🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 22-ஆம் வாரம் - ( ஆண்டு- C) - 28 -08-2022- ஞாயிற்றுக்கிழமை

 

முதல் வாசகம் : சீராக்கின் ஞானம் 3: 17-18, 20, 28-29
இரண்டாம் வாசகம் : எபிரேயர் 12: 18-19, 22-24a
நற்செய்தி : லூக்கா 14: 1, 7-14

தாழ்ச்சியுடையோர் மாட்சியடைவர்

பெரிய ஆலமரத்தின் அடியில் துறவி ஒருவர் அமர்ந்திருந்தார். அவருக்கு கண் பார்வை கிடையாது. அப்போது அந்த வழியாக வந்த ஒருவன், ‘‘ஏய் கிழவா, யாராவது இந்த வழியாக சென்றார்களா?’’ என்று மரியாதையின்றி அதிகாரத்துடன் கேட்டான். அதற்கு அந்த துறவி ‘‘அப்படி யாரும் சென்றதாக தெரியவில்லை” என்று சொன்னார். சிறிது நேரம் கழித்து, மற்றொருவன் வந்து ‘‘ஐயா, இதற்கு முன் யாராவது சென்றார்களா?’’ என்று கேட்டார். அதற்கு அத்துறவியோ “ஆம், சற்று முன் இதே கேள்வியைக் ஒருவன் கேட்டு சென்றான்” என்றார். மீண்டும் சிறிது நேரம் கழித்து இன்னொருவன் வந்தான். அவனும் துறவியிடம் ‘‘வணங்குகிறேன், துறவியாரே. இதற்கு முன் இந்த வழியாக யாராவது செல்லும் சப்தம் கேட்டதா?’’ என்று பணிவுடன் கேட்டான். உடனே துறவி ‘‘மன்னரே, வணக்கம். இந்த வழியாக முதலில் ஒரு வீரன் சென்றான், அடுத்ததாக ஓர் அமைச்சர் சென்றார். இருவருமே நீங்கள் கேட்ட கேள்வியைக் கேட்டுச் சென்றனர்” என்று சொன்னார். அப்போது ஆச்சரியத்துடன் மன்னர் “துறவியாரே, உங்களுக்குத் தான் பார்வை இல்லையே. பின்னர் எப்படி முதலில் வீரனும், அடுத்ததாக அமைச்சர் என்றும் சரியாக சொல்கிறீர்கள்” என்று கேட்டான். அதற்கு துறவி "இதை அறிவதற்கு பார்வை தேவையில்லை. அவரவர் பேசுவதை வைத்தே, அவர் யார், அவரது தகுதி என்ன என்பதை தெரிந்து கொள்ளலாம்” என்று சொல்லி, "முதலில் வந்தவன் சற்றும் மரியாதையின்றியும், அடுத்து வந்தவரின் பேச்சில் அதிகாரமும், உங்களது பேச்சில் தாழ்ச்சியும் தென்பட்டது” என்று பொறுமையாக விளக்கிக் கூறினார். இன்று தாழ்ச்சியே நமது வார்த்தையாக, வாழ்வாக மற்றும் அடையாளமாக மாறி நம்மை வானளவு உயர்த்துகிறது. பொதுக்காலம் 22வது ஞாயிற்று கிழமையில் அடியெடுத்து வைத்திருக்கும் நம் அனைவரையும் இன்றைய இறைவார்த்தை வழிபாடு தாழ்ச்சியோடு வாழ அழைப்பு தருகின்றது. 'தாழ்ச்சியுடையோர் மாட்சியடைவர் மற்றும் தாழ்ச்சியுடையோர் இகழ்ச்சியடையார்' என்னும் சொல்லாடலுக்கு ஏற்ப தாழ்ச்சியான நமது வாழ்வே நம்மை வானளவு உயர்த்தி, இச்சமுதாயத்தில் நமக்கென ஒரு அடையாளத்தை கொடுக்கிறது.

'Humility' என்னும் தாழ்ச்சிக்கான ஆங்கில வார்த்தையின் மூல வார்த்தை 'humilis' என்னும் இலத்தின் மொழியிலிருந்து பிறப்பெடுக்கிறது. தமிழில் அதன் அர்த்தம் 'நிலம்' அல்லது 'மண்' ஆகும். பூமியில் அனைத்து உயிரினங்களும் வாழ்வதற்கு அடிப்படையாக இருப்பது மண் தான், இது ஒரு போதும் தன்னை உயர்த்தி காட்டாமல் தாழ்ச்சிக்கு சிறந்த எடுத்துக்காட்டாய் அமைகிறது. "தம்மைத்தாமே உயர்த்துவோர் யாவரும் தாழ்த்தப் பெறுவர்; தம்மைத்தாமே தாழ்த்துவோர் உயர்த்தப் பெறுவர்.” (லூக்கா 14:11) என இன்றைய நற்செய்தி வாசகமும், "குழந்தாய், நீ செய்வது அனைத்தையும் பணிவோடு செய்; அவ்வாறாயின், கடவுளுக்கு உகந்தோர் உனக்கு அன்பு காட்டுவர்." (சீராக் 3:17) என இன்றைய முதல் வாசகமும் நம்மை தாழ்ச்சியோடு வாழ அழைப்பு தருகிறது. தாழ்ச்சியோடு வாழ்தலே நம்மை மாட்சிப்படுத்தும் என்கின்றது இறை வார்த்தை. பழைய ஏற்பாட்டில் கோலியாத்து தாவீதை எதிர் கொண்டு வந்த போது ஆணவத்தோடும் தற்பெருமையோடும் வந்தான். ஆனால், தாவீது பணிவோடு தன்னையே தாழ்த்தி, இறைவனை நம்பி கோலியாத்தை வென்றார் (1 சாமுவேல் 16:17). இறைவன் முன்பு தன்னையே தாழ்த்தி கொள்பவர் இறைவனால் உயர்த்த பெறுவார். புதிய ஏற்பாட்டில் "இயேசு ஞானத்திலும் உடல் வளர்ச்சியிலும் மிகுந்து கடவுளுக்கும் மனிதருக்கும் உகந்தவராய் வாழ்ந்து வந்தார்" (லூக்கா 2:51-52) ஆக, இயேசு 30-ஆண்டுகள் தாழ்ச்சி என்னும் பண்பில் வளர்ந்தார். அது மட்டுமல்லாது இயேசுவின் இரண்டு முக்கிய செயல்கள் அவரது தாழ்ச்சி என்னும் பண்பை எடுத்துரைக்கிறது‌.

