🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 25-ஆம் வாரம் - ( ஆண்டு- C) - 18 -09-2022- ஞாயிற்றுக்கிழமை

முதல் வாசகம் : ஆமோஸ் 8: 4-7
இரண்டாம் வாசகம் : 1 திமொத்தேயு 2: 1-8

நற்செய்தி : லூக்கா 16: 1-13

பணியாளனின் செயல் 

தையல்காரர் ஒருவர் அவருடைய கடையில் உட்கார்ந்து துணியை தைய்த்துக் கொண்டிருக்கிறார். அவர் மகன் அவரருகில் உட்கார்ந்து வேலை செய்வதை பார்த்துக் கொண்டிருக்கிறார். அந்த தையல்காரரோ அழகான துணியை எடுத்து, பளபளப்பான புதிய கத்திரிக்கோலிலே அதை வெட்டுகிறார். பின்பு அந்த கத்திரிக்கோலை அவர் கால் அருகே கீழே போடுகிறார். அந்த வெட்டிய துணியை தைக்கிறார், அதன் பின்பு அதிலிருக்கின்ற ஊசியை எடுத்து அவர் தலை மீது இருந்த தொப்பியிலே பாதுகாப்பாக குத்தி வைக்கிறார். இதைப் பார்த்த மகன், அப்பா கத்திரிக்கோல் விலை உயர்ந்தது அதை அலட்சியமாக காலுக்கு அடியிலே தூக்கி போட்டு விட்டீர்கள். ஆனால் இந்த ஊசியோ மிகவும் மலிவானது அதை பாதுகாப்பாக உங்கள் தொப்பியில் குத்தி வைத்திருக்கிறீர்களே என்று கேட்கிறான். அதற்கு அந்த அப்பா நீ சொல்வது உண்மை தான். கத்திரிக்கோல் விலை உயர்ந்ததாகவும் மற்றும் அழகானதாகவும் இருந்தாலும் அதனுடைய செயல் வெட்டுவது அதாவது பிரிப்பது. ஆனால் ஊசி மலிவானதாகவும் மற்றும் சின்னதாகவும் இருந்தாலும் அதனுடைய செயல் தைப்பது அதாவது சேர்ப்பது. ஒருவருடைய மதிப்பை தீர்மானிப்பது அவருடைய பணமோ அல்லது பொருளோ அல்ல மாறாக அவர் செய்கின்ற செயல் தான். இன்றைய நற்செய்தியிலும் வீட்டுப் பொறுப்பாளரை பணியிலிருந்து நீக்க போகிறேன் என்று தலைவர் கூறியவுடன், அவர் முன்மதியோடு செய்த செயல் தான் அவருக்கு மதிப்பையும் தலைவரிடத்தில் பாராட்டையும் பெற்று தந்தது. அப்பணியாளர் செய்த செயல் பல்வேறு பண்புகளை கொண்டதாக அமைகின்றது.

1. உறவுக்கு முக்கியத்துவம் தந்த செயல்:

செல்வரின் உடமைகளை பாழாக்கியதாக பழி சுமத்தப்பட்டு, கணக்கை ஒப்படையும் இனி நீ வீட்டு பொறுப்பாளராய் இருக்க முடியாது என்று தலைவர் கூறியவுடன் பணியாளர் மூன்று விதமான செயல்களை செய்திருக்கலாம்.

(a). பதவிக்கு முக்கியத்துவம்: அப்பணியாளர் தன்னுடைய பதவியை அதாவது பொறுப்பை காத்துக் கொள்வதற்காக, தான் செய்த செயல் தவறு என்று அந்த தலைவரின் காலில் விழுந்து மன்னிப்பு கேட்டு அந்த பதவியை அதாவது பொறுப்பை தக்க வைத்து கொண்டிருந்திருக்கலாம்.

(b). பொருளுக்கு முக்கியத்துவம்: அப்பணியாளர் தன் தலைவரிடம் கடன்பட்டவர்களை அழைத்து அவர்களது கடன் சீட்டில் குறைத்து எழுத வைத்து அதிலிருந்து ஒரு பங்கை அதாவது மீதமுள்ள 50 குடம் எண்ணெயில் 25 குடம் எண்ணெயும், மீதமுள்ள 20 மூடை கோதுமையில் 10 மூடை கோதுமையும் என்னுடைய பங்காக தாரும் என கேட்டு வாங்கியிருக்கலாம்.

(c). பணத்துக்கு முக்கியத்துவம்: நேர்மையற்ற பணியாளர் தன் தலைவரிடம் கடன்பட்டவர்களை அழைத்து அவர்கள் கடன் சீட்டில் குறைத்து எழுத வைத்து அதற்கு மாற்றாக ஒவ்வொருவரிடமும் பணம் பெற்று இருக்கலாம். தன்னுடைய தலைவரின் கணக்கை நிர்வகித்ததால், பொய் கணக்கு எழுதி தனக்கென்று பணத்தை எடுத்திருக்கலாம்.

ஆனால் இப்பணியாளர் செய்த செயல் பணத்திற்கும், பொருளுக்கும் மற்றும் பதவிக்கும் முக்கியத்துவம் கொடுக்காமல் உறவுக்கு முக்கியத்துவம் கொடுத்தாக இருந்தது. "பணம் பந்தியிலே குணம் குப்பையிலே இதைப் பார்த்து அறிந்து நடக்காதவன் மனிதனில்லே" என்று சொல்லுவார்கள். இவன் பணத்திற்கு முக்கியத்துவம் கொடுத்தவனாக அல்லாது குணத்திற்கு முக்கியத்துவம் கொடுத்து உறவுகளை சம்பாதித்துக் கொண்டான். இன்றைக்கு நம்மை பெற்று வளர்த்தெடுத்த பெற்றோரை பணத்தின் பொருட்டும் மற்றும் நம்முடைய வேலைகளின் பொருட்டும் மதிக்க மறக்கின்றோம், அவர்களுக்கு முக்கியத்துவம் தர மறந்து விடுகின்றோம். நமது வேலை, அதன் மூலம் கிடைக்கும் பணம் மற்றும் நகர வாழ்வு என கிராமத்திலிருக்கும் நம்முடைய பெற்றோர்களையும் உறவுகளையும் சந்திக்க நேரமில்லாமல் போய் விடுகிறது. அன்று அந்தப் பணியாளனின் செயல் பணத்திற்கு, பொருளுக்கு மற்றும் பதவிக்கு முக்கியத்துவம் கொடுக்கவில்லை மாறாக உறவுக்கு மட்டுமே முக்கியத்துவம் தந்தது. இன்று நமது செயல் எதற்கு முக்கியத்துவம் கொடுக்கிறது? பணம், பதவி மற்றும் பொருளுக்காக? அல்லது நமது உறவுகளுக்காக? சிந்திப்போம்!

