🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - கிறிஸ்து அரசர் பெருவிழா - ( ஆண்டு- C) - 20 -11-2022- ஞாயிற்றுக்கிழமை

🌱விவிலிய விதைகள்🌱

கிறிஸ்து அரசர் பெருவிழா

தமிழ் திருவழிபாட்டு மறையுரை

(20 நவம்பர் 2022, ஞாயிறு)

முதல் வாசகம்: 2 சாமு 5: 1-3

இரண்டாம் வாசகம்: கொலோ 1: 12-20

நற்செய்தி: லூக் 23: 35-43

வாழ்வளிக்கும் கிறிஸ்து அரசர்

வாழ்க்கையை வெறுத்த மன்னர் ஒருவர் தற்கொலை எண்ணத்தில் அதிகரித்து தன்னுடைய ரதத்தில் இமயமலையை நோக்கி பயணித்துக் கொண்டிருந்தார். அப்பொழுது வழியில் ஒரு மனிதர் மரத்தடியில் தியானம் செய்து கொண்டிருந்தார். எளிமையான அவரது முகம் தாமரைப் போல மலர்ந்திருந்தது. எனவே அதைக் கண்டு தன்னுடைய ரதத்தினை நிறுத்தி அவர் அருகே சென்றார். கண்களைத் திறந்த அந்த மனிதர், என்ன வேண்டும்? எனக் கேட்டார். நான் காசியின் மன்னர், செல்வம் எல்லாம் இருந்தும் ஏதுமில்லாதது போல மனம் வாடுகிறேன். எளிமையாக இருந்தாலும் உங்களின் முகம் பிரகாசமாக இருக்க, அது என்னை ஈர்த்தது, சாக முடிவெடுத்த நிலையிலும் உங்களிடம் சற்று நேரம் பேசத் தோன்றுகிறது, அதனால் நின்று விட்டேன் என்றார். மன்னரின் பேச்சைக் கேட்டாலும் அந்த மனிதரின் பார்வை முழுவதும் மன்னரின் கால்களை நோக்கியே இருந்தது. மன்னருக்கு சிறு வயது முதல் கால்களை ஆட்டும் பழக்கம் இருந்தது. அந்த மனிதர் தனது கால்களை பார்க்கிறார் என்பதை அறிந்ததும் சற்றென அசைப்பதை நிறுத்தினார் மன்னர். மன்னா, எவ்வளவு காலமாக இந்த பழக்கம் உள்ளது? என கேட்டார். அவர் நினைவு தெரிந்த நாள் முதல் என்றார். இப்போது ஏன் நிறுத்திவிட்டாய்? என்று கேட்டார். அவர் நீங்கள் என் கால்களையே உற்று கவனித்தீர்கள் என்றார். பார்த்தாயா மற்றவர் உன்னை கவனிக்க வேண்டும் என கருதுகிறாய். பிறரை சார்ந்தே வாழ ஆசைப்படுகிறாய். உலகத்தைப் பற்றி கவலைப்படாதே, உன் கால்களை நான் கவனித்தால் நீண்ட நாள் பழக்கத்தை கூட நிறுத்தி விட்டேன் என்கிறாய். இனி உன்னையே நீ கவனிக்க தொடங்கு எதையெல்லாம் நிறுத்த வேண்டும் என உனக்கு தெரிய வரும். உன் வாழ்க்கை இந்த உலகத்திலே மற்றவர்களிடத்திலே மற்றும் மற்றவைகளிலே அல்ல, மாறாக உன்னிலே தான் இருக்கிறது. பணிவோடு அந்த மன்னர் தாங்கள் யார் என்று கேட்டார், அதற்கு அவரோ புத்தர் என்றார். அந்த மனிதர் காலில் விழுந்து வணங்கினார். இன்றைக்கு நாமும் நமது வாழ்க்கை இந்த உலகத்திலே மற்றும் மற்றவைகளிலே இருக்கின்றது என ஓடிக் கொண்டிருக்கின்றோம். ஆனால் கிறிஸ்தவர்கள் என்னும் நம்முடைய அடையாளத்தில் அதாவது கிறிஸ்துவில் தான் நம்முடைய வாழ்க்கை இருக்கிறது என்பதை உணர்ந்து கொள்ள நாம் ஒவ்வொருவரும் அழைக்கப்படுகிறோம். இன்று திருவழிபாட்டு ஆண்டின் இறுதி ஞாயிற்றுக்கிழமை. இந்நாளை தாயாம் திரு அவையானது கிறிஸ்து அரசர் பெருவிழாவாக கொண்டாடி மகிழ்கின்றது. இந்த கிறிஸ்து அரசர் நம் ஒவ்வொருவருக்கும் வாழ்வு தருபவராக இருக்கிறார் என்பதை சிந்திக்க அழைக்கப்படுகிறோம்.

1925-ஆம் ஆண்டு பாசிச சக்திகள் கொஞ்சம் கொஞ்சமாக இந்த உலகை தன்வசம் கொண்டு வந்து கொண்டிருந்தன. இத்தாலியில் முசோலினியும், ஜெர்மனியில் ஹீட்லரும் மற்றும் உலகம் முழுவதும் பாசிச சக்திகள் ஊடுருவி கொண்டிருந்த தருணத்தில் தான் திருத்தந்தை பத்தாம் பத்திநாதர் டிசம்பர் 11-ஆம் தேதி "Quas Primas" என்னும் தனது திருத்தூது மடலில் இயேசுவை திரு அவைக்கு அரசராக பிரகடனப்படுத்தி கிறிஸ்து அரசர் பெருவிழாவை கொண்டாட அழைப்பு தருகிறார். இவ்வுலகிற்கும் திருஅவைக்கும் புது நம்பிக்கையையும் வாழ்வையும் கிறிஸ்து அரசர் தருகிறார். ஆக இவ்விழா துவங்கப்பட்டதன் முக்கிய நோக்கமே மக்கள் பாசிச சக்தியால் இழந்து கொண்டிருந்த வாழ்வை மீண்டும் கொண்டு வர வேண்டும் என்பதேயாகும்.

மீட்பின் வரலாற்றில் இஸ்ராயேல் மக்கள் தங்களுக்கென்று ஒரு அரசரை எதிர்பார்த்தனர். இறை விருப்பத்திற்கு எதிரான மக்களது பிடிவாதத்தால் இறைவன் அரசர்களை நியமிக்கின்றார். சவுல் தொடங்கி செதேக்கியா வரை எல்லா அரசர்களும் சிலை வழிபாடு, வேற்று தெய்வ வழிபாடு, ஆணவம், அதிகாரம் மற்றும் பழிவாங்குதல் என இறைவனுக்கு எதிராக வாழ்ந்து மக்களையும் தவறான வழிக்கு நடத்தினார்கள். தாவீது மற்றும் எசேக்கியா போன்ற சில அரசர்கள் மட்டுமே இறைவனுக்கு உண்மையுள்ளவர்களாய் இருந்தார்கள். எனவே தான் தாவீதின் வழிமரபில் ஒரு அரசர் உங்களுக்காக தோன்றி புதுவாழ்வு தருவார் என்பதை வெளிக்கொணர இஸ்ரயேல் மக்களுக்கு தாவீதை அரசராக திருப்பொழிவு செய்கின்ற நிகழ்வு இன்றைய முதல் வாசகமாக தரப்பட்டிருக்கின்றது. இன்றைய நற்செய்தியில் இயேசு கல்வாரி மலையில் இரண்டு கள்வர்களுக்கு இடையே சிலுவை மரத்தில் அறையப்பட்ட போது அவர்களுள் ஒருவர், "இயேசுவே, நீர் ஆட்சியுரிமை பெற்று வரும் போது என்னை நினைவிற்கொள்ளும்" என்கிறார். அதற்கு இயேசு அவனிடம், "நீர் இன்று என்னோடு பேரின்ப வீட்டில் இருப்பீர் என உறுதியாக உமக்குச் சொல்கிறேன்" (லூக் 23: 42-43) என்கிறார். இது இயேசு நாம் பாவத்திலிருந்து புதுவாழ்வு பெற தன்னுயிரை கையளிக்கின்ற இறுதி தருணத்திலும் கள்வர் ஒருவர் விடுத்த ஜெபத்தை ஏற்று விண்ணகம் என்னும் புதிய வாழ்வை உறுதிப்படுத்துவதை காட்டுகிறது. ஆக இறையாட்சியில் நம் ஒவ்வொருவருக்கும் மண்ணகத்தில் மட்டுமல்ல விண்ணகத்திலும் புது வாழ்வு உண்டு என்பதை இயேசு சிலுவையிலிருந்த போதே முன்னறிவித்திருக்கிறார். இயேசு நான்கு வகையில் நம் ஒவ்வொருவருக்கும் புது வாழ்வு அளிப்பதை அவரது பணி வாழ்வின் மூலமாக நாம் அறிந்து கொள்கிறோம்.

1. நீதியளித்து வாழ்வளித்தார்

பழைய ஏற்பாட்டில் மூன்று பகுதிகளில் வரவிருக்கின்ற கிறிஸ்து அரசர் நீதியின் அரசராக மற்றும் நேர்மையாளராக இருப்பார் என முன்னறிவிக்கப்பட்டிருக்கிறது. "மகளே சீயோன்! மகிழ்ந்து களிகூரு; மகளே எருசலேம்! ஆர்ப்பரி. இதோ! உன் அரசர் உன்னிடம் வருகிறார். அவர் நீதியுள்ளவர்; வெற்றிவேந்தர்; எளிமையுள்ளவர்; கழுதையின்மேல், கழுதைக் குட்டியாகிய மறியின்மேல் ஏறி வருகிறவர்" என செக்கரியா 9:9 வரவிருக்கின்ற அரசர் நேர்மையோடு சரியான நீதி வழங்கி வாழ்வளிப்பவராக இருப்பார் என எடுத்துரைக்கிறது. இதே போல "இதோ, ஓர் அரசர் நேர்மையுடன் அரசாள்வார்; தலைவர்களும் நீதியோடு ஆட்சி செய்வர்" என எசாயா 32:1-லும், "நேர்மையோடு ஏழைகளுக்கு நீதி வழங்குவார்; நடுநிலையோடு நாட்டின் எளியோரது வழக்கை விசாரிப்பார்; வார்த்தை எனும் கோலினால் கொடியவரை அடிப்பார்; உதட்டில் எழும் மூச்சினால் தீயோரை அழிப்பார்." -என எசாயா 11:4-லும் நீதியளித்து வாழ்வு தருகின்ற கிறிஸ்தவ அரசர் பற்றி முன்னறிவிக்கப்பட்டிருக்கிறது.

