விவிலிய விதைகள் - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலத்தின் 7-ஆம் ஞாயிறு - (ஆண்டு- A)- 19-02-2023- ஞாயிற்றுக்கிழமை

 

🌱விவிலிய விதைகள்🌱

பொதுக்காலத்தின் 7-ஆம் ஞாயிறு

தமிழ் திருவழிபாட்டு மறையுரை

(19 பிப்ரவரி  2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: லேவியர் 19: 1-2, 17-18

இரண்டாம் வாசகம்: 1 கொரிந்தியர் 3: 16-23

நற்செய்தி: மத்தேயு 5: 38-48

தீமைக்கு நன்மை...

1998- ஆம் ஆண்டு டாடா மோட்டார்ஸ் நிறுவனம் டாடா இண்டிகா என்னும் தங்களுடைய முதல் பயணிகள் காரை அறிமுகம் செய்தார்கள். ஆனால் இதில் பல குறைபாடுகளை கண்டு பலரும் இந்த காருக்கு பெரும் வரவேற்பை தரவில்லை. இதனால் இந்த நிறுவனம் பெரும் பொருளாதார இழப்பை சந்தித்தது ஒரு கட்டத்தில் டாடா மோட்டார்ஸ் நிறுவனத்தை விற்று விடலாம் என முடிவு செய்து, அமெரிக்காவின் ஃபோர்டு நிறுவனத்திடம் பேச்சுவார்த்தையில் ஈடுபட்டார்கள். ஆனால் அந்நிறுவனத்தின் தலைவர் பில்ஃபோர்டு 'ஒரு காரை முறையாக வடிவமைக்க தெரியாதவர்களுக்கெல்லாம் எதற்கு கார் தயாரிக்கும் நிறுவனம்' என்று அவர்களை அவமானப்படுத்தினார். அங்கிருந்த டாட்டா மோட்டார்ஸ் உரிமையாளர் ரத்தன் டாடா இதைத்தான் விற்கப்போவதில்லை என்று முடிவு எடுத்து அந்த காரில் இருந்த அனைத்து குறைகளையும் நிவர்த்தி செய்து சில ஆண்டுகளிலே மினி டாடா இண்டிகா என்னும் மற்றொரு காரை வடிவமைத்து வெளியிட்டார். இது இந்தியாவில் மட்டுமல்லாது உலகெங்கும் பெரும் வரவேற்பை பெற்றது. 2008 ஆம் ஆண்டு அமெரிக்க நாடுகள் கடும் பொருளாதார வீழ்ச்சியை சந்தித்தபோது அமெரிக்காவின் ஃபோர்டு நிறுவனமும் பாதிப்புக்குள்ளானது. எனவே அந்நிறுவனம் தங்களது விலை மதிப்புள்ள கார் நிறுவனங்களான Jaquar மற்றும் Lan Rover -யை விற்க முடிவு செய்தது. ஆனால் அதை யாருமே வாங்குவதற்கு முன் வரவில்லை. அச்சூழலில் அந்நிறுவனங்களை வாங்கி ஃபோர்டு நிறுவனத்திற்கு மாபெரும் உதவியாக இருந்தது டாடா மோட்டார்ஸ் உரிமையாளர் ரத்தன் டாடா. தன்னையும் தன்னுடைய நிறுவனத்தையும் அவமானப்படுத்தி தனக்கு தீமை செய்தவருக்கு நன்மை செய்த ரத்தன் டாடாவை போல நாமும் நம்முடைய வாழ்க்கையில் தீமை செய்தவருக்கு தீமையை அல்லாது நன்மையை செய்ய அழைப்பு கொடுக்கிறது என்று நாம் அடி எடுத்து வைத்துள்ள பொதுக்காலத்தின் ஏழாவது ஞாயிற்றுக்கிழமை திருவழிபாட்டு வாசகங்கள்.

1. தீமைக்கு தீமை:-

"முள்ளை முள்ளால் எடுக்க வேண்டும்" என்னும் பழமொழிக்கு ஏற்ப பழைய ஏற்பாட்டில் 'கண்ணுக்கு கண் பல்லுக்கு பல்' என பல சட்டங்கள் இருந்தது. விவிலியம் இத்தகைய சட்டங்களை எடுத்துரைக்கலாமா? பழிவாங்குதல் சரியா? ஏன் மோசே இத்தகைய சட்டங்களை தர வேண்டும்? என நம்மில் பல கேள்விகள் எழலாம். மோசே வாழ்ந்த காலத்திலிருந்த மக்கள் கொடூரமான சட்டத்தினை செயல்படுத்தி வந்தனர். அதன்படி ஒருவர் மற்றொருவரின் கையை வெட்டினால் கூட பதிலுக்கு அவனுடைய உயிரை எடுக்கக்கூடிய பழக்கம் இருந்தது. இந்த பின்னணியில்தான் மோசே "உயிருக்கு உயிர்,கண்ணுக்குக் கண்; பல்லுக்குப் பல்; கைக்குக் கை; காலுக்குக் கால்;சூட்டுக்குச் சூடு; காயத்துக்கு காயம்; கீறலுக்குக் கீறல் என நீ ஈடுகொடுப்பாய்."(விடுதலைப் பயணம் 21:23-25) மற்றும் (லேவியர் 24:20 & இணைச் சட்டம் 19:21) என்னும் சட்டத்தை தருகிறார். உண்மையில் இங்கு தீமைக்கு தீமை என்பது பழிவாங்குதலையும் வன்முறையையும் கட்டுப்படுத்துவதே ஆகும். இதைத்தான் இன்றைய நற்செய்தியில் இயேசு "‘கண்ணுக்குக் கண்’, ‘பல்லுக்குப் பல்’ என்று கூறப்பட்டிருப்பதைக் கேள்விப்பட்டிருக்கிறீர்கள்." (மத்தேயு 5:38) என சுட்டிக்காட்டி தீமைக்கு தீமை என்பதை மாற்றி தீமைக்கு நன்மை என்னும் அன்பின் கட்டளையை தருகிறார்.

2. தீமைக்கு நன்மை:-

இன்னா செய்தாரை ஒறுத்தல் அவர்நாண

நன்னயம் செய்து விடல்.