2. இக்கட்டான சூழலில் செய்த செயல்:

இன்றைக்கு நற்செய்தியிலே இயேசு எடுத்துரைக்கும் பணியாளன் தன்னுடைய தலைவர் வீட்டு பொறுப்பிலிருந்து தன்னை நீக்க போகிறார் என்பதை அறிகிறான். இது அவனுக்கு ஒரு இக்கட்டான சூழல், திடீரென்று அவனது பொறுப்பு அவனை விட்டு போகிறது. குழம்பிய ‌மற்றும் வாழ்வை வெறுக்கும் ஒரு மனநிலையை உருவாக்கும் நேரம். ஆனால், இக்கட்டான சூழலிலும் சரியான ஒரு செயல், உறவுக்கு முக்கியத்துவம் கொடுத்து, தன் தலைவரிடத்தில் பெரும் பாராட்டை பெறுகிறான். இக்கட்டான சூழலிலும் அவனது செயல் இரண்டு பண்புகளை கொண்டிருந்தது.

(a). சிந்தித்து செயல்பட்ட நிலை: இக்கட்டான சூழ்நிலையிலும்

நான் என்ன செய்வேன்? என்று சிந்திக்க ஆரம்பிக்கின்றான். வீட்டுப் பொறுப்பிலிருந்து என்னை நீக்கிடும் போது, பிறர் என்னை தங்களது வீடுகளில் ஏற்றுக்கொள்ளும்படி நான் என்ன செய்ய வேண்டும்? என சிந்திக்கின்றான். ஒவ்வொரு மனிதனுக்கும் வாழ்வில் இக்கட்டான சூழல் ஏற்படுவதுண்டு. அத்தகைய சூழல்களில் எல்லாம் நம்முடைய உள்ளம் பயத்தால் சூழ்ந்து, வாழ்க்கையை வெறுத்து மற்றும் எதையும் சிந்திக்காமல் அவசர முடிவுகளை நாம் எடுப்பதுண்டு. எத்தகைய சூழலிலும் நாம் செய்யும் செயல் சரியானதாகவும் நன்மை பயக்கக் கூடியதாகவும் எதிர்கால வாழ்வை தரக்கூடியதாகவும் அமைய சிந்திக்க வேண்டும் என்பதற்கு நற்செய்தியில் வரும் பணியாளன் ஒரு மாபெரும் எடுத்துக்காட்டு.

(b). தன்னிலையை உணர்ந்த செயல்: தன் வேலை போக போகிறது என்னும் இக்கட்டான சூழலில், அப்பணியாளன் தன் வேலை போனால் தன்னால் மண் வெட்டவோ, இரந்து உண்ணவோ முடியாது என நினைக்கின்றான். இது அவன் தன்னிலையை உணர்ந்து செயல்பட்டிருக்கின்றான் என்பதன் அடையாளமாகும். இப்பணியாளனைப் போல இன்றைக்கு நாமும் இக்கட்டான சூழலிலும் மன அமைதியுடனும், பொறுமையுடனும் மற்றும் தன்னிலையை உணர்ந்து நன்றாக ஆழ்ந்து சிந்தித்து முடிவுகளை எடுக்கக்கூடிய திறனையும் வளர்த்துக் கொள்ள முயற்சி செய்ய வேண்டும். இன்று நமது முடிவுகள் தன்னிலை மை உணர்ந்து அமைகின்றதா? சிந்திப்போம்!

அனைவருக்காகவும் மன்றாடுங்கள், இறைவனிடம் வேண்டுங்கள், பரிந்து பேசுங்கள் மற்றும் நன்றி செலுத்துங்கள் என்னும் இன்றைய இரண்டாம் வாசக வார்த்தைகளுக்கு ஏற்ப நாம் இப்பணியாளனை போல இக்கட்டான சூழலிலும் சரியான ஒரு செயலை செய்யவும், அச்செயல் சிந்தித்து, தன்னிலையை உணர்ந்து மற்றும் நம் உறவுகளை வளர்க்க கூடியதாக அமைய இறையருளை வேண்டுவோம். இறைவன் நம் ஒவ்வொருவரையும்

ஆசீர்வதிப்பார்.

அன்புடன்:-

அருட்பணி. அ. குழந்தை யேசு ராஜன் CMF

                     

காணொளியில் காண/ஆடியோவில் கேட்க ... (தமிழ்)

காணொளியில் காண/ஆடியோவில் கேட்க ...(ஆங்கிலம்)

 

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 24-ஆம் வாரம் - ( ஆண்டு- C) - 11-09-2022- ஞாயிற்றுக்கிழமை

 

முதல் வாசகம் : விடுதலைப் பயணம் 32: 7-11, 13-14
இரண்டாம் வாசகம் : 1 திமொத்தேயு 1: 12-17

நற்செய்தி : லூக்கா 15: 1-32

Start with Why என்னும் ஆங்கில புத்தகம் Simon Sinek என்பவரால் எழுதப்பட்டது. இவர் இந்த புத்தகத்தில் மனிதன் சாதனையாளனாக மாறுவதற்கு Golden Circle அதாவது தங்க வளையம் என்னும் ரகசியத்தை கூறுகிறார். இவர் விமானம் கண்டுபிடிக்காத காலத்தில், Dong Lee என்பவர் அதை கண்டுபிடிப்பதற்காக முயற்சி எடுத்ததாகவும் மற்றும் அவருக்கு பல பெரிய நிறுவனங்கள் உதவி செய்ததாகவும் ஆனாலும் அவர் முயற்சி தோல்வி அடைந்து, அதே சூழலில் வாழ்ந்த ரைட் சகோதரர்கள் விமானத்தை கண்டுபிடித்ததற்கு காரணம் இந்த ரகசியத்தை அறிந்ததே ஆகும் என்கிறார். அதுமட்டுமல்லாது ஆப்பிள் நிறுவனத்தை தொடங்கிய ஸ்டீவ் ஜாப்ஸ் மற்றும் மார்ட்டின் லூதர் கிங் ஜூனியர் தங்களுடைய இலக்கிலே வெற்றி கண்டதற்கு காரணம் இந்த ரகசியம் தான் என்கிறார். What? how? why? அதாவது என்ன? எப்படி? மற்றும் ஏன்? என இந்த கேள்விகளை நாம் கேட்பதில் இரண்டு அணுகுமுறைகள் உண்டு. Outside In என்பது முதல் அணுகுமுறை அதாவது வெளியிருந்து உள்ளே மற்றும் Inside out என்பது இரண்டாவது அணுகுமுறை அதாவது உள்ளிருந்து வெளியே. சாதனையாளர்கள் எப்போதும் இரண்டாவது அணுகுமுறையை அதாவது ஏன்? என்னும் கேள்வியில் தொடங்கி என்ன? என்னும் கேள்வியில் தங்கள் இலக்குகளை வைக்கிறார்கள் என்கிறார். இத்தகைய அணுகுமுறையை பயன்படுத்தாதவர்கள் தங்களது வாழ்வின் இலக்குகளையும், தங்களது வாழ்வையும் காணாமல் போகச் செய்கிறார்கள் என்கிறார் சைமன் ஸ்னீக்.

