🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - திருவருகைக் காலம் 4-ஆம் ஞாயிறு - ( ஆண்டு- C) - 11 -12-2022- ஞாயிற்றுக்கிழமை

 

🌱விவிலிய விதைகள்🌱

திருவருகைக் காலம் 4-ஆம் ஞாயிறு

தமிழ் திருவழிபாட்டு மறையுரை

(18 டிசம்பர் 2022, ஞாயிறு)

முதல் வாசகம்: எசா 7:10-14

இரண்டாம் வாசகம்: உரோ 1:1-7

நற்செய்தி: மத் 1: 18-24

யோசேப்பும் இறைத்தொடுதலும்

ஒரு முயல் தற்கொலை செய்து கொள்ள முடிவெடுத்ததாம். ஆம், முயல் என்ன செய்யும் பாவம். ஒரு பக்கம் வேடன் விரட்டுகிறான், இன்னொரு பக்கம் நாய், மறுபக்கம் புலி என எந்த பக்கம் சென்றாலும் எதிரிகள் துரத்துகிறார்கள். எப்படியெல்லாம் தற்கொலை செய்து கொள்ளலாம் என்று சிந்தித்துப் பார்த்தது. இறுதியாக குளத்தில் குதித்து தற்கொலை செய்து கொள்வோம் என்று எண்ணி குளத்திற்குச் சென்றது முயல். அப்போது முயலின் வருகைக்கு அஞ்சி குளத்தின் கரையிலிருந்த தவளைகள் குளத்துக்குள் குதித்தது. அட நம்மையும் பார்த்து பயப்பட இந்த உலகில் உயிரினங்கள் உள்ளன என்று ஆச்சரியப்பட்டு தன் தற்கொலை முடிவை மாற்றிக் கொண்டு தைரியத்தோடு தனக்கு நேர்ந்த எல்லா பிரச்சனைகளையும் மற்றும் துன்பங்களையும் சந்தித்தது. ஆம் முயலின் இக்கட்டான மற்றும் துன்பமான வேளையில் வாழ்வதற்கு ஒரு தூண்டுதலாக இருந்தது அந்த குளத்திலிருந்த தவளைகள்தான். நம் மனித வாழ்க்கையிலும் இக்கட்டான சூழலில் ஏதாவது ஒன்றின் வழியாய் இறைத் தொடுதல் நமக்கு கிடைக்கும். அத்தகைய இறைத்தொடுதலை நம் வாழ்வில் உணர்ந்து வாழ இன்றைய திருவருகைக்காலத்தின் நான்காம் ஞாயிற்றுக்கிழமை அழைப்பு தருகிறது. இன்றைய நற்செய்தியில் புனித யோசேப்பு தன்னுடைய இக்கட்டான சூழலில் இறைத்தொடுதலை உணர்ந்து, அதை எதிர்கொண்டு வாழ்ந்ததைப் போல நாமும் வாழ அழைக்கப்படுகின்றோம்.

விவிலியத்தில் பல பகுதிகளில் புனித யோசேப்பை ஒரு வார்த்தை கூட பேசாத நபராக பார்க்கிறோம். அதே வேளையில் பல இக்கட்டான சூழல்களை சந்தித்த ஒரு நபராகவும் பார்க்கிறோம்.

1. இன்றைய நற்செய்தியில் அன்னை மரியா யோசேப்போடு நிச்சயிக்கப்பட்ட பின் அவர் கருவுற்று இருப்பதை அறிந்த யோசேப்பு, என்ன செய்வது? என்னும் இக்கட்டான சூழலுக்கு தள்ளப்படுகிறார் (மத் 11:2-11).

2. பேரரசர் அகுஸ்து சீசர் கட்டளையை ஏற்று கணக்கெடுப்பிற்காக தனது சொந்த ஊராகிய பெத்லகேமுக்கு சென்ற போது மரியாவுக்கு பேறுகாலம் வந்தது. அச்சூழலில் அவர்கள் தங்குவதற்கு ஒரு விடுதி கூட கிடைக்கவில்லை (லூக் 2: 1-7). இதுவும் யோசேப்பை இக்கட்டான ஒரு சூழலுக்கு தள்ளியது.

3. குழந்தை பிறந்த பிறகும், ஏரோது குழந்தையை கொல்ல தேடுகிறான் என்பதை அறிந்து யோசேப்புக்கு ஆண்டவரின் தூதர் கனவில் எகிப்துக்கு தப்பி ஓட சொல்லுவதும், (மத் 2: 13-15) மீண்டுமாக எகிப்துக்கு திரும்பி வர செய்தலும் யோசேப்பு சந்தித்த இக்கட்டான சூழல்கள். (மத் 2: 19-21)

4. யோசேப்பும் அன்னை மரியாவும் சிறுவன் இயேசுவோடு பாஸ்கா விழாவை கொண்டாட எருசலேமுக்கு சென்ற போது அவர் காணாமல் போனதும், என்னை ஏன் தேடினீர்கள்? என இயேசு கேட்டதும் இயேசுவின் வளர்ப்பு தந்தையாகிய யோசேப்புக்கு மிகவும் இக்கட்டான ஒரு சூழலை கொடுத்திருக்கும் (லூக் 2: 1-7).

புனித யோசேப்பு தான் சந்தித்த இத்தகைய எல்லா இக்கட்டான சூழலிலும் இறைத் தொடுதலை உணர்ந்தார். அதனால்தான் அவரால் எல்லா துன்பங்களையும் கடந்து பயணிக்க முடிந்தது. மீட்புத்திட்டத்திற்காக தன்னை அர்ப்பணிக்க முடிந்தது. யோசேப்பு வாழ்ந்த காலத்தில் யூத முறைப்படி திருமணத்தில் மூன்று படிநிலைகள் இருந்ததை பார்க்கின்றோம்.

1. பேசி முடிவெடுத்தல்: பெற்றோர்கள் தங்களுடைய குழந்தைகள் சிறு வயதில் இருக்கின்ற போதே அவர்களது வாழ்க்கை துணையை தேர்ந்தெடுத்து அவர்களுக்காக பேசி முடிவெடுப்பார்கள்.

2. நிச்சயதார்த்தம்: இது திருமணத்திற்கு சில மாதங்கள், வாரங்கள் அல்லது நாட்களுக்கு முன்பு திருமணம் செய்து கொள்வோரின் முழு சம்மதத்தோடு மேற்கொள்ளப்படும் ஒப்பந்தமாகும். ஆனால் அவர்கள் திருமண ஒப்பந்தம் செய்யப்பட்டிருந்தாலும் ஒன்று கூடி வாழ மாட்டார்கள். இருப்பினும் யூத முறைப்படி நிச்சயதார்த்தத்திற்கு பிறகு அவர்கள் பிரிய வேண்டுமென்றால் விவாகரத்து என்று சொல்லக்கூடிய திருமண முறிவு சீட்டைப் பெற வேண்டும். அன்னை மரியாவும் யோசேப்பும் இந்நிலையில் தான் இருந்தார்கள்.

3. திருமணம்: இதுதான் இன்றைய காலகட்டத்தில் நாம் பார்ப்பதை போல

திருமணத்தின் முழுமையான நிலையாகும். இதன் பின் இருவரும் ஒன்று கூடி ஒரே இல்லத்தில் வாழ்வார்கள்.

இரண்டாவது மற்றும் மூன்றாவது நிலையிலிருக்கும் பொழுது அதாவது "மணமாகியும் கன்னிமை கழியாத ஒருத்தியை நகரில் ஒருவன் சந்தித்து அவளோடு உறவுகொண்டால், அவர்கள் இருவரையும் நகர் வாயிலுக்குக் கொண்டு போய்க் கல்லால் எறிவர்," (இணைச் சட்டம் 22:23,24) இத்தகைய பின்னணியில்தான் ஒரு நேர்மையாளராக இருந்து தனக்கு நிச்சயிக்கப்பட்ட மரியா கருவுற்றிருப்பதை அறிந்து, அவரை இச்சூழலுக்கு உள்ளாக்க அவர் விரும்பாமல் மேலும் குழப்பமடைந்து இக்கட்டான ஒரு சூழலை சந்திப்பதை இன்றைய நற்செய்தி எடுத்துரைக்கிறது. அன்னை மரியாள் தூய ஆவியால் கருவுற்று இயேசுவை தன்னிலே ஏற்றதை போல, புனித யோசேப்பு கனவில் வானத்தூதரின் வழியாய் வந்த இறைவார்த்தையால் தொடப்பட்டு, இறைவனை உணர்ந்து மீட்புத்திட்டத்தில் தன்னை அர்ப்பணித்தார். இன்றைக்கு நாம் புனித யோசேப்பை போல நமது இக்கட்டான சூழலிலும் இறைத் தொடுதலை உணர்கின்றோமா? மனிதர்களாகிய நாம் ஒவ்வொருவரும் நம் வாழ்க்கை பயணத்தில் திடீர் துன்பங்கள் மற்றும் சோதனைகளின் வழியாய் இக்கட்டான சூழலுக்கு தள்ளப்படுகிறோம். இத்தகைய சூழல்களில் எல்லாம் இறைவன் பலரின் வழியாக நம்மிடையே இறைச்செய்தியை அனுப்புகிறார், அதுவே நாம் துன்பத்திலிருந்து விடுபட இறைவனின் இறைத்தொடுதல், அதை நமது வாழ்க்கையில் உணர்கின்றோமா? இன்றைய முதல் வாசகத்தில் இஸ்ரயேலின் அரசன் தமாஸ்சு நாட்டின் அரசனோடு கூட்டணி வைத்து யூதாவின் தலைநகரான எருசலேமை தாக்க தயாராக இருக்கின்ற போது, கடவுள் இறைவாக்கினர் எசாயா வழியாக "அஞ்சாதே! யாவே இறைவன் மீது நம்பிக்கை வை. நீயும் உன் மக்களும் காப்பாற்றப்படுவீர்கள். எருசலேமுக்கு எத்தகைய துன்பமும் வராது" எனும் நம்பிக்கை செய்தியை எடுத்துரைக்கிறார். அன்று யூத மக்களுக்கு ஒரு இக்கட்டான சூழல் ஏற்படுகின்ற போது இறைவாக்கினர் எசாயா வழியாக இறைத்தொடுதல் வெளிப்படுகிறது. இறைவன் மீது நாம் கொள்ளுகின்ற ஆழமான நம்பிக்கைதான் நமது இக்கட்டான மற்றும் துன்பமான சூழலில் இறைத்தொடுதலை நமக்கு உணர வைக்கும். அத்தகையோராய் வாழ்வோம். இறைவன் நம் ஒவ்வொருவரையும் ஆசீர்வதிப்பார்.