அதாவது நமக்கு தீமை செய்தவர் வெட்கப்படும் அளவுக்கு நாம் அவருக்கு நன்மையைச் செய்வதுடன் அவர் செய்த தீமையையும் தாம் செய்த நன்மையையும் மறந்து விடுதலே தமக்குத் தீங்கு செய்தாரைத் தண்டிக்கும் சிறந்த முறை என்கிறது வள்ளுவரின் குறள். இன்றைய இறைவார்த்தை வழிபாடும் கிறிஸ்தவர்களாகிய நாம் ஒவ்வொருவரும் தீமைக்கு நன்மை என்னும் அன்பின் கட்டளையை ஏற்று வாழ அழைப்பு தருகிறது. இன்றைய முதல் வாசகம் "பழிக்குப் பழியென உன் இனத்தார்மேல் காழ்ப்புக் கொள்ளாதே. உன் மீது நீ அன்புகூர்வதுபோல் உனக்கு அடுத்திருப்பவர் மீதும் அன்பு கூர்வாயாக! (லேவியர் 19:18) என்று கூறுகிறது. ஒரு யூதனுக்கு இன்னொரு யூதன்தான் அடுத்திருப்பவர், எனவே யூதர்களுக்கு மற்றொரு யூதனை அன்பு செய்தாலே போதும். அதனால்தான் இன்றைய நற்செய்தியில் இயேசு "தீமை செய்பவரை எதிர்க்க வேண்டாம்." (மத்தேயு 5:39a) மற்றும் "உங்கள் பகைவரிடமும் அன்பு கூருங்கள்." (மத்தேயு 5:44a) என தீமைக்கு தீமை என்னும் பழிவாங்குதல் குணத்தை மாற்றி தீமைக்கு நன்மை என அடுத்திருப்பவரை மட்டுமல்லாது பகைவரையும் அன்பு செய்கின்ற குணத்தை நம்மில் வளர்த்துக் கொள்ள அழைப்பு தருகிறார். இதைத்தான் திருத்தூதர் பவுல் "தீமைக்குப் பதில் தீமை செய்யாதீர்கள்; எல்லா மனிதரும் நலமெனக் கருதுபவை பற்றியே எண்ணுங்கள்." (உரோமையர் 12:17) என்கிறார். பகைவரை அன்பு செய்ய இன்றைய நற்செய்தியில் இயேசு நான்கு செயல்பாடுகளை எடுத்துக்காட்டாக தருகிறார்.

a)- உடல் வலியை ஏற்றுக்கொள்ளுதல்

"உங்களை வலக் கன்னத்தில் அறைபவருக்கு மறுகன்னத்தையும் திருப்பிக் காட்டுங்கள்." (மத்தேயு 5:39b) இது நம் உடலுக்கு வலியை கொடுத்தவருக்கு பதிலுக்கு வலியை தராமல், அவருக்கு மறு கன்னத்தையும் காட்டி அதாவது உடல் வலியை ஏற்று பகைவரை அன்பு செய்து வாழ அழைப்பு பெறுவதாகும்.

b)- உடை இழப்பை ஏற்றுக்கொள்ளுதல்

"ஒருவர் உங்களுக்கு எதிராக வழக்குத் தொடுத்து, உங்கள் அங்கியை எடுத்துக்கொள்ள விரும்பினால் உங்கள் மேலுடையையும் அவர் எடுத்துக் கொள்ள விட்டு விடுங்கள்." (மத்தேயு 5:40) இங்கு உங்கள் உடையை அபகரித்து தீங்கு செய்ய நினைப்பவரிடம் உடை இழப்பை ஏற்றுக்கொண்டு பகை நினைத்தவரை அன்பு செய்து வாழ அழைப்பு பெறுவதாகும்.

c)- கட்டாய வலியை ஏற்றுக்கொள்ளுதல்

"எவராவது உங்களை ஒரு கல் தொலை வரக் கட்டாயப்படுத்தினால் அவரோடு இரு கல் தொலை செல்லுங்கள்." (மத்தேயு 5:41) இங்கு ஒரு கல் தொலைவு நடப்பதே நம்மை கட்டாயப்படுத்தி தருகின்ற வலியாகும். ஆனால் இறைமகன் இயேசு கிறிஸ்து அவ்வலியை ஏற்று அவரோடு இன்னொரு கல் தொலை நடந்து தீமைக்கு நன்மை செய்வதற்கு அழைப்பு தருகிறார்.

d)- இறைவனிடம் மன்றாடுங்கள்

தீமைக்கு நன்மை என்பதற்கு மற்றொரு செயல் வடிவமாக "உங்களைத் துன்புறுத்துவோருக்காக இறைவனிடம் வேண்டுங்கள்." (மத்தேயு 5:44b) என்னும் மிக உயர்ந்த செயல்பாட்டு அழைப்பை தருகிறார் இயேசு.

தீமைக்கு நன்மை என பகைவரை அன்பு செய்வதன் மூலம் நமது வாழ்வு மாறுபடுகிறது. இங்கு எண்ணற்ற நன்மைகளை கிறிஸ்தவர்களாகிய நாம் ஒவ்வொருவரும் சுவைப்போம்.

i)- நல்ல ஆரோக்கியம்

முதலாவதாக நாம் நமக்கு தீங்கு செய்தவரை மன்னித்து அன்பு செய்வதன் மூலமாக நல்ல உடல் ஆரோக்கியத்தை பெறுகிறோம். இன்றைக்கு மனிதரின் அதிகமான நோய்களுக்கு 92% காரணமாக அமைவது Psychosomatic என்னும் அவர்களுடைய மனநலம் பாதிக்கப்படுவதே என்கின்றனர் உளவியலாளர்கள். பழிவாங்குதலும் பகையுணர்வும் நம் மன நலத்தை பாதித்து உடல் நலத்தையும் கெடுக்கும். எனவே இன்றைக்கு நம்முடைய வாழ்வில் நமக்கு தீங்கு செய்தவர்களை மன்னித்து அன்பு செய்வதன் மூலமாக நாம் நல்ல உடல் ஆரோக்கியத்தோடு வாழலாம்.

ii)- இறைவனின் திருமுகம்

இரண்டாவதாக நாம் நம் பகைவர்களை மன்னித்து தீமைக்கு நன்மை என்னும் அன்பை காட்டுகின்ற போது இறைவனின் திருமுகத்தைப் பெறுகின்றோம். இங்கு இறைவனின் திருமுகம் என்பது அன்பையும் பாசத்தையும் இரக்கத்தையும் அமைதியையும் தன்னகத்தே கொண்டிருக்கின்ற முகமாகும். பழைய ஏற்பாட்டில் தன் தந்தையிடமிருந்து ஆசீரை ஏமாற்றி வாங்கிய தன் சகோதரன் யாக்கோபுவை ஏசா மன்னித்து அன்பை காட்டினார். அதனால் தான் யாக்கோபு ஏசாவை பார்த்து, "உமது முகத்தைக் காண்பது கடவுளின் முகத்தைக் காண்பதுபோல் இருக்கிறது." (தொடக்க நூல் 33:10) என்கிறார். அதேபோல ஸ்தேவான் தான் இறக்கும் தருவாயிலும் முழந்தாள்படியிட்டு உரத்த குரலில், “ஆண்டவரே, இந்தப் பாவத்தை இவர்கள் மேல் சுமத்தாதேயும்” என்று சொல்லி உயிர்விட்டார். (திருத்தூதர் பணிகள் 7:60) தன்னை கொன்றவர்களையும் மன்னித்து அவர்களுக்காக இறைவனிடம் வேண்டிய ஸ்தேவான் இறை முகத்தை கொண்டிருந்தார். அதனால் தான் "தலைமைச் சங்கத்தில் அமர்ந்திருந்த அனைவரும் அவரை உற்றுப் பார்த்தபோது அவரது முகம் வானதூதரின் முகம்போல் இருக்கக் கண்டனர்." (திருத்தூதர் பணிகள் 6:15) இங்கு தீமைக்கு நன்மை என்னும் குணம் இறைவனின் திருமுகத்தை ஏசாவுக்கும் ஸ்தேவானுக்கும் தந்தது.

iii)- இறைவனின் பிள்ளை

"கடவுள் தம் உருவில் மானிடரைப் படைத்தார்." (தொடக்க நூல் 1:27) என்னும் இறைவார்த்தையின் அடித்தளத்தில் இறைச்சாயலாக படைக்கப்பட்ட நாம் ஒவ்வொருவரும் இறைவனின் பிள்ளைகள் என்னும் முழுமையான உரிமையை பெற அவர் வழியில் நடக்க வேண்டும். இறைமகன் இயேசு, “தந்தையே, இவர்களை மன்னியும். ஏனெனில் தாங்கள் செய்வது என்னவென்று இவர்களுக்குத் தெரியவில்லை” என்று சொன்னார். (லூக்கா 23:34) தீமைக்கு நன்மையை செய்தார், அவர் வழியில் வாழும் கிறிஸ்தவர்களாகிய நாம் இயேசுவின் பிள்ளைகளாக அவரைப் போல் பகைவரையும் அன்பு செய்து தீமைக்கு நன்மை செய்பவர்களாக மாறுவோம்.