1. மனித உருவெடுத்து சிலுவை சாவை ஏற்றது:-

"அவர் தம்மையே வெறுமையாக்கி அடிமையின் வடிவை ஏற்று மனிதருக்கு ஒப்பானார். மனித உருவில் தோன்றி,சாவை ஏற்கும் அளவுக்கு, அதுவும் சிலுவைச் சாவையே ஏற்கும் அளவுக்குக் கீழ்ப்படிந்து தம்மையே தாழ்த்திக்கொண்டார்.எனவே கடவுளும் அவரை மிகவே உயர்த்தி, எப்பெயருக்கும் மேலான பெயரை அவருக்கு அருளினார்." (பிலிப்பியர் 2:7-9)

2. இயேசு சீடர்களின் பாதங்களை கழுவியது:-

ஒரு சமுதாயத்தில் குருவாக மற்றும் போதகராக இருக்கின்ற ஒரு மனிதர் அவருடைய சீடர்களின் பாதங்களை கழுவி, துடைத்து மற்றும் முத்தமிடுவது அவரில் விளங்கிய தாழ்ச்சி என்னும் பண்பை நமக்கு சுட்டிக் காட்டுகிறது(யோவா 13:14). இயேசு தாழ்ச்சியோடு வாழ்ந்தார், அதனால் எப்பெயருக்கும் மேலாக இறைவன் அவரை உயர்த்தினார். நாமும் அவரை போல இறைவனால் உயர்த்தப்பட தாழ்ச்சியோடு வாழ நம்மையும் அழைக்கிறார். ஆலயத்தினுள் நுழைந்து தன்னையே பெருமையாய்ப் பேசிய பரிசேயனின் வேண்டுதல் கேட்கப்படவில்லை. மாறாக, ஆண்டவரே நான் பாவி. என் மேல் இரக்கமாயிரும் என தாழ்ச்சியோடு செபித்த ஆயக்காரனின் வேண்டுதல் தான் இறைவனால் கேட்கப்படுகிறது (லூக் 18:11-13). தாழ்ச்சியும் பணிந்த மனமும் மிகுதியான ஆசீர்வாதங்களை இறைவனிடமிருந்து நமக்கு பெற்றுத்தருகிறது.

அன்னை மரியாவும், “நான் ஆண்டவரின் அடிமை; உம்சொற்படியே எனக்கு நிகழட்டும்” (லூக்கா 1:38) என இறைவன் முன்பு தன்னை முழுவதுமாக தாழ்த்தினார். இதைத்தான் "நெஞ்சிலே செருக்குற்றவர்களைச் சிதறடித்தார். ஆண்டவர் வலியாரை அரியணியினின்று அகற்றினார். தாழ்ந்தோரை உயர்த்தினார்” என மரியா தான் அடைந்த பேற்றைப் பாடுகிறார் (லூக் 1:51). பிரான்ஸ் நாட்டின் பிரன்னீஸ் மலைத்தொடரில் லூர்து என்ற இடத்திலுள்ள மசபியேல் குகையில் “நாமே அமலோற்பவம்” எனக் கூறிய மாதா, 1958 பிப்ரவரி 11 ஆம் நாள் முதல் பெர்னதெத் என்ற 14 வயது சிறுமிக்கு 18-முறை காட்சி கொடுத்து உலகிற்கு மீட்புச் செய்தியை அறிவித்தார். ஒரு முறை மாதா காட்சி கொடுத்தபோது பெர்னதெத்திடம் “உன் விரலை நீ மண்டியிட்டிருக்கும் இடத்திற்கு முன்னால் தரையில் விடு” என்றார். அப்படியே செய்யும் போது நீருற்று கொப்பளித்துக் கொண்டு வெளியே வந்தது. சேறும் சகதியுமான அத்தண்ணீரை நீ குடி” என்றார் மாதா. எந்த வெறுப்பையும் காட்டாதபடி அந்தக் கலங்கிய நீரைக் குடித்தாள் சிறுமி. இதுபற்றி ஒரு காட்சியில் பெர்னதெத் மாதாவிடம் விளக்கம் கேட்டபோது மாதா இவ்வாறு குறிப்பிட்டார். “உனக்குத் தாழ்ச்சி இருக்கிறதா என அறியவே உன்னைக் கலங்கிய நீரைக் குடிக்கச் சொன்னேன். நீ மகிழ்வோடு நான் சொன்னவாறே நடந்து கொண்டதால் உன்னிடம் மிகப்பெரிய இரகசியங்களையும் சொல்ல முன்வந்தேன்” என்றார். தாழ்ச்சி நிறை உள்ளமே இறைவனுக்கு உகந்த இதயம், அவ்விதயத்தை அன்னையை போல நாமும் பெறுவோம்.

"உண்மையில் வாழ்வதே தாழ்ச்சி" என்கிறார் புனித அவிலா தெரசா. "எல்லா நற்பண்புகளையும் இணைக்கும் மாபெரும் நற்பண்பு தான் தாழ்ச்சி, அது இல்லையென்றால் மாலையாகத் கோர்த்த மற்ற நற்பண்புகள் அனைத்தும் சிதறிவிடும்" என்கிறார் புனித ஜான் மரிய வியான்னி. "தாழ்ச்சி எல்லா நற்பண்புகளையும் விட மேலானது" என்கிறார் புனித வின்சென்ட் தெ பவுல். வாழ்க்கையில் எல்லா மனிதருக்கும் உயர வேண்டும் என்ற எண்ணமும் ஆசையும் உண்டு. அதை அடைய பிறரை அவமானப்படுத்துவதும் மற்றும் காயப்படுத்துவதும் சரியான வழி அல்ல. இறைவனில் சரணடைந்து தாழ்ச்சி என்னும் பண்பில் வாழும் போது அவர் நம்மை உயர்த்துவார். இதைத்தான் "ஆண்டவர்முன் உங்களைத் தாழ்த்துங்கள்; அவர் உங்களை உயர்த்துவார்" (யாக்கோபு 4:10) என்கிறது இறைவார்த்தை. இன்றைக்கு தாழ்ச்சியோடு வாழ்தலை அடிமைத்தனம் மற்றும் பலவீனம் என்று நினைக்கின்றோம். ஆனால் அது தான் நம்மை வளர்த்தெடுக்கும் உந்து சக்தியாக இருக்கிறது. தாழ்ச்சியோடு வாழும் குடும்பங்கள் பிரச்சனைகளை எளிதாக தீர்க்கும் குடும்பங்களாக மாறுகிறது. "தாழ்ச்சியோடு வாழ்தலே இறைவனை அடையும் வழி" என்கிறார் திருத்தந்தை பிரான்சிஸ். எனவே நம்மையும் நம் குடும்பங்களையும் உயர்த்தி, நம்மை இறைவனை நோக்கி அழைத்து செல்லும் தாழ்ச்சியை நம் ஆடையாக அணிந்து வாழ இறையருளை வேண்டுவோம். இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

அருட்பணி. அ. குழந்தை யேசு ராஜன் CMF

                காணொளியில் காண/ஆடியோவில் கேட்க ... (தமிழ்)

காணொளியில் காண/ஆடியோவில் கேட்க ...(ஆங்கிலம்)

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 21-ஆம் வாரம் - ( ஆண்டு- C) - 21-08-2022- ஞாயிற்றுக்கிழமை

 

இடுக்கமான வாயில் 

(சிலுவை, பொறுமை, தாழ்ச்சி, இயேசு, மீட்பின் வழி)

முதல் வாசகம் : எசாயா 66: 18-21
இரண்டாம் வாசகம் : எபிரேயர்12: 5-7, 11-13
நற்செய்தி : லூக்கா 13: 22-30