2. மன்னித்து வாழ்வளித்தார்

இறை மைந்தன் இயேசு கிறிஸ்து தவறு செய்தவர்களை மற்றும் பாவத்தில் விழுந்தவர்களை மண்ணுலக அரசர்களைப் போல தண்டனையளித்து சாகடிக்காமல், அவர்களை மன்னித்து வாழ்வு தருபவராக இருக்கிறார். அதனால் தான் விபச்சாரத்தில் பிடிபட்ட பெண்னை நோக்கி, “நானும் தீர்ப்பு அளிக்கவில்லை. நீர் போகலாம். இனிப் பாவம் செய்யாதீர்” என மன்னித்து புதுவாழ்வு அருளினார் (யோவான் 8:11). இயேசு தன் சீடர்களிடமும் "உங்களை வலக் கன்னத்தில் அறைபவருக்கு மறுகன்னத்தையும் திருப்பிக் காட்டுங்கள்" (மத்தேயு 5:39) என்றும், “ஏழுமுறை மட்டுமல்ல; எழுபது தடவை ஏழுமுறை என நான் உனக்குச் சொல்கிறேன்" (மத்தேயு 18:22) என்றும் மன்னிப்பை பற்றி பறைசாற்றி அதனால் உருவாகும் புது வாழ்வை பற்றி எடுத்துரைக்கிறார். இறுதியாக தான் சிலுவையிலிருந்த போது கூட “தந்தையே, இவர்களை மன்னியும். ஏனெனில் தாங்கள் செய்வது என்னவென்று இவர்களுக்குத் தெரியவில்லை” (லூக்கா 23:34) என்று சொல்லி அவர்களுக்கான விண்ணக வாழ்வை உறுதிப்படுத்துகிறார்.

3. உணவளித்து வாழ்வளித்தார்

அரசர்கள் என்றாலே பொதுவாக அரண்மனை, அரியணை மற்றும் அந்தஸ்தோடு இருப்பார்கள். ஆனால் கிறிஸ்து அரசர் மாட்டு கொட்டகையில் பிறந்து, தீவனத்தொட்டியில் கிடத்தப்பட்டு, அன்றே நான் பிறருக்கு உணவாக பிறந்திருக்கின்றேன் எனும் அடையாளத்தை காட்டியிருக்கிறார். ஏனென்றால் இந்த உணவு தான் மனிதன் வாழ்வதற்கு அடிப்படைத் தேவையாக இருக்கிறது. ஆனால் நம் கிறிஸ்து அரசர் தருகின்ற உணவு வெறும் உடலுக்கான உணவு அல்ல மாறாக ஆன்மாவிற்கானது. அதனால் தான் இயேசு “வாழ்வு தரும் உணவு நானே. என்னிடம் வருபவருக்குப் பசியே இராது; என்னிடம் நம்பிக்கை கொண்டிருப்பவருக்கு என்றுமே தாகம் இராது (யோவான் 6:35). என்கிறார். இதன் வெளிப்பாடாக தான் காட்டி கொடுக்கப்படுவதற்கு முந்திய இரவு நற்கருணை என்னும் வாழ்வு தரும் உணவை ஏற்படுத்தி இன்றும் நம் ஒவ்வொருவருக்கும் வாழ்வு தருகின்ற அரசராக திகழ்கிறார்.

4. தன்னுயிரளித்து வாழ்வளித்தார்

அரசர்கள் பொதுவாக போரில் மற்றும் தண்டனை வழங்குவதில் பிறரது உயிரை எடுத்து அவர்களது வாழ்வை அழிப்பார்கள். ஆனால் நம் கிறிஸ்து அரசர் தன்னுயிரை அளித்து வாழ்வை கொடுக்கிறார். பாவத்தினால் நாம் தொலைத்த வாழ்வை அவரது சிலுவை சாவால் மீண்டும் தருகிறார். இயேசுவின் சிலுவை சாவு நம் ஒவ்வொருவருக்கும் மீட்பை தந்து புதுவாழ்வை அளித்திருக்கிறது. பொதுவாக அரசர்கள் தனக்காக மற்றவரை அடிமையாக்கி வாழ்வார்கள். ஆனால் கிறிஸ்து அரசர் பிறருக்காக தன்னை சிலுவையில் அடிமையாக்கி வாழ்ந்து நம்மை வாழ வைத்துக் கொண்டிருக்கிறார். அன்று இயேசுவின் சிலுவையில் "யூதரின் அரசர்" என்று எழுதப்பட்டிருந்தது (யோவான் 19:19). ஆனால் இயேசு தனது சிலுவை மரணத்தின் வழியாக தான் யூதரின் அரசர் அல்ல, மாறாக அரசருக்கெல்லாம் அரசர், இந்த மனித குலத்திற்கு அரசர், குறிப்பாக வாழ்வு தருகின்ற அரசர் என்பதை எடுத்துக்காட்டுகிறார்.

நிலைவாழ்வு

அரசர்கள் என்றாலே பொதுவாக ஒரு குறிப்பிட்ட காலத்திற்கு மட்டும் தான் அரசாள்வார்கள். அவரது அரசாட்சி சில நாட்களுக்குள் முடிவுக்கு வந்து விடும். உலக வரலாற்றில் நாம் பார்த்த பேரரசர்களும் அவர்களுடைய ஆட்சிகளும் சில ஆண்டுகளுக்குள் முடிவடைந்து விட்டது. ஆனால் இயேசு “எனது ஆட்சி இவ்வுலக ஆட்சி போன்றது அல்ல” (யோவான் 18:36) என்கிறார். இதைத்தான் வானத்தூதரும் அன்னை மரியாவிடம் "அவர் யாக்கோபின் குடும்பத்தின் மீது என்றென்றும் ஆட்சி செலுத்துவார். அவருடைய ஆட்சிக்கு முடிவே இராது” (லூக்கா 1:33) என்றார்.கிறிஸ்து அரசரின் இறையாட்சி எக்காலத்திற்கும் நிலைத்து நிற்கக்கூடியது. அதனால் அவர் தரும் வாழ்வும் இன்று மட்டுமல்ல என்றும் நிலைத்து நிற்கும்.

இன்றைக்கு வாழ்வு தருகின்ற இந்த கிறிஸ்து அரசரை நம் வாழ்வில் ஏற்றுக் கொள்ள தயாராக இருக்கின்றோமா? இன்றைக்கு வெறும் பணம், பதவி, பொருள், சினிமா, பொழுதுபோக்கு, தொலைக்காட்சி, கணினி,மொபைல் மற்றும் உறவுகள் மட்டுமே நமக்கு நிரந்தரமான மற்றும் மகிழ்வான வாழ்வை தந்து விட முடியாது. கிறிஸ்துவில் மட்டுமே நமக்கு நிரந்தரமான மற்றும் விண்ணக வாழ்விற்கான வழி உண்டு என்பதை உணர்வோம். அவர் வழியில் இந்த மண்ணக வாழ்வை மட்டும் அல்லாது விண்ணக வாழ்வையும் பெற்றுக் கொள்ளுவோம். அரசர் மற்றும் அரசாட்சி என்றாலே அது இறந்த காலத்தை சார்ந்தது இப்பொழுது அதைக் காண நாம் வரலாற்று புத்தகத்தை தான் புரட்டி பார்க்க வேண்டும். ஆனால் காலம் மாறிய காலத்திலும் கிறிஸ்து அரசர் பெருவிழாவை ஆண்டுதோறும் நாம் கொண்டாடிக் கொண்டிருக்கின்றோம் என்றால், அது கிறிஸ்து அரசர் தரும் புது வாழ்வை நாம் பெற்று கொள்ள வேண்டும் என்பதற்காகவே ஆகும். இதை உணர்ந்து அவர் வழியில் வாழ, வளர இறையருளை வேண்டுவோம். இறைவன் நம் ஒவ்வொருவரையும் ஆசீர்வதிப்பார்.