"பழி வாங்கினால் எதிரிக்கு நிகராவோம். அலட்சியம் செய்தால் எதிரியைவிட உயர்ந்தவராவோம்." என தாமஸ் புல்லரும் "பழிவாங்குதல் என்பது மனிதப் பண்புக்கு விரோதமானதோர் மொழியாகும்." என ஸெனீக்காவும் எடுத்துரைத்த கூற்றுக்கு ஏற்ப இன்றைக்கு நமக்கு எதிராக தீமை செய்த ஒவ்வொருவரையும் குறிப்பாக நம் குடும்பத்தாரையும் மற்றும் உறவினர்களையும் எதிரிகளாக நினைக்காமல் யாவரையும் அன்பு செய்து அவர்களுக்காக ஜெபித்து தீமைக்கு நன்மை செய்யும் உயர்ந்த குணத்தில் வளர்வோம். இறைவன் ஒவ்வொருவரையும் ஆசீர்வதிப்பார்.

விவிலிய விதைகள் - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலத்தின் 6-ஆம் ஞாயிறு - (ஆண்டு- A)- 12-02-2023- ஞாயிற்றுக்கிழமை

 

🌱விவிலிய விதைகள்🌱

பொதுக்காலத்தின் 6-ஆம் ஞாயிறு

தமிழ் திருவழிபாட்டு மறையுரை

(12 பிப்ரவரி  2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: சீராக்கின் ஞானம் 15: 15-20

இரண்டாம் வாசகம்: 1 கொரிந்தியர் 2: 6-10

நற்செய்தி: மத்தேயு 5: 17-37

கோபம் என்னும் கொடுங்காரன்

  பொதுக்காலத்தின் 6-ஆம் ஞாயிறு திருவழிபாட்டு இறைச்சிந்தனைக்கு உங்களை அன்போடு வரவேற்கின்றேன். இன்றைய நற்செய்தியில் “திருச்சட்டத்தையோ இறைவாக்குகளையோ நான் அழிக்க வந்தேன் என நீங்கள் எண்ண வேண்டாம்; அவற்றை அழிப்பதற்கல்ல, நிறைவேற்றுவதற்கே வந்தேன்." (மத்தேயு 5:17) என திருச்சட்டத்தை நிறைவேற்றுதல் பற்றி எடுத்துரைக்கின்ற இயேசு, இறைவன் மோசே வழியாக பழைய ஏற்பாட்டில் கொடுத்த பத்து கட்டளைகளில் சிலவற்றை அதாவது, கொலை செய்யாதே, கோபம் கொள்ளாதே, சகோதர சகோதரிகளையும் மற்றும் எதிரியையும் மன்னித்து வாழு, பெண்களை இச்சையோடு நோக்காதே, மணமுறிவைத் தேடாதே, பொய்யாணை இடாதே மற்றும் நேர்மையோடு இரு என தம் சீடர்கள் புரிந்து கொள்ளும் வகையில் அதன் ஆழ்ந்த உண்மைகளை விளக்குகிறார். இக்கட்டளைகளில் பல கட்டளைகளை பின்பற்ற இடையூறுதலாக நம்மிலிருக்கும் கோபத்தை அறவே விட்டொழிய இன்று அழைக்கப்படுகின்றோம். மனித உறவுகளில் ஏற்படுகின்ற பல்வேறு பிளவுகளுக்கு காரணம் நம்மிலிருக்கும் கோபம் என்னும் கொடுங்காரன். யாருக்கும் பயன்படாத இந்த கோபம் என்னும் செடியை வேரோடு பிடுங்கி எறிவதே நம் வாழ்க்கைக்கு நல்லது. இயேசுவும் "தம் சகோதரர் சகோதரிகளிடம் சினங்கொள்கிறவர் தண்டனைத் தீர்ப்புக்கு ஆளாவார்." (மத்தேயு 5:22) என கோபமின்றி வாழ அழைப்பு தருகின்றார்.

விவிலியத்தில் கோபம்:-

     விவிலியத்தில் பலர் கோபம் கொண்டதை வாசிக்கின்றோம். "காயினையும் அவன் காணிக்கையையும் ஆண்டவர் கனிவுடன் கண்ணோக்கவில்லை. ஆகவே, காயின் கடுஞ்சினமுற்றான். அவன் முகம் வாடியது." (தொடக்க நூல் 4:5) பொறாமையால் எழுந்த இந்த கோபம் ஆபேலை கொன்றது. "ஆண்டவரின் தூதரைக் கண்ட கழுதை பிலயாமுக்கு அடியில் படுத்துக்கொண்டது; பிலயாம் சினம் கொண்டு தம் கோலால் கழுதையை அடித்தார்." (எண்ணிக்கை 22:27) மற்றும் "இது யோனாவுக்குச் சிறிதும் பிடிக்கவில்லை. அவர் கடுஞ்சினங் கொண்டு ஆண்டவரிடம் முறையிட்டார்." (யோனா 4:1) இங்கு பிலயாம் கழுதையின் மீது கொண்ட கோபமும், யோனா இறைவன் மீது கொண்ட கோபமும் புரிந்து கொள்ளாமையால் எழுந்த கோபமாகும். மேலும், "பாளையத்தை மோசே நெருங்கி வந்தபோது கன்றுக் குட்டியையும் நடனங்களையும் கண்டார். மோசேக்குச் சினம் மூண்டது. அவர் தம் கையிலிருந்த பலகைகளை மலையடிவாரத்தில் வீசியெறிந்து உடைத்துப் போட்டார்." (விடுதலைப் பயணம் 32:19) மற்றும் "அப்போது உசாவுக்கு எதிராக ஆண்டவரின் சினம் பற்றி எரிந்தது. கடவுள் அவனது தவற்றுக்காக அங்கேயே அவனை வீழ்த்தினார்." (2 சாமுவேல் 6:7,8) இங்கு மோசே மக்களின் மீது கொண்ட கோபமும், ஆண்டவர் உசா மீது கொண்ட கோபமும் அவர்கள் பாவம் செய்ததால் எழுந்த கோபங்களாகும். இவ்வாறு விவிலியத்தில் பல காரணங்களுக்காக பலர் கோபம் கொண்டதை நாம் வாசிக்கின்றோம்.

