🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக்காலம் 3-ஆம் ஞாயிறு - ( ஆண்டு- C) ----- 23-01-2022- ஞாயிற்றுக்கிழமை

🌱விவிலிய விதைகள்🌱

 பொதுக்காலம் 3-ஆம் ஞாயிறு

தமிழ் திருவழிபாட்டு மறையுரை

முதல் வாசகம்: நெகேமியா 8: 2-4a, 5-6, 8-10

இரண்டாம் வாசகம்: 1 கொரிந்தியர் 12: 12-30

நற்செய்தி:  லூக்கா 1: 1-4; 4: 14-21

 தூய ஆவியில் வாழ்வு

 

                 விவசாயி ஒருவர் தன்னுடைய நிலத்தில் உருளைக்கிழங்கு பயிர் செய்து, அதை ஒவ்வொரு முறையும் தன்னுடைய மாட்டு வண்டியில் சந்தைக்கு எடுத்துச் சென்று வியாபாரம் செய்கிறார். திடீரென்று அவருடைய நிலத்தின் ஒரு பகுதியில் எண்ணெய் வளம் இருப்பதாக கண்டறிகிறார். எண்ணெய் கிணற்றின் மூலமாக அவர் மிகப் பெரிய பணக்காரராக மாறுகிறார். மிக ஆடம்பரமான சொகுசு கார் ஒன்றையும் வாங்குகிறார். மீதமுள்ள நிலத்தில் தொடர்ந்து அவர் உருளைக்கிழங்கு பயிர் செய்து அதை தன்னுடைய காரில் சந்தைக்கு எடுத்து செல்கிறார். ஆனால் அவர் தன்னுடைய காரை எடுத்து சென்ற விதம் கண்டு சந்தையில் மக்கள் அனைவரும் அவரைப் பார்த்து சிரித்தார்கள். ஏனென்றால் அவருடைய சொகுசு காரையும் அவரது மாட்டு வண்டியை இழுத்துச் சென்ற அதே மாடுகள் இழுத்துச் சென்றன. பணத்தால் தனது பழைய நிலையிலிருந்து மாறி கார் வாங்கிய அந்த மனிதனுக்கு பழைய மாடுகளை விடவும் தெரியவில்லை, புதிய காரை பயன்படுத்தவும் தெரியவில்லை. அதனால் தான் அவன் காரை இன்னும் மாடுகள் இழுத்து செல்கின்றன. கிறிஸ்துவில் அன்பார்ந்தவர்களே, பல வேளைகளில் நமது கிறிஸ்தவ வாழ்வும் இந்த விவசாய பணக்காரன் போல தான் இருக்கிறது. "யூதரானாலும் கிரேக்கரானாலும், அடிமைகளானாலும் உரிமைக் குடிமக்களானாலும் நாம் எல்லாரும் ஒரே தூய ஆவியால் ஒரே உடலாய் இருக்கும்படி திருமுழுக்குப் பெற்றோம். அந்த ஒரே ஆவியையே பானமாகவும் பெற்றோம்".(1 கொரிந்தியர் 12:13) என்னும் இன்றைய இரண்டாம் வாசகத்தின் அடித்தளத்தில், நாம் தூய ஆவியால் திருமுழுக்குப் பெற்று கிறிஸ்துவின் உறுப்புகளாக இருக்கின்றோம் என்பதை மறந்து வாழ்கின்றோம். தூய ஆவியால் இயங்கும் கிறிஸ்து என்னும் புது கார் நமக்கு கிடைத்த பிறகும் கூட, நமது பழைய மனித பலவீனங்களை கொண்டே அந்த கிறிஸ்து என்னும் காரை இயக்க முற்படுகின்றோம். அர்த்தமற்ற வாழ்வை வாழுகின்றோம்.

"உடல் ஒன்றே; உறுப்புகள் பல. உடலின் உறுப்புகள் பலவாயினும் உடல் ஒன்றாயிருப்பதுபோல கிறிஸ்துவும் இருக்கிறார்" (1 கொரிந்தியர் 12:12). என்பதை உணர்ந்து, "ஒரே ஆவியாரே இவற்றையெல்லாம் செயல்படுத்துகிறார்" (1 கொரிந்தியர் 12:11). என நமது வாழ்வு தூய ஆவியில் ஆட்கொள்ளப்பட்ட வாழ்வாக அமைய வேண்டும். இயேசு தூய ஆவியால் ஆட்கொள்ளப்பட்டு, பாலைவனத்தில் நாற்பது நாட்கள் நோன்பிருக்க மற்றும் சாத்தானால் சோதிக்கப்பட அழைத்து செல்லப்பட்டு அதில் வெற்றியும் பெற்று தூய ஆவியின் வல்லமை உடையவராக கலிலேயாவுக்கு திரும்பிப் போனார் (லூக்கா 4:14) என்னும் இன்றைய நற்செய்தி வாசகத்தின் அடித்தளத்தில் இயேசுவினுடைய பணி வாழ்வு முழுவதும் தூய ஆவி நிறைந்திருந்தார். நம் அனைவருக்கும் அவரே தூய ஆவியில் வாழ்வுக்கு முன் உதாரணமாக இருக்கிறார். ஆவியிலும் உண்மையிலும் வாழ ஒரு மனிதருக்கு இயேசுவே சிறந்த எடுத்துக்காட்டு.

