவுள் தம் மக்களை எகிப்திலிருந்து மீட்பதன் மூலம் தனது அன்பைக் காட்டினார். ஒரு 'புதிய உடன்படிக்கை' இருக்கும் என்று கடவுள் வாக்குறுதி அளித்தார்.
இதோ, நாள்கள் வருகின்றன. அப்பொழுது நான் இஸ்ரயேல் வீட்டாரோடும் யூதாவின் வீட்டாரோடும் புதிய உடன்படிக்கை ஒன்றைச் செய்து கொள்வேன், என்கிறார் ஆண்டவர். அவர்களுடைய மூதாதையரை எகிப்து நாட்டினின்று விடுவிப்பதற்காக, அவர்களை நான் கைப்பிடித்து நடத்தி வந்தபொழுது அவர்களோடு செய்து கொண்ட உடன்படிக்கையைப் போன்று இது இராது. நான் அவர்களின் தலைவராய் இருந்தும், என் உடன்படிக்கையை அவர்கள் மீறி விட்டார்கள், என்கிறார் ஆண்டவர்.அந்நாள்களுக்குப் பிறகு, இஸ்ரயேல் வீட்டாரோடு நான் செய்யவிருக்கும் உடன்படிக்கை இதுவே; என் சட்டத்தை அவர்கள் உள்ளத்தில் பதிப்பேன்; அதை அவர்களது இதயத்தில் எழுதி வைப்பேன். நான் அவர்களின் கடவுளாய் இருப்பேன்; அவர்கள் என் மக்களாய் இருப்பார்கள், என்கிறார் ஆண்டவர் (எரேமியா 31:31,32,33). இயேசு தம்முடைய இரத்தத்தை சிலுவையில் சிந்தியபோது இந்த புதிய உடன்படிக்கை நடைமுறைக்கு வந்தது. அவர் கடைசி இராவுணவில் இதை முன்னறிவித்தார், அப்படியே உணவு அருந்திய பின்பு அவர் கிண்ணத்தை எடுத்து, “இந்தக் கிண்ணம் உங்களுக்காகச் சிந்தப்படுகிற எனது இரத்தத்தால் நிலைப்படுத்தப்படும் புதிய உடன்படிக்கை (லூக்கா 22:20). இந்த புதிய உடன்படிக்கையில் இயேசுவின் இரத்தம் சிந்தப்படுகிறது, இயேசு தம் மக்களுக்கு மீட்பு தருகின்றார்.
அன்பின் அடையாளம் :-
நற்கருணை ஆன்மீகம் என்பது அன்பின் ஆன்மீகம். இது இறை அன்பின் நிமித்தமாக நமக்கு வழங்கப்பட்டது. நற்கருணையில், கடவுள் நம்மீது தனது அன்பைக் காட்டுகிறார். கடவுள் நம்மை மிகவும் நேசிக்கிறார். அவர் தன் உடலாலும் மற்றும் இரத்தத்தாலும் தம்மை நம்மோடு இணைத்து, நாம் அவருடன் இணைந்திருக்க வேண்டும் என்று விரும்புகிறார். அவர் நம் வாழ்வாகவே இருக்க விரும்புகிறார். இயேசுவின் உடலையும் இரத்தத்தையும் பெறுவது கிறிஸ்துவுடன் நம்மை இணைக்கக்கூடிய சிறந்த வழிகளில் ஒன்றாகும். நற்கருணை இயேசுவைப் பெறுவதில், நாம் அணைத்தையும் பெறுகிறோம்; அவருடைய உடல், இரத்தம், ஆன்மா மற்றும் புனிதத்தன்மை. நாம் அவரைப் பெறும்போது இயேசு உண்மையிலேயே நமக்குள் உயிரோடு பிரசன்னமாகிறார். இயேசு தன்னை இறைமகனாக வெளிப்படுத்தவும், நிலைவாழ்வின் வழியை நமக்கு காட்டவும், என்றும் அவர் இறைபிரசன்னத்தை நம்முடன் இருக்கச் செய்யவும், தனது அன்பை முழுமையாக நற்கருணையில் வெளிப்படுத்துகின்றார். இயேசு தன் சீடர்களிடம், “இதை என் நினைவாகச் செய்யுங்கள்” (லூக்கா 22:19) என்று சொல்லும் போது தன் அன்பை பிறரோடு பகிர்ந்து வாழ அழைப்பு தருகின்றார். நம் வாழ்வில் ஒவ்வொரு நாளும் இந்த அன்பை பிறரோடு காட்ட நாம் அவரை நம் உள்ளங்களில் ஏற்றுக்கொள்ள வேண்டும். கடவுள் மீதான நம் அன்பை நற்கருணையில் காட்டுவோம். நற்கருணை இயேசுவைப் பெறுவதற்கு நம்முடைய உள்ளத்தை தயார் செய்வதன் மூலம் அவர்மீது வைத்திருக்கும் அன்பைக் காண்பிப்போம்.
ஒவ்வொரு முறையும் நற்கருணையில் நாம் இயேசுவின் உடலையும் இரத்தத்தையும் எடுத்துக் கொள்ளும்போது, இறைவனுடனான உடன்படிக்கையை புதுப்பித்துக்கொண்டிருக்கிறோம், இயேசுவைப் பின்பற்றுவதற்கான பொறுப்பை நம்முடைய திறனுக்கு ஏற்றவாறு ஏற்றுக்கொள்கிறோம். இது இதயங்களில் எழுதப்பட்ட உடன்படிக்கை, அன்பின் உடன்படிக்கை. ஒவ்வொரு முறையும் நாம் திருப்பலியில் கலந்து கொள்ளும்போது, இறைவார்த்தைகளைக் கேட்கிறோம். இந்தக் கிண்ணம் உங்களுக்காகச் சிந்தப்படுகின்ற எனது இரத்தத்தால் நிலைப்படுத்தப்படும் புதிய உடன்படிக்கை, இது உங்களுக்காகவும் பலருக்கும், பாவ மன்னிப்புக்காகவும் ஊற்றப்படும். இயேசுவின் பலியில் அப்பத்தையும் கிண்ணத்தையும் பருகுவது இயேசு தம்முடைய இரத்தத்தை சிலுவையிலிருந்து நமக்கு தருவது ஒரு புதிய நினைவூட்டலாகும். இறைவன் தன் மகன் இயேசுவின் மூலமாக தனது உடன்படிக்கையை புதுப்பிக்கிறார் என்பதை நன்கு அறிந்த பின்னர், நாம் எவ்வாறு நமது உடன்படிக்கையில் வளர்கின்றோம் என்பதைப் பற்றி சிந்திக்க வேண்டும். இது இதயத்திலிருந்து அவர் நமக்காக தரும் உடன்படிக்கையின் உணவு. இதை உணர்ந்து, ஏற்று அன்பின் உடன்படிக்கையில் நாளும் நிலைத்திருப்போம்.
அருட்பணி. அ.குழந்தை யேசு ராஜன் CMF
கும்பகோணம்.