கிரிக்கெட் மற்றும் கால்பந்து என முக்கியமான போட்டிகளை பார்க்க மைதானத்திற்கு செல்லுவதற்கும், வெளிநாட்டவர்கள், அமைச்சர்கள், அரசு அதிகாரிகள் மற்றும் திரைப்பட நடிகர், நடிகைகள் பங்கேற்கும் முக்கியமான நிகழ்வுகள் நடக்கும் அரங்கிற்கு செல்லுவதற்கும் பொதுவாக ஒரே ஒரு வழியை ஏற்பாடு செய்வதில்லை. விளையாட்டு வீரர்கள் மற்றும் சிறப்பு விருந்தினர்கள் செல்லுவதற்கு ஒரு வழியும், பார்வையாளர்கள் செல்லுவதற்கு மற்றொரு வழியும் என பல்வேறு விதமான மனிதர்களுக்கு ஏற்றவாறு பல வழிகள் அமைப்பதை நாம் அறிவோம். ஆனால் இறைவன் தரும் இறையாட்சிக்குள் நுழைய, அவர் தரும் மீட்பை பெற்றுக் கொள்ள நம் எல்லோருக்கும் ஒரே வழியாம் இடுக்கமான வாசல் மட்டுமே உள்ளது, அதில் நாம் நுழைய வருந்தி முயல அழைக்கப்படுகின்றோம். இன்றைய நற்செய்தியில் ஒருவர் இயேசுவிடம், “ஆண்டவரே, மீட்புப் பெறுவோர் சிலர் மட்டும்தானா?” (13:23) என யூதர்கள் தான் கட்டளைகளை கடைபிடிக்கிறார்கள், அவர்கள் மட்டுமே மீட்பு பெற தகுதியானவர்கள், அதை இயேசுவே சொல்லட்டும் என்னும் விவிலிய பின்னணியில் கேட்கின்றார். ஆனால் இயேசு அவரிடம் எல்லோருக்கும் மீட்புக்கு ஒரே வழி "இடுக்கமான வாயில்" என்பதை எடுத்துரைகின்றார். இன்றைக்கு நாமும் நமது வாழ்வில் இடுக்கமான வாயில் வழியாய் நுழைய அதன் ஜந்து முக்கிய குணங்களை புரிந்து அதை தமதாக்க வேண்டும்.

1. சிலுவையின் வழி
2. பொறுமையின் வழி
3. தாழ்ச்சியின் வழி
4. இயேசுவின் வழி
5. மீட்பின் வழி

1. சிலுவையின் வழி

இடுக்கமான வாயிலில் எல்லோரும் அவ்வளவு எளிமையாக நுழைய முடியாது, மாறாக கஷ்டப்பட்டு தான் நுழைய இயலும். இறைவன் பயன்படுத்தும் உருவகமான இடுக்கமான வாயில் நம்மை சிலுவைகளை அதாவது நம் வாழ்வின் துன்பங்களை ஏற்றுக் கொள்ள அழைப்பு தருகிறது. அதனால் தான் இயேசு "என்னை பின்பற்ற விரும்பும் எவரும் தன்னலம் துறந்து தன் சிலுவையை சுமந்துகொண்டு என்னை பின்பற்றட்டும்" என்கிறார். அதுமட்டுமல்லாது என்னோடு இந்த துன்பக்கிண்ணத்தில் பருகுவதற்கு தயாரா? எனவும் கேட்கிறார். இன்றைக்கு நமது வாழ்வில் நாம் மீட்பை பெற வாழ்வின் சிலுவைகளை அதாவது துன்பங்களை, அவமானங்களை, சோதனைகளை மற்றும் கஷ்டங்களை ஏற்றுக் கொள்ள வேண்டும். இதற்கு இயேசுவே முன்னுதாரணமாக சிலுவை சுமந்து, பாடுகளை ஏற்று மற்றும் தன்னுயிரை தந்திருக்கிறார். இவையனைத்தும் இயேசு நம் ஒவ்வொருவருக்கும் சிலுவையின் வழியில் வாழ கொடுக்கும் அழைப்பாகும்.

2. பொறுமையின் வழி

பொறுமை கடலினும் பெரியது என்னும் சொல்லாடலுக்கு ஏற்றவாறு இடுக்கமான வாயில் நமக்கு பொறுமை என்னும் நற்குணத்தை கற்றுத் தருகிறது. இடுக்கமான வாயிலில் நாம் நினைத்தவுடன் எல்லோரும் நுழைந்து விட முடியாது. அதற்காக காத்திருந்து ஒருவர் ஒருவராக தான் செல்ல வேண்டும் மற்றும் முழுவதுமாக நம்மை தயாரிக்க வேண்டும். இயேசு கானாவூர் திருமணத்தில் தண்ணீரைத் திராட்சை இரசமாக மாற்றுவதற்கு முன்பு தன்னுடைய தாயிடம் என்னுடைய நேரம் இன்னும் வரவில்லை என்கின்றார். மேலும் ஒவ்வொரு முறையும் தன்னுடைய சீடர்களிடம் தான் எருசலேம் செல்ல வேண்டும் மற்றும் பாடுகள் பட வேண்டும் என கூறும் போதெல்லாம் அவர் அதற்காக பொறுமையோடு காத்திருந்தது வெளிப்படுகிறது. இவ்வாறு இயேசு கல்வாரி மலையில் தன்னை சிலுவையில் அர்ப்பணித்து மானுடத்திற்கு மீட்பை அளிக்க முப்பத்து மூன்று ஆண்டுகள் காத்திருந்தார். மாறிவரும் இந்த மாய உலகில் எதுவும் துரிதமாக நடந்து விட வேண்டும் என எண்ணுகிறோம், ஆனால் பொறுமையாக காத்திருக்கும் போது நம் இலக்குகளை அடைய இயலும், குடும்பத்தின் பிரச்சனைகளை சரி செய்ய இயலும் மற்றும் நம் வாழ்வு வசந்தமாகும். எனவே பொறுமையோடு நம் நேரத்திற்காக விழிப்பாய் காத்திருப்போம்.

3. தாழ்ச்சியின் வழி

இடுக்கமான வாயிலில் பணிந்து மற்றும் குணிந்து தான் செல்ல இயலும், ஆக இடுக்கலான வாயில் என்னும் உருவகம் நம்மை தாழ்ச்சியோடு வாழ கொடுக்கும் அழைப்பாகும். பெத்லகேமில் இயேசு பிறந்த இடத்தில் கட்டப்பட்டிருக்கின்ற ஆலயத்தின் நுழைவு வாயிலானது மிக இடுக்கலான வாயிலாக கட்டப்பட்டிருக்கிறதாம். இது எல்லோரும் சிரம் தாழ்த்தி தாழ்ச்சி என்னும் குணத்தோடு இறைவனிடம் செல்வதற்காக அமைக்கப்பட்டதாம். இயேசு தன்னையே சிலுவையில் தாழ்த்தி நமக்கு மீட்பை கொடுத்தார். அன்னை மரியாள் "இதோ ஆண்டவருடைய அடிமை, உமது வார்த்தையின்படியே எனக்கு ஆகட்டும்." என தன்னை முழுவதுமாக தாழ்த்தினார். இன்றைக்கு நாமும் தாழ்ச்சி என்னும் ஆடையை அணிந்து இறைவன் அருளும் மீட்பை பெற்றுக் கொள்வோம்.

4. இயேசுவின் வழி

“வழியும் உண்மையும் வாழ்வும் நானே. என் வழியாய் அன்றி எவரும் தந்தையிடம் வருவதில்லை." (யோவான் 14:6) என்னும் வார்த்தைக்கேற்ப இயேசுவே நமக்கு வழியாக இருக்கிறார். அப்படியென்றால் அவரை பின்பற்றுகின்ற சீடர்களாக வாழ நாம் அழைப்பு பெறுகின்றோம். இங்கு இயேசுவின் வழி என்பது சீடத்துவத்தின் வழியாகும், இயேசுவை பின்பற்றும் சீடத்துவமே நமக்கு மீட்பை தரும்.