1. தூய ஆவி அவரில் தங்கியிருக்கும் என்னும் வாக்குறுதி.

 பழைய ஏற்பாட்டில் உங்களுக்காக மெசியா வருவார் என்னும் வாக்குறுதியில், மெசியாவில் தூய ஆவி நிறைந்திருப்பார் அதாவது அவர் மேல் இருப்பார் என்னும் வாக்குறுதியும் தரப்பட்டிருக்கிறது. "ஆண்டவரின் ஆவி அவர்மேல் தங்கியிருக்கும்; ஞானம், மெய்யுணர்வு, அறிவுரைத்திறன், ஆற்றல், நுண்மதி, ஆண்டவரைப்பற்றிய அச்ச உணர்வு — இவற்றை அந்த ஆவி அவருக்கு அருளும்." (எசாயா 11:2) ஆக மெசியாவின் வாழ்வு தூய ஆவியில் நிறைந்திருக்கும் என்பது பழைய ஏற்பாட்டிலே முன் அறிவிக்கப்பட்டிருக்கிறது.

 2. தூய ஆவியில் பிறப்பு

 

 இயேசுவின் பிறப்பும் தூய ஆவியால் நிகழ்வதை பார்க்கின்றோம். அன்னை மரியாளுக்கு மங்கள வார்த்தை கூறியபொழுது, “தூய ஆவி உம்மீது வரும். உன்னத கடவுளின் வல்லமை உம்மேல் நிழலிடும். ஆதலால் உம்மிடம் பிறக்கப் போகும் குழந்தை தூயது. அக்குழந்தை இறைமகன் எனப்படும்". (லூக்கா 1:35) 

 

3. பணிவாழ்வில் தூய ஆவி

இயேசுவின் பணி வாழ்வு முழுவதும் தூய ஆவியில் நிறைந்திருந்தார்.(யோவான் 3:34) தொடக்கத்தில் திருமுழுக்கு பெற்ற பொழுது தூய ஆவி இறங்கி வருவதும் (மத்தேயு 3:16), அதே ஆவி அவரை பாலைவனத்துக்கு அழைத்துச் செல்வதும் (லூக்கா 4:1), பாலைவன சோதனைக்குப் பிறகு அவர் தூய ஆவியின் வல்லமை உடையவராய் கலிலேயாவுக்கு திரும்பி செல்வதும் (லூக்கா 4:14) மற்றும் தொழுகைக் கூடத்தில் "ஆண்டவருடைய ஆவி என்மேல் உளது ஏனெனில் அவர் எனக்கு அருள்பொழிவு செய்துள்ளார்" (லூக்கா 4:18) என பறைசாற்றுவதும் மற்றும் தூய ஆவியில் தீய ஆவிகளை விரட்டுவதும் ( மத்தேயு 12:22-32) இவருடைய பணி வாழ்வில் தூய ஆவி நிறைந்திருந்ததை எடுத்துரைக்கிறது. இன்னும் தனது பணி வாழ்வில் பல தருணங்களில் இயேசு தனக்கும் தூய ஆவியாருக்கும் உண்டான உறவைப் பற்றியும், உங்களுக்காக துணையாளராம் தூய ஆவியை அனுப்புவதாகவும் வாக்களித்திருக்கிறார் (யோவான் 14: 15-31).

4. இயேசுவின் இறப்பில் - உயிர்ப்பில் தூய ஆவி

 இறைமகன் இயேசு கிறிஸ்து தான் இறக்கும் பொழுதும் மற்றும் அவரது உயிர்ப்பில் உம் தூய ஆவி நிறைந்திருந்திருக்கிறது. "கிறிஸ்துவின் இரத்தம், வாழும் கடவுளுக்கு நாம் வழிபாடு செய்யுமாறு, சாவுக்கு அழைத்துச் செல்லும் செயல்களிலிருந்து நம் மனச்சான்றை எத்துணை மிகுதியாய்த் தூய்மைப்படுத்துகிறது! ஏனெனில் என்றுமுள்ள தூய ஆவியினால் தம்மைத்தாமே கடவுளுக்கு மாசற்ற பலியாகக் கொடுத்தவர் அவரே"(எபிரேயர் 9:14). ஆக இயேசு சிலுவையில் இருந்தபொழுதும் தூய ஆவி அவரோடு இருந்தது. இயேசுவின் உயிர்ப்பின் போதும் தூய ஆவி உடனிருந்ததை பார்க்கின்றோம்.(உரோமையர் 1:4, 8:11)