கிறிஸ்துவில் அன்புடன், 

Fr. அ. குழந்தை யேசு ராஜன் CMF
கிளரீசியன் ஊடகப் பணியகம்
தாம்பரம், சென்னை

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 33-ஆம் வாரம் - ( ஆண்டு- C) - 13 -11-2022- ஞாயிற்றுக்கிழமை

 🌱விவிலிய விதைகள்🌱

பொதுக்காலம் 33-ஆம் ஞாயிறு

தமிழ் திருவழிபாட்டு மறையுரை

(13 நவம்பர் 2022, ஞாயிறு)

முதல் வாசகம்: மலா 4: 1-2a

இரண்டாம் வாசகம்: 2 தெச 3: 7-12

நற்செய்தி: லூக் 21: 5-19

தயாரிப்போம்

வெளிநாட்டு பிரபல பாடகர் ஒருவர் இந்தியாவில் தன்னுடைய பாடல்களை அரங்கேற்றம் செய்து கொண்டிருக்கிறார். அப்போது அவருடைய ரசிகர்களுள் ஒருவர் அவருக்கு ரோஜா பூ மாலையை அணிவிக்கிறார். அந்த மாலையை பெற்றுக் கொண்ட பின்னும், அந்த பாடகர் தொடர்ந்து நடனத்தோடு பாடலை பாடிக் கொண்டிருக்கிறார். தன்னை மறந்து நடனம் ஆட ஆட மாலையிலிருந்து ரோஜா பூ கொஞ்சம் கொஞ்சமாக உதிர்ந்து தரையில் விழ ஆரம்பித்தது. இதை பார்த்துக் கொண்டிருந்த தம்பதியருள் கணவர் மனைவியை பார்த்து, 'நீ வேண்டுமானால் பார், இவர் பாடி முடிப்பதற்குள் இவருடைய கழுத்தில் வெறும் மாலையின் நாறு மட்டும் தான் இருக்கும்' என்று கூறினார். அதற்கு அவருடைய மனைவி 'நீங்கள் ஏன் அவருடைய கழுத்திலிருக்கின்ற மாலையின் நாறை பார்க்கிறீர்கள். அதே மாலையிலிருந்த ரோஜா பூ இதழ்கள் உதிர்ந்து தரையை அலங்கரித்துக் கொண்டிருக்கின்றன. அவர் நிற்கின்ற இடம் முழுவதும் ரோஜா பூ நிறைந்து கிடக்கின்றது' என்று கூறினார். இன்றைக்கு நாம் பார்க்கின்ற, கேட்கின்ற ஒவ்வொன்றிலும் பல்வேறு உள்ளார்ந்த அர்த்தங்கள் இருக்கும். நாம் எதை பார்த்து மற்றும் எவற்றை எடுத்து கொள்கிறோம் என்பது மிகவும் முக்கியமானது. இன்றைய இறைவார்த்தையை வாசிக்கும் போது, குறிப்பாக நற்செய்தியில் இயேசு எருசலேமின் அழிவை எடுத்துரைப்பது நமக்கு அச்சத்தை கொடுத்தாலும் அதன் பின்னணியில் அவர் தரும் அழைப்பை உணர வேண்டும். பொதுக்காலத்தின் இறுதி ஞாயிறான இன்றைய 33-வது ஞாயிறு திருவழிபாட்டு வாசகங்கள் கிறிஸ்தவர்களாகிய நம் ஒவ்வொருவரையும் தகுந்த முன் தயாரிப்போடு வாழ அழைப்பு தருகிறது. இன்றைய இறைவார்த்தை வழிபாடு மூன்று விதமான எச்சரிக்கைகளை நம்முன் வைக்கின்றது. இதன் மூலம் இயேசு எவ்வாறு தன் சீடர்களையும் நம்மையும் முன் தயாரிப்போடு வாழ அழைப்பு தருகிறார் என்பதை சிந்திப்போம்.

1. துன்பத்தை எதிர்கொள்ள தயாரிப்போம்

(எருசலேம் கோவிலின் அழிவு)

இயேசுவின் காலத்தில் கட்டப்பட்டு இருந்த எருசலேம் ஆலயம் பெரிய ஏரோதால் கிமு. 20 மற்றும் 19-ல் கட்ட தொடங்கப்பட்டு கிபி 60-ல் முடிவடைந்த மூன்றாவது ஆலயமாகும். சலவைக் கற்களால் கட்டப்பட்டு, தங்க ஏடுகளால் பொதியப்பட்டு அழகிய சிறந்த வேலைப்பாடுகளுடன் விளங்கியது. உலகமே கண்டு வியக்கும் அளவுக்கு மிகவும் நேர்த்தியான கட்டடக்கலை தேவாலயத்தில் வெளிப்பட்டது. யூத மக்கள் இதன் அழகு கண்டு பெருமையால் பூரித்தார்கள். இயேசுவின் சீடர்களும் எருசலேம் தேவாலயத்தின் அழகை கண்டு பிரம்மித்தார்கள். இவ்வளவு உலகப் புகழ்பெற்ற மிகவும் அழகிய ஆலயம் அழிக்கப்படும் என இயேசு கூறுவது சீடர்களுக்கு ஒரு அடையாளம். இன்று இயேசுவோடு மகிழ்வாக இருக்கிற அவர்கள் எருசலேம் தேவாலயம் அழிவுறுவதை போல ஒரு நாள் மானிட மகன் சிலுவை சாவுக்கு ஆளாக்கப்படும் போது சீடர்கள் பல இன்னல்களுக்கும் துன்பங்களுக்கும் உள்ளாகும் நிலைவரும். இதை மனதைரியத்தோடு எதிர்கொண்டு இயேசுவின் பணியை தொடர்ந்தாற்ற அவர் அவர்களை தயார் செய்கிறார். இயேசு முன்னறிவிக்கின்ற துன்பம் லூக்கா நற்செய்தியின் இரண்டாம் பாகமாக கருதப்படுகின்ற திருத்தூதர் பணிகள் நூலில் நிறைவேறுவதை நாம் காண முடியும். திருத்தூதர்களும் மற்றும் தொடக்க கிறிஸ்தவர்களும் கிறிஸ்துவின் பொறுத்து அனுபவித்த துன்பங்களை தான் இயேசு முன்னறிவிப்பதாக இருக்கிறது. இயேசு தன்னுடைய சீடர்களை தயார் செய்கிறார். அவரது இறப்புக்குப் பிறகு தொடர்ந்து அவர்கள் அவரின் சீடர்களாக, அவர் விட்டு செல்லுகின்ற இறைப்பணியை தொடர்ந்தாற்ற ஏற்படுகின்ற துன்பங்களை எதிர்கொள்ளும் மன திறனை ஏற்படுத்த அவர்களை தயாரிக்கிறார். வரவிருக்கும் அழிவின் மத்தியிலும் மற்றும் துன்பங்களுக்கு இடையிலும் இயேசுவின் எதிர்கால சீடர்கள் இறைவழியில் வாழ முன்னறிவித்து திருத்தூதர்களை தயார்படுத்துகிறார். இன்றைக்கு இயேசு நம் ஒவ்வொருவரையும் கிறிஸ்தவர்களாக வாழ்வதற்கு இச்சமுதாயத்தில் பெறப்போகும் துன்பங்களை ஏற்றுக்கொள்ள தயாராக அழைப்பு தருகிறார். லஞ்சம், அநீதி, பொய், ஏமாற்றுத்தனம் என்னும் தவறுகளும் பாவமும் சூழ்ந்து நிற்கும் இச்சமுதாயத்தில் இயேசு கற்பித்த நற்செய்தியின் விழுமியங்களோடு உண்மை கிறிஸ்தவர்களாக வாழ்வதற்கு எண்ணற்ற தியாகங்களையும், துன்பங்களையும் சோதனைகளையும் நாம் ஏற்றுக் கொள்ள வேண்டும். இத்தகைய ஒரு வாழ்வுக்கு நம்மை தயாரிக்க கிறிஸ்து இன்று அழைப்பு தருகிறார்.

2. உண்மையானதை அறிந்திட தயாரிப்போம்

(போலி இறைவாக்கினர்கள்)

எருசலேமின் அழிவு எப்போது வரும் அதனுடைய அறிகுறி எப்படியிருக்கும் என்று இயேசுவிடம் கேட்கப்படுவதற்கு அவர் எவ்விதமான அடையாளங்களையும் தராமல் எச்சரிக்கை தருகிறார். அதாவது தாங்களே மெசியா என்று சொல்லிக் கொண்டும், மெசியாவின் காலம் வந்து விட்டது எனவும் பல போலி இறைவாக்கினர்கள் வருவார்கள், எனவே எச்சரிக்கையோடு இருக்க அழைப்பு தருகிறார். இன்று நமது அன்றாட வாழ்விலும் இறைவன் இருக்க வேண்டிய இடத்தில் பணமும், பொருளும், பதவியும் மற்றும் சிற்றின்ப ஆசைகளும் சூழ்ந்து கிடக்கின்றது. இவையெல்லாம் போலிகளே, இறைவன் ஒருவரே உண்மையானவர் மற்றும் நிரந்தரமானவர் என்பதை நாம் நமது வாழ்க்கையில் உணர்ந்து, இத்தகைய போலிகளிலிருந்து விடுபட்டு “வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை" (யோவான் 14:6) என்று சொன்ன இயேசுவை ஏற்றுக் கொள்ள நம்மை முழுவதுமாக தயாரிப்போம்.

3. மனமாற்றம் பெற்றிட தயாரிப்போம்

(உலக முடிவு)

இன்றைய முதல் வாசகம் பாபிலோனிய அடிமைத்தனத்திலிருந்து மீண்டு வந்த தென்னாடான யூதா மக்களுக்கு சொல்லப்பட்டது. இவர்கள் கோவிலையும் மற்றும் வீடுகளையும் கட்டி எழுப்பிய பின்னும் ஒழுக்கமின்மை, ஏற்றத்தாழ்வுகள் மற்றும் வறுமை போன்றவற்றால் மனசோர்வடைந்து இருந்த சூழலில் இறைவாக்கினர் மலாக்கி ஆண்டவரின் நாள் வரும் எனவும், அது எப்படியிருக்கும் என்பதையும் மற்றும் அவரின் பெயருக்கு அஞ்சி நடக்கிற ஒவ்வொருவர் மீதும் "நீதியின் கதிரவன் எழுகிறது" (2:7) என்பதையும் எடுத்துரைக்கின்றார். மேலும் இன்றைய நற்செய்தியில் இயேசு பல பேரிடர்கள் மூலம் உலகம் அழிவுறும் போதும் கிறிஸ்தவர்களாக வாழ உங்களை தயார்படுத்துங்கள் என சீடர்களுக்கு எடுத்துரைக்கின்றார். இறைவன் இஸ்ராயேல் மக்களுக்கு அவர்களது பாவ வாழ்வை பற்றிய எச்சரிக்கையை அளித்தது போல இன்றைக்கு நமது பாவ வாழ்வையும் பலர் வழியாக இறைவன் நமக்கு சுட்டிக் காட்டி எச்சரித்துக் கொண்டிருக்கிறார். இதை நமது வாழ்வில் ஏற்று, ஆண்டவரின் நாளில் நாம் ஒவ்வொருவருமே தீர்ப்பிடப்படுவோம் என்பதை முழுவதுமாக உணர்வோம். நாம் அடியெடுத்து வைக்கவிருக்கின்ற திருவருகை காலத்தில் இயேசுவை நமது உள்ளத்திலும் வாழ்விலும் ஏற்றுக்கொள்ள மனமாற்றம் பெற நம்மை முழுவதுமாக தயாரிப்போம்.