5. மீட்பின் வழி

இடுக்கலான வழி மீட்பின் வழியாகும், ஆக மேற்கண்ட நான்கு நற்குணங்களை கொண்டு இடுக்கலான வாயிலில் நுழையும் போது நாம் இறையாட்சிக்குள் நுழைகின்றோம், அவர் தரும் மீட்பை பெறுகின்றோம். அத்தகையோராய் வாழ்வோம்.

இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

அருட்பணி. அ. குழந்தை யேசு ராஜன் CMF

                     

காணொளியில் காண/ஆடியோவில் கேட்க ... (தமிழ்)

காணொளியில் காண/ஆடியோவில் கேட்க ...(ஆங்கிலம்)

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 20-ஆம் வாரம் - ( ஆண்டு- C) - 14 -08-2022- ஞாயிற்றுக்கிழமை

 

முதல் வாசகம் : எரேமியா 38: 4-6, 8-10
இரண்டாம் வாசகம் : எபிரேயர் 12: 1-4
நற்செய்தி : லூக்கா 12:49-53

"மண்ணுலகில் தீ மூட்ட வந்தேன்"

ஆதிமனிதனின் முதல் கண்டுபிடிப்புக்கு அடித்தளமாக இருந்தது கற்கள். கற்களைக் கொண்டுதான் மனிதன் அன்று முதல் கருவிகளை மற்றும் சக்கரத்தை கண்டுபிடித்தான். மேலும் இந்த கற்களை உரசுகின்ற போது அவன் நெருப்பையும் கண்டு கொண்டான். நெருப்பு மனிதனின் கண்டுபிடிப்புகளில் மிக முக்கியத்துவம் வாய்ந்ததாக அமைந்தது, ஏனென்றால் இந்த நெருப்பு தான் மனிதன் தன்னை விலங்குகளிலிருந்து பாதுகாத்துக்கொள்ள பயன்பட்டது, மனிதனின் வாழிடத்தை காட்டிக் கொடுத்தது, இரவிலும் பணி செய்ய விளக்கை கண்டுபிடிக்க காரணமாயிருந்தது மற்றும் இதே நெருப்பு தான் மனிதன் உண்ட இறைச்சியையும் மற்றும் காய்களையும் சுட்டு மற்றும் சமைத்து சாப்பிடுவதற்கு அடிப்படையாக இருந்தது. ஆக, நெருப்பு ஆதிமனிதனுக்கு நாகரிக வளர்ச்சியின் துவக்கமாக அமைந்தது என்று கூறலாம். இன்றைக்கு இதே நெருப்பு தான் நம்முடைய வாழ்க்கையிலும் பல மாற்றங்களை செய்து கொண்டிருக்கின்றது. பொதுக்காலத்தின் 20-வது ஞாயிற்று கிழமையாகிய இன்றைய இறைவார்த்தை வழிபாடு கிறிஸ்தவ வாழ்வை புதுப்பிக்க கிறிஸ்து அளிக்கும் நெருப்பை அதாவது தீயை நம்முன் வைக்கின்றது.

இன்றைய நற்செய்தியை வாசிக்கின்ற போது இயேசுவின் வார்த்தைகள் நம் ஒவ்வொருவரையும் ஆச்சரியத்திற்கும் அதிர்ச்சிக்கும் உள்ளாக்குகிறது. இயேசுவின் பிறப்புக்குப் பிறகு "உன்னதத்தில் கடவுளுக்கு மாட்சி உரித்தாகுக! உலகில் அவருக்கு உகந்தோருக்கு அமைதி உண்டாகுக!" என்று வானதூதர்கள் புகழ்ந்து பாடினார்கள் (லூக்கா 2: 13-14). இயேசு தம் சீடர்களை இருவர் இருவராக பணிக்கு அனுப்புகின்ற பொழுது, நீங்கள் எந்த வீட்டிற்கு சென்றாலும் அவர்களுக்கு வாழ்த்து கூறுங்கள். நீங்கள் கூறும் அமைதி அவர்கள் மேல் தங்கட்டும் என்கிறார் (மத்தேயு 10:12-13). இயேசு"அமைதியை உங்களுக்கு விட்டுச் செல்கிறேன்; என் அமைதியையே உங்களுக்கு அளிக்கிறேன். நான் உங்களுக்குத் தரும் அமைதி உலகம் தரும் அமைதி போன்றது அல்ல. நீங்கள் உள்ளம் கலங்க வேண்டாம்; மருள வேண்டாம்." (யோவான் 14:27) மற்றும் "அமைதி ஏற்படுத்துவோர் பேறுபெற்றோர்; ஏனெனில் அவர்கள் கடவுளின் மக்கள் என அழைக்கப்படுவர்"( மத்தேயு 5:9) என்று பறைசாற்றுகிறார். இயேசு தன் உயிர்ப்புக்கு பிறகு சீடர்களை சந்திக்கின்ற பொழுதெல்லாம் "உங்களுக்கு அமைதி உரித்தாகுக" என்கிறார். இவ்வாறாக அவருடைய பிறப்பு, பணி வாழ்வு மற்றும் உயிர்ப்புக்கு பிறகு உள்ள காட்சிகள் அனைத்தும் இயேசு அமைதியை பறைசாற்றுபவர் என்பதை காட்டுகிறது. பிறகு ஏன் இன்றைய நற்செய்தியில் இயேசுவின் வார்த்தைகள் "மண்ணுலகில் தீ மூட்ட வந்தேன்", "அமைதியை ஏற்படுத்த வந்தேன் என்றா நினைக்கிறீர்கள்? இல்லை, பிளவு உண்டாக்கவே வந்தேன்" என்கிறது. இன்றைய நற்செய்தியின் பகுதிக்கும் அதனைத் தொடர்ந்துள்ள மற்ற பகுதிகளுக்கும், இயேசு வாழ்ந்த காலத்தில் இருந்த மூன்று தவறான எண்ணங்கள் காரணங்களாக அமைகின்றது.

1. மெசியா மண்ணுலகில் அமைதியை ஏற்படுத்த மட்டுமே வந்தார்.

2. மெசியா இன்னும் வரவே இல்லை.

3. மனிதன் கடவுளோடு அமைதி ஏற்படுத்த தேவையில்லை.

அதுமட்டுமல்லாது, இயேசு இம்மண்ணுலகில் நீதியை நிலைநாட்டி இறையாட்சியை அறிவிக்க விரும்பினார்‌, எனவே தான் தீ மூட்ட வந்தேன் என்கிறார். இங்கு இயேசு எடுத்துரைக்கின்ற தீ, நன்மையிலிருந்து தீமையை பிரித்தெடுக்கும் மற்றும் பயனுள்ளதிலிருந்து பயனற்றவையை பிரித்தெடுக்கும், இது தான் இயேசு எடுத்துரைக்கும் பிளவுமாகும். இறுதி நாளில் நீதியின் அரசராக நன்மை செய்தோரையும் மற்றும் தீமை செய்தோரையும் பிரித்தெடுத்து நீதியை நிலைநாட்டி, உண்மையான அமைதியை தரும் இறையாட்சியை அமைக்கின்றார்.

விவிலியத்தில் "தீ" என்னும் வார்த்தை பல அர்த்தங்களை எடுத்துரைக்கிறது.