               இயேசுவின் வாழ்வு கடவுளால் அங்கீகரிக்கப்பட்ட ஒரு வாழ்வு , ஏனெனில் அது தூய ஆவியால் நிறைந்திருந்தது. ஆவியின் வல்லமையில் ஜெபித்த வாழ்வு, தந்தையின் குரலுக்கு செவிகொடுத்து, எண்ணத்திலும், சொல்லிலும், செயலிலும் ஆவியானவரால் வழிநடத்தப்பட்டு, இறையாட்சியை அறிவித்தார். ஆவியில் நம் வாழ்வு எப்படி இருக்க வேண்டும் என்பதை முன்மாதிரியாக வாழ்ந்து காட்டியவர் இறைமகன் இயேசு. தூய ஆவியானவரால் வழிநடத்தப்பட்டு வாழப்படும் வாழ்வு தொடக்கம் முதல் இறுதி வரை கிறிஸ்துவில் இணைந்த வாழ்வாக அமைகிறது. அன்று நாம் குழந்தையாக இருந்தபோது திருமுழுக்கின் வழியாக தூய ஆவியில் பிறப்பெடுத்தோம். உறுதிப்பூசுதல் வழியாக தூய ஆவியில் உறுதிபடுத்தப்பட்டோம். இன்றும் கிறிஸ்தவர்களாகிய நாம் ஒவ்வொருவரும் தூய ஆவியின் ஆலயங்களாக வாழ அழைக்கப்பட்டிருக்கிறோம். ஒவ்வொரு முறையும் நாம் பாவத்திற்காக மன்னிப்பு கேட்கின்ற பொழுது பாவசங்கீர்த்தனத்தின் வழியாக மீண்டும் நாம் தூய ஆவியில் உறுதிபடுத்தப்படுகின்றோம். "இறந்த இயேசுவை உயிர்த்தெழச் செய்தவரின் ஆவி உங்களுள் குடிகொண்டிருந்தால், கிறிஸ்துவை உயிர்த்தெழச் செய்த அவரே உங்களுள் குடிகொண்டிருக்கும் தம் ஆவியினாலே சாவுக்குரிய உங்கள் உடல்களையும் உயிர் பெறச் செய்வார்". (உரோமையர் 8:11) கிறிஸ்துவிலிருந்து இறைத்திட்டத்தை நிறைவேற்றிய தூய ஆவி நம் உள்ளும் இருக்கின்றார். உலக ஆசைகளுக்கு மற்றும் மாயைகளுக்கு அடிமை ஆகாமல், இறைவன் நமக்குக் கொடையாக கொடுத்திருக்கின்ற தூய ஆவியை உணர்ந்து, கிறிஸ்து என்னும் உடலின் உறுப்புகளாய் வாழ்வோம். இறைவன் நம்மை ஆசீர்வதிப்பார்.

அன்புடன்

அருட்பணி. அ. குழந்தை யேசு ராஜன் CMF

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - ஆண்டவர் இயேசுவின் திருமுழுக்கு பெருவிழா - ( ஆண்டு- C) ----- 09-01-2022- ஞாயிற்றுக்கிழமை

 

                    நீங்கள் திருமுழுக்கு பெற்ற நாள் உங்களுக்கு நினைவிருக்கிறதா? அதை கொண்டாடுவீர்களா? நமது பிறந்த நாளை தெரிந்து, அதை ஒவ்வொரு ஆண்டும் கொண்டாடுகின்றோம். ஆனால், நமது திருமுழுக்கு  நாளை மறந்து விடுகின்றோம்.  ஏனென்றால் நமது திருமுழுக்கின் முக்கியத்துவத்தை நாம் எப்பொழுதும் உணர்வதில்லை.  இன்று ஆண்டவர் இயேசு கிறிஸ்துவின் திருமுழுக்குப் பெருவிழாவை கொண்டாடி மகிழ்கின்றோம். இது  இயேசுவின் மற்றும் நமது திருமுழுக்கின் முக்கியத்துவத்தை  உணர்ந்து கொள்ள அழைப்பு தருகிறது.  இயேசுவின் திருமுழுக்கு பெருவிழா கிறிஸ்து பிறப்பு காலத்தின் நிறைவாகவும் அமைகிறது.