இன்றைய இரண்டாம் வாசகம் பவுலடிகளார் தெசலோனிய திருச்சபைக்கு எழுதியதாகும். இது ஆண்டவரின் இரண்டாம் வருகையை முழுமையாக உணராது சோம்பேறித்தனமாய் வாழ்ந்த மக்களை உழைத்து வாழவும், தங்களது கடமைகளை செய்யவும் மற்றும் இறுதி நாளை குறித்து அஞ்சாமல் உண்மையோடு வாழவும் அழைப்பு தருகிறது. இன்றைக்கு நாமும் ஆண்டவர் ஒரு நாள் நம் மத்தியில் நீதி தீர்ப்பிடுவார் என்பதை உணராமல் சோம்பேறித்தனமாக வாழ்ந்து கொண்டிருக்கின்றோம். இந்நிலையை தவிர்த்து இயேசுவை ஏற்றுக் கொள்கின்ற மனம் பெற இறையருளை வேண்டுவோம். இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

Fr. அ. குழந்தை யேசு ராஜன் CMF

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 32-ஆம் வாரம் - ( ஆண்டு- C) - 06 -11-2022- ஞாயிற்றுக்கிழமை

 

🌱விவிலிய விதைகள்🌱

பொதுக்காலம் 32-ஆம் ஞாயிறு

தமிழ் திருவழிபாட்டு மறையுரை

(06 நவம்பர் 2022, ஞாயிறு)

முதல் வாசகம்: 2 மக் 7: 1-2, 9-14

இரண்டாம் வாசகம்: 2 தெச 2: 16- 3: 5

நற்செய்தி: லூக் 20: 27-38

கிறிஸ்துவில் புது வாழ்வு

அது கிரேக்க மற்றும் எகிப்திய புராண கதைகளில் சொல்லக் கூடிய ஃபினிக்ஸ் பறவை. கழுகை போல மிகப்பெரிய பறவையாக சிகப்பு மற்றும் ஆரஞ்சு நிறத்திலுள்ள இந்த பறவையின் சிறப்பம்சம் 500 ஆண்டு கால இதன் வாழ்நாள் தான். எப்படி இந்த பறவை இவ்வளவு ஆண்டு காலம் வாழ முடியும் என்று சிந்திக்கின்ற போது, இந்த பறவை ஒவ்வொரு முறையும் மறுபிறப்பெடுப்பதே இதற்கு காரணம் என்கின்றனர். இப்பறவை எரியும் நெருப்பில் விழுந்து, முழுவதும் எரிந்து, தன்னுயிரை மாய்த்து முற்றிலும் சாம்பலாகும், பின்னர் புழுவாக பிறப்பெடுத்து சாம்பலை ஒன்றினைத்து புது பறவையாக உருவெடுக்கும். நமது கிறிஸ்தவ வாழ்வும் இந்த ஃபினிகஸ் பறவையை போல தான், இந்த மண்ணக வாழ்விலிருந்து இறக்கும் நாம் மீண்டும் விண்ணக வாழ்வில் கிறிஸ்துவில் புது பிறப்படைவோம். கிறிஸ்தவர்களாகிய நாம் ஒவ்வொருவரும் விண்ணக வாழ்வில் மீண்டும் கிறிஸ்துவில் புது வாழ்வை பெறுவோம் என்னும் மையசிந்தனையை நம்முன் வைக்கின்றது இன்றைய பொதுக்காலத்தின் 32 ஆம் ஞாயிற்று கிழமையின் இறைவார்த்தை வழிபாடு.

யூத முறைப்படி வாரிசு இன்றி இறப்பது ஒரு சாபக்கேடு, அதுமட்டுமல்லாது விதவை பெண் குடும்பத்தின் வெளியே திருமணம் செய்யவும் அனுமதிக்கப்படுவதில்லை. இதை கருத்தில் கொண்டு இறந்தவரின் சகோதரரே விதவையை ஏற்றுக் கொண்டு வாரிசு உண்டாக்குவது யூதர்களிடையே வழக்கமாக இருந்தது. இதன் பின்னணியில் தான் இன்றைய நற்செய்தியில் சதுசேயர்கள் ஏழு சகோதரர்களை மணந்த பெண்ணை பற்றி எடுத்துரைத்து, இயேசுவிடம் உயிர்த்தெழுதலை பற்றிய கேள்வியை கேட்கின்றார்கள். இவர்கள் உயர்ப்பிலும் மற்றும் வானத்தூதர்களிலும் நம்பிக்கையின்றி இருந்தார்கள். இயேசுவோ அவர்களுடைய பின்னணியில் "தோரா" எனப்படும் விவிலியத்தின் முதல் ஐந்து புத்தகங்களிலிருந்து இறைவன் வாழ்வோரின் கடவுள் எனவும், இதனால் நம் அனைவருக்கும் மறுவாழ்வு உண்டு எனவும் எடுத்துரைக்கின்றார்.

“உங்கள் மூதாதையரின் கடவுள், ஆபிரகாமின் கடவுள், ஈசாக்கின் கடவுள், யாக்கோபின் கடவுள் நானே” (விப 3:6) என இறைவன் மோசேயிடும் கூறியது வாழும் கடவுளாக தான் இருப்பதை எடுத்துரைத்ததன் அடையாளம். ஆபிரகாம், ஈசாக்கு மற்றும் யாக்கோபு என இவர்கள் வாழ்ந்தார்கள், இறந்தார்கள், ஆனால் இன்றும் அவர்கள் வாழ்ந்து கொண்டிருக்கிறார்கள். இறந்த பிறகும் இவர்கள் எப்படி வாழ்ந்து கொண்டிருக்கிறார்கள்? இவர்கள் வாழ்ந்த காலத்தில் இறைவனில் வாழ்ந்ததால், இன்றும் இறைவனில் வாழ்ந்து கொண்டிருக்கிறார்கள். அதனால் தான் இறைவன் மோசேயிடம் தன்னை ஆபிரகாமின், ஈசாக்கின் மற்றும் யாக்கோபின் கடவுள் என்று எடுத்துரைக்கின்றார். கிறிஸ்தவர்களாகிய நாமும் இன்று நமது வாழ்வில் கிறிஸ்துவில் வாழுகின்ற பொழுது, "உயிர்த்தெழுதலும் வாழ்வும் நானே. என்னிடம் நம்பிக்கை கொள்பவர் இறப்பினும் வாழ்வார்" (யோவான் 11:25) என்று கூறிய இயேசு இறப்பிலும் புது வாழ்வு வாழ செய்வார். மண்ணக வாழ்வில் கிறிஸ்துவை நாம் சொந்தமாக்கும் போது விண்ணக வாழ்வில் அவர் நம்மை சொந்தமாக்குவார்.

இன்றைய முதல் வாசகத்தில் தாயும் சகோதரர்கள் ஏழு பேரும் பன்றி இறைச்சியை உண்பதற்கு மன்னனால் கட்டாயப்படுத்தப்பட்ட போது, நான்காவது சகோதரன் இறக்கும் தறுவாயில், “கடவுள் மீண்டும் உயிர்த்தெழச் செய்வார் என்னும் நம்பிக்கை எனக்கு இருப்பதால், மனிதர் கையால் இறக்க விரும்புகிறேன்” என்கிறார். (2 மக்கபேயர் 7:14) இன்றைக்கு கிறிஸ்தவர்களாகிய நம் ஒவ்வொருவரிடத்திலும் இதே நம்பிக்கையிருக்க வேண்டும். மண்ணக வாழ்வில் நாம் விண்ணக வாழ்வுக்காக அதாவது கிறிஸ்துவில் புதுபிறப்படைய நம்மை முழுவதும் தயாரிக்க வேண்டும். நம் ஆண்டவர் இயேசு இறந்து மூன்றாம் நாள் உயிர்த்தெழுந்ததை போல, கிறிஸ்தவர்களாகிய நாமும் இறந்து கிறிஸ்துவில் உயிர்த்தெழுவோம். இதைத் தான் பவுலடிகளார் "இறந்தோர் உயிருடன் எழுப்பப்படுவதில்லை என்றால் கிறிஸ்துவும் உயிருடன் எழுப்பப்படவில்லை என்றாகிவிடும். கிறிஸ்து உயிருடன் எழுப்பப்படவில்லை என்றால் நீங்கள் கொண்டிருக்கும் நம்பிக்கை பயனற்றதே. நீங்கள் இன்னமும் உங்கள் பாவங்களில் வாழ்பவர்களாவீர்கள்"( கொரிந்தியர் 15:16,17) என்கிறார். அன்று இயேசு நயீன் ஊர் கைம்பெண்ணின் மகனை, தொழுகை கூடத் தலைவரின் மகளை மற்றும் இலாசரை உயிர்த்தெழ செய்ததை போல நம்மையும் இறப்பினின்று உயிர்த்தெழ செய்வார்.

நாம் இரண்டு விதமான மனநிலையை கொண்டிருக்க வாய்ப்புகள் உண்டு.

1. சதுசேயர்களின் மனநிலை:

இது உயிர்ப்பே இல்லை என்னும் மனநிலை.

2. இயேசுவை பின்பற்றியவரின் மனநிலை:

இது உயிர்ப்பு என்னும் புதுபிறப்பின் மனநிலை.

எத்தகைய மனநிலையோடு நாம் இருக்கிறோம் என சிந்தித்து பார்ப்போம். ஆபிரகாம், ஈசாக்கு மற்றும் யாக்கோபு இறைவனில் வாழ்ந்ததை போல, இயேசுவை பின்பற்றியவர்கள் அவர் தரும் புது வாழ்வில் நம்பிக்கை கொண்டதை போல நாமும் கிறிஸ்துவில் புது வாழ்வு பெற இம்மண்ணக வாழ்வில் நாளும் முயற்சி செய்வோம்.