நமது வாழ்க்கையிலும் நாம் பல இலக்குகள் மற்றும் நோக்கங்களை கொண்டு வாழ்கின்றோம் ஆனால் அதில் நாம் வெற்றி காண முடிவதில்லை. ஏனெனில் இவற்றை ஏன் செய்கின்றோம்? எப்படி செய்கின்றோம்? மற்றும் என்ன செய்கின்றோம்? என அறியாமலே செய்து கொண்டிருக்கின்றோம். இதனால் நம்முடைய இலக்குகள் மட்டுமல்லாது நமது வாழ்வே காணாமல் போய் விடுகிறது. இன்றைய இறைவார்த்தை இறைவனை, இறையாட்சியை மற்றும் கிறிஸ்தவ வாழ்வு என்னும் நோக்கத்தை விட்டு காணாமற் போன நம் வாழ்வை கண்டறிந்து மகிழ்ச்சி கொள்ள அழைப்பு தருகிறது. குறிப்பாக இன்றைய நற்செய்தி வாசகம் காணாமல் போன நம் வாழ்வை கண்டறிய மூன்று விதமான உவமைகளை குறிப்பிடுகின்றது. இந்த மூன்று உவமைகளும் மூன்று முக்கியமான பகுதிகளை கொண்டிருப்பதை நான் பார்க்கிறேன்.

1. காணாமற்போதல்

2. தேடுதல்

3. மகிழ்தல்

1. காணாமற்போதல்

நற்செய்தியின் மூன்று உவமைகளிலும் ஏதோ ஒன்று காணாமல் போயிருக்கின்றது. ஏன் இவைகள் காணாமல் போய் இருக்கிறது என்று சிந்தித்துப் பார்க்கின்ற பொழுது, காணாமல் போன ஆடு தனது குறிக்கோளிலிருந்து விலகி சென்றிருக்கின்றது, எதற்கு முக்கியத்துவம் கொடுக்க வேண்டுமோ அதற்கு முக்கியத்துவம் கொடுக்காமல், வெளியே இருப்பதால் கவர்ந்து இழுக்கப்பட்டு இருக்கின்றது. தன்னுடைய ஆயனின் சொல்லை கேட்காமல் இருந்திருக்கின்றது. தன்னுடன் இருக்கும் ஆடுகளோடு இணைந்திராமல் தனிமையில் இருந்திருக்கின்றது. எனவே தான் அது காணாமல் போயிருக்கின்றது. காணாமல் போன திராக்மாவை கொண்டு வந்த நபர் கவனக் குறைவாக இருந்திருக்க வேண்டும். வேறு எதற்கோ முக்கியத்துவம் கொடுத்திருக்க வேண்டும். அந்த வீடு சுத்தமில்லாததாக மற்றும் இருளாக இருந்திருக்க வேண்டும். அதனால் தான் அந்த திராக்மா காணாமல் போய் இருக்கின்றது. ஊதாரி மைந்தன் உவமையிலே இளைய மகன் பண ஆசை மிகுந்தவனாக இருந்திருக்கின்றான், ஆசையால் கவர்ந்து இழுக்கப்பட்டு, நண்பர்களின் பேச்சைக் கேட்டு தன்னையே மற்றும் தனது வாழ்வையே காணாமல் போக செய்திருக்கின்றான். தந்தைக்கு கொடுக்க வேண்டிய முக்கியத்துவத்தை கொடுக்காமல் இருந்திருக்கின்றான், தந்தையின் அன்பை உணராமல் இருந்திருக்கின்றான், யாரை சார்ந்து இருக்க வேண்டுமோ அவர்களை சார்ந்து இராமல், பிறரை சார்ந்து இருந்திருக்கின்றான். இவர்கள் எதற்கு முக்கியத்துவம் கொடுக்க வேண்டுமோ அதற்கு முக்கியத்துவம் கொடுக்காமல், எதை சார்ந்து இருக்க வேண்டுமோ அதை சார்ந்து இராமல், ஆசையால் வெளியே உள்ளதில் கவர்ந்திழுக்கப்பட்டு, பாவத்தில் விழுந்து இருந்திருக்கிறார்கள். இன்றைக்கு நமது கிறிஸ்தவ வாழ்விலும் நாம் எதற்கு முக்கியத்துவம் கொடுக்க வேண்டுமோ, அதற்கு முக்கியத்துவம் கொடுக்காமல் இந்த உலகத்தின் மீது மற்றும் உலகப் பொருட்களின் மீது ஆசை கொண்டு அதற்கு முக்கியத்துவம் கொடுத்து வாழ்ந்து கொண்டிருக்கின்றோம். அதனால் நம்மை, நம்முடைய இலக்குகளை மற்றும் கிறிஸ்தவ வாழ்வை காணாமல் போக செய்திருக்கின்றோம். இன்றைக்கு இறைவனை மறந்து, இறைவன் தருகின்ற இறையாட்சியை மறந்து மற்றும் கிறிஸ்துவ வாழ்வை மறந்து, மண், பெண், பொன் மற்றும் பொருளின் மீது ஆசை கொண்டு நம் வாழ்வை இழந்து கொண்டிருக்கின்றோம். ஆசைக்கு முக்கியத்துவம் கொடுத்துக் கொண்டு நல்ல குடும்ப வாழ்வை, பிள்ளைகளோடு இருக்க வேண்டிய உறவை காணாமல் போக செய்து கொண்டிருக்கின்றோம். இன்றைக்கு நான் என்னுடைய வாழ்க்கையிலே எப்படி இருக்கின்றேன்? எதற்கு முக்கியத்துவம் கொடுத்துக் கொண்டிருக்கின்றேன்? இறைவனுக்கும் இறைவன் தந்த அன்பான வாழ்விற்கும் முக்கியத்துவம் கொடுக்காமல் வெறும் பொருளுக்கும், பொண்ணுக்கும் மற்றும் மனித ஆசைகளுக்கும் முக்கியத்துவம் கொடுத்துக் கொண்டிருக்கின்றேனா? சிந்திப்போம்.