   திருவிவிலியம் நமக்கு எண்ணற்ற  திருமுழுக்கின் நிலைகளை/வகைகளை எடுத்துரைக்கிறது.

1. யோவானின் திருமுழுக்கு (மத் 3:6)

2. இயேசுவின் திருமுழுக்கு (மத் 3:13-17)

3. தூய ஆவியில் திருமுழுக்கு (1 கொரி 12:12-13) 

4. நெருப்பில் திருமுழுக்கு ( லூக். 3:16) 

5. நம்பிக்கையாளரின் திருமுழுக்கு (தி. பணி 2:41)

6. மேகத்தால்/கடலால் திருமுழுக்கு-மோசேயின் திருமுழுக்கு  (1 கொரி 10:2)

7. இறந்தோருக்காக திருமுழுக்கு ( 1 கொரி 15:29)

           ஆனால், கத்தோலிக்க திருஅவையில் மூன்றுவிதமான திருமுழுக்கை பற்றி சொல்லப்படுகிறது.

 

 1. தண்ணீரால் திருமுழுக்கு:-

 

              இது திருஅவையிலிருக்கும் பொதுவான முறையாகும்.  நாம் எல்லோருமே குழந்தையாக இருந்த பொழுது, குருவானவர் நம்மீது தண்ணீர் ஊற்றி,  தமத்திருத்துவத்தின் பெயராலே நமக்கு பெயர் வைத்து கிறிஸ்துவில் நம்மை இணைத்தார். இது தண்ணீரால் திருமுழுக்கு என்பதாகும்.

 2. இரத்தத்தால் திருமுழுக்கு:-

 

                      திருமுழுக்குப் பெறாத ஒருவர் கிறிஸ்துவுக்காக, அவரின் பொருட்டு தன்னுடைய உயிரையே அர்ப்பணித்து, அவருக்காக இரத்தம் சிந்துவது தான் இந்த திருமுழுக்கு.  இயேசுவின் பிறப்பின் பொழுது எண்ணற்ற குழந்தைகள் ஏரோதுவால் கொல்லப்பட்டார்கள். (மத் 2:16)  இந்த மாசில்லா குழந்தைகள் கிறிஸ்துவின் பொருட்டு இரத்தம் சிந்தி மறைசாட்சியாக திருமுழுக்கு பெற்றவர்கள்.  தொடக்க கால கிறிஸ்தவர்கள் உரோமையர்களால் இயேசுவின் பெயரால் கொடுமைப்படுத்தப்பட்டு கொலை செய்யப்பட்ட போதும்  இரத்தத்தால் திருமுழுக்குப் பெற்றார்கள். ஆக இரத்தத்தால் திருமுழுக்கு என்பது தண்ணீரால் திருமுழுக்கு போல திருஅவையால் ஏற்றுக்கொள்ளபட்டதாகும் (CCC-1258).

3. விருப்பத்தால் திருமுழுக்கு

                           கிறிஸ்தவத்தை சாராத ஒரு நபர் தன்னுடைய வாழ்வின் ஏதாவது ஒரு நிலையில்  அல்லது சாகும் தருவாயில் தான் ஒரு கிறிஸ்தவராக இருக்க வேண்டும் என மனதால் நினைத்தாலோ மற்றும் கிறிஸ்தவராக மாறுவதற்கு தன்னைத் தயாரித்து கொண்டிருக்கையில் இறந்திருந்தாலோ,  அவர்கள் தங்களது விருப்பத்தால் திருமுழுக்கு பெற்றவர்களாக கருதப்படுகிறார்கள் (CCC-1260). இன்று நாம் கொண்டாடுகின்ற  இயேசுவின் திருமுழுக்கு, நமது  திருமுழுக்கை நினைவுபடுத்துகின்றது.  இது திருமுழுக்கின் உன்னதமான நிலைகள், அதன் அர்த்தங்கள் மற்றும் அது தரும் அழைப்பு பற்றியும் புரிந்து கொள்ள அழைக்கிறது. இதற்கு அடித்தளமாய் இருப்பது  இயேசுவின் திருமுழுக்கு.

இயேசுவின் திருமுழுக்கு:-

                 ஒவ்வொரு மனிதனின் வாழ்க்கையிலும் ஒரு முக்கியமான தருணம் இருக்கும். அது அவனுடைய வாழ்க்கையை மாற்றி அமைக்கும் மற்றும் புது மாற்றத்தை தரும். இறைமகன் இயேசுவின்  வாழ்க்கையிலும் அத்தகைய சில தருணங்கள் இருந்தது. அவர் தன்னுடைய பன்னிரண்டாம் வயதில் ஆலயத்திலேயே தங்கியிருந்து தந்தைக்கும் அவருக்கும் உண்டான உறவை  முதன் முதலாக கண்டுணர்ந்தது.(லூக்கா 3:23).