1. இறை பிரசன்னம்:

பழைய ஏற்பாட்டில் இறைவன் மோயீசனை அழைக்கின்ற போது எரியும் முட்புதரில் தன்னுடைய பிரசன்னத்தை வெளிப்படுத்துகிறார் (விப 3:1-10). இங்கு "தீ" இறைபிரசன்னத்தின் அடையாளமாக மாறுகிறது.

2. இறைத்தூய்மை:

இறைவன் எசாயாவை அழைத்த போது நான் தூய்மையற்ற உதடுகளை கொண்டிருக்கின்றேன் என்று அவர் கூறியபோது, “இதோ, இந்நெருப்புப்பொறி உன் உதடுகளைத் தொட்டது. உன் குற்றப்பழி உன்னை விட்டு அகன்றது; உன் பாவம் மன்னிக்கப்பட்டது,” என்றார் ஆண்டவர் (எசாயா 6:7). இங்கு "தீ" இறைத்தூய்மையின் அடையாளமாக இருக்கிறது.

3. இறை வல்லமை(தூய ஆவி)

புதிய ஏற்பாட்டில் திருமுழுக்கு யோவான் அவர்கள் அனைவரையும் பார்த்து, “நான் தண்ணீரால் உங்களுக்குத் திருமுழுக்குக் கொடுக்கிறேன்; ஆனால் என்னைவிட வலிமைமிக்க ஒருவர் வருகிறார். அவருடைய மிதியடி வாரை அவிழ்க்கக்கூட எனக்குத் தகுதியில்லை. அவர் தூய ஆவி என்னும் நெருப்பால் உங்களுக்குத் திருமுழுக்குக் கொடுப்பார்." (லூக்கா 3:16) என கூறுவது "தீ" தூய ஆவியின் இறைவல்லமையின் அடையாளமாக இருக்கிறது. பெந்தகோஸ்து பெருவிழாவின் போது நெருப்பு நாவுகளின் உருவில் இறங்கி வந்த தூய ஆவி சீடர்களுக்கும், அன்னை மரியாவுக்கும் இறை வல்லமையை தருவதை பார்க்கின்றோம். ( திபணி 2:3)

4. இறைத்தீர்ப்பு:

"தீ" இறைத்தீர்ப்பின் அடையாளமாகவும் அமைகிறது. "நற்கனி தரா மரங்கள் எல்லாம் வெட்டப்பட்டுத் தீயில் போடப்படும்” (லூக்கா 3:9) என்னும் இறைவார்த்தையின் அடித்தளத்தில் இறைவன் தீமையை, பயனற்றதை, நற்கனி தரா மனிதர்களை என யாவற்றையும் தீயிலிட்டு அழித்து நீதியையும் மற்றும் நிரந்தர நிலையான அமைதியையும் மண்ணுலகில் நிலைநாட்டுவார்.

கிறிஸ்து ஏற்படுத்தும் தீயும் நமது வாழ்வும்

ஆக கிறிஸ்து இம்மண்ணில் தீயை மூட்ட வந்தேன் என்று கூறுகின்ற பொழுது, மண்ணுலகம் எங்கும் இறைபிரசன்னத்தை பரப்புவதற்காக, மனிதர்களின் பாவங்களை மற்றும் தீமைகளை நீக்கி தூய்மை படுத்துவதற்காக, தூய ஆவியின் இறைவல்லமையை நமக்கு தருவதற்காக மற்றும் நமது வாழ்வை நீதித் தீர்ப்பீடுவதற்காக வந்திருக்கிறார் என்பது அர்த்தமாகும். எனவே, இன்றைக்கு நமது வாழ்வை சோதித்தறிவோம். நமது வாழ்வில் நாம் செய்த பாவங்களை, தீமைகளை நமது தவறான எண்ணங்களை, பேச்சுகளை மற்றும் செயல்களை இறைவன் பாதத்தில் அர்ப்பணித்து, கிறிஸ்துவின் "தீ" நம்மை தூய்மைப்படுத்தவும், இறை வல்லமையும் இறைபிரசன்னமும் நமது வாழ்வை நிறைக்க, அதனால் நாம் இறைவனின் நீதி தீர்ப்புக்கு உள்ளாக நம்மையும் நம் குடும்பத்தாரையும் முழுவதுமாக தயார் செய்வோம். இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

அருட்பணி. அ. குழந்தை யேசு ராஜன் CMF

       காணொளியில் காண/ஆடியோவில் கேட்க ... (தமிழ்)

காணொளியில் காண/ஆடியோவில் கேட்க ...(ஆங்கிலம்)

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக் காலம் 19-ஆம் வாரம் - ( ஆண்டு- C) - 07 -08-2021- ஞாயிற்றுக்கிழமை

 

முதல் வாசகம்: சாலமோனின் ஞானம் 18: 6-9
இரண்டாம் வாசகம்: எபிரேயர்  11: 1-2, 8-19
நற்செய்தி: லூக்கா 12:32-48

பேறுபெற்றவர்களாக வாழ...

(தயாரிப்பு - காத்திருப்பு - விழிப்பு)

அகில உலக 44-வது சதுரங்க போட்டியானது நமது இந்தியாவில் அதிலும் தமிழ்நாட்டினுடைய தலைநகரமான சென்னையில் நடைபெற்றுக் கொண்டிருக்கின்றது என்பதை நாம் அறிவோம். இதற்காக ஏறக்குறைய 180 நாடுகளிலிருந்து ஆயிரத்திற்கும் மேற்ப்பட்ட விளையாட்டு வீரர்கள் இந்த போட்டியில் பங்கெடுப்பதற்கு வந்திருக்கின்றார்கள். இவர்களில் பலர் கொடுத்த தொலைக்காட்சிப் பேட்டிகளில் இதற்காக தாங்கள் ஆவலோடு காத்திருந்ததாகவும், தங்களை முழுமையாக தயாரித்திருப்பதாகவும் கூறினர். அதே போல இங்கிலாந்து நாட்டில் பர்மிங்கம் நகரிலே நடந்து கொண்டிருக்கின்ற காமன்வெல்த் போட்டிகளிலும் பங்கெடுத்துக் கொண்டிருக்கின்ற இந்திய விளையாட்டு வீரர்களும், வீராங்கனைகளும், இந்த விளையாட்டுப் போட்டிக்காக தாங்கள் பல ஆண்டுகளாக காத்திருந்ததாகவும், அதற்காக தங்களை முழுமையாக தயாரித்திருப்பதாகவும் கூறினார்கள். ஒரு விளையாட்டு வீரர் தான் பங்கேற்க இருக்கின்ற போட்டிக்காக தன்னையே முழுமையாக தயாரிக்க வேண்டும், அந்த போட்டி நேரத்திற்காக காத்திருக்க வேண்டும் மற்றும் போட்டியில் பங்கெடுக்கின்ற பொழுது விழிப்போடு இருக்க வேண்டும், அப்பொழுது தான் அவன் அதிலே வெற்றி காண முடியும். இது ஒரு விளையாட்டு வீரருக்கு மட்டுமல்லாது நம் ஒவ்வொருவருக்குமே பொருந்தும். வாழ்வின் எல்லா நிலைகளிலும் நாம் நினைக்கின்ற செயல்பாடுகளில் வெற்றி காண தயாரிப்பும், காத்திருப்பும் மற்றும் விழிப்பும் அவசியமாகிறது என்பதை தான் இன்றைய இறைவார்த்தை வழிபாடு நம்முன் வைக்கும் மையச்சிந்தனையாக இருக்கின்றது.