அன்புடன்:-

Fr. அ. குழந்தை யேசு ராஜன் CMF 

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 31-ஆம் வாரம் - ( ஆண்டு- C) - 30 -10-2022- ஞாயிற்றுக்கிழமை

 🌱விவிலிய விதைகள்🌱

பொதுக்காலம் 31-ஆம் ஞாயிறு

தமிழ் திருவழிபாட்டு மறையுரை

(30 அக்டோபர் 2022, ஞாயிறு)

முதல் வாசகம்: சாஞா 11: 22- 12: 2

இரண்டாம் வாசகம்: 2 தெச 1: 11- 2: 2

நற்செய்தி: லூக் 19: 1-10

தடைகளை தாண்டிய தேடல்

ஒரு கிராமத்தின் அருகே மிகப்பெரிய மலை ஒன்று இருந்ததாம். காடுகள் சூழ்ந்திருந்த இந்த மலையில் ஒரு கிராமவாசி ஏற வேண்டிய சூழலிருந்தது. இந்த மலையில் பகலில் ஏறுவது மிகவும் கடினமானது. எனவே அவர் இரவில் இந்த மலையின் உச்சியில் ஏறிவிட வேண்டும் என்று கையில் விளக்கோடு புறப்படுகிறார். மலையடிவாரத்தில் நின்ற அவர் என்னுடைய விளக்கு வெறும் பத்தடி தூரம் தான் வெளிச்சத்தை தருகிறது, இதை வைத்து நான் எப்படி பல கிலோமீட்டர் தூரம் மலையை ஏற முடியும் என்று யோசிக்க தொடங்கினார். அப்போது அவ்வழியாக அவரைப் போல மலை ஏறுவதற்கு வயதான ஒருவர் வருகிறார். நம்மை விட இவரிடம் மிகச் சிறிய தூரம் வெளிச்சத்தை தருகின்ற விளக்கே இருக்கிறது என நினைத்த அவர் வயதானவரிடம், என்னுடைய விளக்கே அதிக தூரம் வெளிச்சத்தை தரவில்லை. உங்களுடைய இந்த சிறிய விளக்கை வைத்து எப்படி மலை ஏறுவீர்கள் என்று கேட்கிறார். வயதானவரோ சிரித்துக் கொண்டே உன்னிடமிருக்கின்ற வெளிச்சத்தை வைத்து நீ முதலில் பத்தடி தூரம் செல், பின்பு இன்னும் பத்தடி தூரத்திற்கு வெளிச்சம் தெரியும். இவ்வாறாக நீ எத்தனை கிலோமீட்டர் வேண்டுமானாலும் செல்லலாம் என்று கூறினார். நமது வாழ்வின் இலக்குகளை அடைவதற்கான பயணத்தில் எண்ணற்ற தடைகளிருக்கும், இதை கண்டு நம்முடைய இலக்குகளை அடைவது கடினம் என நினைத்தால் வாழ்வில் வெற்றியும் மாற்றமும் ஒரு போதும் கிடைக்காது. தடைகளை கண்டு அஞ்சாமல், ஒவ்வொன்றாக மன உறுதியோடு எதிர் கொள்கின்ற போது நமது இலக்குகளை தெளிவாக அடைய இயலும்.

            இறை இயேசுவில் இனியவர்களே, நமது கிறிஸ்தவ வாழ்விலும் மனமாற்றம் பெற்று புது வாழ்வு பெற இயேசுவைத் தேடிச் செல்ல வேண்டும். அத்தேடலில் வரும் எண்ணற்ற தடைகளை எதிர்கொள்ள வேண்டும், அப்பொழுதுதான் மனமாற்றம் பெற்று கிறிஸ்துவில் வாழ முடியும். இன்றைய நற்செய்தியில் சக்கேயு மனமாற்றம் பெற்று புது வாழ்வு பெற விரும்புகிறார். அதற்காக இறைமைந்தன் இயேசுவை தேடுகிறார். இந்த தேடலில் பலவிதமான தடைகளை சந்திக்கிறார். அவற்றை உடைத்தெரிந்து கிறிஸ்துவில் மனமாற்றம் பெற்று புது வாழ்வு பெறுகிறார். இன்று நாமும் நமது கிறிஸ்தவ வாழ்வில் மன மாற்றம் பெற சந்திக்கும் சவால்களை தகர்த்தெறிந்து புது வாழ்வு பெற பொதுக்காலத்தின் 31-வது ஞாயிற்றுக்கிழமையின் இறைவார்த்தை வழிபாடு அழைப்பு தருகிறது.

1. உடல் தடை

இயேசுவை பார்க்க வேண்டும் என்னும் சக்கேயுவின் தேடலுக்கு முதல் தடையாக அமைந்தது அவருடைய குட்டையான உருவம் தான். அவருடைய உருவத்திற்கு சோதனையாக மக்கள் கூட்டம் இருந்ததால் அவரால் இயேசுவை பார்க்க முடியவில்லை. இங்கு மக்கள் கூட்டம் இல்லாமல் இருந்திருந்தால் அவருக்கு அவரது குட்டையான உருவம் ஒரு பிரச்சனையாகவே இருந்திருக்காது அல்லது அவர் மிக உயரமாக இருந்திருந்தால் மக்கள் கூட்டம் அவருக்கு ஒரு பிரச்சனையாகவே இருந்திருக்காது. ஆனால் இங்கு சக்கேயுவுக்கு தன்னுடைய உயரம் மிகப்பெரிய தடையாக அமைகிறது. ஆனால் அவர் தன் தேடலை நிறுத்தவில்லை, மாறாக அத்தடையை முறியடிக்க மரத்தின் மீது ஏறுகிறார், இயேசுவை பார்க்கிறார். இன்று நமது வாழ்விலும் உடல் தடை பெரும் தடையாக இருக்கிறது. நான் குட்டையானவன், உயரமானவன், மெலிந்தவன், குண்டானவன், கருத்தவன் மற்றும் வெளுத்தவன் என நமது உடல் அமைப்புகளை தடைகளாக எண்ணி நமது திறமைகளை உணராமல் இருக்கின்றோம். வாய்ப்புகளை பயன்படுத்தாமல் இருக்கின்றோம். நான் எப்படி பீடம் ஏறி வாசகம் வாசிக்க முடியும்? நான் எப்படி ஆலய நிகழ்வுகளில் பங்கேற்க முடியும்? பக்த சபைகளிலும் மறைக்கல்வியிலும் பங்கேற்க முடியும்? என தடைகளைக் கண்டு அஞ்சி வாழ்கின்றோம். இறைவன் அருகே செல்லாமல் இருக்கின்றோம். சக்கேயுவைப் போல நம் உருவ அமைப்புகளை தடைகளாக எண்ணாது, தொடர்ந்து முயலுவோம்.

2. உள்ளத்து தடை

                சக்கேயு ஒரு வரி வசூலிப்பவர், இஸ்ராயலில் மிகவும் மக்களால் வெறுக்கப்பட்டவர். சக்கேயு என்னும் பெயருக்கு தூயவன் மற்றும் நேர்மையாளன் என்னும் அழகிய அர்த்தங்கள் இருந்தாலும், வரி வசூலிப்பவரான சக்கேயுவை மக்கள் திருடனாகவும், ஏமாற்றுபவனாகவும் மற்றும் துரோகியாகவும் தான் பார்த்தார்கள். இதனால் சக்கேயு மிகுந்த மன உளைச்சலுக்கு உள்ளாகியிருக்கக்கூடும், இருப்பினும் இத்தகைய உள்ளத்து தடைகளை முறியடித்து அவர் இயேசுவை காண முயலுகிறார். இன்று நமது வாழ்விலும் உடல் பிரச்சினைகளை காட்டிலும் உள்ளத்து பிரச்சனைகள் தான் பெரும் தடைகளாக இருக்கிறது. சக்கேயு தனது உள்ளத்து தடைகளை மனமாற்றத்திற்கான படிக்கட்டுக்களாக மாற்றி பாவ மன்னிப்பு அடைய இயேசுவை தேடுகிறார். நமது வாழ்விலும் பல்வேறு சூழல்களால் பாரமாக கிடைக்கின்ற நமது மனங்களை இறைவனின் அர்ப்பணித்து தடைகளை தகர்த்தெறிவோம், கிறிஸ்துவில் இணைவோம்.

3. சமுதாய தடை

                    வரி தண்டுபவர்களைப் பற்றி இந்த சமுதாயம் பார்க்கின்ற விதமும் குறிப்பாக பேசுகின்ற பேச்சுகளும் சக்கேயுவுக்கு ஒரு சமுதாய தடையாகவே இருந்தது. இன்றைய நற்செய்தியில் கூட இயேசு அந்த இடத்திற்கு வந்தவுடன், அண்ணாந்து பார்த்து அவரிடம், “சக்கேயு, விரைவாய் இறங்கிவாரும்; இன்று உமது வீட்டில் நான் தங்க வேண்டும்” (லூக்கா 19:5) என்று கூறியவுடன் அங்கிருந்த மக்கள், “பாவியிடம் தங்கப்போயிருக்கிறாரே இவர்” என்று முணுமுணுத்தை (லூக்கா 19:7) வாசிக்கின்றோம். இயேசுவை காணும் தேடலில் இது மாபெரும் சமுதாயத் தடையாக இருக்கிறது. ஆனால் சக்கேயு சமுதாயத்தின் ஏளன பேச்சுகளை முறியடித்து இயேசுவை தன் வாழ்வில் கண்டு கொண்டார், புது வாழ்வு அடைந்தார். இன்றைக்கு நம்மை பார்த்தும் ஏராளமான பேச்சுகள் இருந்து கொண்டு தான் இருக்கின்றன. நான் இதை எடுத்து இவ்வாறு செய்தால் அடுத்தவர்கள் என்ன சொல்லுவார்களோ என எண்ணி நாம் நமது வாழ்வில் சீரழித்துக் கொண்டிருக்கிறோம். "போற்றுபவர் போற்றட்டும் புழுதி வாரித் தூற்றுபவர் தூற்றட்டும்" என ஏளனப் பேச்சுகள் என்னும் உள்ளத்து தடைகளை துரத்தியடித்து வாழ்வில் வெற்றிக்கான தொடர்ந்து சக்கேயுவை போல முயற்சிப்போம்.