 

கோபத்தின் விளைவு:-

"கொலை செய்யாதே; கொலை செய்கிறவர் எவரும் தண்டனைத் தீர்ப்புக்கு ஆளாவர்." (மத்தேயு 5:21) என பத்து கட்டளைகளில் ஒன்றான 'கொலை செய்யாதே' என்னும் கட்டளையை இயேசு எடுத்துரைக்கின்ற போது, கொலை செய்வது வெளிப்புற செயலாக இருந்தாலும் அதற்கு காரணமாக இருப்பது உள்ளத்திலிருந்து வெளிப்படும் கோபம் தான் என்கிறார். அக்கோபத்தை நம்மிடையேயிருந்து அகற்றுகின்ற பொழுது இப்பெரும் பாவத்தை நம் வாழ்விலிருந்து தடுக்கலாம். அதுமட்டுமல்லாது, "எவரும் தம் மனைவியைப் பரத்தைமைக்காக அன்றி வேறு எந்தக் காரணத்திற்காகவும் விலக்கிவிடக் கூடாது." (மத்தேயு 5:32) என இன்று நமது குடும்பங்களில் கோபம் மணமுறிவுக்கான காரணமாக அமையக்கூடாது என்கிறார். இதைத்தான் திருத்தூதர் பவுல் "சினமுற்றாலும் பாவம் செய்யாதிருங்கள்..." (எபேசியர் 4:26) என கோபம் நம்மை பாவம் என்னும் பள்ளத்தாக்கில் தள்ளாமல் இருக்கட்டும் என்கிறார்.

கோபத்தின் பதில் - மன்னிப்பும் நல்லுறவும்:

கோபமின்றி வாழ்வதற்கு அழைப்பு தருகின்ற இயேசு, அக்கோபத்திற்கான பதிலையும் அதாவது அதிலிருந்து நாம் மீண்டு வருவதற்கு மன்னிப்பு மற்றும் நல்லுறவு என்னும் வழியையும் காட்டுகிறார். நீங்கள் உங்களுடைய காணிக்கையை பலிபீடத்தில் செலுத்த வரும்பொழுது உங்கள் சகோதரர் சகோதரிகள் எவருடனாவது உங்களுக்கு மனத்தாங்கலிருந்தால் அதாவது கோபமிருந்தால், அங்கேயே பலிபீடத்தின் முன் உங்கள் காணிக்கையை வைத்துவிட்டுப் போய் முதலில் அவரிடம் நல்லுறவு ஏற்படுத்திக் கொள்ளுங்கள். பின்பு வந்து உங்கள் காணிக்கையைச் செலுத்துங்கள் என்று மன்னிப்பையும் நல்லுறவையும் நம் கோபத்திற்கான மருந்தாக இயேசு எடுத்துரைக்கிறார். அதேபோல உங்கள் எதிரி உங்களை நீதிமன்றத்திற்கு கூட்டிச் செல்லும்போது அவருடன் வழியிலேயே உடன்பாடு செய்து கொள்ளுங்கள். இல்லையென்றால் நீங்கள் சிறையில் அடைக்கப்படுவீர்கள் என நமது சினத்தை அதாவது நம்மிலிருக்கும் கோபம் என்னும் கொடுங்காரனை வெளியேற்றி யாவரிடமும் குறிப்பாக நம் பகைவரிடம் மன்னிப்பு கேட்டு நல்லுறவோடு வாழ அழைப்பு தருகிறார். ஒரு சமயம் ஆபிரகாம் லிங்கனிடம் வந்த ஒருவர், “எனக்கு ஒருவன் தீங்கு செய்து விட்டான். அதை என்னால் மறக்க முடியவில்லை. அவன் மேல் உள்ள என் கோபத்தை அடக்க முடியவில்லை” என்றார். உடனே ஆபிரகாம் லிங்கன், “உங்கள் கோபத்தை எல்லாம் கொட்டி ஒரு கடிதம் எழுதிக் கொண்டு வந்து என்னிடம் கொடுங்கள்” என்றார். அதேபோல், அந்த நபரும் ஒரு கடிதம் எழுதிக் கொண்டு வந்து லிங்கனிடம் காட்டி, “என் மனசில் இருக்கும் குமுறலை எல்லாம் கொட்டி இந்தக் கடிதத்தை எழுதி இருக்கிறேன். இதைத் தபாலில் சேர்த்து விடட்டுமா?’ என்று கேட்டார். அப்போது லிங்கன், “உங்கள் கோபம் குறைந்ததா? மனம் அமைதியாக இருக்கிறதா?’’ என்று கேட்க, அவர் “ஆம்” என்று கூறினார். “சரி… இப்போது அந்தக் கடிதத்தைக் கிழித்துப் போடுங்கள். அவரை மன்னித்துவிடுங்கள். உங்கள் மனச்சுமை குறையும். அதுதான் முக்கியம்” என்றார். கடிதம் எழுதிக் கொண்டு வந்த நபர், ஆபிரகாம் லிங்கனை ஆச்சரியத்தோடு பார்த்தார். அதைக் கண்ட லிங்கன் அவரிடம் புன்முறுவலுடன்,“ அவரை நீங்கள் திட்டலாம், கோபப்படலாம். அதனால் உங்கள் மனச்சுமைதான் அதிகரிக்கும். உங்களுக்குள் உள்ள உறவு நசிந்து விடும். இப்போது உங்களுக்குள் ஒரு அமைதி இருக்கிறது. இதுதான் நல்லது” என்றார். ஆம் மன்னிப்பும் நல்லுறவும் கோபம் என்னும் கொடுங்காரனுக்கு சிறந்த மருந்தாகும்.

கோபமும் நம் வாழ்வும்:

ஒரு ஞானியிடம், கோபம் என்றால் என்ன? என்று கேட்டபோது 'பிறர் செய்த தவறுக்கு நமக்கு நாமே கொடுத்துக் கொள்ளக்கூடிய தண்டனை' என்கிறார். கோபம் நம் உடலில் அட்ரினலின் அதிகரிக்க காரணமாகிறது. கோபப்படும் போது நம் தசைகள் இறுக்கமடைகிறது. வியர்வை, இதய துடிப்பு மற்றும் சுவாசம் விரைவுபடுத்தப்படுகிறது. கோபப்படும் போது நுாற்றுக்கணக்கான நரம்புகள் நம்மில் செயல்படுகின்றன என்பதை அறிவியல் தெரிவிக்கிறது. மேலும் நாம் அதிகமாக கோபப்படுகின்ற பொழுது நம்முடைய நரம்புகள் செயல் இழக்க வாய்ப்பு உண்டு. இது இதய நோய்க்கும் காரணமாக அமையும் என்கிறார்கள் மருத்துவர்கள். கோபம் அதிகம் உள்ளவர்கள் அடிக்கடி இரத்த அழுத்தம், தலைவலி மற்றும் தோல் நோய்களால் அவதியுறுகிறார்கள். கோபம் உடலை மட்டுமின்றி மன ஆரோக்கியத்தையும் பாதிக்கும் அதனால் பலர் பெரும்பாலும் தவறான முடிவுகளை எடுக்கிறார்கள். நம்மில் கோபம் ஏற்படுகின்ற பொழுது நாம் நம்மை மறந்து விடுகின்றோம் அதனால் நமது பேச்சுகள் மற்றும் செயல்கள் நம்மை அறியாமலே வெளிப்படுகிறது. இது குடும்பங்களில் பிரச்சனைகளை உருவாக்கி அதுவே பிளவுக்கு காரணமாக அமைகிறது. இன்றைக்கு குழந்தைகள் முதல் முதியவர்கள் வரை அனைவருக்கும் கோபம் ஒரு பெரும் பிரச்சனையாகவே மாறியிருக்கிறது. ஒரு சீடன் தன் குருவிடம் கேட்டான். “ என்னால் எனது கோப இயல்பைக் கட்டுப்படுத்தவே இயலவில்லை.” குரு அவனிடம், “ உனது கோபம் எங்கே? எனக்குக் கொஞ்சம் காட்டு” என்றார். சீடன் ஆச்சரியப்பட்டான். “இப்போதைக்கு என்னிடம் கோபம் இல்லை, அதனால் என்னால் அதைக் காட்ட முடியாது” என்றான். குரு பதில் அளித்தார். “பிரச்னை ஒன்றும் இல்லை. கோபம் வரும்போது என்னிடம் கொண்டுவந்து காட்டு” என்றார். சீடன் கடுப்புடன், “கோபம் வந்தவுடன் என்னால் கொண்டுவந்து உடனடியாகக் காட்ட முடியாதே” என்றான். அத்துடன், “எதிர்பாராத வேளையில் கோபம் வரும். அதை நான் உங்களிடம் வந்து காட்டுவதற்குள் நிச்சயமாக மறைந்தே போய்விடும்” என்றான் சீடன். “அப்படியானால் கோபம் என்பது உனது உண்மையான இயல்பாக இருக்க முடியாது” என்றார் குரு. “கோபம் உனது உண்மையான இயல்பாக இருக்கும் எனில் எந்தச் சமயத்திலும் என்னிடம் அதைக் கொண்டுவந்து காட்ட முடியும். நீ பிறக்கும்போது உன்னிடம் அது இல்லை. உனது பெற்றோரும் உன்னிடம் தரவில்லை. அதனால் அது வெளியிலிருந்துதான் வந்திருக்க வேண்டும். எப்போதெல்லாம் கோபம் வருகிறதோ அதை ஒரு குச்சியால் அடித்து விரட்டு” என்றார் குரு. நமது அன்றாட வாழ்வில் கோபத்தை கட்டுப்படுத்தாவிட்டால் அது நம் உடல் நிலையையும் மற்றும் மனநிலையையும் பாதித்து நம்மையும், நம் உறவையும் அழித்து விடும் என்பதை புரிந்து வாழ்வோம். "நீங்கள் சினம், சீற்றம், தீமை ஆகிய அனைத்தையும் அகற்றி விடுங்கள்." (கொலோசையர் 3:8) என்னும் இறைவார்த்தைக்கு ஏற்ப கோபத்தை விட்டு கடவுள் படைத்த இந்த அழகான உலகில் உடல், உள்ள நலத்தோடும் மற்றும் உறவுகளோடும் மகிழ்வாய் வாழ்வோம். இறைவன் நம் ஒவ்வொருவரையும் ஆசிர்வதிப்பார்.

விவிலிய விதைகள் - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலத்தின் 5-ஆம் ஞாயிறு - (ஆண்டு- A)- 05-02-2023- ஞாயிற்றுக்கிழமை

 

🌱விவிலிய விதைகள்🌱

பொதுக்காலத்தின் 5-ஆம் ஞாயிறு

தமிழ் திருவழிபாட்டு மறையுரை

(05 பிப்ரவரி  2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: எசாயா 58: 7-10

இரண்டாம் வாசகம்: 1 கொரிந்தியர் 2: 1-5

நற்செய்தி: மத்தேயு 5: 13-16

உப்பும் ஒளியும் காட்டும் சீடத்துவம்

பொதுக்காலத்தின் ஐந்தாவது ஞாயிற்றுக் கிழமையின் இறைவார்த்தை வழிபாடு இன்றைக்கு கிறிஸ்தவர்களாகிய நாம் ஒவ்வொருவரும் உப்பாகவும் மற்றும் ஒளியாகவும் பிறருக்கு திகழ்வதே கிறிஸ்துவின் சீடத்துவ வாழ்வு என்பதை உணர்ந்து கொள்ள அழைக்கின்றது. இயேசு பயன்படுத்தும் இந்த இரண்டு உருவகங்களும் நாம் நன்கு அறிந்தவையே ஆகும். நாம் அன்றாடம் பயன்படுத்துகின்ற உப்பு மற்றும் ஒளி என்னும் இந்த இரண்டு உருவகங்களின் குணங்களை சிந்தித்து அவை சீடத்துவ வாழ்விற்கு எடுத்துரைக்கின்ற பண்புகளை நமதாக்க அழைப்பு பெறுகின்றோம்.

உப்பும் சீடத்துவமும்

உப்பிற்கென்று பல குணங்கள் உண்டு. நீங்கள் மண்ணுலகிற்கு உப்பாய் இருக்கிறீர்கள். (மத்தேயு 5:13) என்னும் இன்றைய நற்செய்தியின் வார்த்தைகளுக்கு ஏற்ப ஒவ்வொரு உப்பின் குணமும் நம்மை அர்த்தமுள்ள கிறிஸ்தவ சீடத்துவ வாழ்வுக்கு அழைப்பு தருகிறது.

1. உப்பு தனித்துவமானது:

சமையலுக்கு நாம் பயன்படுத்தும் அனைத்து பொருட்களிலும் வித்தியாசமானது மற்றும் தனித்துவமானது உப்பு. வேறு எதிலும் கிடைக்காத தனித்துவமான சுவையை தன்னகத்திலே கொண்டுள்ளது. இது பயன்பாட்டிற்கு ஏற்றவாறு சுவையை தருகிறது. கிறிஸ்தவ சீடத்துவ வாழ்வுக்கு அழைக்க பெற்ற நாம் ஒவ்வொருவரும் மாறி வருகின்ற இந்த மாய உலகின் ஆசைகளில் மூழ்காதவாறு தனித்துவமிக்கவர்களாக வாழ அழைக்கப்படுகின்றோம்.

2. உப்பு பாதுகாப்பது:

பதப்படுத்தப்படுவதற்கும் கெட்டுப் போகாமல் இருப்பதற்கும் நாம் அதிகம் பயன்படுத்துவது உப்பு. இது பொருட்களை கெட்டுப் போகாமல் பாதுகாப்பது மட்டுமல்லாமல் சுத்தமும் செய்கிறது. இயேசுவின் சீடர்களாக வாழுகின்ற நாம் ஒவ்வொருவரும் பிறரை தவறான வழியிலிருந்து பாதுகாக்கவும் மற்றும் அனைவரையும் தூய வாழ்வுக்கு அழைத்து செல்லவும் அழைக்கப்படுகின்றோம்.