Fr. அ. குழந்தை யேசு ராஜன் CMF

கிளரீசியன் ஊடகப் பணியகம்

தாம்பரம், சென்னை

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - திருவருகைக் காலம் 3-ஆம் ஞாயிறு - ( ஆண்டு- C) - 11 -12-2022- ஞாயிற்றுக்கிழமை

 

🌱விவிலிய விதைகள்🌱

திருவருகைக் காலம் 3-ஆம் ஞாயிறு

தமிழ் திருவழிபாட்டு மறையுரை

(11 டிசம்பர் 2022, ஞாயிறு)

முதல் வாசகம்: எசா 35:1-6a, 10

இரண்டாம் வாசகம்: யாக் 5:7-10

நற்செய்தி: மத் 11: 2-11

அவசரம் வேண்டாம் (பொறுமை)

புகழ்பெற்ற விஞ்ஞானி ஐசக் நியூட்டன் ஒரு நாயை வளர்த்துவந்தார். அதற்கு டயமண்ட் என்று பெயரும் சூட்டி அன்பாகப் போற்றி வந்தார். ஒரு நாள் அவர் மாலையில் உலாவச் சென்றார். அப்பொழுது அறையின் மேஜை மீது மெழுகுவர்த்தி எரிந்து கொண்டிருந்தது. அன்று என்ன நிகழ்ந்ததோ தெரியவில்லை. அவர் உலாவச் சென்ற நேரத்தில் அந்த நாய் மேஜை மீது தாவிக் குதித்தது போலும். மெழுகுவர்த்தி கீழே சாய்ந்து அங்கு அவர் எழுதிவைத்திருந்த காகிதங்களுக்குத் தீ வைத்தது. அத்தனையும் எரிந்து கருகின. அதன் அருமை பெருமை நியூட்டன் ஒருவருக்கே தெரியும். ஏனெனில் அவை அவரது இருபது ஆண்டுக் கால ஆராய்ச்சியின் முடிவுகளடங்கிய காகிதங்கள். உலாவச் சென்று திரும்பிய நியூட்டனுக்கு அவற்றைப் பார்த்தவுடன் பெரும் அதிர்ச்சி. எல்லாம் டயமண்டின் ‘திருவிளையாடல்’ தான் என்பது அவருக்குப் புரிந்தது. அதுவோ தான் செய்த பெரிய தீங்கை அறியாது அன்பாக வாலைக் குழைத்து நியூட்டனை வரவேற்றது. நியூட்டனைத் தவிர வேறு ஒருவர் அந்த சூழ்நிலையில் இருந்திருந்தால், நாயை எத்தி உதைந்து அறைக்கு வெளியே தள்ளி கதவைச் சாத்தியிருப்பார். ஆனால் நியூட்டனோ அன்பாக நாயை எடுத்துத் தழுவி அணைத்து, “டயமண்ட், நீ செய்த சிறிய காரியத்தின் விளைவுகளை நீ அறியமாட்டாய்” என்று சொல்லிக் கொஞ்சினார். அது மீண்டும் வாலை ஆட்டி தன் நன்றியைத் தெரிவித்தது. நியூட்டன் மீண்டும் எழுதத் துவங்கினார். நியூட்டனின் பொறுமையை போல, நாம் பயணித்துக் கொண்டிருக்கும் இந்த அவசர உலகில் பொறுமையோடு வாழ அழைக்கிறது இன்றைய திருவருகைக் காலத்தின் மூன்றாம் ஞாயிற்று கிழமையின் வாசகங்கள்.

கத்தோலிக்கத் திருஅவை ஒவ்வொரு ஆண்டும் திருவருகைக் காலத்தின் மூன்றாம் ஞாயிற்றுக்கிழமையை மகிழ்ச்சியின் ஞாயிறாக கொண்டாடுகிறது. "Gaudete" ('Rejoice' in English) என்னும் இலத்தீன் வார்த்தையிலிருந்து மகிழ்ச்சி என்னும் வார்த்தை வருகின்றது. நவம்பர் மாதம் 11-ஆம் தேதி புனித மார்ட்டின் அவர்களின் திருவிழாவிலிருந்து சரியாக நாற்பது நாட்கள் திருவருகைக் கால நோன்பு கடைபிடித்ததின் நிறைவாக இந்த மகிழ்ச்சியின் ஞாயிறானது கொண்டாடப்படுகிறது. இது கிறிஸ்தவத்தின் மற்றும் நமக்காக மீட்பர் ஒருவர் பிறக்கிறார் என்னும் கிறிஸ்தவர்களின் மகிழ்ச்சி. அதனால் தான் இயேசுவின் பிறப்பில் வானதூதர் இடையர்களிடம், “அஞ்சாதீர்கள், இதோ, எல்லா மக்களுக்கும் பெரும் மகிழ்ச்சியூட்டும் நற்செய்தியை உங்களுக்கு அறிவிக்கிறேன். இன்று ஆண்டவராகிய மெசியா என்னும் மீட்பர் உங்களுக்காகத் தாவீதின் ஊரில் பிறந்திருக்கிறார்" (லூக்கா 2:10,11) என்றார். இன்றைய முதல் வாசகமும் "ஆண்டவரால் விடுவிக்கப்பட்டோர் திரும்பி வருவர்; மகிழ்ந்து பாடிக் கொண்டே சீயோனுக்கு வருவர்; அவர்கள் முகம் என்றுமுள மகிழ்ச்சியால் மலர்ந்திருக்கும்; அவர்கள் மகிழ்ச்சியும் பூரிப்பும் அடைவார்கள்; துன்பமும் துயரமும் பறந்தோடும்." என அவரால் எழும் மகிழ்வை எடுத்துரைக்கிறது. 'பொறுமை கடலினும் பெரியது' என்னும் சொல்லாடலுக்கு ஏற்ப மகிழ்ச்சியின் ஞாயிறு நம்மை பொறுமையோடு வாழ அழைப்பு தருகிறது.

பொறுமையின்மையின் அறிகுறி

இன்றைய நற்செய்தி வாசகத்தில் யோவானின் சீடர்கள் “வரவிருப்பவர் நீர் தாமா? அல்லது வேறு ஒருவரை எதிர்பார்க்க வேண்டுமா?” என்று கேட்கின்றனர். (மத் 11:2) இது அவர்கள் பொறுமை இழந்ததன் அறிகுறியாகும். இதற்கு இரண்டு காரணங்களை கூறலாம். 1. யோவான் சிறையிலிருந்தது மற்றும்

2. மெசியாவின் செயல்கள் மெசியாவுக்காக ஆவலோடு முன்னறிவித்து காத்திருந்தவர்கள் தங்கள் பொறுமையை இழந்து இயேசுவிடம் சென்று "வரவிருப்பவர் நீர் தாமா? என்று கேட்கின்றனர்.

பொறுமையின் பலனும் முன்மாதிரியும்

இன்றைய இரண்டாம் வாசகம் பொறுமையின் பலனை எடுத்துரைக்கிறது. "பயிரிடுபவரைப் பாருங்கள். அவர் நிலத்தின் நல்ல விளைச்சலை எதிர்பார்த்து முன்மாரியும் பின்மாரியும் பொழியுமளவும் பொறுமையோடு காத்திருக்கிறார்."(யாக் 5:7) அதே போல் "நீங்களும் பொறுமையோடிருங்கள். உங்கள் உள்ளங்களை உறுதிப்படுத்துங்கள். ஏனெனில் ஆண்டவரின் வருகை நெருங்கி வந்து விட்டது" (யாக் 5:8) என்கிறது. இங்கு ஆண்டவருக்காய் பொறுமையோடு நமது தயாரிப்பும் காத்திருப்பும் புதுவாழ்வு என்னும் பலனை தரும். மேலும், "நீங்கள் துன்பத்தைத் தாங்குவதிலும் பொறுமையைக் கடைபிடிப்பதிலும் ஆண்டவரின் பெயரால் பேசிய இறைவாக்கினரை உங்களுக்கு மாதிரிகளாகக் கொள்ளுங்கள்."(யாக் 5:10) என நமக்கு பொறுமைக்கான முன்மாதிரியையும் தருகிறது. சிறியோர் செய்த சிறு பிழையெல்லாம் பெரியோராயின் பொறுப்பது கடனே - வெற்றி வேர்க்கை நிறையுடைமை நீங்காது வேண்டின் பொறையுடைமை போற்றி ஒழுகப்படும் – குறள் பல ஆண்டுகளாக ஆண்டவரின் வருகைக்காக பொறுமையோடு காத்திருந்த இஸ்ராயேல் மக்களை போல, இயேசு நம்முள் பிறக்க வேண்டுமென்று பொறுமையோடு காத்திருப்போம். இந்தப் பொறுமை வெறும் கொண்டாடவிருக்கின்ற கிறிஸ்துமஸ் திருவிழாவிற்கு மட்டுமல்லாது, நமது அன்றாட ஜெப வாழ்விலும் இறைவனின் ஆசீரும் அருளும் கிடைக்க வேண்டுமென்று பொறுமையோடு காத்திருப்போம். இரவு முழுவதும் விழித்திருந்தாலும் கூட ஒரு மலர் மலர்வதை நம்மால் காண இயலாது. ஆனால் காலையில் பூத்து மணக்கும் போது தான் மொட்டின் பொறுமையான மலர்ச்சி நமக்கு புரியும். வெறும் நமது கிறிஸ்தவ வாழ்வில் மட்டுமல்லாது அன்றாட குடும்ப வாழ்விலும் பொறுமை அடிப்படையாக தேவைப்படுகிறது. கணவன் மற்றும் மனைவியிடையே பொறுமையின்மை அவர்களின் வாழ்வையே அழித்துவிடும். இதைத்தான் சீன பழமொழி 'ஒரு கண நேர பொறுமை பேரழிவைத் தடுக்கவும் செய்யும், ஒரு கண நேர பொறுமையின்மை மொத்த வாழ்வை கூட அழிக்கவும் செய்யும்' என்கிறது. இன்று பொறுமையாக குடும்பத்தில் உள்ளவர்களுக்கும் அடுத்தவர்களுக்கும் செவி கொடுக்காததால் பல பிரச்சனைகள் உருவாகிறது. அதுமட்டுமல்லாது பொறுமையின்மை அடுத்தவர்களின் தவறான மதிப்பீட்டுக்கு ஆளாவது, பிறருக்குத் துன்பம் விளைவிப்பது மற்றும் கவனம் சிதைவு போன்ற பல பாதிப்புகளை வர செய்கின்றது. இன்றைக்கு நாம் அவசர உலகில் வாழ்ந்து கொண்டிருக்கிறோம். எல்லாமே நமக்கு உடனடியாக கிடைத்து விட வேண்டும், எங்கு செல்ல வேண்டுமானாலும் நாம் உடனடியாக சென்று விட வேண்டும் மற்றும் எதையும் வேகமாக நடத்தி முடித்து விட வேண்டும் என அவசரத்தில் வாழ்ந்து கொண்டிருக்கின்ற நாம் ஒவ்வொருவரும் பொறுமையை கற்றுக் கொள்வோம். ‘பதறாத காரியம் சிதறாது’ என்பது போல நிதானத்தை உருவாக்கிக்கொள்ளும்போது பிரச்சினைகளுக்குத் தீர்வு காணவும் வாழ்க்கையின் சிக்கல்களைக் களையவும் பல வழிகள் பிறக்கின்றன. எனவே நம் வாழ்வின் எல்லா நிலைகளிலும் பொறுமையோடு வாழ முயற்சிப்போம். இறைவன் நம் ஒவ்வொருவரையும் ஆசீர்வதிப்பார்.