4. அரசியல் தடை

எரிகோ நகரம் மூலிகைகளும் மற்றும் திரவியமும் நிறைந்து கிடக்கும் இடம். இங்குள்ள ரோஜா மலர்கள் புகழ் பெற்றவை, எனவே இந்நகரில் வரி வசூல் சிறப்பு வாய்ந்ததாகவும், அதிகமாகவும் இருந்தது. சக்கேயுவும் வரிவசூலிப்பவராக மற்றும் "வரிதண்டுவோருக்குத் தலைவராக" (லூக்கா 19:2) அரச பொறுப்பில் இருந்தார். உயர் பதவியிலிருக்கும் இவர் அரச பதவி என்னும் பெரும் தடையை தகர்த்தெறிந்து இயேசுவை சந்திக்க முயலுகிறார். நான் ஒவ்வொரு நாளும் வேலைக்கு செல்கின்றேன். எப்படி திருப்பலியில் பங்கேற்க முடியும்? ஜெபிக்க முடியும்? இறைவார்த்தையை வாசிக்க முடியும்? என நமது அன்றாட வேலைகளை காரணங்களாக மற்றும் தடைகளாக மாற்றி இறைவனில் இணைய மறந்தும், மறுத்தும் கொண்டிருக்கின்றோம். இந்நிலையை மாற்றி இயேசுவில் இணைவோம், மனமாற்றம் பெறுவோம்.

5. செல்வத் தடை

     “நிறைவுள்ளவராக விரும்பினால் நீர் போய், உம் உடைமைகளை விற்று ஏழைகளுக்குக் கொடும். அப்பொழுது விண்ணகத்தில் நீர் செல்வராய் இருப்பீர். பின்பு வந்து என்னைப் பின்பற்றும்” (மத்தேயு 19:21) என்னும் இறை வார்த்தைக்கேற்ப, தன் வீட்டிற்கு வந்த இயேசு தன் உள்ளத்தில் வர, அவரில் நான் நிலைத்து நிற்க செல்வம் ஒரு தடையாக இருக்கக் கூடாது என எண்ணி “ஆண்டவரே, என் உடமைகளில் பாதியை ஏழைகளுக்குக் கொடுத்துவிடுகிறேன்; எவர் மீதாவது பொய்க் குற்றம் சுமத்தி எதையாவது கவர்ந்திருந்தால் நான் அதை நான்கு மடங்காகத் திருப்பிக் கொடுத்து விடுகிறேன்” என்று கூறினார் (லூக்கா 19:8). இன்றைக்கு நமது வாழ்விலும் இறைவனைக் காட்டிலும் செல்வம் தான் பெரிது என எண்ணி அதற்காக முயற்சிக்கின்றோம். ஆனால் இறைவனை அடைவதற்கு செல்வங்களே நமக்கு பெரும் தடைக்கல்லாக இருக்கின்றது என்பதை மறந்து விடுகின்றோம்.

"நேர்மையாளர்களை அல்ல, பாவிகளையே மனம் மாற அழைக்க வந்தேன்” (லூக்கா 5:32) என்னும் வாக்கிற்கு ஏற்ப நாமும் வாழ்வின் தடைகளை தகர்த்தெறிந்து இயேசுவிலே இணைந்து, மனமாற்றம் பெற்று புது வாழ்வு பெறுவோம்.

அன்புடன்:-

Fr. அ. குழந்தை யேசு ராஜன் CMF 

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 30-ஆம் வாரம் - ( ஆண்டு- C) - 23 -10-2022- ஞாயிற்றுக்கிழமை

   🌱விவிலிய விதைகள்🌱

பொதுக்காலம் 30-ஆம் ஞாயிறு

தமிழ் திருவழிபாட்டு மறையுரை

(23 அக்டோபர் 2022, ஞாயிறு)

முதல் வாசகம்: சீஞா 35: 12-14, 16-18

இரண்டாம் வாசகம்: 2 திமொ 4: 6-8, 16-18

நற்செய்தி: லூக் 18: 9-14

தாழ்ச்சியோடு ஜெபிப்போம்

புகழ்பெற்ற ஓவியன் தன் குடும்பத்தாரோடு திரைப்படத்துக்கு சென்றான். அரங்கில் கூட்டமே இல்லை. வெறும் நான்கு பேர் மட்டுமே அமர்ந்திருந்தனர். ஓவியர் உள்ளே நுழைந்ததும், நான்கு பேரும் கரவொலி எழுப்பினர். கலைஞனுக்கு ஒரே மகிழ்ச்சி. என் பெருமையைப் பார்த்தாயா? என் படைப்புகளை பாராட்டுவதற்கு மக்கள் இருக்கிறார்கள் என பெருமகிழ்ச்சியோடு தன் மனைவியிடம் கூறினார். அப்போது ஒருவர் ஓடிவந்து கை குலுக்கி பாராட்டுக்களை தெரிவித்தார். மகிழ்ச்சி பெருவெள்ளத்தில் மிதந்து கொண்டிருந்த கலைஞன் அவரிடம், நீங்கள் என் ரசிகரா? என கேட்டான். உடனே அவர் போங்க சார், நீங்க யாருன்னு எனக்கு தெரியாது. இன்னும் 5 பேர் வந்தால் மட்டுமே படம் போடுவோம். இல்லையென்றால் கிடையாது என சொல்லி விட்டார்கள். அந்நேரத்தில் நீங்கள் வந்தீர்கள்? அதனால் தான் மகிழ்ச்சியில் உங்களுக்கு நன்றி சொல்ல வந்தேன், என்றார். இந்த கலைஞனை போலவே நாமும் பல நேரங்களில் தற்பெருமையோடு வாழ்ந்து கொண்டிருக்கிறோம். தற்பெருமையையும், ஆணவத்தையும் அகற்றி தாழ்ச்சியோடு இறைவேந்தல் செய்யவும் மற்றும் வாழ்வும் இன்றைய இறைவார்த்தை வழிபாடு நமக்கு அழைப்பு தருகிறது.

இன்றைய நற்செய்தி வாசகத்தில் இரண்டு மனிதர்கள் ஜெபிப்பதை பார்க்கின்றோம். ஒருவர் வரிதண்டுபவர் மற்றொருவர் பரிசேயர், இவர்கள் இருவர் ஜெபத்திலும் ஒரு ஒற்றுமை உண்டு. இருவரும் ஆலயத்திற்கு சென்று இறைவனிடம் ஜெபிக்கிறார்கள். ஆனால் அவர்களுடைய ஜெப உணர்வு வித்தியாசப்படுகிறது, பரிசேயரின் ஜெபத்தில் ஆணவமும், சுயநலமும் மற்றும் தற்புகழ்ச்சியும் இருந்தது. வரிதண்டுபவரின் ஜெபத்தில் தாழ்ச்சியும் தன்னிலையை உணர்ந்தமையும் இருந்தது. இங்கு வரிதண்டுபவரின் ஜெபமே ஆண்டவர் முன் ஏற்றுக் கொள்ளப்படுகிறது. இன்றைக்கு நமது ஜெபங்கள் எப்படி இருக்கின்றது? எத்தகைய உணர்வோடு நாம் ஜெபித்துக் கொண்டிருக்கின்றோம்? நமது ஜெபம் இறைவனால் ஏற்றுக் கொள்ளப்பட வேண்டுமென்றால் தாழ்ச்சி என்ற பண்போடு நமது இறைவேண்டல் அமைய வேண்டும்.

இன்றைய முதல் வாசகத்தில் "தங்களைத் தாழ்த்துவோரின் வேண்டுதல் முகில்களை ஊடுருவிச் செல்லும்" (சீராக் 35:17) என்னும் வார்த்தைகள் நமது வாழ்வில் பல வேளைகளில் நாம் உணர்ந்திருக்க கூடும். ஆம், தாழ்ச்சி நிறைந்த நமது இறைவேண்டல் இறைவனால் கேட்கப்படும் என்பதையே இது காட்டுகிறது. இன்றைய நற்செய்தியிலும் வரிதண்டுபவர் தொலையில் நின்று கொண்டு வானத்தை அண்ணாந்து பார்க்கக்கூடத் துணியாமல் தன் மார்பில் அடித்துக்கொண்டு, ‘கடவுளே, பாவியாகிய என்மீது இரங்கியருளும்’ (லூக்கா 18:13) என தாழ்ச்சி நிறைந்த உள்ளத்தோடு ஜெபிப்பது இறைவனுக்கு ஏற்புடையதாக அமைகிறது. அரசர்கள் திருநூலில் நாம் ஆகாபைப் பற்றி வாசிக்கிறோம். அவன் சிலை வழிபாடு உட்பட இறைவனுக்கு எதிராகப் பல தீமைகளை செய்தான். அதனால் இறைவன் இறைவாக்கினர் எலியா வாயிலாக அவனை எச்சரித்தார். இஸ்ரயேல் மக்கள் முன்னிலையிலிருந்து ஆண்டவர் விரட்டியடித்த எமோரியர் செய்த சிலைகளை வழிபடும் அளவுக்கு அவன் மிகவும் இழிவாக நடந்து கொண்டான் என்பதை ஆகாபு கேட்டவுடன் ஆடைகளைக் கிழித்துக் கொண்டு வெற்றுடல்மீது சாக்கு உடை உடுத்தி நோன்பிருந்து பணிவோடு ஜெபித்தான். அப்பொழுது எலியாவுக்கு ஆண்டவர் உரைத்த வாக்கு: "என் திருமுன் ஆகாபு தன்னைத் தாழ்த்திக் கொண்டதைக் கண்டாயன்றோ? அவன் என் திருமுன் தன்னைத் தாழ்த்திக் கொண்டதால் நான் அவன் வாழ்நாளின் போது தீமை வரச் செய்யாமல், அவனுடைய மகனது வாழ்நாளின் போது அவனுடைய குடும்பத்தாரின் மேல் தீமை விழச் செய்வேன்" (1 அர 21:26-29). ஆகாபு தன் தவறுகளைப் புரிந்து கொண்டு தாழ்ச்சி நிறைந்த உள்ளத்தோடு மன்றாடிய போது ஆண்டவரும் அவனை மன்னித்தார். இறைவாக்கினரான யோனா நினிவே மாநகர் மக்களுக்கு அழிவு வரும் என்று அறிவிக்கின்றார் (யோனா 3:4-10) நினிவே மக்கள் யோனா அறிவித்ததைக் கேட்டு, தாழ்ச்சியோடு இறைவேண்டல் செய்து மனம் மாறி கடவுளின் மன்னிப்பை பெற்றார். இன்றைக்கு நாமும் ஜெபிக்கும் பொழுது இறைவன் முன் நம்மையே தாழ்த்தி நமது வேண்டுதல்களை அவர் முன் அர்ப்பணிக்கும் போது நாம் அவரால் உயர்த்தப்பட்டு நம்முடைய வேண்டுதல்கள் ஆசீர்வதிக்கப்படும்.