                  

                    ஏறக்குறைய 18-வருடங்களுக்கு பிறகு அவருடைய 30-வது வயதில் மீண்டும் அப்படி ஒரு தருணம் ஏற்படுகிறது, அது தான் அவரின் திருமுழுக்கு.  பெரும் கூட்டம் ஒன்று  யோவானை நோக்கி திருமுழுக்கு பெறுவதற்காக செல்கிறது. அந்தக் கூட்டம் கடவுளோடு தங்களுடைய உறவை புதுப்பிப்பதற்காக மற்றும் தந்தையாகிய கடவுளை கண்டு கொள்வதற்காக சென்றது. இயேசுவும் அங்கு சென்றது 18- ஆண்டுகளுக்கு முன்பு ஆலயத்தில் கண்டு கொண்ட தந்தையின் உறவில் இணைந்து கொள்வதற்காகும். இயேசுவின் திருமுழுக்கு அவரது மூன்று விதமான சாயலை நமக்கு வெளிப்படுத்துகிறது.

 1. இறைச்சாயல் 

 2. மனித சாயல் 

 3. பணிச்சாயல்

1. இறைச்சாயல்:-

                       தந்தையோடு உறவை மீண்டும் புதுப்பித்த அந்த தருணம் தான் இயேசுவின் இறைச்சாயலை எடுத்து காட்டுகிறது.  அவரின் திருமுழுக்கின் போது மூவொரு இறைவனின் பிரசன்னத்தை பார்க்கின்றோம். தந்தையாகிய கடவுள் எனும் வார்த்தையும் புறா வடிவில் தூய ஆவியாரின் வருகையும் என  இங்கு இவர்கள் கிறிஸ்துவின் இறைச்சாயலை உறுதிப்படுத்துகிறார்கள். இதற்கும் மேலாக தந்தையாகிய இறைவன் "என் அன்பார்ந்த மகன் நீயே" (லூக்கா 3:22) என எடுத்துரைத்தது, இவர் கடவுளின் மகன் மற்றும் இறைச்சாயல் கொண்டவர் என்பதை சுட்டிக்காட்டுகிறது.

 

2. மனித சாயல்:-

                யோவானிடம் பெருந்திரளான மக்கள் இறைவனை தங்களது வாழ்க்கையில் தேடியவர்களாக மனமாற்றம் பெற்று திருமுழுக்கு பெறுகிறார்கள்,  அவ்வேளையில் இயேசுவும் திருமுழுக்கு பெறுகிறார். இறைவனைத் தேடும் மக்களோடு தன்னையும் அடையாளப்படுத்தி கொள்வதற்காக இந்த திருமுழுக்கு. இதைத்தான் இயேசுவின் திருமுழுக்கின் போது கேட்ட அந்த விண்ணக குரலும் உறுதி செய்கிறது. என் அன்பார்ந்த மகன் நீயே" (லூக்கா 3:22) என்பது திருப்பாடல் 2;7 -லிருந்து எடுக்கப்பட்டது.  இது வரவிருக்கின்ற மெசியா இவர் என்பதை சுட்டிக்காட்டுகிறது. "உன் பொருட்டு நான் பூரிப்படைகிறேன்" (லூக்கா 3:22) என்பது இறைவாக்கினர் எசாயாவின் நூலில் காணப்படுகிறது (எசாயா 42 ;1).  இது இவர் தந்தையின் பணியாளனாக இறை சித்தத்தை நிறைவேற்ற மனித சாயலில் தன்னை அர்ப்பணித்ததை  காட்டுகிறது. தங்களுடைய பாவத்திலிருந்து மனமாற்றம் பெறுவதற்காக, யோவானிடம் திருமுழுக்கு பெற்ற மக்களோடு இயேசுவும் திருமுழுக்கு பெறுவது, அவர் ஒரு பாவி என்பதை காட்டுவதற்காக அல்ல.  மாறாக மனித பாவங்களைப் போக்க தெய்வமே மனித சாயலை தெரிந்து கொண்டதாகும். ஆக இயேசுவின் திருமுழுக்கு மனித சாயலையும் காட்டுகிறது.