2. தேடுதல்

இயேசு கூறும் இந்த மூன்று உவமைகளிலும் காணாமல் போனவற்றை தேடுகின்ற நிலையை பார்க்கின்றோம். காணாமல் போன ஆட்டினை ஆயன் தேடுகின்றான். அதை கண்டுபிடிக்கும் வரை தேடிச் செல்கின்றான். தன்னிடையே இருந்த மீதமுள்ள 99 ஆடுகளையும் விட்டு விட்டு தேடுகின்றான். காணாமல் போன திராக்மா உவமையிலே விளக்கு ஏற்றி தேடுகிறாள், இருளான வீடு இங்கு விளக்கால் ஒளி ஏற்றப்படுகின்றது. அசுத்தமாக இருந்த வீடு கூட்டி சுத்தம் செய்யப்படுகிறது. அப்பெண் மிக கவனமாக அதைத் தேடுகின்றார். ஊதாரி மைந்தன் உவமையிலே இளைய மகன் தான் தொலைத்த வாழ்வை தானே தேடுகிறான். தன் நிலையை உணர்கின்றான், தந்தையின் அன்பை புரிந்து கொள்கின்றான். தன் துன்பத்தை, தனிமையை, பசியை மற்றும் அடிமை வாழ்வை உணர்கின்றான். நாமும் நம்முடைய வாழ்வை காணாமல் போக செய்திருந்தால் அதை தேட முயற்சிக்க வேண்டும். இறைவன் தரும் அன்பு வாழ்வை நோக்கி செல்ல வேண்டும். என்னுடைய குடும்ப வாழ்வை காணாமல் போக செய்திருந்தால், அந்த மகிழ்வான குடும்பத்தை நோக்கி செல்ல வேண்டும். இறைவனை மற்றும் இறைவன் தந்த அழகான கிறிஸ்தவ வாழ்வை நான் காணாமல் போக செய்திருந்தால், மீண்டும் அதை தேடி வந்து கண்டு கொள்ள வேண்டும்.

3. மகிழ்தல்

இந்த மூன்று உவமைகளிலும் காணாமல் போனவற்றை தேடி கண்டடைந்த பிறகு மகிழ்ச்சி ஏற்படுவதை பார்க்கின்றோம். தன்னுடைய ஆட்டை கண்டறிந்த ஆயன் மகிழ்ச்சியோடு அந்த ஆட்டை தோள்மீது போட்டுக் கொண்டு, வீடு வந்து, தன்னுடைய சக நண்பர்களை மற்றும் உறவுகளை அழைத்து மகிழ்ந்து கொண்டாடுவதை பார்க்கின்றோம். காணாமல் போன திராக்மாவை கண்டறிந்த பிறகு அப்பெண் அண்டை வீட்டாரை அழைத்து தன்னிடம் இருப்பவற்றை பகிர்ந்து மகிழ்வதை பார்க்கின்றோம். ஊதாரி மைந்தன் உவமையிலே மகனை கண்ட தந்தை மகிழ்ந்து, கொழுத்த கன்று அடித்து மகிழ்வதை பார்க்கின்றோம். ஆக இங்கு காணாமல் போனவை மீண்டும் கண்டறியப்படுவது மகிழ்வை தருகின்றது. இன்றைக்கு நாமும் நம்முடைய வாழ்க்கையிலே இறைவன் தருகின்ற அந்த நிலையான மகிழ்ச்சியை பெற வேண்டுமென்றால் காணாமல் போன நம் வாழ்வை மீண்டும் தேடுவோம். அப்பொழுது நமது வாழ்க்கையில் மகிழ்ச்சி மட்டுமல்லாது அழகான கிறிஸ்தவ வாழ்வு, அன்பான குடும்பம், சகோதரத்துவம், பகிர்வு மற்றும் மன அமைதி எல்லாம் நிரந்தரமாக கிடைக்கும்.

இன்றைய முதல் வாசகத்தில் இஸ்ராயேல் மக்கள் இறைவனுக்கு முக்கியத்துவம் கொடுக்காமல் பிற தெய்வங்களுக்கு முக்கியத்துவம் கொடுத்து பாவ வாழ்க்கையை வாழ்ந்தது போல, நாம் வாழாது இறைவனை தேடி அவரே எல்லாம் என அவர் பாதம் பணிவோம். இரண்டாம் வாசகத்தில் பவுல் அடிகளார் கூறுவதைப் போல நாம் நம்முடைய வாழ்க்கையிலே பாவத்தை விட்டு விட்டு இறைவனை நமது சொந்தமாக்குவோம், அவர் தருகின்ற அழகிய வாழ்வை பெற்றுக் கொள்ளுவோம். இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

அருட்பணி. அ. குழந்தை யேசு ராஜன் CMF

                  காணொளியில் காண/ஆடியோவில் கேட்க ... (தமிழ்)

காணொளியில் காண/ஆடியோவில் கேட்க ...(ஆங்கிலம்)

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 23-ஆம் வாரம் - ( ஆண்டு- C) - 04 -09-2022- ஞாயிற்றுக்கிழமை

 