Fr. அ. குழந்தை யேசு ராஜன் CMF
கிளரீசியன் ஊடகப் பணியகம்
தாம்பரம், சென்னை

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - திருவருகைக் காலம் 2-ஆம் ஞாயிறு - ( ஆண்டு- C) - 04 -12-2022- ஞாயிற்றுக்கிழமை

                    🌱விவிலிய விதைகள்🌱

திருவருகைக் காலம் 2-ஆம் ஞாயிறு

தமிழ் திருவழிபாட்டு மறையுரை

(04 டிசம்பர் 2022, ஞாயிறு)

முதல் வாசகம்: எசா 11:1-10

இரண்டாம் வாசகம்: உரோ 15: 4-9

நற்செய்தி: மத் 3: 1-12

மனமாற்றம் என்னும் பாதை

        தன்னிடம் சீடனாக புதிதாக வந்து சேர்ந்தவரிடம் குரு கேட்கிறார், "ஆன்மீகத்தின் நோக்கம் என்ன என்று சொல்ல முடியுமா?" புதிய சீடன், "இறைவனை அறிவதும், அடைவதும் தான் ஆன்மீகத்தின் நோக்கம்" என்கிறான். "இத்தனை நாள் ஆன்மீக செயல்பாடுகளில் ஈடுபட்டு வருகிறாயே, இறைவனை அறிந்தாயோ" என்று கேட்கிறார். "இல்லை, ஆனால் முயன்று கொண்டிருக்கிறேன்" என்றான். அதற்கு குரு, "நல்லது, உண்மையிலேயே இறைவனை அறிந்து விட முடியும் என்று நம்புகிறாயா?" என்று மீண்டும் கேட்டார். சீடன் சற்றே யோசித்து விட்டுச் சொன்னான், "நம்புகிறேன்... இருப்பினும், கொஞ்சம் சந்தேகமாகவே இருக்கிறது." "எதனால் இந்த சந்தேகம் வருகிறது? "பலர் பலவிதமாக இறைவனைப் பற்றி சொல்கிறார்கள். மிகவும் ஆராய்ந்து பார்த்தால் தெளிவைவிட குழப்பமே மிஞ்சுகிறது." என்றான் சீடன். 'நல்லது... எப்போது நீ உள்ளது உள்ளபடி சொன்னாயோ அதுவே நல்லது சீடனே... இப்போது நான் வேறு விதமாக கேட்கிறேன்... நீ ஆண்டவனை தெரிந்து கொள்ள, அடைய உண்மையிலேயே விரும்புகிறாயா?" "ஆமாம் குருவே." என்றான். சீடனே, உன் விருப்பத்தின் காரணமாகவே நீ ஆன்மீக செயல்பாடுகளில் ஈடுபட்டு இருக்கிறாய். இறைவனை அடைய ஒரு எளிமையான மாற்று வழியை சொல்லித் தருகிறேன். இந்த வழியில் இறைவனை அடைய முடியாது. ஆனால், இறைவன்தான் உன்னை வந்து அடைவார்" என்றார் குரு. "இது குழப்பமாக இருக்கிறதே." என்றான் சீடன். "ஒரு குழப்பமும் இல்லை, அரசன் இருக்கிறார் அவர் அருகே நெருங்குவதோ, பேசுவதோ, அறிவதோ எளிமையான விஷயமல்ல. முடியவும் முடியாது, ஆனால் ராஜாவை சந்திக்க வேண்டும் என்ற ஆசை ஒருவனுக்கு இருக்கிறது. அவன் நாட்டில் உள்ள எல்லா மக்களும் பயன்படும்படியாக கடுமையாக உழைக்கிறான். பல நல்ல செயல்களை செய்கிறான். இந்த செய்தியை ராஜா அறிகிறார். உடனே தான் கேள்விப்பட்ட அந்த மனிதனை பார்ப்பதற்கு அவரே அழைப்பு தருகிறார் அல்லது அவரே சென்று நேரில் பார்க்கிறார். அவனோடு உரையாடுகிறார், பாராட்டுகிறார் மற்றும் பரிசுகள் தருகிறார். இவ்வாறெல்லாம் நடக்கும் இல்லையா?" "நிச்சயம் நடக்கும் குருவே" என்கிறான் அந்த சீடன். மேலும் குரு சீடனிடம், "ராஜா தான் இறைவன், நீ தான் அவன், நீ என்ன முயற்சி செய்தாலும் ராஜாவை அடைய இயலாது. ஆனால் உன் செயல்கள் பலருக்கும் பயனுள்ளதாக இருந்தால் ராஜாவே உன்னை பார்க்க வருவார். இறைவனை பார்க்கும் முயற்சியை கைவிடு, இறைவன் உன்னை தேடி வர தகுதியான செயல்களில் ஈடுபடு, உன்னை தயாரித்துக் கொள், இறைவன் உன்னை வந்து அடைவார்" என்று கூறினார் குரு. இன்றைக்கு கிறிஸ்தவர்களாகிய நாம் ஒவ்வொருவரும் இறைவனை சந்திக்க வேண்டும் மற்றும் அவர் அருளாசீரோடும் மகிழ்ச்சியோடும் வாழ வேண்டும் என்று நினைக்கிறோம். அதற்காக பல பக்தி முயற்சிகளிலும் ஈடுபடுகிறோம். ஆனால் இந்த இறைவன் நிரந்தரமாக நம்மில், நம் உள்ளத்தில் மற்றும் நம் வாழ்வில் வந்து தங்க வேண்டும் என்று ஆசை கொள்வதில்லை. திருவருகைக் காலத்தின் இரண்டாம் ஞாயிற்றுக்கிழமையில் அடியெடுத்து வைத்துள்ள நம் ஒவ்வொருவரையும் இன்றைய இறைவார்த்தை வழிபாடு வெறும் இறையாசீரை பெறுகின்ற கிறிஸ்தவர்களாக வாழாது, நம்மை தேடி வரும் தெய்வத்தை வரவேற்று அவரில் வாழுகின்ற கிறிஸ்தவர்களாக வாழ, அதற்காக நம் வாழ்வின் பாதையை தயாரிக்க அழைப்பு தருகிறது.

    இன்றைய நற்செய்தியில் திருமுழுக்கு யோவான் ஆண்டவரின் வருகைக்காக நம் உள்ளங்களை தயாரிக்க அழைப்பு தருகிறார். "மனம் மாறுங்கள், ஏனெனில் விண்ணரசு நெருங்கி வந்துவிட்டது." என்று பறைசாற்றி நம் எல்லோருக்கும் மனமாற்றம் என்னும் புது பாதையை தருகிறார். இன்றைய நற்செய்தி முழுவதையும் வாசித்து தியானிக்கின்ற பொழுது நம்முடைய மனமாற்றம் எப்பேற்பட்டதாக இருக்க வேண்டும் என்பதை நம்மால் உணர முடியும்.

1. எளிமையான வாழ்வு

            நற்செய்தி எடுத்துரைக்கின்ற திருமுழுக்கு யோவானின் எளிய வாழ்வு நம் மனமாற்றத்தோடு தொடர்புடையதாக இருக்கிறது. திருமுழுக்கு யோவான் பாலைவனத்தில் வாழ்ந்ததையும், ஒட்டக முடியாலான ஆடையை அணிந்ததையும், தோல் கச்சையை இடையில் கட்டியதையும் மற்றும் காட்டுத் தேன், வெட்டுக்கிளி போன்ற உணவை உண்டதையும் எடுத்துரைத்து, அவரின் எளிய வாழ்வை நமக்கு காட்டுவதன் அர்த்தம் நாமும் எளிய வாழ்வை ஏற்றுக் கொள்ள பெறும் அழைப்பாகும். இங்கு எளிமையான வாழ்வு என்பது நமது செல்வங்களை தூக்கி எறிந்து விட்டு குடிசையில் வாழ்வது அல்ல, மாறாக நம் வாழ்வில் எல்லோரையும் ஏற்றுக் கொள்வதும், நம்மிடையே இருப்பதை எல்லோரிடமும் பகிர்ந்து கொள்வதும் ஆகும். எவ்வித பாகுபாடுமின்றி அனைவரையும் ஏற்றுக்கொண்டு, ஏழை எளியவருக்கு நம்மாலான உதவிகளை செய்கின்ற எளிமையான உள்ளம் கொண்ட வாழ்வே உண்மையான மனமாற்றம் என்பதை திருமுழுக்கு யோவானின் பாலைவன வாழ்வு நமக்கு எடுத்துரைக்கிறது.