3. உப்பு சுவையூட்டுவது:

"உப்பில்லா பண்டம் குப்பையிலே" என்னும் சொல்லாடலுக்கு ஏற்ப நாம் உண்ணும் உணவுக்கு சுவையூட்டுகிறது உப்பு. இதைப் போல கிறிஸ்தவர்களாகிய நாம் ஒவ்வொருவரும் கிறிஸ்து என்னும் சுவையை பிறருக்கு நம் சொல்லாலும், செயலாலும் மற்றும் வாழ்வாலும் அளிப்பதே உண்மையான சீடத்துவமாகும்.

4. உப்பு ஊடுருவுவது:

சமையலுக்கு நாம் பயன்படுத்தும் உப்பு உணவோடு ஒன்றாக கலந்துவிடுகிறது. தன்னை அழித்து, உணவின் உருவத்தை ஏற்று எங்கும் ஊடுருவியிருக்கும் உப்பை போல கிறிஸ்தவர்களாகிய நாம் ஒவ்வொருவரும் செல்லும் இடமெல்லாம் கிறிஸ்துவையும் மற்றும் அவர் தருகின்ற நற்செய்தியின் விழுமியங்களையும் பறைசாற்றுபவர்களாக இருக்க வேண்டும்.

5. உப்பு மலிவானது:

சமையலுக்கு பயன்படுத்தப்படும் எத்தனையோ பொருட்கள் மிக அதிகமான விலையில் விற்கப்பட்டாலும் ஒரு காலமும் உப்பு அதிக விலைக்கு விற்கப்பட்டதில்லை. அதே வேளையில் உப்பில்லாமல் எவரும் சமைத்ததும் இல்லை. இத்தகைய அத்தியாவசியமான பொருளான உப்பு எப்போதும் மலிவாக எல்லோருக்கும் கிடைக்கும் வகையில் இருக்கிறது. இந்த உலகிற்கு உப்பாய் இருக்க அழைக்கப்படுகின்ற கிறிஸ்தவர்களாகிய நாம் ஒவ்வொருவரும் எல்லோரையும் சென்று அடைபவர்களாக இருக்க வேண்டும். நம் வழியாக கிறிஸ்துவும் கிறிஸ்துவின் மதிப்பீடுகளும் எல்லோரையும் சென்றடைய வேண்டும்.

6. உப்பு திரும்ப பெற முடியாதது:

உப்பை ஒரு முறை நாம் சமையலுக்கு பயன்படுத்தி விட்டால், அதை மற்ற காய்கறிகளைப் போலவோ அல்லது பருப்பை போலவோ தனியே பிரித்தெடுக்க முடியாது. அதேபோல நமது கிறிஸ்தவ சீடத்துவ வாழ்வு ஒருபோதும் நம்மிலிருந்து பிரித்தெடுக்க முடியாததாக அமைய வேண்டும், மற்றும் நாம் பிறருக்கு எடுத்துரைக்கின்ற கிறிஸ்துவும் அவரின் மதிப்பீடுகளும் மற்றவர்களிடமிருந்து பிரித்தெடுக்க முடியாததாக அவர்களுக்கு சென்று சேர வேண்டும்.

ஒளியும் சீடத்துவமும்

விவிலியத்தில் ஒளி இறைவனையும் (1 யோவான் 1:5) மற்றும் இயேசுவையும் ( யோவான் 8:12/9:5) சுட்டிக் காட்டுகிறது என்பதை நாம் அறிவோம். ஏனெனில் “உலகின் ஒளி நானே; என்னைப் பின்தொடர்பவர் இருளில் நடக்கமாட்டார்; வாழ்வுக்கு வழி காட்டும் ஒளியைக் கொண்டிருப்பார்”.(யோவான் 8:12) என இயேசுவே எடுத்துரைக்கிறார். மேலும் "என்னிடம் நம்பிக்கை கொள்பவர் இருளில் இராதபடி நான் ஒளியாக உலகிற்கு வந்தேன்." (யோவான் 12:46) என தன்னை ஒளியாக அடையாளப்படுத்தியது மட்டுமல்லாது பிறரையும் அவ்வொளியில் வழி நடத்துவேன் என்கிறார். இன்றைக்கு அவ்வொளியின் மக்களாக நாம் வாழ்ந்திட "நீங்கள் உலகிற்கு ஒளியாய் இருக்கிறீர்கள்." (மத்தேயு 5:14) என்கிறார். ஒளியின் குணங்களை தமதாக்கி கிறிஸ்துவின் சீடத்துவத்தில் வாழ அழைக்கப்படுகின்றோம்.

1. ஒளி பிராகாசிப்பது:

ஒளி என்றாலே அது பிரகாசிக்கும், தனது பிரகாசிக்கும் தன்மையை ஒருபோதும் தன்னிலே வைப்பதில்லை. தன்னை சுற்றியிருக்கின்ற ஒவ்வொருவருக்கும் அது கொடுக்கிறது. இன்றைக்கு நாமும் மரக்காலுக்குள் உள்ள விளக்காக அல்லாது, விளக்குத் தண்டு மற்றும் மலைமேலிருக்கும் நகர் போல, சுயநலமில்லாத ஒளியாய் பிறருக்கு வாழ்வு தந்து நம்மை அர்ப்பணிக்கும் சீடத்துவ வாழ்வை வாழ்வோம்.

2. ஒளி ஊடுருவுவது:

ஒளி கண்ணாடியிலும் மற்றும் தண்ணீரிலும் ஊடுருவி செல்கின்ற தன்மை கொண்டது. ஒளியின் மக்களாக வாழ அழைக்கப்பட்ட நாம் எவ்வாறு ஒளியாம் இயேசு கிறிஸ்து மனித மனங்களில் ஊடுருவி இறையாட்சியை பறைசாற்றினாரோ அதேபோல நாமும் இவ்வுலகின் எல்லா இடங்களிலும் மற்றும் மனித மனங்களிலும் ஊடுருவி இறையாட்சியை எடுத்துரைக்க அழைப்புப் பெறுகிறோம்.

3. ஒளி வழிகாட்டுவது:

கரையிலிருக்கும் கலங்கரை விளக்கு கடலிலிருக்கும் கப்பலுக்கு கரையை நோக்கி வருவதற்கு வழி காட்டுவது போல, இயேசுவின் சீடர்களான நாம் பாவ குழியில் விழுந்து இறை வழியை மறந்து வாழ்ந்து கொண்டிருப்பவருக்கு ஒளியாக திகழ்ந்து புது வழியை காட்ட முயற்சிப்போம்.

4. ஒளி பாதுகாப்பது:

ஒளி இருளையும் இருளிலிருக்கும் தீயதையும் சுட்டிக்காட்டி நம்மை பாதுகாப்பது போல இயேசுவின் சீடத்துவத்தில் வாழ்ந்து கொண்டிருக்கும் நாம் இருளான இவ்வுலகின் மாயைகளையும் மற்றும் கவர்ச்சிகளையும் பிறருக்கு சுட்டிக்காட்டி அவர்களை பாதுகாப்போம். "ஒரு காலத்தில் இருளாய் இருந்த நீங்கள் இப்போது ஆண்டவரோடு இணைந்து ஒளியாய் இருக்கிறீர்கள். ஆகவே ஒளி பெற்ற மக்களாக வாழுங்கள்." (எபேசியர் 5:8) என்னும் இறை வார்த்தைக்கு ஏற்றவாறு அவர்கள் வாழ கிறிஸ்து என்னும் ஒளியில் அவர்களை வழிநடத்துவோம்.