1. தயாரிப்பு

2. காத்திருப்பு

3. விழிப்பு

என்னும் மூன்று பூக்களோடு கிறிஸ்தவர்களாகிய நாம் ஒவ்வொருவரும் இயேசுவின் இரண்டாம் வருகைக்காகவும், அவர் நமக்கு தரும் இறையாட்சிக்காகவும் வாழ அழைக்கப்படுகின்றோம். இன்றைய நற்செய்தியில் இயேசு பொறுப்புள்ள மற்றும் பொறுப்பற்ற பணியாளர்களின் உவமையை எடுத்துரைக்கிறார். இதில் பொறுப்புள்ள பணியாளர் விழிப்போடு காத்திருந்ததையும், தலைவரின் வருகைக்காக தயாரித்திருந்ததையும் பார்க்கின்றோம். அத்தகையோர் தலைவரின் நம்பிக்கைக்குரிய (லூக் 12:42)மற்றும் பேறுபெற்ற பணியாளர் (லூக் 12:43) ஆகிறார். பொறுப்பற்ற பணியாளர் தன்னுடைய சக ஆண் மற்றும் பெண் பணியாளர்களை அடிக்கவும், நன்றாக உண்டு, குடித்து, மயக்கமுற்று, விழிப்பின்றி மற்றும் தகுந்த தயாரிப்புமின்றி இருந்ததால் தண்டனைக்கு உள்ளாகிறான். இறைவனை நம் இல்லத்திலும், உள்ளத்திலும் மற்றும் வாழ்விலும் ஏற்க நாம் தயாராக இருக்கின்றோமா? என்பதை சிந்தித்துப் பார்ப்போம். தகுந்த தயாரிப்பும், காத்திருப்பும் மற்றும் விழிப்பும் கொண்ட பணியாளர்களாக நாம் வாழ்ந்தால் இறைவனை நம்முடைய வாழ்விலும் மற்றும் உள்ளத்திலும் ஏற்று அவரில் நாம் பேறுபெற்றவர்களாக வாழ்வோம்.

1. தயாரிப்பு

இன்றைய நற்செய்தியில் ஆயுத்தமாய் இருங்கள் நினையாத நேரத்தில் மானிடமகன் வருவார் என்று கூறப்பட்டிருக்கின்றது. அதுமட்டுமல்லாது திருடன் எப்போது வேண்டுமானாலும் வருவான் ஆயுத்தமாய் இருங்கள் அதாவது தயாராக இருங்கள் என்று குறிப்பிடப்பட்டிருக்கிறது. ஆக தயாரிப்பு மனிதனின் அன்றாட வாழ்வில் இன்றியமையாத ஒன்றாக இருக்கின்றது. பழைய ஏற்பாட்டிலே எகிப்திலிருந்து இஸ்ராயேல் மக்கள் கடந்து வருவதற்கு முன்பு பாஸ்கா கொண்டாடுவதற்காக தங்களையே தயாரித்தார்கள். பாலைவனத்தில் இறைவன் இஸ்ராயேல் மக்களோடு பேச மோசே அவர்களை தயார் செய்தார். புதிய ஏற்பாட்டிலே திருமுழுக்கு யோவான் ஆண்டவருடைய வருகைக்காக மக்களை தயாரித்தார் மற்றும் மரியாவும், சூசையும் இயேசுவின் பிறப்புக்காக தங்களையும் மற்றும் பெத்லகேமில் இடத்தையும் தயார் செய்தார்கள். ஒரு விவசாயி விவசாயம் செய்வதற்காக நிலத்தை முழுவதுமாக தயார் செய்வதை பார்க்கின்றோம். இன்றைக்கு நாம் இறைவனில் பேறுபெற்றவர்களாக வாழவும், அதற்காக நம்மைத் தயாரிக்கவும் திருஅவை திருவருட்சாதனங்களையும், பல்வேறு பக்தி முயற்சிகளையும் தந்திருக்கிறது. குறிப்பாக ஒவ்வொரு நாளும் நற்கருணையின் வடிவில் ஆண்டவரை ஏற்றுக் கொள்ள மற்றும் இறைவார்த்தையை வாசித்து தியானிக்க திருப்பலி என்னும் திருவருட்சாதனம் தரப்பட்டிருக்கின்றது. இவையனைத்தும் இறைவனில் நாம் வாழ, பேறுபெற்றவர்களாக, அவர் தந்த கருவிகளாகும். எனவே நாம் நம்மை முழுவதுமாக தயாரிப்போம்‌.

2. காத்திருப்பு

இன்றைய முதல் வாசகத்தில் நீதிமான்களின் மீட்பையும், பகைவர்களின் அழிவையும் எதிர்பார்த்து காத்திருப்பதாக கூறப்படுகிறது. காத்திருப்போரை ஆண்டவர் கண்ணோக்குகின்றார். (திருப்பாடல் 33:18). பழைய ஏற்பாட்டிலே இஸ்ராயேல் மற்றும் யூத மக்கள், மெசியா வருவார் என்று பல நூற்றாண்டுகளாக காத்திருந்தனர். புதிய ஏற்பாட்டில் இயேசுவின் வருகைக்காக சக்கேயு காத்திருந்ததை பார்க்கின்றோம். அனைத்திற்கும் ஒரு காலம் உண்டு, எதுவும் எப்போதும் உடனே நடைபெறுவதில்லை என்பதை உணர்ந்து காத்திருக்க வேண்டும். குரங்கு ஒன்று தான் சாப்பிட்ட மாம்பழத்தின் விதையை நிலத்தில் ஊன்றி அதற்கு நீர் ஊற்றி வளர்த்ததாம். ஒவ்வொரு நாளும் அதற்கு நீர் ஊற்றிய பின்பு, அதை மண்ணிலிருந்து தோண்டி விதையை எடுத்து வளர்ந்திருக்கிறதா என பார்க்குமாம். இது காத்திருக்க மனமில்லாததன் அறிகுறியாக இருக்கின்றது. பல வேளைகளில் நாமும் இப்படி தான் இருக்கின்றோம், அனைத்தும் அவசரமாக கிடைக்க வேண்டும் என எண்ணுகிறோம். நாம் ஜெபித்த உடனே எனக்கு இறைவன் தந்து விட வேண்டும் என நினைக்கின்றோம். நான் தேர்வு எழுதிய உடன் அதிக மதிப்பெண் கிடைத்துவிட வேண்டும் என நினைக்கின்றோம். இன்றைக்கு நான் காத்திருக்கின்றேன் என்றால் பிறரை மதித்து அவர்களை ஏற்றுக் கொள்கின்றேன் என்று அர்த்தம். இறைவனில் நாம் பேறுபெற்றவர்களாக வாழ, எவ்வாறு பணியாளர் தலைவனுக்காக காத்திருந்தாரோ, அதே போல இறைவன் நம்மில் செயல்பட, இறைவன் நமது உள்ளத்தில், இல்லத்தில் மற்றும் வாழ்க்கையில் வர நாம் அவருக்காக காத்திருப்போம். நமது அன்றாட வாழ்விலும் நினைத்த காரியங்கள் எதுவும் உடனடியாக நடந்து விடுவதில்லை, மாறாக நாம் அதற்காக காத்திருக்க வேண்டும் அப்பொழுது தான் நாம் அதில் வெற்றி காண முடியும்.