 3. பணிச்சாயல்:-

                     இயேசுவின் பணிச்சாயல் என்பது  திருமுழுக்கு அவரது பணி வாழ்வின் தொடக்கமாக அமைந்ததாகும். "என் கடன் பணி செய்து கிடப்பதே"  என்னும் கூற்றுக்கு ஏற்ப, "தொண்டு ஏற்பதற்கு அல்ல, தொண்டாற்றுவதற்கே வந்தேன்" என்னும் வார்த்தையை வாழ்வாக்க, ஊற்றாக அமைந்தது தான் இறைமகன் இயேசு கிறிஸ்துவின் திருமுழுக்கு. முப்பது ஆண்டுகள் தன்னுடைய பிரசன்னத்தால் நற்செய்தியைஅறிவித்தவர், அடுத்த மூன்று ஆண்டுகள்  ஆற்றும் மகத்தான வரலாற்று நினைவுக்கு தொடங்கியிருக்கும் பணிக்கு அச்சாணி தான் இந்த திருமுழுக்கு. அவரின் இந்த மகத்தான பணியை போல எவரும்  இம்மண்ணுலகில்   செய்ததும் இல்லை, ஏன்? இவ்வாறு செய்ய போவதும் இல்லை என்று  கூறலாம். அதற்காக தம்மை கடுமையாக தயாரித்து அளப்பெரிய இறைபணியாம் மீட்புப்பணியை இறைமகன் இயேசு கிறிஸ்து செய்தார் என்பதை தான் அவரது இந்த திருமுழுக்கு நினைவுப்படுகின்றது. "ஜெபமின்றி ஜெயம் இல்லை, தூய ஆவியின்றி பணியில் நிறைவில்லை" என்பதை முற்றிலும் உணர்ந்த இறைமகன் இயேசு கிறிஸ்து, ஆவியின் துணைப்பெற்று பணி வாழ்வை தொடங்க முற்படுகின்ற ஒரு நினைவுச் சின்னம் தான் அவரது இந்த திருமுழுக்கு.

கிறிஸ்தவர்களின் திருமுழுக்கு:-

                  கிறிஸ்தவர்களின் திருமுழுக்கு என்றால் என்ன?  திருமுழுக்கு "baptizein" என்னும் கிரேக்க வார்த்தையிலிருந்தும் அதாவது ஆங்கிலத்தில் "plunge" அல்லது "immerse". இது தமிழில் தண்ணீரில் மூழ்குதல் என பொருள் படும். அன்று நாம் குழந்தையாக இருந்த பொழுது நம்முடைய ஜென்ம மற்றும் கர்ம பாவத்தை நீக்கி,  இறைவனுக்கும் திருஅவைக்கும் நம்மை பிள்ளைகளாக மாற்றிய ஒரு உன்னதமான திருவருட்சாதனம் தான் இந்த திருமுழுக்கு. இது ஒரு திருவருட்சாதனம் = திரு + அருள் + சாதனம். கடவுளின் அருளை நமக்கு பெற்று தரும் ஒரு சாதனமாகும். இதன்  முக்கியத்துவத்தை  கத்தோலிக்க மறைக்கல்வி நமக்கு ஏழு நிலைகளில் எடுத்துரைக்கிறது. (Catechism of Catholic Church - CCC-1213)

1. கிறிஸ்தவத்தின் அடித்தளம்.

2. தூய ஆவியில் நாம் வாழ்வதற்கான நுழைவுவாயில்.

3. மற்ற திருவருட்சாதனங்கள் பெறுவதற்கான முதல் படி.

4. பாவத்திலிருந்து நம்மை கழுவி புது பிறப்பெடுக்க வைக்கிறது.

5. இறைவனின் பிள்ளையாக மாற்றுகிறது.

6. கிறிஸ்துவின் அங்கத்தினர்களாக உருவெடுக்க வைக்கிறது.

7. திருஅவையில் நம்மை இணைத்து அதன் பணி பொறுப்பை நமக்குத் தருகிறது.

             இன்று நாம் எதற்காக திருமுழுக்குப் பெற்றோம்? மேற்காணும் திருமுழுக்கின் அர்த்தங்களை நமது வாழ்க்கையில் உணர்ந்திருக்கிறோமா? என சிந்திப்போம்.  கிறிஸ்துவிடம் திருஅவையில் நம்மை இணைத்து இறையருளை நமக்கு  வழங்கியிருக்கும் திருமுழுக்கு என்னும் திருவருட்சாதனம் நம்மை இறைவனின் பணி வாழ்விற்கு அழைக்கிறது. இதைத்தான் பெற்றோர்களாகிய நாம் கொடுத்த திருமுழுக்கு வாக்குறுதிகளும் நமக்கு நினைவூட்டுகிறது. "நீங்கள் போய் எல்லா மக்களினத்தாரையும் சீடராக்குங்கள்; தந்தை, மகன், தூய ஆவியார் பெயரால் திருமுழுக்குக் கொடுங்கள்"( மத்தேயு 28:19).  எனும் இயேசுவின் வார்த்தைகளுக்கு ஏற்ப நமது வாழ்க்கையால் நாம் நம்முடைய திருமுழுக்கை வெளிப்படுத்த அழைப்பு பெறுகிறோம். நமது வார்த்தை, செயல் மற்றும் வாழ்வு நாம் திருமுழுக்கு பெற்ற கிறிஸ்தவர்கள் என்பதை பிறருக்கு எடுத்து கூற வேண்டும்.  அத்தகையோராய் நாம் வாழ்வோம்.                                                                                                

                                                               இறைவன் நம்மை ஆசீர்வதிப்பார்.