5. ஒளி வித்தியாசப்படுத்துவது:

தண்ணீரில் மிதக்கும் எண்ணெய் போல இவ்வுலகில் எது இருள் மற்றும் எது ஒளி என வித்தியாசப்படுத்துவது ஒளியாகும். இதுவே சரியானவற்றையும் மற்றும் தவறானவற்றையும் பிரித்துக் காட்டுகிறது. “இன்னும் சிறிது காலமே ஒளி உங்களோடு இருக்கும். இருள் உங்கள்மேல் வெற்றி கொள்ளாதவாறு ஒளி உங்களோடு இருக்கும்போதே நடந்து செல்லுங்கள்." (யோவான் 12:35) என்னும் இறைவார்த்தையின் அடித்தளத்தில் ஒளியின் பாதையில் நடப்போம்.

6. ஒளி கவர்ந்திழுப்பது:

பொதுவாகவே ஒளியை நோக்கி நடக்கவும் மற்றும் ஒளியிருக்கின்ற இடத்தில் வாழவும் நாம் ஆசைப்படுவோம். ஒளி மனிதர்களை மட்டுமல்லாது சிறிய பூச்சிகளை கூட அதனை நோக்கி வர கவர்ந்திழுக்கும் குணம் கொண்டதாகும். "ஒளியே எல்லா நன்மையையும் நீதியையும் உண்மையையும் விளைவிக்கிறது." (எபேசியர் 5:9) எனும் இறைவார்த்தைக்கேற்ப இவ்வொளியை நோக்கி எல்லோரும் கவர்ந்திழுக்கப்பட, நீதியிலும் மற்றும் உண்மையிலும் வளர நாம் ஒளியின் தூண்களாய் மாறுவோம்.

அன்பார்ந்தவர்களே, இறைமைந்தன் இயேசு கிறிஸ்து ஏதோ எடுத்துக்காட்டிற்காக உப்பையும் மற்றும் ஒளியையும் பயன்படுத்தவில்லை. மாறாக அதனுள்ளிருக்கும் ஆழமான பண்புகளை உணர்ந்து அதன் வழியாய் நாம் சீடத்துவத்தில் வளர மற்றும் வாழ இவற்றை பயன்படுத்துகிறார். எனவே இத்தகைய பண்புகளை நமதாக்கி நாளும் இயேசுவின் சீடத்துவத்தில் வாழ்வோம். இறைவன் நம் ஒவ்வொருவரையும் ஆசீர்வதிப்பார்.

விவிலிய விதைகள் - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலத்தின் 4-ஆம் ஞாயிறு - (ஆண்டு- A)- 29-01-2023- ஞாயிற்றுக்கிழமை

 

🌱விவிலிய விதைகள்🌱

பொதுக்காலத்தின் 4-ஆம் ஞாயிறு

தமிழ் திருவழிபாட்டு மறையுரை

(29 ஜனவரி 2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: செப்பனியா 2: 3, 3: 12-13

இரண்டாம் வாசகம்: 1 கொரிந்தியர் 1: 26-31

நற்செய்தி: மத்தேயு 5: 1-12a

பேறுபெற்ற உள்ளங்கள்

ஒரு நாள் சாவியைப்பார்த்து சுத்தியல் கேட்டது. உன்னை விட நான் வலிமையானவனாக இருக்கிறேன். ஆனாலும் பூட்டை திறக்க நான் மிகவும் சிரமப்படுகிறேன். ஆனால் நீ மிகவும் எளிதாக திறந்து விடுகிறாய் அது எப்படி? அதற்கு சாவி சொன்னது, நீ என்னை விட பலசாலி தான். அதை நானும் ஒப்புக்கொள்கிறேன். பூட்டை திறக்க நீ அதன் தலையில் அடிக்கிறாய் . ஆனால் நான் பூட்டின் இதயத்தை தொடுகிறேன் என்றது. அன்பார்ந்தவர்களே, இறைவனும் நம் தலையையோ அல்லது உடலையோ தொடுவதில்லை மற்றும் பார்ப்பதில்லை மாறாக அவர் நம் உள்ளத்தை தொடுகிறார் மற்றும் பார்க்கிறார். நமது உள்ளங்கள் இறைவனுக்கு உகந்ததாக மாற வேண்டுமென்றால் அவை பேறுபெற்ற உள்ளங்களாக இருக்க வேண்டும். நாம் எப்பேர்ப்பட்ட உள்ளங்களை கொண்டிருந்தால் பேறுபெற்றவர்களாக வாழலாம் என்பதை எடுத்துரைக்கின்றது இன்றைய நற்செய்தி. இயேசுவின் மலைப்பொழிவு எட்டு விதமான உள்ளங்களை எடுத்துரைக்கிறது. இத்தகைய பண்புகளை நிறைந்த உள்ளமாக நமது உள்ளங்கள் மாறுகின்ற பொழுது நாம் இறைவனில் பேறுபெற்றவர்களாகவோம்.

1. ஏழ்மையின் உள்ளம்

(“ஏழையரின் உள்ளத்தோர் பேறுபெற்றோர்; ஏனெனில் விண்ணரசு அவர்களுக்கு உரியது.”)
இங்கு குறிப்பிடப்படுகின்ற ஏழ்மை பொருளாதாரம் சார்ந்தது அல்ல மாறாக ஆன்மீகம் சார்ந்தது. அதாவது இது தன்னைச் சார்ந்த வாழ்வையோ அல்லது இவ்வுலகை சார்ந்த வாழ்வையோ எடுத்துரைக்காமல் இறைவனைச் சார்ந்த வாழ்வை எடுத்துரைக்கிறது, இறைவன் முன் நாம் எல்லோரும் ஏழ்மையான அதாவது வெறுமையான உள்ளத்தோராய் நம்மை முழுவதும் அர்ப்பணிக்க அழைப்பு பெறுகின்றோம். இத்தகைய உள்ளம் நம்மை இறைவனுக்கு முக்கியத்துவம் கொடுக்கின்ற ஒரு வாழ்வை வாழவும், நாம் செய்த தவறுக்கு அவரிடம் மன்னிப்பு கேட்கவும், நம்முடன் வாழ்கின்ற நம்பிக்கையாளர்களோடு நல்லுறவு கொண்டு வாழவும் மற்றும் இறைவன் கொடுத்த இந்த அழகிய வாழ்வை முழுமையாக அவர் வழியில் வாழவும் அழைப்புத் தருகிறது.

2. மன்னிப்பின் உள்ளம்

(“துயருறுவோர் பேறுபெற்றோர்; ஏனெனில் அவர்கள் ஆறுதல் பெறுவர்.”)