முதல் வாசகம் : சீராக்கின் ஞானம் 9: 13-18
இரண்டாம் வாசகம் : பிலமோன் 9b-10, 12-17

நற்செய்தி : லூக்கா 14: 25-33

இயேசுவின் சீடத்துவத்தில் பங்கேற்க …|

பள்ளிக்கூடத்தின் வாயிலில் ஒருவர் பலூன் விற்று கொண்டிருக்கின்றார். அதை ஒரு சிறுமி நிறைய நேரமாக பார்த்துக் கொண்டிருக்கிறார். மெதுவாக அந்த சிறுமி பலூன் விற்பவரிடம் சென்று இங்கிருக்கின்ற எல்லா பலூன்களும் பறக்குமா? என்று கேட்கின்றாள். அதற்கு அவர் 'ஆம்' என்கிறார். அந்த சிறுமி மீண்டுமாக எல்லா கலர் பலூன்களும் பறக்குமா? என்று கேட்கின்றாள். அதற்கு அவர் மீண்டுமாக 'ஆம் பறக்குமே' என்கின்றார். அந்த சிறுமி கருப்பு நிற பலூனாக இருந்தாலும் பறக்குமா? என மீண்டும் கேட்கின்றாள். அந்த சிறுமி தான் கருப்பு நிறமாக இருப்பதை நினைத்துக் கொண்டு தான் இவ்வாராக கேட்கின்றாள் என்பதை உணர்ந்த அந்த பலூன் வியாபாரி, அந்த சிறுமியை பார்த்து பலூன் பறப்பது வெளியே உள்ள நிறத்தினால் அல்ல, மாறாக உள்ளே உள்ள கேஸினால் மட்டுமே என்றார். இன்றைக்கு நாமும் பல வேளைகளிலே வெளித்தோற்றத்தை வைத்து, அதை மதிப்பீட்டு அடைய முயற்சி செய்து கொண்டிருக்கிறோம். இயேசு செய்த வெளிப்புற வல்ல செயல்களை பார்த்து பலர் இயேசுவை பின்பற்ற முயன்ற போது, அவரது சீடத்துவத்தில் நுழைவதற்கான நிபந்தனைகளை இயேசு முன்வைப்பதே இன்றைய நற்செய்தி வாசகமாகும். வெறும் வெளிப்புற வல்ல செயல்களை பார்த்து அல்லாது, நமது உட்புற குணங்களை வைத்து மட்டுமே இயேசுவின் சீடத்துவம் சாத்தியமாகும் என்பதை உணர்ந்து கொள்ள அழைப்பு பெறுகின்றோம். கிரேக்க மொழியில் சீடன் என்பதற்கு கொடுக்கப்பட்ட பதம் மதட்டஸ் (mathetes), இதன் பொருள் மாணவன், பயிலுனன் என்பவையாகும். சீடன் என்பவன் குருவோடிருந்து, அவர் எடுத்துரைக்கின்ற யாவற்றையும் கேட்டு, அதன்படி செயல்படுகின்றவன். சீடத்துவத்தின் நிபந்தனைகளை அறிந்து, அதை பின்பற்ற இயலுமா என்பதை உணர்ந்து செயல்பட வேண்டும்.

"The Seven Habits of Highly effective people" என்பது Stephen Covey எழுதிய புத்தகம், இவர் இந்த புத்தகத்திலே மனிதனுக்கு தேவையான ஏழு முக்கியமான பழக்கங்களை குறிப்பிடுகின்றார். அதிலே ஏழாவது பழக்கமான 'ரம்பத்தை கூர்மைப்படுத்து' அதாவது Sharpen the saw என்னும் பழக்கத்தை விவரிப்பதற்காக நான்கு விதமான கூர்மைகளைப் பற்றி எடுத்துரைக்கிறார்.

1. உணர்வு கூர்மை

2. ஆன்மீக கூர்மை

3. உள்ளத்து கூர்மை

4. உடற் கூர்மை

இந்த நான்கு கூர்மைகளும் மனிதன் தன்னுடைய வாழ்வில் தன்னையே செதுக்கிக் கொள்ள அடிப்படையாக தேவைப்படுகிறது. இயேசுவின் சீடர்களாக வாழ நமக்கும் சில நிபந்தனைகள் தேவைப்படுகிறது. இன்றைய நற்செய்தியில் இயேசு சீடத்துவ வாழ்விற்கு எடுத்துரைக்கும் நிபந்தனைகளை இந்த நான்கு கூர்மைகளின் அடித்தளத்தில் எடுத்துரைக்கின்றார்.

1. உணர்வு கூர்மை (உணர்வுகளை கடந்து வருதல்...)

“என்னிடம் வருபவர் தம் தந்தை, தாய், மனைவி, பிள்ளைகள், சகோதர, சகோதரிகள் ஆகியோரையும், ஏன், தம் உயிரையுமே என்னைவிட மேலாகக் கருதினால், அவர் என் சீடராயிருக்க முடியாது." (லூக்கா 14:26) என நம் உறவுகளின் உணர்வுகளைக் கடந்து, ஏன் நம் உயிரையும் கடந்து, இயேசுவுக்கு முக்கியத்துவம் கொடுத்து, அவரின் சீடர்களாக வாழ நம் உணர்வுகளை கூர்மைப்படுத்த அழைப்பு பெறுகின்றோம். இன்றைக்கு நான் எனது வாழ்வில் எதற்கு முக்கியத்துவம் கொடுத்துக் கொண்டிருக்கின்றேன்? இந்த உலகில் நம் உறவுகளின் உணர்வுகளைக் காட்டிலும் இறைவனுக்கு முக்கியத்துவம் கொடுத்துக் கொண்டிருக்கின்றோமா? சிந்திப்போம். பல நேரங்களில் எங்கள் வீட்டிற்கு நண்பர்கள் மற்றும் உறவுகள் வந்திருக்கின்றார்கள் என்று இறைவனுக்கு முக்கியத்துவம் கொடுக்காமல் அதாவது ஞாயிறு திருப்பலியில் பங்கேற்காமல், குடும்ப ஜெபமாலையில் செய்யாமல், அதற்கான தயாரிப்பிற்கும், அவர்களுக்கும் முக்கியத்துவம் கொடுத்து கொண்டிருக்கின்றோம். இத்தகைய நிலையிலும் இறைவனுக்கு முக்கியத்துவம் கொடுப்பதே உண்மையான கிறிஸ்தவ சீடத்துவ வாழ்வு. இன்று நம்முடைய உணர்வுகளை கூர்மைப்படுத்தி இறைவனுக்கு முக்கியத்துவம் கொடுப்பவர்களாக நாம் மாறுவோம்.

2. ஆன்மீக கூர்மை ( துன்பங்களை கடந்து வருதல்...)

"தம் சிலுவையைச் சுமக்காமல் என் பின் வருபவர் எனக்குச் சீடராய் இருக்க முடியாது." (லூக்கா 14:27) என்னும் இயேசுவின் வார்த்தைகள் நாம் நமது வாழ்வின் துன்பங்களை மற்றும் சோதனைகளை ஏற்றுக்கொள்ள அழைப்பு தருகிறது. இன்று தன் துன்பங்களை ஏற்றுக் கொள்கின்றவனே நாளைய சாதனையாளனாகவும் மாறுகின்றான். நாம் செய்யும் ஒவ்வொரு செயலுக்கும் நாமே பொறுப்பேற்க வேண்டும். எனது சொல்லால், செயல்களால் மற்றும் நான் செய்கின்ற பாவங்களால் ஏற்படுகின்ற துன்பங்கள் என்னும் சிலுவைகளை நானே சுமக்க வேண்டும். இதுவே சீடத்துவத்திற்கான வழியாகவும் அமைகின்றது என்கின்றார் இறைமகன் இயேசு. நாம் நமது வாழ்வின் அன்றாட சிலுவைகளை சுமத்தல் என்பது நம்மை ஆன்மீக கூர்மைக்கு அழைப்பு விடுக்கின்றது. இன்றைக்கு வளர்ந்து வருகின்ற இந்த மாய உலகிலே எல்லாம் எனக்கு கஷ்டமில்லாமல் கிடைக்க வேண்டும் என்ற ஒரு உணர்வு நம்மிடையே இருக்கின்றது. இப்புதிய சமுதாயத்தின் நாகரீக வளர்ச்சியில் எதுவும் நமக்கு எளிமையாக கிடைப்பதில்லை. உழைப்பும் விடாமுயற்சியும் மற்றும் துன்பங்களை ஏற்றுக் கொள்ளுகின்ற மனமும் தான் வாழ்க்கையில் வெற்றி கொள்ளுகின்ற மனமாகும். இறைமைந்தன் இயேசு கிறிஸ்து அத்தகைய மனதோடு தான் சிலுவையை சுமந்து நமக்கு மீட்பை அளித்தார். தொடக்க கிறிஸ்தவர்களும் அன்று துன்பம் என்னும் சிலுவைகளை ஏற்றுக்கொண்டதால் தான் இன்று கிறிஸ்தவம் வளர்ந்தெழ செய்திருக்கின்றது. எனவே நமது கிறிஸ்தவ வாழ்வில் நாம் அனுபவிக்கும் அன்றாட சோதனைகளையும் மற்றும் துன்பங்களையும் ஏற்றுக்கொண்டு நமது ஆன்மீக வாழ்வை கூர்மைப்படுத்துவோம்.