அன்புடன்,

அருட்பணி. அ. குழந்தை யேசு ராஜன் CMF

வீடியோவாக பார்க்க...

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - திருவருகைக்காலம் நான்காம் ஞாயிறு - ( ஆண்டு- C) ----- 19-12-2021- ஞாயிற்றுக்கிழமை

 

நற்செய்தி:-  லூக்கா 1: 39-45

நம் வாழ்வின் சந்திப்புகள்

"மழை நிலத்தை சந்திக்கிறது,

கடல் அலை கரையை சந்திக்கிறது,

சூரியன் ஒவ்வொரு நாளும் நம்மை சந்திக்கிறான்,

நாம் ஒவ்வொரு நாளும் பலரை சந்திக்கின்றோம்."

சந்திப்பு மனித வாழ்வின் அங்கமாகும். நாம் பேசும்போது நம் உதடுகள் கூட சந்திக்கின்றது. இன்றைய நற்செய்தியில் அன்னை மரியாள் எலிசபெத்தை சந்திக்கிறார். இது வெறும் இருவரின் சந்திப்பு அல்ல, யுகங்களின் சந்திப்பு, விசுவாசத்தின் சந்திப்பு, பழைய ஏற்பாட்டின் மற்றும் புதிய ஏற்பாட்டின் சந்திப்பு. ஆக, அன்னை மரியாள் எலிசபெத்தை சந்தித்தது மாற்றத்தின் மற்றும் புது வாழ்வின் சந்திப்பு. இங்கு அன்னை மரியாள் மட்டும் எலிசபெத்தை சந்திக்கவில்லை, எலிசபெத்தும் அன்னையை சந்திக்கிறார், யோவான் இயேசுவை சந்திக்கிறார், இயேசு எலிசபெத்தையும் அவர் வயிற்றிலிருந்த யோவானையும் சந்திக்கிறார். சந்திப்புகள் இங்கே எண்ணற்ற மாற்றங்களை ஏற்படுத்துவதை பார்க்கின்றோம்.

1. மகிழ்ச்சி

"குழந்தை மகிழ்ச்சியால் துள்ளிற்று" என்னும் வார்த்தைகள் அன்னை மரியாள் - எலிசபெத்து சந்திப்பு மகிழ்வை ஏற்படுத்தியதை காட்டுகிறது. எலிசபெத்தும் அவர் வயிற்றிலிருந்த குழந்தையும் மகிழ்ந்ததை பார்க்கின்றோம். அன்னையின் சந்திப்பு மகிழ்வைத் தருகிறது, நாமும் நமது வாழ்வில் பலரை சந்திக்கிறோம். இன்று நமது சந்திப்புகள் பிறருக்கு மகிழ்வை தருகிறதா? வேதனையை தருகிறதா? தொல்லையை தருகிறதா? அன்னையின் சந்திப்பை போல, நமது சந்திப்பு பிறருக்கு மகிழ்ச்சி தருவதாக இருக்கட்டும்.

2. தூய ஆவி

அன்னையின் சந்திப்பு எலிசபெத்துக்கு தூய ஆவியை பெற்று தருகிறது. அன்னையின் சந்திப்பின் நிமித்தமாக தான் எலிசபெத்து தூய ஆவியால் ஆட்கொள்ளப்பட்டு அன்னையிடம், "பெண்களுக்குள் நீர் ஆசி பெற்றவர்" என்று கூறுகின்றார். இரண்டாம் வத்திக்கான் சங்க ஏடுகளின் அடித்தளத்தில் "எங்கெல்லாம் நன்மை ஏற்படுகின்றதோ, அங்கெல்லாம் தூய ஆவியாரின் பிரசன்னம் நிறைந்திருக்கின்றது". அவ்வகையில் நமது சந்திப்பு பிறருக்கு நன்மையை ஏற்படுத்துகின்ற பொழுது, தூய ஆவியின் பிரசன்னமும் அங்கு நிறைந்திருக்கும். பிறருக்கு நான் தூய ஆவியின் பிரசன்னத்தை தருபவனாக இருக்கின்றேனா?