2. வெளிவேடமற்ற வாழ்வு

            இன்றைய நற்செய்தியில் திருமுழுக்கு யோவான் சதுசேயர் மற்றும் பரிசேயர்களை "விரியன் பாம்புக் குட்டிகளே, வரப்போகும் சினத்திலிருந்து தப்பிக்க இயலும் என உங்களிடம் சொன்னவர் யார்?" எனக் கேட்பது சரி செய்யவில்லை வெளிவேட வாழ்வு உண்மையான மனமாற்றம் அல்ல என்பதை எடுத்துரைக்கிறது. சதுசேயர்களும், பரிசேயர்களும் சுயநல வாழ்வை வாழ்ந்து தங்கள் வாழ்வுக்காக பிறரை கஷ்டப்படுத்தி வாய்ப்பேச்சு வீரர்களாக வாழ்ந்தவர்கள். சட்டங்களை தங்கள் சுயநலத்துக்காக பயன்படுத்தி, பிறர் வாழ்வை அழித்து இயேசு கூட தங்கள் விருப்பப்படி நடக்க வேண்டும் என்று நினைத்தவர்கள். கிறிஸ்தவர்களாகிய நமது மனமாற்றம் இத்தகைய பரிசேய மற்றும் சதுசேய வெளிவேட மாற்றமாக அல்லாது, உண்மையான மனமாற்றமாக அமைய திருமுழுக்கு யோவான் அழைப்பு தருகிறார்.

3. தூய ஆவியில் வாழ்வு

            திருமுழுக்கு யோவான் மனமாற்றத்தின் அடையாளமாக மக்களுக்கு தண்ணீரால் திருமுழுக்கு கொடுத்தார். அவரே "எனக்குப் பின் ஒருவர் வருகிறார். அவர் என்னை விட வலிமை மிக்கவர். அவருடைய மிதியடிகளைத் தூக்கிச் செல்லக் கூட எனக்குத் தகுதியில்லை. அவர் தூய ஆவி என்னும் நெருப்பால் உங்களுக்குத் திருமுழுக்குக் கொடுப்பார்." என்று உரைக்கிறார். இது கிறிஸ்தவர்களாகிய நம் ஒவ்வொருவரின் மனமாற்றமும் தூய ஆவியில் வாழ நம்மை அழைத்துச் செல்லும் மாற்றமாக அமைய வேண்டும் என்பதை எடுத்துரைக்கிறது. நாம் ஒவ்வொருவரும் தூய ஆவியின் ஆலயங்களாக வாழுகின்ற ஒரு மாற்றமாக நமது மனமாற்றம் அமைவதே ஆண்டவரின் வருகைக்காக உண்மையான தயாரிப்பாகும். அப்படியென்றால் நமது மனமாற்றம் நம்மை தூய ஆவியின் கனிகளையும் கொடைகளையும் நமது வாழ்வாக்க அழைத்துச் செல்வதாக இருக்க வேண்டும். அன்று அன்னை மரியாள் தூய ஆவியின் அருளால் கிறிஸ்துவை தன்னுடைய கருவில் தாங்கி, ஆவியின் ஆலயமாக மாறி இறுதி வரை மீட்பு திட்டத்திற்காக தன்னை முழுவதுமாக அர்ப்பணித்தார். ஆண்டவர் இயேசுவின் இறப்புக்குப் பிறகு திருத்தூதர்களும் தங்களை முழுவதுமாக அர்ப்பணித்து பெந்தகோஸ்து நாளில் தூய ஆவியை பெற்று இயேசுவை அகில உலகத்திற்கும் எடுத்துச் சென்றனர். இன்று நாமும் அதே ஆவியில் வாழ்கின்ற ஒரு மாற்றத்தை நம்மில் உருவாக்கி பிறக்கவிருக்கின்ற இயேசுவை நம்முள் ஏற்றுக்கொள்வோம்.

4. கிறிஸ்துவில் வாழ்வு

                இன்றைய முதல் வாசகம் தங்கள் உயிரை காப்பாற்றிக் கொள்ள சிதறி சென்ற இஸ்ராயேல் மக்களுக்கு, ஜெசெவின் கோத்திரத்திலிருந்து மெசியா தோன்றுவார். அவர் மீது ஆண்டவரின் ஆவி தங்கும்‌. நீதியோடு தீர்ப்பு வழங்குவார் என்னும் தேடி வரும் மெசியாவின் நம்பிக்கையூட்டும் செய்தியை இறைவாக்கினர் எசாயா அறிவிக்கின்றார். இன்றைய இரண்டாம் வாசகம் நாம் ஒரே மனத்தினராக வாழ வேண்டும் என்றும் ஒருவர் மற்றவரை ஏற்றுக்கொண்டு கிறிஸ்துவின் வருகைக்காக நம்மை தயாரிக்க அழைப்பு தருகிறது. இன்றைய நற்செய்தியில் நம்மை தேடி வரும் தெய்வத்திற்கு மனமாற்றம் என்னும் பாதையை நம் வாழ்வில் உருவாக்க திருமுழுக்கு யோவான் அழைப்பு தருகிறார். நமது மனமாற்றம் கிறிஸ்துவில் நம்மை வாழ வைக்க வேண்டும். கிறிஸ்துவை சாராத வாழ்வு உண்மையான மனமாற்றம் பெற்ற வாழ்வாக அமையாது. எனவே திருவருகை காலத்தில் பயணித்துக் கொண்டிருக்கின்ற நம் ஒவ்வொருவரும் மனமாற்றம் என்னும் பாதையை ஆண்டவருக்காக உருவாக்குவோம் அவரை நம் உள்ளத்திலும் வாழ்விலும் ஏற்றுக் கொள்வோம். இறைவன் நம் ஒவ்வொருவரையும் ஆசீர்வதிப்பார்.

Fr. அ. குழந்தை யேசு ராஜன் CMF
கிளரீசியன் ஊடகப் பணியகம்
தாம்பரம், சென்னை

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - திருவருகைக் காலம் முதல் ஞாயிறு - ( ஆண்டு- C) - 27 -11-2022- ஞாயிற்றுக்கிழமை

                                                                                                                🌱விவிலிய விதைகள்🌱

திருவருகைக் காலம் முதல் ஞாயிறு

தமிழ் திருவழிபாட்டு மறையுரை

(27 நவம்பர் 2022, ஞாயிறு)

முதல் வாசகம்: எசா 2:1-5

இரண்டாம் வாசகம்: உரோ 13: 11-14

நற்செய்தி: மத் 24: 37-44

விழிப்பும் - தயாரிப்பும்

அன்பிற்குரியவர்களே,

புதிய திருவழிபாட்டு ஆண்டின் தொடக்கமாக திருவருகைக் காலத்தில் நுழைந்திருக்கின்றோம். நான்கு வாரங்கள் கிறிஸ்து பிறப்புக்காக நம்மை நாமே தயாரிக்க திரு அவை இக்காலத்தை தந்திருக்கிறது. ஆக இது ஒரு தயாரிப்பின் காலம். நான்கு மற்றும் ஐந்தாம் நூற்றாண்டுகளில் கீழை நாட்டு திருச்சபையில் ஒவ்வொரு ஆண்டும் ஜனவரி மாதம் ஆறாம் தேதி திருக்காட்சி திருவிழாவை கொண்டாடினார்கள். அதில் பலரும் திருமுழுக்கு பெறுவதுண்டு, இவர்கள் இத்திருமுழுக்கை பெறுவதற்கு பல நாட்களாக தங்களை தயாரிப்பதுண்டு, இவர்கள் எடுத்துக் கொண்ட இந்த தயாரிப்பின் நாட்களே பின்னர் திருவருகைக் காலமாக அதாவது கிறிஸ்து பிறப்பு பெருவிழா தயாரிப்பின் காலமாக மாறியது.

முட்டை வியாபாரி ஒருவர் தனக்குப்பின் தன் கடையை நிர்வகிக்கக்கூடிய திறமை தன்னுடைய இரு மகன்களில் யாரிடம் இருக்கின்றது என்று சோதித்தறிந்து அவனிடம் கடையை ஒப்படைக்க நினைத்தாராம். எனவே தன் இரு மகன்களையும் அழைத்து அவர்கள் இருவருக்குமே தலா 1000 ரூபாயை கொடுத்து கடைக்கு முட்டை வாங்கி வரச் சொன்னாராம். இருவரும் சந்தைக்கு சென்றனர். மூத்த மகன் நன்றாக யோசித்து ஆயிரம் ரூபாயில் 200 ரூபாய்க்கு முட்டை வைக்கக் கூடிய பெட்டியையும், 100 ரூபாய்க்கு அந்த பெட்டிக்கு ஒரு பூட்டையும், மீதமுள்ள 700 நூறு ரூபாய்க்கு முட்டையையும் வாங்கினான். ஆனால் இளைய மகன் 200 ரூபாய்க்கு முட்டை வைக்கக் கூடிய பெட்டியை வாங்கிவிட்டு, ஏன் தேவையில்லாமல் பூட்டிற்காக 100 ரூபாய் செலவு செய்ய வேண்டும், மீதமுள்ள 800 ரூபாய்க்கு முட்டையை வாங்குவோம் அப்போது தான் தந்தை என்னை பாராட்டி கடையின் உரிமையை எனக்கு கொடுப்பார் என நினைத்தான். இருவரும் முட்டையை எடுத்துக்கொண்டு வருகின்ற வழியில், தண்ணீர் குடிக்கலாம் என்று ஒரு மரத்தருகே தங்களது முட்டை பெட்டிகளை வைத்தார்கள். அப்போது மரத்திலிருந்து குரங்குகள் வந்து பூட்டு போடாத முட்டை பெட்டியை திறந்து அதிலிருந்த முட்டைகளை எடுத்து வெளியே வீசி அனைத்தையும் நாசமாக்கியது. இறுதியாக வரவிருக்கின்ற ஆபத்தை அறிந்து விழிப்போடு அதற்காக தயாரித்த மூத்த மகனை தந்தை பாராட்டி கடையின் முழு பொறுப்பையும் ஒப்படைத்தார். இன்று நாம் கொண்டாடிக் கொண்டிருக்கின்ற திருவருகைக் காலத்தின் முதல் ஞாயிற்றுக்கிழமை இறைவார்த்தை வழிபாடும் நம் ஒவ்வொருவரையும் விழிப்போடும் தயாரிப்போடும் வாழ அழைக்கிறது.