பொதுவாக நம்முடன் வாழ்ந்து மரித்தவர்களுடைய இழப்பை எண்ணி நாம் துயருறுவோம் அல்லது உடைந்த உள்ளத்தோராய் வாழ்வோம். இங்கு குறிப்பிடப்படுகின்ற உடைந்த உள்ளம் நம்முடைய பாவங்களுக்காக மனம் வருந்தி மன்னிப்பு கேட்கின்ற உள்ளம். இது உலகைச் சார்ந்த துயரம் அல்ல மாறாக நமது ஆன்மீக வாழ்வைச் சார்ந்த துயரம். நமது ஆன்மீக வாழ்வில் இறைவனை மறந்து அவருடன் பேச மற்றும் அவரை பார்க்க மறந்த தருணங்களை நினைத்து துயருற்று உடைந்த உள்ளத்தோராய் மீண்டும் அவரிடம் வருகின்ற ஒர் உள்ளத்தை இது சுட்டிக்காட்டுகிறது.

3. தாழ்ச்சியின் உள்ளம்

(“கனிவுடையோர் பேறுபெற்றோர்;

ஏனெனில் அவர்கள் நாட்டை உரிமைச் சொத்தாக்கிக் கொள்வர்.”)
இது தாழ்ச்சியான ஒரு வாழ்வுக்கு அழைப்பு தருகிறது. தாழ்ச்சி என்பது அடிமை வாழ்வுக்கு கொடுக்க கூடிய அழைப்பு அல்ல, மாறாக வலுவான மற்றும் உறுதியான உடலோடு தாழ்ச்சியான உள்ளத்தை கொண்டிருக்க கொடுக்கும் அழைப்பாகும். இது ஆணவத்தையும் மற்றும் அதிகாரத்தையும் தூக்கியெறிந்து இறைவன் முன் தாழ்ச்சியோடு அர்ப்பணிக்கின்ற ஒர் வாழ்வாகும். தாழ்ச்சியான உள்ளம் கொண்டோர் பழிவாங்கும் எண்ணத்தை கைவிட்டு மன்னிக்கும் எண்ணத்தைக் கொண்டிருப்போராகும்.

4. உண்மையின் உள்ளம்

(“நீதி நிலைநாட்டும் வேட்கை கொண்டோர் பேறுபெற்றோர்; ஏனெனில் அவர்கள் நிறைவு பெறுவர்.”)

இது நேர்மையான மற்றும் உண்மையான உள்ளத்தைக் கொண்டு வாழ அழைப்பு தருகிறது. இது நீதியோடு வாழவும் நீதியின் செயல்களை செய்யவும் தருகின்ற அழைப்பாகும். "நீதியுள்ள ஆண்டவர் நேரிய செயல்களை விரும்புகின்றார்; அவர்தம் திருமுகத்தை நேர்மையாளர் காண்பர்." (திருப்பாடல்கள் 11:7) என்னும் இறைவார்த்தையின் அடித்தளத்தில் நீதியுள்ள ஆண்டவர் நம்மையும் நீதியோடு நடந்து நேரிய செயல்களை பிறருக்கு செய்கின்ற உண்மையின் உள்ளத்தை கொண்டவர்களாக வாழ அழைப்பு தருகிறார்.

5. இரக்கத்தின் உள்ளம்

(“இரக்கமுடையோர் பேறுபெற்றோர்; ஏனெனில் அவர்கள் இரக்கம் பெறுவர்.”)

இது இரக்கமும் மன்னிப்பும் கொண்ட உள்ளத்தோராய் வாழ அழைப்பு தருவதாகும். திருஅவையில் ஒவ்வொரு நம்பிக்கையாளரும் இரக்கமுள்ள இதயம் கொண்டோராய் வாழ அழைப்பு பெறுகிறோம். இத்தகைய உள்ளத்தினர் தான் இறையாட்சியை சொந்தமாக்குபவர்கள். இரக்கமுள்ள இதயம் ஆன்மாவை வளர்க்கிறது.

6. தூய்மையின் உள்ளம்

(“தூய்மையான உள்ளத்தோர் பேறுபெற்றோர்; ஏனெனில் அவர்கள் கடவுளைக் காண்பர்.”)

தூய உள்ளம் அநீதியையும் தீமையையும் அழித்து நன்மையிலும் உண்மையிலும் வாழ அழைப்பு தருகிறது. இத்தகைய உள்ளத்தினர் பாவ கறையின்றி இறைவன் மீது ஆழ்ந்த நம்பிக்கை கொண்டு அவரில் வாழ்வர்.

7. அமைதியின் உள்ளம்

(“அமைதி ஏற்படுத்துவோர் பேறுபெற்றோர்; ஏனெனில்

அவர்கள் கடவுளின் மக்கள் என அழைக்கப்படுவர்.”)

அமைதி நல்லுறவை நோக்கி அழைத்துச் செல்கிறது. கிறிஸ்தவர்களாகிய நாம் ஒவ்வொருவரும் எல்லா போராட்டங்களுக்கும் மற்றும் இடர்பாடுகளுக்கும் மத்தியில் அமைதியை அன்பு செய்யவும் இவ்அமைதியின் மூலம் நம்முடனும், பிறருடனும் மற்றும் இறைவனுடனும் நல்லுறவில் வளர அழைப்புப் பெறுகிறோம்.

8. சிலுவையின் உள்ளம்

(“நீதியின் பொருட்டுத் துன்புறுத்தப்படுவோர் பேறுபெற்றோர்;

ஏனெனில் விண்ணரசு அவர்களுக்கு உரியது.”)

“என்னைப் பின்பற்ற விரும்பும் எவரும் தன்னலம் துறந்து தம் சிலுவையைத் தூக்கிக்கொண்டு என்னைப் பின்பற்றட்டும்." (மத்தேயு 16:24) இது கிறிஸ்துவுக்காக துன்பத்தை ஏற்றுக்கொள்ள கொடுக்கும் அழைப்பாகும். கிறிஸ்துவுக்காக நாம் பல வகையில் துன்பங்களை ஏற்றுக் கொண்டால் நாம் இறைவனில் பேறுபெற்றவர்களாவோம்.

மழைப்பொழிவிலே இயேசு எடுத்துரைக்கின்ற இத்தகைய உள்ளங்கள் நம்மில் இருக்கிறதா? என சிந்தித்துப் பார்ப்போம். ஏழ்மையையும், மன்னிப்பையும், தாழ்ச்சியையும், உண்மையையும், இரக்கத்தையும், தூய்மையையும், அமைதியையும், மற்றும் சிலுவையையும் சுமந்து செல்லுகின்ற உள்ளங்களாக நம்முடைய உள்ளங்கள் மாறப்பட வேண்டும். அப்போதுதான் இறைவனிலே நாம் பேறுபெற்றவர்களாக வாழ முடியும். இன்றைக்கு நாம் அடியெடுத்து வைத்திருக்கின்ற பொதுக்காலத்தின் நான்காவது ஞாயிற்றுக்கிழமையின் திருவழிபாட்டு வாசகங்கள் நமக்கு இத்தகையொரு அழைப்பை தருகிறது. இயேசு நம் உள்ளத்தை பார்க்கிறார் மற்றும் அவர் அதை தொடுகிறார் என்பதை உணர்ந்து மேற்கண்ட பண்புகளால் உள்ளத்தை நிறைப்போம். இறைவனோடு இணைந்திருக்கின்ற பேறுபெற்றவர்களாவோம். இறைவன் நம் ஒவ்வொருவரையும் ஆசீர்வதிப்பார்.