"தம்மைத் தாமே தாழ்த்துவோர் உயர்த்தப் பெறுவர்" என்னும் இயேசுவின் வாக்கிற்கினங்க நமது ஜெபம் தாழ்ச்சியோடு கூடியதாக அமைய வேண்டும். தாழ்ச்சிக்கு முன்னுதாரணமாக திகழ்ந்தவர் தான் நம் ஆண்டவர் இயேசு கிறிஸ்து. அவர் நம்மிடம், 'நான் கனிவும் மனத்தாழ்மையும் உடையவன். ஆகவே என் நுகத்தை உங்கள்மேல் ஏற்றுக் கொண்டு என்னிடம் கற்றுக் கொள்ளுங்கள்' (மத் 11:29) என்கிறார். அவர் தம்மையே வெறுமையாக்கி அடிமையின் தன்மை பூண்டு மனிதருக்கு ஒப்பானார். மனித உருவில் தோன்றி தம்மைத் தாழ்த்தி சாவை ஏற்கும் அளவுக்கு, அதுவும் சிலுவை சாவையே ஏற்கும் அளவுக்குக் கீழ்ப்படிபவரானார் என்று புனித பவுல் பிலிப்பியருக்கு எழுதிய திருமுகம் 2:5 முதல் 8 வரை உள்ள வசனங்கள் தெளிவுபடுத்துகின்றன. இயேசு கிறிஸ்து தன்னுடைய சீடர்களின் பாதங்களை கழுவி தாழ்ச்சி என்னும் பண்பில் வளர சீடர்களுக்கு சீடர்களுக்கு அழைப்பு தருகின்றார். இறைவனே தன்னை தாழ்த்தி சிலுவையை ஏற்றுக்கொண்டார் எனில் நாமும் வாழ்வின் பல சூழல்களில் தாழ்ச்சியை ஆடையாக அணிந்து கொள்ள வேண்டும். தாழ்ச்சிக்கு சிகரமான நமது அன்னை மரியாளைப் பாருங்கள். "இதோ ஆண்டவருடைய அடிமை. உமது வார்த்தையின்படியே எனக்கு ஆகட்டும்" என தன்னை தாழ்ச்சி நிறைந்த ஜெபத்தில் அர்ப்பணித்தார்.

புனித வின்சென்ட் தெ பவுல் தாழ்ச்சி என்னும் புண்ணியத்தைக் குறித்து பின்வருமாறு கூறுகின்றார். "தாழ்ச்சிதான் மற்ற எல்லா நற்பண்புகளையும் விட மேலானது. தாழ்ச்சி என்ற புண்ணியம் ஒருவனிடம் இல்லையென்றால் அவனிடம் இருக்கும் மற்ற எல்லாப் புண்ணியங்களும் மற்றும் நற்பண்புகளும் பயனற்றதாய்ப் போய்விடும்." புனித ஜோன் மரிய வியான்னி தாழ்ச்சியைப் பற்றி இவ்வாறு கூறுகின்றார். மற்ற எல்லா நற்பண்புகளையும் இணைக்கும் மாபெரும் நற்பண்புதான் தாழ்ச்சி என்னும் புண்ணியம். தாழ்ச்சி இல்லையென்றால் மாலையாகத் கோர்த்த மற்ற நற்பண்புகள் அனைத்தும் சிதறிவிடும். ஆண்டவர் இயேசுவின் அருள் கிடைக்க தாழ்ச்சியைப் போன்று பயன்படும் வேறு நற்பண்பு இல்லை என்கிறார் புனித அன்னை தெரேசா.

இன்றைக்கு பல வேளைகளில் நமது ஜெபம் சுயநலத்தோடும், சந்தேகத்தோடும், தற்பெருமையோடும் மற்றும் ஆணவத்தோடும் இருக்கின்றது. நாம் நமக்காக மட்டுமே ஜெபிக்கின்றோம். மற்றவர் நன்றாக வாழக்கூடாது என எண்ணுகின்றோம். நம் ஜெபத்திற்கு பலன் கிடைக்கவில்லை என்றால் இறைவன் மீது சந்தேகம் கொள்கின்றோம். நாம் தான் அதிக விசுவாசம நிறைந்தவர்கள் என ஆணவம் கொள்கின்றோம். இவையனைத்தையும் துறந்து தாழ்ச்சியோடு இறைவன் முன் நம் ஜெபங்களை அர்ப்பணிப்போம், அவர் ஆசீர் பெறுவோம். இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

Fr. அ. குழந்தை யேசு ராஜன் CMF 

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 29-ஆம் வாரம் - ( ஆண்டு- C) - 16 -10-2022- ஞாயிற்றுக்கிழமை

 

🌱விவிலிய விதைகள்🌱

பொதுக்காலம் 29-ஆம் ஞாயிறு

தமிழ் திருவழிபாட்டு மறையுரை

(16 அக்டோபர் 2022)

முதல் வாசகம்: விப 17: 8-13
இரண்டாம் வாசகம்: 2 திமொ 3: 14- 4: 2
நற்செய்தி: லூக் 18: 1-8

விடாமுயற்சி தரும் மாற்றம்

படுத்த படுக்கையாகக் கிடந்த அந்த மனிதருக்குப் பேசவோ, நடக்கவோ முடியாது. உடலில் ஒரு விரலைத் தவிர வேறெந்த பாகத்தையும் அசைக்க முடியாது. அந்த நிலையில் இருக்கும் மற்ற எவருமே மரணம் சீக்கிரமாக தன்னிடம் கருணை காட்டாதா என்று ஏங்குவதைத் தவிர வேறெதையும் செய்ய முடியாது. ஆனால் வாஷிங்டன் ரோப்ளிங் (Washington Roebling) என்ற அந்த மனிதரின் உடலைத் தான் விதியால் தொட முடிந்ததே தவிர அவருடைய கனவையும், மன உறுதியையும் அந்த ஒரு பரிதாப நிலையிலும் தொட முடியவில்லை. இத்தனைக்கும் அவர் தன் கனவை நிறைவேற்றும் முயற்சியில் தன் தந்தையை இழந்திருந்தார். தன் உடல் இயக்கத்தையும் இழந்திருந்தார். ஆனால் அவரால் தன் கனவை இழக்க முடியவில்லை. நியூயார்க் நகரத்தில் மன்ஹட்டன் பகுதியையும், லாங் ஐலேண்ட் ப்ரூக்ளின் பகுதியையும் இணைக்க கிழக்கு நதியின் குறுக்கே 5989 அடி நீளமுள்ள தொங்குபாலம் கட்ட தன் தந்தையோடு சேர்ந்து எண்ணியிருந்தார்கள். ஆனால் அவர்கள் வாழ்ந்த காலத்தில் (1870 ஆம் ஆண்டில்) அது போன்ற பாலம் சாத்தியமே அல்ல என்று வல்லுனர்கள் கருதினார்கள். வாஷிங்டன் ரோப்ளிங்கும், அவர் தந்தை ஜான் ரோப்ளிங்கும் இருவருமே இஞ்சீனியர்கள். அவர்கள் சாத்தியம் என்று நம்பினார்கள். அந்தப் பாலம் கட்டும் பணியைத் தொடங்கவும் செய்தார்கள். பாலம் கட்டும் பணியைத் தொடங்கிய சில மாதங்களிலேயே கட்டுமானப் பணி நடந்த இடத்திலேயே ஒரு விபத்தில் தந்தை ஜான் ரோப்ளிங்க் இறந்து போனார். அந்தப் பணியைத் தொடர்ந்த மகன் வாஷிங்டன் ரோப்ளிங்கும் ஒரு விபத்தில் அடிபட்டு மூளையின் சில பாகங்கள் பாதிக்கப்பட்டு படுத்த படுக்கையானார். எல்லோரும் அந்தப் பாலம் முட்டாள்தனமான முயற்சி என்றும், ராசியுமில்லாதவை என்றும், அந்த விபத்துகள் அதற்கான ஆதாரம் என்றும் விமரிசித்தார்கள். சிகிச்சைக்குப் பின் வாஷிங்டன் ரோப்ளினுக்கு அசையும் ஒரு விரலும், அசையாத மனமும் மட்டுமே எஞ்சி இருந்தன. அவர் அந்த பரிதாப நிலையிலும் உள்ளதை வைத்து முடிந்ததைச் செய்ய எண்ணினார். சில நாட்களில் மனைவி எமிலியுடன் விரலாலேயே தன் கருத்துகளைத் தெரிவிக்கும் ஒரு முறையை உருவாக்கிக் கொண்டு பாலம் கட்டும் எஞ்சீனியர்களை வரவழைக்கச் சொன்னார். அவர்களும் வந்தனர். மனைவி மூலம் அடுத்தது என்ன செய்ய வேண்டும் என்று அவர்களுக்கு விளக்கினார். மீண்டும் பாலம் கட்டும் பணி ஆரம்பித்தது. கணவருக்காக எமிலி தானும் கணிதம், கட்டிடக் கலை ஆகியவற்றைக் கற்று அந்தப் பணியில் தன்னையும் இணைத்துக் கொண்டார். அவர் மேற்பார்வையில் 11 ஆண்டுகளில் அந்தப் பாலம் நிறைவு பெற்றது. வாஷிங்டன் ரோப்ளினின் அந்தக் கனவு 1883ல் ப்ரூக்ளின் பாலம் என்ற பெயரில் நனவாகி வரலாற்றுச் சின்னமானது. அந்தப் பாலத்தைத் திறந்து வைத்தார் அமெரிக்க ஜனாதிபதி. விடாமுயற்சி மனித வாழ்வின் கனவுகளையும் மற்றும் இலட்சியங்களையும் அடைய இறைவன் தந்த மாபெரும் கருவி. இதை கிறிஸ்தவர்களாகிய நாமும் நமது ஜெப வாழ்வில் பயன்படுத்திட இன்றைய இறைவார்த்தைகளின் வழியாய் இறைவன் நம்மை அழைக்கிறார்.