3. விழிப்பு

இன்றைய நற்செய்தியில் தலைவன் வருகின்ற பொழுது விழித்திருந்து, கதவைத் திறக்கும் பணியாளனே பேறு பெற்றவன் ஆகிறான். அதே போல தலைவன் இரண்டாம் மற்றும் மூன்றாம் காவல் வேளையில் வந்தாலும் அதற்காக காத்திருக்கின்ற பணியாளனே பேறுபெற்றவன். இறைவன் எப்பொழுது வேண்டுமானாலும், யார் வாழ்வில் வேண்டுமானாலும் மாற்றங்களை செய்யலாம். ஆகையால் நாம் விழிப்போடு இருக்க வேண்டும், நற்செய்தியில் பத்து கன்னியர் உவமையில் விளக்குகளோடு இருந்த முன்மதிவுடைய கன்னியர்களை போல நாமும் விழித்திருக்க வேண்டும். விழித்திருந்து ஆண்டவருக்காக காத்திருக்க வேண்டும். மகன் எப்போதும் தன்னுடைய சட்டைப் பையிலிருந்து பணத்தை எடுப்பதையறிந்த தந்தை, அன்றிரவு பணத்தை தன் மகனின் சட்டை பையில் வைத்தாராம். தந்தையின் சட்டைப் பையில் தேடிப் பார்த்துவிட்டு பணம் இல்லை என்று வருத்தத்தோடு உறங்கி விட்டனாம் மகன். தந்தையை போல விழிப்போடு இருத்தல் நமது கிறிஸ்தவ வாழ்வுக்கும் தேவைப்படுகிறது.

எனவே தயாரிப்பு, காத்திருப்பு மற்றும் விழித்திருப்பு என்னும் பண்புகளை தமதாக்கி நம்பிக்கைக்குரிய பணியாளனை போல நம் தலைவராம் இயேசுவில் பேறுபெற்றவர்களாவோம்.

அன்புடன்:-

அருட்பணி. அ. குழந்தை யேசு ராஜன் CMF

காணொளியில் காண/ஆடியோவில் கேட்க ... (தமிழ்)

காணொளியில் காண/ஆடியோவில் கேட்க ...(ஆங்கிலம்)

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக் காலம் 18-ஆம் வாரம் - ( ஆண்டு- C) - 31 -07-2021- ஞாயிற்றுக்கிழமை

 

முதல் வாசகம்: சபை உரையாளர் 1:2, 2:21-23
இரண்டாம் வாசகம்: கொலோசையர் 3:1-5, 9-11
நற்செய்தி: லூக்கா 12:13-21

நமது பற்று எங்கே?

(பற்றற்ற, பகிரும் & பரலோக வாழ்வு)

அதிகம் பணம் சம்பாதிக்க வேண்டும் என்பது அவன் ஆசை, அதற்காக மிகவும் முயற்சித்து ஒரு சிறிய கடையை ஆரம்பித்தான். தனது நேரம் முழுவதும் அந்தக் கடையிலிருந்து பணம் சம்பாதிப்பதற்காகவே செலவழித்தான். ஒரு நாள் திடீரென்று அவனுக்கு உடல்நிலை சரியில்லை, அவனைச் சுற்றி குடும்பமே இருந்தது. கண்விழித்து மிகவும் கஷ்டப்பட்டு பொறுமையாக வாயை திறந்து, என்னுடைய மனைவி எங்கே? என்று கேட்டான், அவனது மனைவியோ இதோ இங்கே இருக்கிறேன் என்றாள். உடனடியாக என்னுடைய பிள்ளைகள் எங்கே? என்று கேட்டான், இதோ இங்கு இருக்கிறோம் அப்பா என்றார்கள். என்னுடைய தம்பி எங்கே? என்று கேட்டான், இதோ இங்கே இருக்கிறேன் அண்ணா, கவலைப்படாதீர்கள் எல்லோரும் உம்மை சுற்றி தான் இருக்கிறோம் என்று கூறினான். அதற்கு அவனோ அப்படியென்றால் கடையில் யாரும் இல்லையா! இன்றைக்கு வியாபாரம் நடக்காதா! பணம் கிடைக்காதா! என்று கேட்டானாம்.

பணம் என்றால் பிணமும் வாய் திறக்கும், பணம் பத்தும் செய்யும், பணம் பந்தியிலே குணம் குப்பையிலே, பணம் குலமாகும் பசி கறியாகும் என எண்ணற்ற பழமொழிகள் பணத்தின் மீது இவ்வுலகிற்கு இருக்கும் ஆசையை எடுத்துரைக்கிறது. "செல்வம் எப்போதும் நிலைத்திராது; சொத்து தலைமுறை தலைமுறையாக நீடித்திருப்பதில்லை" (நீதிமொழிகள் 27:24) என்னும் இறைவார்த்தைக்கேற்ப பணம் தான் எல்லாமென்று இன்று மனித வாழ்வு பயணித்துக் கொண்டிருக்கிறது. நிலையற்ற பணத்தின் மீது ஆசை கொள்ளாமல் நிலையான இறைவனில் இணைந்திருக்க இன்றைய இறைவார்த்தை வழிபாடு நமக்கு அழைப்புத் தருகிறது.

1. பற்றற்ற வாழ்வு
2. பகிரும் வாழ்வு
3. பரலோக வாழ்வு

என இத்தகைய மூன்று விதமான அழைப்புகளுக்கு ஏற்றவாறு நமது கிறிஸ்தவ வாழ்வை அமைத்து கொள்ள அழைப்பு பெறுகின்றோம்.

1. பற்றற்ற வாழ்வு

இன்றைய முதல் வாசகத்தில் "வீண், முற்றிலும் வீண், என்கிறார் சபையுரையாளர்; வீண், முற்றிலும் வீண், எல்லாமே வீண்." (சபை உரையாளர் 1:2) ஏனெனில், ஞானத்தோடும் அறிவாற்றலோடும் திறமையோடும் ஒருவர் உழைக்கிறார்; உழைத்துச் சேர்த்த சொத்தை அதற்காக உழைக்காதவருக்கு விட்டுச் செல்கிறார். அவரது உழைப்பும் வீணே (சபை உரையாளர் 2:21). ஆக நாம் ஆசைப்பட்டு சேர்க்கின்ற பணமும் மற்றும் சொத்தும் நம்முடன் இறுதிவரை வருவதில்லை, எனவே நிலையற்றவையின் மீது பற்று கொண்டு வாழ்வது பயனற்றதாகும். அள்ள அள்ள குறையாதது அட்சய பாத்திரம் என்று சொல்வார்கள், அதுபோல போட போட நிரம்பாதது தான் பேராசை. இதுதான் நம்மை பணம், பொருள், பதவி மற்றும் பட்டம் என அனைத்தின் பின்னும் ஓட தூண்டுகிறது , நம் மன நிம்மதியை சீர்குலைத்து, உறவுகளை அழிக்க செய்கிறது. எனவே பணம் மற்றும் பொருட்களின் மீது பற்றற்ற வாழ்வை வாழ்வோம். ஊதாரி மைந்தன் உவமையில் இளைய மகன் தந்தையை நோக்கி, "அப்பா, சொத்தில் எனக்கு உரிய பங்கைத் தாரும்" (லூக்கா 15:12) என்று கேட்டது சொத்தின் மீது அவன் கொண்ட பற்றினை காட்டுகிறது. ஆனால் அப்பற்று அவனுக்கு இறுதி வரை கைகொடுக்கவில்லை. இதைத் தான் "மனிதர் உலகம் முழுவதையும் ஆதாயமாக்கிக் கொண்டாலும் தம் வாழ்வையே இழப்பாரெனில் அவருக்குக் கிடைக்கும் பயன் என்ன? அவர் தம் வாழ்வுக்கு ஈடாக எதைக் கொடுப்பார்?" (மத்தேயு 16:26) என்கிறார் இறைமகன் இயேசு. எனவே “எவ்வகைப் பேராசைக்கும் இடங்கொடாதவாறு எச்சரிக்கையாயிருங்கள். மிகுதியான உடைமைகளைக் கொண்டிருப்பதால் ஒருவருக்கு வாழ்வு வந்துவிடாது” (லூக்கா 12:15) என்னும் இன்றைய நற்செய்திக்கு ஏற்ப, இவ்வுலகின் பணம், பொருள் மற்றும் சொத்துக்கள் மீது பற்றற்ற ஒரு வாழ்வை வாழ்வோம்.