3. உள்ளத்து கூர்மை (திட்டமிடுதலும், சிந்தனையும்)

நற்செய்தியில் திட்டமிடுதலையும் சிந்தனையையும் எடுத்துரைப்பதற்காக இயேசு இரண்டு விதமான உவமைகளை எடுத்துரைக்கின்றார். கட்டிடம் கட்டுபவன் அதற்காக திட்டமிடுகின்றான் மற்றும் அதற்கான செலவினங்களை பற்றி யோசிக்கின்றான். போருக்கு செல்லும் அரசன் தான் கொண்டிருக்கின்ற படைவீரர்களைக் கொண்டு எதிர் நாட்டு அரசின் படைகளோடு போராட முடியுமா என சிந்திக்கின்றான் (லூக்கா 14:28-32). இதே போல இயேசுவினுடைய சீடராக மாறுவதற்கு முன், என்னால் இந்த சீடத்துவ வாழ்க்கையை வாழ முடியுமா என்று ஆழ்ந்து சிந்திக்க வேண்டும் மற்றும் சீடத்துவ வாழ்விற்கான திட்டமிடலை செய்ய வேண்டும். ஆக திட்டமிடுதலும் ஆழ்ந்த சிந்தனையும் நமது உள்ளத்தில் பிறப்பவையாகும், அதை கூர்மையாக்குதலிலே இவை சாத்தியமாகும். ஆழம் தெரியாமல் காலை விடாதே என்னும் பழமொழிக்கு ஏற்ப நாம் செய்யும் ஒவ்வொரு செயலையும் யோசித்து சரியாக திட்டமிட்டு செய்ய முயல வேண்டும். நமது வீடுகளில் நடக்கும் திருமணத்திற்கும் மற்ற விசேஷங்களுக்கும் திட்டமிட்டு யோசித்து செயல்படுகின்ற நாம், தனிப்பட்ட ஆன்மீக வாழ்விற்காக சிந்திப்பதும் கிடையாது, திட்டமிடுவதும் கிடையாது. நாம் என்ன படிக்க வேண்டும்? எந்த வேலை செய்ய வேண்டும்? என்னுடைய குடும்பத்தை எப்படி அமைத்துக் கொள்ள வேண்டும்? என்பதை திட்டமிடுகின்ற நாம் நமது ஆன்மீக வாழ்விற்கு எவ்விதமான திட்டமிடுதலையும் சிந்திப்பதையும் செய்வது கிடையாது. ஒவ்வொரு நாளும் நான் அரை மணி நேரம் இறைவார்த்தையை வாசிப்பதற்கு செலவிடுவேன், குடும்ப ஜெபமாலை ஜெபிப்பேன், திருப்பலியில் பங்கேற்பேன், ஆலய நிகழ்வுகளிலும் மற்றும் பக்த சபைகளிலும் முழுமையாக பங்கேற்பேன என பலவிதமான திட்டமிடுதல்கள் நமது கிறிஸ்தவ சீடத்துவம் வாழ்வை ஆழப்படுத்தும்.

4. உடற்சார்ந்த கூர்மை (உடல் ஆசைகளை கடந்து)

"உங்களுள் தம் உடைமையையெல்லாம் விட்டுவிடாத எவரும் என் சீடராய் இருக்க முடியாது." (லூக்கா 14:33) என நம் உடலை அலங்கரிக்கின்ற ஆடைகளை அதாவது நம் உடமைகளை கடந்து, இன்னும் குறிப்பாக உடல் ஆசைகளைக் கடந்தால் தான் இயேசுவின் சீடர்களாக வாழ முடியும் என்கின்றார். இது உடை, நகை, அழகு சாதனங்கள் மற்றும் அலங்கார பொருட்கள் என உடலை அழகூட்ட மற்றும் அலங்கரிக்க பயன்படுவதில் ஆசை கொண்டு அதற்கு முக்கியத்துவம் கொடுக்கும் உலகம். அதுவே நமது கிறிஸ்தவ சீடத்துவ வாழ்விற்கு மிகப்பெரிய தடைக்கல்லும் ஆகும். இத்தகைய உடல் ஆசைகளை கடந்து இறைவனுக்கும் மனிதருக்கும் முக்கியத்துவம் கொடுத்து வாழ இறைவன் அழைப்பு விடுக்கின்றார்.

ஆக, நம்முடைய உறவுகளை கடந்து நம் உணர்வுகளை கூர்மைப்படுத்தி, துன்பங்களைக் கடந்து ஆன்மீகத்தை கூர்மைப்படுத்தி, ஆழ்ந்த சிந்தனை கொண்டு உள்ளத்தை கூர்மைப்படுத்தி மற்றும் நம்மை அழகுப்படுத்துவதை கடந்து உடலைக் கூர்மைப்படுத்தி இயேசுவின் சீடத்துவத்திற்குள் நுழைவோம். இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

அருட்பணி. அ. குழந்தை யேசு ராஜன் CMF

                     

காணொளியில் காண/ஆடியோவில் கேட்க ... (தமிழ்)

காணொளியில் காண/ஆடியோவில் கேட்க ...(ஆங்கிலம்)

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 22-ஆம் வாரம் - ( ஆண்டு- C) - 28 -08-2022- ஞாயிற்றுக்கிழமை

 

முதல் வாசகம் : சீராக்கின் ஞானம் 3: 17-18, 20, 28-29
இரண்டாம் வாசகம் : எபிரேயர் 12: 18-19, 22-24a
நற்செய்தி : லூக்கா 14: 1, 7-14