இன்றைக்கு நமது அன்றாட வாழ்வில் அனைத்து செயல்பாடுகளுக்கும் மற்றும் நமது இலக்குகளை அடைவதற்கும் விழிப்பும் தகுந்த முன்தயாரிப்பும் அவசியமாகிறது. கிறிஸ்தவர்களாகிய நம் ஒவ்வொருவரையும் திருஅவையானது இறைமகன் இயேசுவை நமது வாழ்விலும் மற்றும் உள்ளத்திலும் ஏற்றுக்கொள்ள விழிப்போடு தயாரிக்க அழைப்பு தருகிறது. இச்சிந்தனையை நம்மில் விதைக்க இன்றைய நற்செய்தியில் இயேசு இரண்டு விதமான எடுத்துக்காட்டுகளை கூறுகிறார்.

1. நோவாவும் மக்களும்

பழைய ஏற்பாட்டில் நோவா ஆண்டவருடைய வார்த்தையை ஏற்று வரவிருக்கும் பேராபத்திலிருந்து காப்பாற்றிக் கொள்ள விழிப்போடு பெட்டகத்தை தயாரிக்கிறார். இந்த முன் தயாரிப்பு நோவாவின் குடும்பத்தையும் பல உயிரினங்களையும் காப்பாற்றியது. ஆனால் நோவா காலத்தில் வாழ்ந்த மக்கள் வரவிருக்கின்ற ஆபத்தை அறியாது சிற்றின்ப ஆசைகளில் மூழ்கி நோவாவை ஏளனம் செய்து வாழ்ந்து மழை வெள்ளத்தில் இறந்தனர். விழிப்பும் தகுந்த முன்தயாரிப்பும் இங்கு வாழ்வு கொடுத்தது.

2. வீட்டு உரிமையாளரும் திருடனும்

இன்றைய நற்செய்தியில் இயேசு திருடன் வரும் வேளையில் வீட்டு உரிமையாளர் தன் வீட்டிலுள்ள பொருட்களை பாதுகாப்பதற்காக விழிப்போடு இருக்க வேண்டிய அவசியத்தை எடுத்துரைக்கிறார். வீட்டு உரிமையாளரின் விழிப்பு நிலை தான் அவரது உடமைகள் அனைத்தையும் பாதுகாக்கும். இவ்வாறு இவ்விரு எடுத்துக்காட்டுகளின் வழியாக இயேசு நம் ஒவ்வொருவரையும் விழிப்போடும் தயாரிப்போடும் வாழ அழைப்பு தருகிறார்.

இன்றைய இரண்டாம் வாசகமும் "இறுதிக்காலம் இதுவே என அறிந்து கொள்ளுங்கள்; உறக்கத்தினின்று விழித்தெழும் நேரம் ஏற்கெனவே வந்துவிட்டது. நாம் கிறிஸ்துவின்மேல் நம்பிக்கை கொண்டபோது இருந்ததை விட மீட்பு இப்பொழுது மிக அண்மையில் உள்ளது." (உரோமையர் 13:11) என ஆண்டவரின் வருகையை எதிர்கொள்ள விழித்திருந்து தயாரிக்க அழைப்பு தருகிறது. இத்திருவருகைக் காலத்தில் நாம் நான்கு நிலைகளில் விழிப்போடும் தகுந்த முன் தயாரிப்போடும் ஆண்டவர் இயேசுவின் வருகைக்காக நம்மை தயாரிக்க முடியும்.

1. இயேசுவை அறிதல்

விழிப்பின் முதல் நிலையாக கிறிஸ்தவர்களாகிய நாம் ஒவ்வொருவரும் கிறிஸ்துவை அறிந்திருக்க வேண்டும். இவர் நமக்காக இந்த மண்ணுலகில் மனிதனாக அவதரித்து சிலுவையில் தன்னுயிரை அளித்து நம் பாவங்களிலிருந்து மீட்பு கொடுத்தார் என்பதை முற்றிலும் அறிய வேண்டும். மேலும் இவர் ஒவ்வொரு நாளும் இறைவார்த்தை மற்றும் நற்கருணையின் வழியாக நம்முள் வருகின்றார் என்பதையும் அறிந்து அதற்காக நம்மை தயாரிக்க வேண்டும். குறிப்பாக நாம் துவங்கியிருக்கின்ற இந்த திருவருகைக் காலத்தில் பிறக்க இருக்கும் இயேசுவை நம் உள்ளத்திலும் வாழ்விலும் பிறக்க செய்ய விழிப்போடு நம்மை தயாரிக்க வேண்டும். வெறும் அன்றாட நாட்டு நிகழ்வுகளை மட்டும் அறிந்து கொள்பவர்களாக நாம் இல்லாது, நமக்காக ஒருவர் இருக்கின்றார் என அறிந்து அவரை ஏற்றுக்கொள்ள நம்மை முழுவதுமாக தயாரிப்போம்.

2. தன்னை அறிதல்

விழிப்பின் இரண்டாவது நிலையாக தன்னிலையை முற்றிலுமாக நாம் ஒவ்வொருவரும் அறிந்து கொள்ள வேண்டும். அப்போதுதான் இயேசுவை அறிந்த நாம் அவரை நமது வாழ்க்கைக்குள் கொண்டுவர முடியும். நமது கிறிஸ்தவ வாழ்வு எப்படியிருக்கின்றது? கிறிஸ்துவுக்குள் நம்முடைய வாழ்வு எத்தகைய நிலையில் இருக்கின்றது? மேலும் இந்த கிறிஸ்துவை நம்முள் மற்றும் நம் வாழ்க்கைக்குள் ஏற்றுக்கொள்ள நாம் தயாராக இருக்கின்றோமா? இந்த திருவருகைக் காலத்தில் இயேசுவை நம்முள் ஏற்றுக் கொள்வதற்கு, நமது பங்குகளில் பாவசங்கீர்த்தனம் செய்கின்ற ஒரு வாய்ப்பு கிடைக்கும். இதன் மூலம் நாம் ஒவ்வொருவரும் நமது உள்ளங்களையும் வாழ்வையும் தூய்மைப்படுத்தி இயேசுவை நம்முள் ஏற்றுக்கொள்ள முயற்சி செய்வோம்.

3. பிறரை அறிதல்

விழிப்பின் மூன்றாவது நிலையாக நம்மோடு உடல் வாழுகின்ற சகோதர சகோதரிகளை நாம் ஒவ்வொருவரும் அறிந்திருக்க வேண்டும். இறைவனை அறிந்து, நம் நிலையை அறிந்து இறைவனை நம்முள் ஏற்றுக் கொண்ட நாம் பிறரையும் ஏற்றுக் கொள்ள முயற்சி எடுக்க வேண்டும். குறிப்பாக இத்திருவருகைக் காலத்தில் நம்மோடு உடன் வாழுகின்ற ஏழை எளிய மக்களை அறிந்து அவர்களுக்கு உடை மற்றும் உணவு கொடுத்து உதவிட வேண்டும். இதுவும் பிறக்கவிருக்கின்ற இயேசுவுக்காக நாம் எடுக்கும் தயாரிப்பாகும். எனவே நம்முடைய சமுதாயத்திலிருக்கின்ற நம் சகோதர சகோதரிகள் இறைவனை ஏற்றுக்கொள்ள தங்களை தயாரிக்கவும், அவர்களை தயாரிப்பதன் மற்றும் உதவுவதன் மூலமாக நம்மை நாமே தயாரிக்கவும் முயற்சி எடுப்போம்.

4. சூழலை அறிதல்

விழிப்பின் நான்காவது நிலை நாம் வாழும் சூழலை அறிந்திருத்தல். குறிப்பாக நம்முடைய குடும்பம், இல்லம், பங்கு மற்றும் சமுதாயத்தின் நிலையை நன்கு அறிந்து, நாம் நம்மை தயாரித்தது போல நம்முடைய சூழலையும் இயேசுவின் வருகைக்காக மற்றும் கிறிஸ்தவ விசுவாசத்திற்காக தயாரிக்க நாம் உதவ வேண்டும். "ஒளிமயமாகிறது. ஆதலால், “தூங்குகிறவனே, விழித்தெழு; இறந்தவனே, உயிர்பெற்றெழு; கிறிஸ்து உன்மீது ஒளிர்ந்தெழுவார்” (எபேசியர் 5:14) என்னும் இறைவார்த்தைக்கு ஏற்ப நமது பங்கு சமூகம் கிறிஸ்துவில் உயிர்த்தெழ மற்றும் விழித்தெழ நமது பங்களிப்பை தருவோம். பிறக்கவிருக்கின்ற இயேசு பாலகனை நம் வாழ்வாக்க நம்மை முழுவதுமாக தயாரிப்போம். அன்று பத்து கன்னியர்களுள் முன்மதியுடைய ஜவர் விளக்குகளோடும் மற்றும் எண்ணெய் கலன்களோடும் மணமகனை எதிர்கொள்ள வந்தது போல, நாமும் ஆண்டவரை எதிர்கொள்ள விழிப்போடு நம்மை தயாரித்து அவரை நமது உள்ளங்களில் ஏற்றுக் கொள்வோம். இறைவன் நம் ஒவ்வொருவரையும் ஆசிர்வதிப்பார்.