"இடைவிடாது இறைவனிடம் வேண்டுங்கள்." (1 தெசலோனிக்கர் 5:17) என்னும் பவுல் அடிகளாரின் வார்த்தைகளுக்கு ஏற்ப இன்றைய நற்செய்தி வாசகம் இடைவிடாது ஜெபிக்க அழைப்பு தருகிறது. இடைவிடாது தொடர்ந்து நீதிக்காக முயற்சி செய்து கொண்டிருக்கின்ற கைம்பெண் மற்றும் நேர்மையற்ற நடுவரின் உவமையை இறைமைந்தன் இயேசு எடுத்துரைத்து அதே விடாமுயற்சியை நம்முடைய வாழ்விலும் கொண்டிருக்க அழைக்கிறார். இன்றைய நற்செய்தி விடாமுயற்சி தரும் இரண்டு வகையான மாற்றத்தை எடுத்துரைக்கிறது.

1. தன்னில் மாற்றம்
2. பிறரில் மாற்றம்

1. தன்னில் மாற்றம்

இன்றைய நற்செய்தியில் விடாமுயற்சியோடு நீதி கேட்டு போராடிக் கொண்டிருந்த கைம்பெண்ணுக்கு விடாமுயற்சியின் பலனாக நீதி கிடைக்கிறது. இது தன்னில் அவர் கண்ட மாற்றத்தை காட்டுகிறது.

"தெய்வத்தான் ஆகா தெனினும் முயற்சிதன்
மெய்வருத்தக் கூலி தரும் "

என்ற வள்ளுவரின் வரிகள் முயற்சியுடையார் இகழ்ச்சியடையார் என்ற ஒரு நம்பிக்கையைக் கொடுக்கும். முயற்சி செய்ய செய்ய நமக்குள்ளேயே ஒரு ஆர்வம் வந்துவிடும். நம்மில் ஏற்படுகின்ற இந்த நம்பிக்கையும் ஆர்வமும் நாம் நமது இலக்குகளை மற்றும் இலட்சியங்களை அடைவதற்கு வழி வகுக்கும். கிறிஸ்தவர்களாகிய நாம் ஒவ்வொரு நாளும் இடைவிடாமல் மற்றும் மனம் தளராமல் ஜெபிக்கின்ற பொழுது நிச்சயம் நாம் இறைவனால் ஆசீர்வதிக்கப்படுகின்றோம். அவருடைய பிள்ளைகளாக மாறுகின்றோம்.

2. பிறரில் மாற்றம்

விடாமுயற்சி நம்மில் மட்டும் மாற்றத்தை ஏற்படுத்துவதில்லை. நம்மைச் சார்ந்த மற்றும் நமக்காக உதவி செய்தவர்களையும் மாற்றுகிறது. நற்செய்தியில் நேர்மையற்ற நடுவர் தன்னுடைய நேர்மையற்ற தன்மையிலிருந்து மாறுபட்டு செயல்படுகிறார். கடவுளுக்கு அஞ்சாதவன் மற்றும் மக்களை மதிக்காதவன் தன்னுடைய நேர்மையற்ற தன்மையிலிருந்து மாறி, நேர்மையாக அந்த பெண்ணுக்கு நீதி வழங்குவது அவளது விடா முயற்சியால தான். இன்றைக்கு நமது வாழ்விலும் விடாமுயற்சியுடன் இறைவனை நோக்கி ஜெபிக்கின்ற பொழுது அது நம்முடைய குடும்பங்களுக்கும் ஆசீர்வாதமாக அமையும்.

                    லூக்கா நற்செய்தி 11:5-10-ல் நண்பன் வந்து கதவை தட்டிக் கொண்டே இருக்கின்றான், அவனுடைய தொல்லையின் பொருட்டு அவன் எழுந்து அவனுக்கு தேவையான ரொட்டியை கொடுக்கின்றான், விடா முயற்சி வெற்றி தருகிறது. மத்தேயு நற்செய்தி 15:27-28-ல் இஸ்ராயேல் குலத்தை சாராத கானானிய பெண் விடாமுயற்சியுடன் தொடர்ந்து இயேசுவிடம் பரிந்து பேசிக்கொண்டே இருக்கிறார், இறுதியாக மாற்றத்தை உணர்கிறாள். மாற்கு நற்செய்தி 10:46-52 -ல் பார்வையற்ற பர்த்திமேயு 'இயேசுவே தாவீதின் மகனே, எனக்கு இரங்கும்' என்று விடாமுயற்சியோடு நம்பிக்கையோடு வேண்டிக் கொண்டே இருக்கின்றான், இறுதியாக பார்வையைப் பெறுகிறான். இன்றைக்கு நமது வாழ்விலும் கிறிஸ்தவர்களாகிய நாம் பல வேளைகளில் ஜெபிக்கின்ற போது மனம் தளர்ந்து விடுகின்றோம். விடாமுயற்சியோடு தொடர்ந்து இறைவனிடம் ஜெபிக்க மறந்து விடுகின்றோம். குறிப்பாக, நமது சோதனை மற்றும் துன்பமான காலகட்டங்களில் நாம் இறைவனிடம் நம்பிக்கையோடு தொடர்ந்து ஜெபிக்க தவறி விடுகின்றோம். நான் இறைவன் மீது நம்பிக்கையாக இருக்கின்றேன் மற்றும் ஒவ்வொரு நாளும் ஜெபிக்கின்றேன் ஆனால், எனக்கு இறைவன் எதையும் செய்யவில்லை என்று நாம் மனம் தளர்ந்து விடுகின்றோம். நாம் ஒவ்வொரு முறையும் ஜெபிக்கின்ற பொழுது இறைவன் அருகே சென்று கொண்டிருக்கிறோம். இறைவனுடைய அருள் வரங்களால் நிரம்பி வழிந்து கொண்டிருக்கின்றோம். இது நம்முள் ஏற்படுகின்ற நாம் அறியாத ஒரு மாற்றம். எனவே நாம் ஒவ்வொரு முறையும் ஜெபிக்கின்ற பொழுது இறைவனால் ஆசீர்வதிக்கப்பட்டிருக்கின்றோம் என்பதை உணர்ந்தவர்களாக ஒவ்வொரு நாளும் இடைவிடாது நம்பிக்கையோடு ஜெபத்தில் அவரோடு இணைவோம்.

மனம் தளராது விடாமுயற்சியோடு செயல்படுவது வெறும் நமது ஜெப வாழ்விற்கு மட்டுமல்லாது, நமது அன்றாட வாழ்வில் நாம் செய்கின்ற ஒவ்வொரு செயலிலும் விடாமுயற்சி அடிப்படையாக தேவைப்படுகிறது. நாள்தோறும் குறைந்தபட்சம் ஐந்து பக்கங்களாவது எழுதிவிட வேண்டும் என்று விடாமுயற்சியோடு எழுதியதுதான் பெர்னாட்ஷாவைத் தலைசிறந்த எழுத்தாளர் என்ற வரிசையில் கொண்டு நிறுத்தியது. வெற்றி சாதாரணமாக யாருக்கும் கிடைத்து விடுவதில்லை. விடாமுயற்சி இருந்தால் மட்டுமே வெற்றி கிட்டும். தாமஸ் ஆல்வா எடிசன் மின்சாரத்தைக் கண்டுபிடித்தார் என்று பெருமையாகச் சொல்லிக் கொள்கிறோம். அவர் அந்த வெற்றியை அடையும்முன் ஆயிரம்முறை தோற்றிருக்கிறார். அதற்காக அவர் அவருடைய முயற்சியைக் கைவிட்டுவிடவில்லை. தொடர் ஆராய்ச்சி செய்ததன் விளைவாகவே ஆயிரத்திற்கு மேற்பட்ட கண்டுபிடிப்புகளுக்குச் சொந்தக்காரர் என்னும் உயர்நிலையை தாமஸ் ஆல்வா எடிசன் அடைய முடிந்தது. "அடிமேல் அடி வைத்தால் அம்மியும் நகரும் " வெற்றி பெற வேண்டுமா? விடாமுயற்சியையும் தன்னம்பிக்கையையும் அழைத்துக் கொண்டு கை கோர்த்து நடந்து பாருங்கள். ஜெபத்தில் மட்டுமல்ல வாழ்விலும் தோள்கொடுக்கும் விடாமுயற்சி, சுவைத்து பாருங்கள்‌. இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

Fr. அ. குழந்தை யேசு ராஜன் CMF