தாழ்ச்சியுடையோர் மாட்சியடைவர்

பெரிய ஆலமரத்தின் அடியில் துறவி ஒருவர் அமர்ந்திருந்தார். அவருக்கு கண் பார்வை கிடையாது. அப்போது அந்த வழியாக வந்த ஒருவன், ‘‘ஏய் கிழவா, யாராவது இந்த வழியாக சென்றார்களா?’’ என்று மரியாதையின்றி அதிகாரத்துடன் கேட்டான். அதற்கு அந்த துறவி ‘‘அப்படி யாரும் சென்றதாக தெரியவில்லை” என்று சொன்னார். சிறிது நேரம் கழித்து, மற்றொருவன் வந்து ‘‘ஐயா, இதற்கு முன் யாராவது சென்றார்களா?’’ என்று கேட்டார். அதற்கு அத்துறவியோ “ஆம், சற்று முன் இதே கேள்வியைக் ஒருவன் கேட்டு சென்றான்” என்றார். மீண்டும் சிறிது நேரம் கழித்து இன்னொருவன் வந்தான். அவனும் துறவியிடம் ‘‘வணங்குகிறேன், துறவியாரே. இதற்கு முன் இந்த வழியாக யாராவது செல்லும் சப்தம் கேட்டதா?’’ என்று பணிவுடன் கேட்டான். உடனே துறவி ‘‘மன்னரே, வணக்கம். இந்த வழியாக முதலில் ஒரு வீரன் சென்றான், அடுத்ததாக ஓர் அமைச்சர் சென்றார். இருவருமே நீங்கள் கேட்ட கேள்வியைக் கேட்டுச் சென்றனர்” என்று சொன்னார். அப்போது ஆச்சரியத்துடன் மன்னர் “துறவியாரே, உங்களுக்குத் தான் பார்வை இல்லையே. பின்னர் எப்படி முதலில் வீரனும், அடுத்ததாக அமைச்சர் என்றும் சரியாக சொல்கிறீர்கள்” என்று கேட்டான். அதற்கு துறவி "இதை அறிவதற்கு பார்வை தேவையில்லை. அவரவர் பேசுவதை வைத்தே, அவர் யார், அவரது தகுதி என்ன என்பதை தெரிந்து கொள்ளலாம்” என்று சொல்லி, "முதலில் வந்தவன் சற்றும் மரியாதையின்றியும், அடுத்து வந்தவரின் பேச்சில் அதிகாரமும், உங்களது பேச்சில் தாழ்ச்சியும் தென்பட்டது” என்று பொறுமையாக விளக்கிக் கூறினார். இன்று தாழ்ச்சியே நமது வார்த்தையாக, வாழ்வாக மற்றும் அடையாளமாக மாறி நம்மை வானளவு உயர்த்துகிறது. பொதுக்காலம் 22வது ஞாயிற்று கிழமையில் அடியெடுத்து வைத்திருக்கும் நம் அனைவரையும் இன்றைய இறைவார்த்தை வழிபாடு தாழ்ச்சியோடு வாழ அழைப்பு தருகின்றது. 'தாழ்ச்சியுடையோர் மாட்சியடைவர் மற்றும் தாழ்ச்சியுடையோர் இகழ்ச்சியடையார்' என்னும் சொல்லாடலுக்கு ஏற்ப தாழ்ச்சியான நமது வாழ்வே நம்மை வானளவு உயர்த்தி, இச்சமுதாயத்தில் நமக்கென ஒரு அடையாளத்தை கொடுக்கிறது.

'Humility' என்னும் தாழ்ச்சிக்கான ஆங்கில வார்த்தையின் மூல வார்த்தை 'humilis' என்னும் இலத்தின் மொழியிலிருந்து பிறப்பெடுக்கிறது. தமிழில் அதன் அர்த்தம் 'நிலம்' அல்லது 'மண்' ஆகும். பூமியில் அனைத்து உயிரினங்களும் வாழ்வதற்கு அடிப்படையாக இருப்பது மண் தான், இது ஒரு போதும் தன்னை உயர்த்தி காட்டாமல் தாழ்ச்சிக்கு சிறந்த எடுத்துக்காட்டாய் அமைகிறது. "தம்மைத்தாமே உயர்த்துவோர் யாவரும் தாழ்த்தப் பெறுவர்; தம்மைத்தாமே தாழ்த்துவோர் உயர்த்தப் பெறுவர்.” (லூக்கா 14:11) என இன்றைய நற்செய்தி வாசகமும், "குழந்தாய், நீ செய்வது அனைத்தையும் பணிவோடு செய்; அவ்வாறாயின், கடவுளுக்கு உகந்தோர் உனக்கு அன்பு காட்டுவர்." (சீராக் 3:17) என இன்றைய முதல் வாசகமும் நம்மை தாழ்ச்சியோடு வாழ அழைப்பு தருகிறது. தாழ்ச்சியோடு வாழ்தலே நம்மை மாட்சிப்படுத்தும் என்கின்றது இறை வார்த்தை. பழைய ஏற்பாட்டில் கோலியாத்து தாவீதை எதிர் கொண்டு வந்த போது ஆணவத்தோடும் தற்பெருமையோடும் வந்தான். ஆனால், தாவீது பணிவோடு தன்னையே தாழ்த்தி, இறைவனை நம்பி கோலியாத்தை வென்றார் (1 சாமுவேல் 16:17). இறைவன் முன்பு தன்னையே தாழ்த்தி கொள்பவர் இறைவனால் உயர்த்த பெறுவார். புதிய ஏற்பாட்டில் "இயேசு ஞானத்திலும் உடல் வளர்ச்சியிலும் மிகுந்து கடவுளுக்கும் மனிதருக்கும் உகந்தவராய் வாழ்ந்து வந்தார்" (லூக்கா 2:51-52) ஆக, இயேசு 30-ஆண்டுகள் தாழ்ச்சி என்னும் பண்பில் வளர்ந்தார். அது மட்டுமல்லாது இயேசுவின் இரண்டு முக்கிய செயல்கள் அவரது தாழ்ச்சி என்னும் பண்பை எடுத்துரைக்கிறது‌.