Fr. அ. குழந்தை யேசு ராஜன் CMF
கிளரீசியன் ஊடகப் பணியகம்
தாம்பரம், சென்னை

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - கிறிஸ்து அரசர் பெருவிழா - ( ஆண்டு- C) - 20 -11-2022- ஞாயிற்றுக்கிழமை

🌱விவிலிய விதைகள்🌱

கிறிஸ்து அரசர் பெருவிழா

தமிழ் திருவழிபாட்டு மறையுரை

(20 நவம்பர் 2022, ஞாயிறு)

முதல் வாசகம்: 2 சாமு 5: 1-3

இரண்டாம் வாசகம்: கொலோ 1: 12-20

நற்செய்தி: லூக் 23: 35-43

வாழ்வளிக்கும் கிறிஸ்து அரசர்

வாழ்க்கையை வெறுத்த மன்னர் ஒருவர் தற்கொலை எண்ணத்தில் அதிகரித்து தன்னுடைய ரதத்தில் இமயமலையை நோக்கி பயணித்துக் கொண்டிருந்தார். அப்பொழுது வழியில் ஒரு மனிதர் மரத்தடியில் தியானம் செய்து கொண்டிருந்தார். எளிமையான அவரது முகம் தாமரைப் போல மலர்ந்திருந்தது. எனவே அதைக் கண்டு தன்னுடைய ரதத்தினை நிறுத்தி அவர் அருகே சென்றார். கண்களைத் திறந்த அந்த மனிதர், என்ன வேண்டும்? எனக் கேட்டார். நான் காசியின் மன்னர், செல்வம் எல்லாம் இருந்தும் ஏதுமில்லாதது போல மனம் வாடுகிறேன். எளிமையாக இருந்தாலும் உங்களின் முகம் பிரகாசமாக இருக்க, அது என்னை ஈர்த்தது, சாக முடிவெடுத்த நிலையிலும் உங்களிடம் சற்று நேரம் பேசத் தோன்றுகிறது, அதனால் நின்று விட்டேன் என்றார். மன்னரின் பேச்சைக் கேட்டாலும் அந்த மனிதரின் பார்வை முழுவதும் மன்னரின் கால்களை நோக்கியே இருந்தது. மன்னருக்கு சிறு வயது முதல் கால்களை ஆட்டும் பழக்கம் இருந்தது. அந்த மனிதர் தனது கால்களை பார்க்கிறார் என்பதை அறிந்ததும் சற்றென அசைப்பதை நிறுத்தினார் மன்னர். மன்னா, எவ்வளவு காலமாக இந்த பழக்கம் உள்ளது? என கேட்டார். அவர் நினைவு தெரிந்த நாள் முதல் என்றார். இப்போது ஏன் நிறுத்திவிட்டாய்? என்று கேட்டார். அவர் நீங்கள் என் கால்களையே உற்று கவனித்தீர்கள் என்றார். பார்த்தாயா மற்றவர் உன்னை கவனிக்க வேண்டும் என கருதுகிறாய். பிறரை சார்ந்தே வாழ ஆசைப்படுகிறாய். உலகத்தைப் பற்றி கவலைப்படாதே, உன் கால்களை நான் கவனித்தால் நீண்ட நாள் பழக்கத்தை கூட நிறுத்தி விட்டேன் என்கிறாய். இனி உன்னையே நீ கவனிக்க தொடங்கு எதையெல்லாம் நிறுத்த வேண்டும் என உனக்கு தெரிய வரும். உன் வாழ்க்கை இந்த உலகத்திலே மற்றவர்களிடத்திலே மற்றும் மற்றவைகளிலே அல்ல, மாறாக உன்னிலே தான் இருக்கிறது. பணிவோடு அந்த மன்னர் தாங்கள் யார் என்று கேட்டார், அதற்கு அவரோ புத்தர் என்றார். அந்த மனிதர் காலில் விழுந்து வணங்கினார். இன்றைக்கு நாமும் நமது வாழ்க்கை இந்த உலகத்திலே மற்றும் மற்றவைகளிலே இருக்கின்றது என ஓடிக் கொண்டிருக்கின்றோம். ஆனால் கிறிஸ்தவர்கள் என்னும் நம்முடைய அடையாளத்தில் அதாவது கிறிஸ்துவில் தான் நம்முடைய வாழ்க்கை இருக்கிறது என்பதை உணர்ந்து கொள்ள நாம் ஒவ்வொருவரும் அழைக்கப்படுகிறோம். இன்று திருவழிபாட்டு ஆண்டின் இறுதி ஞாயிற்றுக்கிழமை. இந்நாளை தாயாம் திரு அவையானது கிறிஸ்து அரசர் பெருவிழாவாக கொண்டாடி மகிழ்கின்றது. இந்த கிறிஸ்து அரசர் நம் ஒவ்வொருவருக்கும் வாழ்வு தருபவராக இருக்கிறார் என்பதை சிந்திக்க அழைக்கப்படுகிறோம்.

1925-ஆம் ஆண்டு பாசிச சக்திகள் கொஞ்சம் கொஞ்சமாக இந்த உலகை தன்வசம் கொண்டு வந்து கொண்டிருந்தன. இத்தாலியில் முசோலினியும், ஜெர்மனியில் ஹீட்லரும் மற்றும் உலகம் முழுவதும் பாசிச சக்திகள் ஊடுருவி கொண்டிருந்த தருணத்தில் தான் திருத்தந்தை பத்தாம் பத்திநாதர் டிசம்பர் 11-ஆம் தேதி "Quas Primas" என்னும் தனது திருத்தூது மடலில் இயேசுவை திரு அவைக்கு அரசராக பிரகடனப்படுத்தி கிறிஸ்து அரசர் பெருவிழாவை கொண்டாட அழைப்பு தருகிறார். இவ்வுலகிற்கும் திருஅவைக்கும் புது நம்பிக்கையையும் வாழ்வையும் கிறிஸ்து அரசர் தருகிறார். ஆக இவ்விழா துவங்கப்பட்டதன் முக்கிய நோக்கமே மக்கள் பாசிச சக்தியால் இழந்து கொண்டிருந்த வாழ்வை மீண்டும் கொண்டு வர வேண்டும் என்பதேயாகும்.

மீட்பின் வரலாற்றில் இஸ்ராயேல் மக்கள் தங்களுக்கென்று ஒரு அரசரை எதிர்பார்த்தனர். இறை விருப்பத்திற்கு எதிரான மக்களது பிடிவாதத்தால் இறைவன் அரசர்களை நியமிக்கின்றார். சவுல் தொடங்கி செதேக்கியா வரை எல்லா அரசர்களும் சிலை வழிபாடு, வேற்று தெய்வ வழிபாடு, ஆணவம், அதிகாரம் மற்றும் பழிவாங்குதல் என இறைவனுக்கு எதிராக வாழ்ந்து மக்களையும் தவறான வழிக்கு நடத்தினார்கள். தாவீது மற்றும் எசேக்கியா போன்ற சில அரசர்கள் மட்டுமே இறைவனுக்கு உண்மையுள்ளவர்களாய் இருந்தார்கள். எனவே தான் தாவீதின் வழிமரபில் ஒரு அரசர் உங்களுக்காக தோன்றி புதுவாழ்வு தருவார் என்பதை வெளிக்கொணர இஸ்ரயேல் மக்களுக்கு தாவீதை அரசராக திருப்பொழிவு செய்கின்ற நிகழ்வு இன்றைய முதல் வாசகமாக தரப்பட்டிருக்கின்றது. இன்றைய நற்செய்தியில் இயேசு கல்வாரி மலையில் இரண்டு கள்வர்களுக்கு இடையே சிலுவை மரத்தில் அறையப்பட்ட போது அவர்களுள் ஒருவர், "இயேசுவே, நீர் ஆட்சியுரிமை பெற்று வரும் போது என்னை நினைவிற்கொள்ளும்" என்கிறார். அதற்கு இயேசு அவனிடம், "நீர் இன்று என்னோடு பேரின்ப வீட்டில் இருப்பீர் என உறுதியாக உமக்குச் சொல்கிறேன்" (லூக் 23: 42-43) என்கிறார். இது இயேசு நாம் பாவத்திலிருந்து புதுவாழ்வு பெற தன்னுயிரை கையளிக்கின்ற இறுதி தருணத்திலும் கள்வர் ஒருவர் விடுத்த ஜெபத்தை ஏற்று விண்ணகம் என்னும் புதிய வாழ்வை உறுதிப்படுத்துவதை காட்டுகிறது. ஆக இறையாட்சியில் நம் ஒவ்வொருவருக்கும் மண்ணகத்தில் மட்டுமல்ல விண்ணகத்திலும் புது வாழ்வு உண்டு என்பதை இயேசு சிலுவையிலிருந்த போதே முன்னறிவித்திருக்கிறார். இயேசு நான்கு வகையில் நம் ஒவ்வொருவருக்கும் புது வாழ்வு அளிப்பதை அவரது பணி வாழ்வின் மூலமாக நாம் அறிந்து கொள்கிறோம்.

1. நீதியளித்து வாழ்வளித்தார்

பழைய ஏற்பாட்டில் மூன்று பகுதிகளில் வரவிருக்கின்ற கிறிஸ்து அரசர் நீதியின் அரசராக மற்றும் நேர்மையாளராக இருப்பார் என முன்னறிவிக்கப்பட்டிருக்கிறது. "மகளே சீயோன்! மகிழ்ந்து களிகூரு; மகளே எருசலேம்! ஆர்ப்பரி. இதோ! உன் அரசர் உன்னிடம் வருகிறார். அவர் நீதியுள்ளவர்; வெற்றிவேந்தர்; எளிமையுள்ளவர்; கழுதையின்மேல், கழுதைக் குட்டியாகிய மறியின்மேல் ஏறி வருகிறவர்" என செக்கரியா 9:9 வரவிருக்கின்ற அரசர் நேர்மையோடு சரியான நீதி வழங்கி வாழ்வளிப்பவராக இருப்பார் என எடுத்துரைக்கிறது. இதே போல "இதோ, ஓர் அரசர் நேர்மையுடன் அரசாள்வார்; தலைவர்களும் நீதியோடு ஆட்சி செய்வர்" என எசாயா 32:1-லும், "நேர்மையோடு ஏழைகளுக்கு நீதி வழங்குவார்; நடுநிலையோடு நாட்டின் எளியோரது வழக்கை விசாரிப்பார்; வார்த்தை எனும் கோலினால் கொடியவரை அடிப்பார்; உதட்டில் எழும் மூச்சினால் தீயோரை அழிப்பார்." -என எசாயா 11:4-லும் நீதியளித்து வாழ்வு தருகின்ற கிறிஸ்தவ அரசர் பற்றி முன்னறிவிக்கப்பட்டிருக்கிறது.