2. பகிரும் வாழ்வு

இன்றைய நற்செய்தியில் இயேசு சொல்லுகின்ற உவமையில் வரும் செல்வனின் நிலம் நன்றாய் விளைந்தது. ஆனால் அவன் அந்த விளைச்சல்,

1. இறைவனது கொடை
2. பிறரது உழைப்பின் பலன்

3. பகிரப்பட வேண்டிய பரிசு

என்பவற்றை அறவே மறந்து விடுகிறான். உண்டு, குடித்து மகிழ்ச்சியில் திளைக்க வேண்டும் என்று ஆசை கொள்கிறான். இவ்வுலகில் நாம் பெறுகின்ற அனைத்தும் இறைவன் நமக்குத் தருகின்ற அன்பு கொடை. அதை நாம் பிறரோடு பகிர்ந்து வாழ முயல வேண்டும். இயேசுவை பின்பற்ற விரும்பிய இளைஞரிடம், “உமக்கு இன்னும் ஒன்று குறைபடுகிறது. நீர் போய் உமக்கு உள்ளவற்றை விற்று ஏழைகளுக்குக் கொடும். அப்போது விண்ணகத்தில் நீர் செல்வராய் இருப்பீர். பின்பு வந்து என்னைப் பின்பற்றும்” என்று கூறினார் (மாற்கு 10:21). இயேசுவை பின்பற்றும் கிறிஸ்தவ வாழ்வை வாழ, நமது வாழ்வு பிறரோடு பகிரப்பட வேண்டியதாக அமைய வேண்டும். இயேசு இவ்வுலக மீட்பிற்காக தன்னையே அப்ப வடிவில் பகிர்ந்தளித்தார். நாமும் இறைவன் நமக்கு தந்திருக்கின்ற திறமைகளை, அறிவை மற்றும் திறன்களை பிறரோடு பகிர்ந்து வாழ்வோம்.

"மிகச் சிறியோராகிய என் சகோதரர் சகோதரிகளுள் ஒருவருக்கு நீங்கள் செய்ததையெல்லாம் எனக்கே செய்தீர்கள் என உறுதியாக உங்களுக்குச் சொல்லுகிறேன்" (மத்தேயு 25:40). ஆக, பிறரோடு நாம் பகிர்ந்து கொள்ளுகின்ற ஒவ்வொன்றும் நாம் இறைவனுக்கு செய்வதாக அமைகிறது. இந்த "உலகத்திற்கு நாம் எதையும் கொண்டு வந்ததில்லை. உலகத்தை விட்டு எதையும் கொண்டு போகவும் முடியாது" (1 திமொத்தேயு 6:7) எனவே நமது வாழ்வை அன்பு செயல்களால் அர்த்தமுள்ளதாக்குவோம்.

3. பரலோக வாழ்வு

இன்றைய இரண்டாம் வாசகம் "இவ்வுலகு சார்ந்தவை பற்றி அல்ல, மேலுலகு சார்ந்தவை பற்றியே எண்ணுங்கள்" (கொலோசையர் 3:2) என்கிறது. அப்படியெனில் இந்த உலகத்தில் நாம் சேர்த்து வைக்கின்ற பணமும் மற்றும் சொத்துகளும் இவ்வுலகை சார்ந்தவை. இவை மேலுலக வாழ்விற்கு ஒருநாளும் பயன்படுவதில்லை. எனவே, இவ்வுலகை சார்ந்தவை பற்றி எண்ணாமல் மேலுலக வாழ்வாம் பரலோக வாழ்வை பற்றி எண்ணுவோம். அதாவது இறைவன் தரும் இறையாட்சியில் நுழைவதற்கு நம்மை தயாரிப்போம்.

"மண்ணுலகில் உங்களுக்கெனச் செல்வத்தைச் சேமித்து வைக்க வேண்டாம். இங்கே பூச்சியும் துருவும் அழித்துவிடும்; திருடரும் அதைக் கன்னமிட்டுத் திருடுவர்.ஆனால், விண்ணுலகில் உங்கள் செல்வத்தைச் சேமித்து வையுங்கள்; அங்கே பூச்சியோ துருவோ அழிப்பதில்லை; திருடரும் கன்னமிட்டுத் திருடுவதில்லை" (மத்தேயு 6:19,20). இந்த மண்ணுலக செல்வம் அனைத்தும் ஒரு நாள் அழிந்து போகும்‌. ஆனால் விண்ணுலக வாழ்வு என்பது இறைவன் தரும் நிலையான வாழ்வு. எனவே தூய பவுல் அடிகளார் கூறுவதுபோல "உண்மையில், என்னைப் பொறுத்தமட்டில் என் ஆண்டவராம் கிறிஸ்து இயேசுவைப் பற்றிய அறிவே நான் பெறும் ஒப்பற்றச் செல்வம். இதன் பொருட்டு மற்ற எல்லாவற்றையும் இழப்பாகக் கருதுகிறேன். அவர் பொருட்டு நான் அனைத்தையும் இழந்து விட்டேன். கிறிஸ்துவை ஆதாயமாக்கிக்கொள்ள எல்லாவற்றையும் குப்பையாகக் கருதுகிறேன்" (பிலிப்பியர் 3:8). எனவே இவ்வுலகின் பணத்தையும் மற்றும் பொருளையும் குப்பையென கருதி நிலையான செல்வமாம் இயேசுவை நமதாக்கி விண்ணுலக வாழ்வை பெற்றுக் கொள்வோம்.

நில்லாத வற்றை நிலையின என்றுணரும்
புல்லறி வாண்மை கடை. (331)

என நிலையற்றவைகளாக இருக்கும் இவ்வுலக பொருட்களை நிலையானவை என நம்புகின்ற நமது அறியாமையை பற்றி திருவள்ளுவர் எடுத்துரைக்கிறார். "நீங்கள் கடவுளுக்கும் செல்வத்துக்கும் பணிவிடை செய்ய முடியாது" (மத்தேயு 6:24) என்பதை அறிந்து செல்வத்தின் மீது பற்று கொள்ளாது, அதை பிறரோடு பகிர்ந்து இறைவன் மீது பற்று கொண்டு வாழ்வோம்.

அன்புடன்:-

அருட்பணி. அ. குழந்தை யேசு ராஜன் CMF

காணொளியில் காண/ஆடியோவில் கேட்க ... (தமிழ்)

காணொளியில் காண/ஆடியோவில் கேட்க ...(ஆங்கிலம்)