1. மனித உருவெடுத்து சிலுவை சாவை ஏற்றது:-

"அவர் தம்மையே வெறுமையாக்கி அடிமையின் வடிவை ஏற்று மனிதருக்கு ஒப்பானார். மனித உருவில் தோன்றி,சாவை ஏற்கும் அளவுக்கு, அதுவும் சிலுவைச் சாவையே ஏற்கும் அளவுக்குக் கீழ்ப்படிந்து தம்மையே தாழ்த்திக்கொண்டார்.எனவே கடவுளும் அவரை மிகவே உயர்த்தி, எப்பெயருக்கும் மேலான பெயரை அவருக்கு அருளினார்." (பிலிப்பியர் 2:7-9)

2. இயேசு சீடர்களின் பாதங்களை கழுவியது:-

ஒரு சமுதாயத்தில் குருவாக மற்றும் போதகராக இருக்கின்ற ஒரு மனிதர் அவருடைய சீடர்களின் பாதங்களை கழுவி, துடைத்து மற்றும் முத்தமிடுவது அவரில் விளங்கிய தாழ்ச்சி என்னும் பண்பை நமக்கு சுட்டிக் காட்டுகிறது(யோவா 13:14). இயேசு தாழ்ச்சியோடு வாழ்ந்தார், அதனால் எப்பெயருக்கும் மேலாக இறைவன் அவரை உயர்த்தினார். நாமும் அவரை போல இறைவனால் உயர்த்தப்பட தாழ்ச்சியோடு வாழ நம்மையும் அழைக்கிறார். ஆலயத்தினுள் நுழைந்து தன்னையே பெருமையாய்ப் பேசிய பரிசேயனின் வேண்டுதல் கேட்கப்படவில்லை. மாறாக, ஆண்டவரே நான் பாவி. என் மேல் இரக்கமாயிரும் என தாழ்ச்சியோடு செபித்த ஆயக்காரனின் வேண்டுதல் தான் இறைவனால் கேட்கப்படுகிறது (லூக் 18:11-13). தாழ்ச்சியும் பணிந்த மனமும் மிகுதியான ஆசீர்வாதங்களை இறைவனிடமிருந்து நமக்கு பெற்றுத்தருகிறது.

அன்னை மரியாவும், “நான் ஆண்டவரின் அடிமை; உம்சொற்படியே எனக்கு நிகழட்டும்” (லூக்கா 1:38) என இறைவன் முன்பு தன்னை முழுவதுமாக தாழ்த்தினார். இதைத்தான் "நெஞ்சிலே செருக்குற்றவர்களைச் சிதறடித்தார். ஆண்டவர் வலியாரை அரியணியினின்று அகற்றினார். தாழ்ந்தோரை உயர்த்தினார்” என மரியா தான் அடைந்த பேற்றைப் பாடுகிறார் (லூக் 1:51). பிரான்ஸ் நாட்டின் பிரன்னீஸ் மலைத்தொடரில் லூர்து என்ற இடத்திலுள்ள மசபியேல் குகையில் “நாமே அமலோற்பவம்” எனக் கூறிய மாதா, 1958 பிப்ரவரி 11 ஆம் நாள் முதல் பெர்னதெத் என்ற 14 வயது சிறுமிக்கு 18-முறை காட்சி கொடுத்து உலகிற்கு மீட்புச் செய்தியை அறிவித்தார். ஒரு முறை மாதா காட்சி கொடுத்தபோது பெர்னதெத்திடம் “உன் விரலை நீ மண்டியிட்டிருக்கும் இடத்திற்கு முன்னால் தரையில் விடு” என்றார். அப்படியே செய்யும் போது நீருற்று கொப்பளித்துக் கொண்டு வெளியே வந்தது. சேறும் சகதியுமான அத்தண்ணீரை நீ குடி” என்றார் மாதா. எந்த வெறுப்பையும் காட்டாதபடி அந்தக் கலங்கிய நீரைக் குடித்தாள் சிறுமி. இதுபற்றி ஒரு காட்சியில் பெர்னதெத் மாதாவிடம் விளக்கம் கேட்டபோது மாதா இவ்வாறு குறிப்பிட்டார். “உனக்குத் தாழ்ச்சி இருக்கிறதா என அறியவே உன்னைக் கலங்கிய நீரைக் குடிக்கச் சொன்னேன். நீ மகிழ்வோடு நான் சொன்னவாறே நடந்து கொண்டதால் உன்னிடம் மிகப்பெரிய இரகசியங்களையும் சொல்ல முன்வந்தேன்” என்றார். தாழ்ச்சி நிறை உள்ளமே இறைவனுக்கு உகந்த இதயம், அவ்விதயத்தை அன்னையை போல நாமும் பெறுவோம்.

"உண்மையில் வாழ்வதே தாழ்ச்சி" என்கிறார் புனித அவிலா தெரசா. "எல்லா நற்பண்புகளையும் இணைக்கும் மாபெரும் நற்பண்பு தான் தாழ்ச்சி, அது இல்லையென்றால் மாலையாகத் கோர்த்த மற்ற நற்பண்புகள் அனைத்தும் சிதறிவிடும்" என்கிறார் புனித ஜான் மரிய வியான்னி. "தாழ்ச்சி எல்லா நற்பண்புகளையும் விட மேலானது" என்கிறார் புனித வின்சென்ட் தெ பவுல். வாழ்க்கையில் எல்லா மனிதருக்கும் உயர வேண்டும் என்ற எண்ணமும் ஆசையும் உண்டு. அதை அடைய பிறரை அவமானப்படுத்துவதும் மற்றும் காயப்படுத்துவதும் சரியான வழி அல்ல. இறைவனில் சரணடைந்து தாழ்ச்சி என்னும் பண்பில் வாழும் போது அவர் நம்மை உயர்த்துவார். இதைத்தான் "ஆண்டவர்முன் உங்களைத் தாழ்த்துங்கள்; அவர் உங்களை உயர்த்துவார்" (யாக்கோபு 4:10) என்கிறது இறைவார்த்தை. இன்றைக்கு தாழ்ச்சியோடு வாழ்தலை அடிமைத்தனம் மற்றும் பலவீனம் என்று நினைக்கின்றோம். ஆனால் அது தான் நம்மை வளர்த்தெடுக்கும் உந்து சக்தியாக இருக்கிறது. தாழ்ச்சியோடு வாழும் குடும்பங்கள் பிரச்சனைகளை எளிதாக தீர்க்கும் குடும்பங்களாக மாறுகிறது. "தாழ்ச்சியோடு வாழ்தலே இறைவனை அடையும் வழி" என்கிறார் திருத்தந்தை பிரான்சிஸ். எனவே நம்மையும் நம் குடும்பங்களையும் உயர்த்தி, நம்மை இறைவனை நோக்கி அழைத்து செல்லும் தாழ்ச்சியை நம் ஆடையாக அணிந்து வாழ இறையருளை வேண்டுவோம். இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

அருட்பணி. அ. குழந்தை யேசு ராஜன் CMF

                காணொளியில் காண/ஆடியோவில் கேட்க ... (தமிழ்)

காணொளியில் காண/ஆடியோவில் கேட்க ...(ஆங்கிலம்)