2. மன்னித்து வாழ்வளித்தார்

இறை மைந்தன் இயேசு கிறிஸ்து தவறு செய்தவர்களை மற்றும் பாவத்தில் விழுந்தவர்களை மண்ணுலக அரசர்களைப் போல தண்டனையளித்து சாகடிக்காமல், அவர்களை மன்னித்து வாழ்வு தருபவராக இருக்கிறார். அதனால் தான் விபச்சாரத்தில் பிடிபட்ட பெண்னை நோக்கி, “நானும் தீர்ப்பு அளிக்கவில்லை. நீர் போகலாம். இனிப் பாவம் செய்யாதீர்” என மன்னித்து புதுவாழ்வு அருளினார் (யோவான் 8:11). இயேசு தன் சீடர்களிடமும் "உங்களை வலக் கன்னத்தில் அறைபவருக்கு மறுகன்னத்தையும் திருப்பிக் காட்டுங்கள்" (மத்தேயு 5:39) என்றும், “ஏழுமுறை மட்டுமல்ல; எழுபது தடவை ஏழுமுறை என நான் உனக்குச் சொல்கிறேன்" (மத்தேயு 18:22) என்றும் மன்னிப்பை பற்றி பறைசாற்றி அதனால் உருவாகும் புது வாழ்வை பற்றி எடுத்துரைக்கிறார். இறுதியாக தான் சிலுவையிலிருந்த போது கூட “தந்தையே, இவர்களை மன்னியும். ஏனெனில் தாங்கள் செய்வது என்னவென்று இவர்களுக்குத் தெரியவில்லை” (லூக்கா 23:34) என்று சொல்லி அவர்களுக்கான விண்ணக வாழ்வை உறுதிப்படுத்துகிறார்.

3. உணவளித்து வாழ்வளித்தார்

அரசர்கள் என்றாலே பொதுவாக அரண்மனை, அரியணை மற்றும் அந்தஸ்தோடு இருப்பார்கள். ஆனால் கிறிஸ்து அரசர் மாட்டு கொட்டகையில் பிறந்து, தீவனத்தொட்டியில் கிடத்தப்பட்டு, அன்றே நான் பிறருக்கு உணவாக பிறந்திருக்கின்றேன் எனும் அடையாளத்தை காட்டியிருக்கிறார். ஏனென்றால் இந்த உணவு தான் மனிதன் வாழ்வதற்கு அடிப்படைத் தேவையாக இருக்கிறது. ஆனால் நம் கிறிஸ்து அரசர் தருகின்ற உணவு வெறும் உடலுக்கான உணவு அல்ல மாறாக ஆன்மாவிற்கானது. அதனால் தான் இயேசு “வாழ்வு தரும் உணவு நானே. என்னிடம் வருபவருக்குப் பசியே இராது; என்னிடம் நம்பிக்கை கொண்டிருப்பவருக்கு என்றுமே தாகம் இராது (யோவான் 6:35). என்கிறார். இதன் வெளிப்பாடாக தான் காட்டி கொடுக்கப்படுவதற்கு முந்திய இரவு நற்கருணை என்னும் வாழ்வு தரும் உணவை ஏற்படுத்தி இன்றும் நம் ஒவ்வொருவருக்கும் வாழ்வு தருகின்ற அரசராக திகழ்கிறார்.

4. தன்னுயிரளித்து வாழ்வளித்தார்

அரசர்கள் பொதுவாக போரில் மற்றும் தண்டனை வழங்குவதில் பிறரது உயிரை எடுத்து அவர்களது வாழ்வை அழிப்பார்கள். ஆனால் நம் கிறிஸ்து அரசர் தன்னுயிரை அளித்து வாழ்வை கொடுக்கிறார். பாவத்தினால் நாம் தொலைத்த வாழ்வை அவரது சிலுவை சாவால் மீண்டும் தருகிறார். இயேசுவின் சிலுவை சாவு நம் ஒவ்வொருவருக்கும் மீட்பை தந்து புதுவாழ்வை அளித்திருக்கிறது. பொதுவாக அரசர்கள் தனக்காக மற்றவரை அடிமையாக்கி வாழ்வார்கள். ஆனால் கிறிஸ்து அரசர் பிறருக்காக தன்னை சிலுவையில் அடிமையாக்கி வாழ்ந்து நம்மை வாழ வைத்துக் கொண்டிருக்கிறார். அன்று இயேசுவின் சிலுவையில் "யூதரின் அரசர்" என்று எழுதப்பட்டிருந்தது (யோவான் 19:19). ஆனால் இயேசு தனது சிலுவை மரணத்தின் வழியாக தான் யூதரின் அரசர் அல்ல, மாறாக அரசருக்கெல்லாம் அரசர், இந்த மனித குலத்திற்கு அரசர், குறிப்பாக வாழ்வு தருகின்ற அரசர் என்பதை எடுத்துக்காட்டுகிறார்.

நிலைவாழ்வு

அரசர்கள் என்றாலே பொதுவாக ஒரு குறிப்பிட்ட காலத்திற்கு மட்டும் தான் அரசாள்வார்கள். அவரது அரசாட்சி சில நாட்களுக்குள் முடிவுக்கு வந்து விடும். உலக வரலாற்றில் நாம் பார்த்த பேரரசர்களும் அவர்களுடைய ஆட்சிகளும் சில ஆண்டுகளுக்குள் முடிவடைந்து விட்டது. ஆனால் இயேசு “எனது ஆட்சி இவ்வுலக ஆட்சி போன்றது அல்ல” (யோவான் 18:36) என்கிறார். இதைத்தான் வானத்தூதரும் அன்னை மரியாவிடம் "அவர் யாக்கோபின் குடும்பத்தின் மீது என்றென்றும் ஆட்சி செலுத்துவார். அவருடைய ஆட்சிக்கு முடிவே இராது” (லூக்கா 1:33) என்றார்.கிறிஸ்து அரசரின் இறையாட்சி எக்காலத்திற்கும் நிலைத்து நிற்கக்கூடியது. அதனால் அவர் தரும் வாழ்வும் இன்று மட்டுமல்ல என்றும் நிலைத்து நிற்கும்.

இன்றைக்கு வாழ்வு தருகின்ற இந்த கிறிஸ்து அரசரை நம் வாழ்வில் ஏற்றுக் கொள்ள தயாராக இருக்கின்றோமா? இன்றைக்கு வெறும் பணம், பதவி, பொருள், சினிமா, பொழுதுபோக்கு, தொலைக்காட்சி, கணினி,மொபைல் மற்றும் உறவுகள் மட்டுமே நமக்கு நிரந்தரமான மற்றும் மகிழ்வான வாழ்வை தந்து விட முடியாது. கிறிஸ்துவில் மட்டுமே நமக்கு நிரந்தரமான மற்றும் விண்ணக வாழ்விற்கான வழி உண்டு என்பதை உணர்வோம். அவர் வழியில் இந்த மண்ணக வாழ்வை மட்டும் அல்லாது விண்ணக வாழ்வையும் பெற்றுக் கொள்ளுவோம். அரசர் மற்றும் அரசாட்சி என்றாலே அது இறந்த காலத்தை சார்ந்தது இப்பொழுது அதைக் காண நாம் வரலாற்று புத்தகத்தை தான் புரட்டி பார்க்க வேண்டும். ஆனால் காலம் மாறிய காலத்திலும் கிறிஸ்து அரசர் பெருவிழாவை ஆண்டுதோறும் நாம் கொண்டாடிக் கொண்டிருக்கின்றோம் என்றால், அது கிறிஸ்து அரசர் தரும் புது வாழ்வை நாம் பெற்று கொள்ள வேண்டும் என்பதற்காகவே ஆகும். இதை உணர்ந்து அவர் வழியில் வாழ, வளர இறையருளை வேண்டுவோம். இறைவன் நம் ஒவ்வொருவரையும் ஆசீர்வதிப்பார்.

கிறிஸ்துவில் அன்புடன், 

Fr. அ. குழந்தை யேசு ராஜன் CMF
கிளரீசியன் ஊடகப் பணியகம்
தாம்பரம், சென்னை

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 33-ஆம் வாரம் - ( ஆண்டு- C) - 13 -11-2022- ஞாயிற்றுக்கிழமை

 🌱விவிலிய விதைகள்🌱

பொதுக்காலம் 33-ஆம் ஞாயிறு

தமிழ் திருவழிபாட்டு மறையுரை

(13 நவம்பர் 2022, ஞாயிறு)

முதல் வாசகம்: மலா 4: 1-2a

இரண்டாம் வாசகம்: 2 தெச 3: 7-12

நற்செய்தி: லூக் 21: 5-19

தயாரிப்போம்

வெளிநாட்டு பிரபல பாடகர் ஒருவர் இந்தியாவில் தன்னுடைய பாடல்களை அரங்கேற்றம் செய்து கொண்டிருக்கிறார். அப்போது அவருடைய ரசிகர்களுள் ஒருவர் அவருக்கு ரோஜா பூ மாலையை அணிவிக்கிறார். அந்த மாலையை பெற்றுக் கொண்ட பின்னும், அந்த பாடகர் தொடர்ந்து நடனத்தோடு பாடலை பாடிக் கொண்டிருக்கிறார். தன்னை மறந்து நடனம் ஆட ஆட மாலையிலிருந்து ரோஜா பூ கொஞ்சம் கொஞ்சமாக உதிர்ந்து தரையில் விழ ஆரம்பித்தது. இதை பார்த்துக் கொண்டிருந்த தம்பதியருள் கணவர் மனைவியை பார்த்து, 'நீ வேண்டுமானால் பார், இவர் பாடி முடிப்பதற்குள் இவருடைய கழுத்தில் வெறும் மாலையின் நாறு மட்டும் தான் இருக்கும்' என்று கூறினார். அதற்கு அவருடைய மனைவி 'நீங்கள் ஏன் அவருடைய கழுத்திலிருக்கின்ற மாலையின் நாறை பார்க்கிறீர்கள். அதே மாலையிலிருந்த ரோஜா பூ இதழ்கள் உதிர்ந்து தரையை அலங்கரித்துக் கொண்டிருக்கின்றன. அவர் நிற்கின்ற இடம் முழுவதும் ரோஜா பூ நிறைந்து கிடக்கின்றது' என்று கூறினார். இன்றைக்கு நாம் பார்க்கின்ற, கேட்கின்ற ஒவ்வொன்றிலும் பல்வேறு உள்ளார்ந்த அர்த்தங்கள் இருக்கும். நாம் எதை பார்த்து மற்றும் எவற்றை எடுத்து கொள்கிறோம் என்பது மிகவும் முக்கியமானது. இன்றைய இறைவார்த்தையை வாசிக்கும் போது, குறிப்பாக நற்செய்தியில் இயேசு எருசலேமின் அழிவை எடுத்துரைப்பது நமக்கு அச்சத்தை கொடுத்தாலும் அதன் பின்னணியில் அவர் தரும் அழைப்பை உணர வேண்டும். பொதுக்காலத்தின் இறுதி ஞாயிறான இன்றைய 33-வது ஞாயிறு திருவழிபாட்டு வாசகங்கள் கிறிஸ்தவர்களாகிய நம் ஒவ்வொருவரையும் தகுந்த முன் தயாரிப்போடு வாழ அழைப்பு தருகிறது. இன்றைய இறைவார்த்தை வழிபாடு மூன்று விதமான எச்சரிக்கைகளை நம்முன் வைக்கின்றது. இதன் மூலம் இயேசு எவ்வாறு தன் சீடர்களையும் நம்மையும் முன் தயாரிப்போடு வாழ அழைப்பு தருகிறார் என்பதை சிந்திப்போம்.

1. துன்பத்தை எதிர்கொள்ள தயாரிப்போம்

(எருசலேம் கோவிலின் அழிவு)

இயேசுவின் காலத்தில் கட்டப்பட்டு இருந்த எருசலேம் ஆலயம் பெரிய ஏரோதால் கிமு. 20 மற்றும் 19-ல் கட்ட தொடங்கப்பட்டு கிபி 60-ல் முடிவடைந்த மூன்றாவது ஆலயமாகும். சலவைக் கற்களால் கட்டப்பட்டு, தங்க ஏடுகளால் பொதியப்பட்டு அழகிய சிறந்த வேலைப்பாடுகளுடன் விளங்கியது. உலகமே கண்டு வியக்கும் அளவுக்கு மிகவும் நேர்த்தியான கட்டடக்கலை தேவாலயத்தில் வெளிப்பட்டது. யூத மக்கள் இதன் அழகு கண்டு பெருமையால் பூரித்தார்கள். இயேசுவின் சீடர்களும் எருசலேம் தேவாலயத்தின் அழகை கண்டு பிரம்மித்தார்கள். இவ்வளவு உலகப் புகழ்பெற்ற மிகவும் அழகிய ஆலயம் அழிக்கப்படும் என இயேசு கூறுவது சீடர்களுக்கு ஒரு அடையாளம். இன்று இயேசுவோடு மகிழ்வாக இருக்கிற அவர்கள் எருசலேம் தேவாலயம் அழிவுறுவதை போல ஒரு நாள் மானிட மகன் சிலுவை சாவுக்கு ஆளாக்கப்படும் போது சீடர்கள் பல இன்னல்களுக்கும் துன்பங்களுக்கும் உள்ளாகும் நிலைவரும். இதை மனதைரியத்தோடு எதிர்கொண்டு இயேசுவின் பணியை தொடர்ந்தாற்ற அவர் அவர்களை தயார் செய்கிறார். இயேசு முன்னறிவிக்கின்ற துன்பம் லூக்கா நற்செய்தியின் இரண்டாம் பாகமாக கருதப்படுகின்ற திருத்தூதர் பணிகள் நூலில் நிறைவேறுவதை நாம் காண முடியும். திருத்தூதர்களும் மற்றும் தொடக்க கிறிஸ்தவர்களும் கிறிஸ்துவின் பொறுத்து அனுபவித்த துன்பங்களை தான் இயேசு முன்னறிவிப்பதாக இருக்கிறது. இயேசு தன்னுடைய சீடர்களை தயார் செய்கிறார். அவரது இறப்புக்குப் பிறகு தொடர்ந்து அவர்கள் அவரின் சீடர்களாக, அவர் விட்டு செல்லுகின்ற இறைப்பணியை தொடர்ந்தாற்ற ஏற்படுகின்ற துன்பங்களை எதிர்கொள்ளும் மன திறனை ஏற்படுத்த அவர்களை தயாரிக்கிறார். வரவிருக்கும் அழிவின் மத்தியிலும் மற்றும் துன்பங்களுக்கு இடையிலும் இயேசுவின் எதிர்கால சீடர்கள் இறைவழியில் வாழ முன்னறிவித்து திருத்தூதர்களை தயார்படுத்துகிறார். இன்றைக்கு இயேசு நம் ஒவ்வொருவரையும் கிறிஸ்தவர்களாக வாழ்வதற்கு இச்சமுதாயத்தில் பெறப்போகும் துன்பங்களை ஏற்றுக்கொள்ள தயாராக அழைப்பு தருகிறார். லஞ்சம், அநீதி, பொய், ஏமாற்றுத்தனம் என்னும் தவறுகளும் பாவமும் சூழ்ந்து நிற்கும் இச்சமுதாயத்தில் இயேசு கற்பித்த நற்செய்தியின் விழுமியங்களோடு உண்மை கிறிஸ்தவர்களாக வாழ்வதற்கு எண்ணற்ற தியாகங்களையும், துன்பங்களையும் சோதனைகளையும் நாம் ஏற்றுக் கொள்ள வேண்டும். இத்தகைய ஒரு வாழ்வுக்கு நம்மை தயாரிக்க கிறிஸ்து இன்று அழைப்பு தருகிறார்.

2. உண்மையானதை அறிந்திட தயாரிப்போம்

(போலி இறைவாக்கினர்கள்)

எருசலேமின் அழிவு எப்போது வரும் அதனுடைய அறிகுறி எப்படியிருக்கும் என்று இயேசுவிடம் கேட்கப்படுவதற்கு அவர் எவ்விதமான அடையாளங்களையும் தராமல் எச்சரிக்கை தருகிறார். அதாவது தாங்களே மெசியா என்று சொல்லிக் கொண்டும், மெசியாவின் காலம் வந்து விட்டது எனவும் பல போலி இறைவாக்கினர்கள் வருவார்கள், எனவே எச்சரிக்கையோடு இருக்க அழைப்பு தருகிறார். இன்று நமது அன்றாட வாழ்விலும் இறைவன் இருக்க வேண்டிய இடத்தில் பணமும், பொருளும், பதவியும் மற்றும் சிற்றின்ப ஆசைகளும் சூழ்ந்து கிடக்கின்றது. இவையெல்லாம் போலிகளே, இறைவன் ஒருவரே உண்மையானவர் மற்றும் நிரந்தரமானவர் என்பதை நாம் நமது வாழ்க்கையில் உணர்ந்து, இத்தகைய போலிகளிலிருந்து விடுபட்டு “வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை" (யோவான் 14:6) என்று சொன்ன இயேசுவை ஏற்றுக் கொள்ள நம்மை முழுவதுமாக தயாரிப்போம்.

3. மனமாற்றம் பெற்றிட தயாரிப்போம்

(உலக முடிவு)

இன்றைய முதல் வாசகம் பாபிலோனிய அடிமைத்தனத்திலிருந்து மீண்டு வந்த தென்னாடான யூதா மக்களுக்கு சொல்லப்பட்டது. இவர்கள் கோவிலையும் மற்றும் வீடுகளையும் கட்டி எழுப்பிய பின்னும் ஒழுக்கமின்மை, ஏற்றத்தாழ்வுகள் மற்றும் வறுமை போன்றவற்றால் மனசோர்வடைந்து இருந்த சூழலில் இறைவாக்கினர் மலாக்கி ஆண்டவரின் நாள் வரும் எனவும், அது எப்படியிருக்கும் என்பதையும் மற்றும் அவரின் பெயருக்கு அஞ்சி நடக்கிற ஒவ்வொருவர் மீதும் "நீதியின் கதிரவன் எழுகிறது" (2:7) என்பதையும் எடுத்துரைக்கின்றார். மேலும் இன்றைய நற்செய்தியில் இயேசு பல பேரிடர்கள் மூலம் உலகம் அழிவுறும் போதும் கிறிஸ்தவர்களாக வாழ உங்களை தயார்படுத்துங்கள் என சீடர்களுக்கு எடுத்துரைக்கின்றார். இறைவன் இஸ்ராயேல் மக்களுக்கு அவர்களது பாவ வாழ்வை பற்றிய எச்சரிக்கையை அளித்தது போல இன்றைக்கு நமது பாவ வாழ்வையும் பலர் வழியாக இறைவன் நமக்கு சுட்டிக் காட்டி எச்சரித்துக் கொண்டிருக்கிறார். இதை நமது வாழ்வில் ஏற்று, ஆண்டவரின் நாளில் நாம் ஒவ்வொருவருமே தீர்ப்பிடப்படுவோம் என்பதை முழுவதுமாக உணர்வோம். நாம் அடியெடுத்து வைக்கவிருக்கின்ற திருவருகை காலத்தில் இயேசுவை நமது உள்ளத்திலும் வாழ்விலும் ஏற்றுக்கொள்ள மனமாற்றம் பெற நம்மை முழுவதுமாக தயாரிப்போம்.

இன்றைய இரண்டாம் வாசகம் பவுலடிகளார் தெசலோனிய திருச்சபைக்கு எழுதியதாகும். இது ஆண்டவரின் இரண்டாம் வருகையை முழுமையாக உணராது சோம்பேறித்தனமாய் வாழ்ந்த மக்களை உழைத்து வாழவும், தங்களது கடமைகளை செய்யவும் மற்றும் இறுதி நாளை குறித்து அஞ்சாமல் உண்மையோடு வாழவும் அழைப்பு தருகிறது. இன்றைக்கு நாமும் ஆண்டவர் ஒரு நாள் நம் மத்தியில் நீதி தீர்ப்பிடுவார் என்பதை உணராமல் சோம்பேறித்தனமாக வாழ்ந்து கொண்டிருக்கின்றோம். இந்நிலையை தவிர்த்து இயேசுவை ஏற்றுக் கொள்கின்ற மனம் பெற இறையருளை வேண்டுவோம். இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

Fr. அ. குழந்தை யேசு ராஜன் CMF