3. உதவி

முதிர்ந்த வயதில் கருத்தாங்கிய எலிசபெத்துக்கு அன்னையின் சந்திப்பு மிகப்பெரும் உதவியாக இருந்திருக்கும். முதிர்ந்த வயதானவர்க்கு எப்போதும் உதவிகள் தேவைப்படும், அதிலும் கருத்தாங்கியவர்க்கு இன்னும் அதிக உதவியாக இருந்திருக்கும் அன்னையின் சந்திப்பு.

4. இயேசு

சந்திப்பின் வழியாய் அன்னையானவள் இயேசுவை அவர்களுக்கு தந்திருக்கின்றார். தன் வயிற்றிலிருந்த இயேசுவை, அவரது பிரசன்னத்தை அவர்களுக்கு தந்ததன் வாயிலாகத்தான் அவர்களில் மகிழ்ச்சியும், தூய ஆவியும் நிறைந்ததை நாம் பார்க்கின்றோம்.

இன்று நமது வாழ்க்கையிலும் ஒவ்வொரு நாளும் நாம் எண்ணற்ற மனிதர்களை சந்திக்கின்றோம். இன்று எனது சந்திப்புகள் பிறருக்கு எப்படி அமைகின்றது? என் சந்திப்புகள் பிறருக்கு மகிழ்ச்சியை தருகிறதா? பிறருக்கு உதவியாக அமைகின்றதா? தூய ஆவியாரின் பிரசனத்தை ஏற்படுத்தும் நன்மையை தருகிறதா? இவை அனைத்திற்கும் மேலாக இயேசுவின் பிரசன்னத்தை உருவாக்கி தருகிறதா? நமது சந்திப்புகள் பிறருக்கு துன்பத்தை ஏற்படுத்தாமல் என்றும் மகிழ்ச்சியை ஏற்படுத்த கூடியதாகவும், இறையருளை உருவாக்குவதாகவும் அமையட்டும்.

இறைவன் நம்மை ஆசீர்வதிப்பார்.

அன்புடன்,

அருட்பணி. அ. குழந்தை யேசு ராஜன் CMF

வீடியோவாக பார்க்க...

                            https://youtu.be/JF43BxMto9s

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - திருவருகைக்காலம் மூன்றாம் ஞாயிறு - ( ஆண்டு- C) ----- 12-12-2021- ஞாயிற்றுக்கிழமை

 

முதல் வாசகம் : 

                 செப்பனியா  3: 14-17

இரண்டாம் வாசகம் : 

                 பிலிப்பியர் 4: 4-7

நற்செய்தி:-

      லூக்கா 3: 10-18

நாங்கள் என்ன செய்ய வேண்டும்?

(மகிழ்ச்சி தரும் மூன்று நற்செய்தியின் மதிப்பீடுகள்)

கிராமம் ஒன்றில் வயதான முதியவர் ஒருவர் வாழ்ந்து வந்தார். அவரை பார்த்தாலே எல்லோருக்கும் பயம், யாரும் அவர் அருகில் வரக் கூட மாட்டார்கள் ஏனென்றால் அவர் எப்பொழுதும் யாரையாவது மற்றும் எதையாவது குறை கூறிக் கொண்டே இருப்பார், அவர் வார்த்தைகள் எல்லாம் உள்ளத்தை பாதிக்கக் கூடியதாக இருக்கும். எனவே, அந்த ஊரில் யாருக்கும் அவரை பிடிக்காது இதனால் அவரைச் சார்ந்தவர்கள் அதிகமாக கஷ்டப்பட்டார்கள். ஒருநாள் அவர் தன்னுடைய 80-வது பிறந்தநாளை கொண்டாடினார், அன்று ஊரெல்லாம் இவரைப் பற்றிய பேச்சு. இந்த முதியவர் இன்று யாரைப் பற்றியும், எதைப் பற்றியும் குறை கூறவில்லை, மிகவும் மகிழ்ச்சியாக இருக்கிறார். இதையறிந்த ஊர் மக்களுக்கு ஒரே ஆச்சரியம், யோசித்தார்கள், எல்லோரும் ஒன்றாக சேர்ந்து அந்த முதியவரிடம் கேட்டார்கள். அதற்கு அந்த முதியவர் ஊர் மக்களிடம், "நான் கடந்த 80 ஆண்டுகளாக என்னுடைய வாழ்க்கையில் மகிழ்ச்சியை தேடிக்கொண்டே இருந்தேன். அது கிடைக்கவில்லை, அதனால் இனி தேடுவதை நிறுத்தி விட வேண்டும் என்று நினைத்தேன், எனது மகிழ்ச்சிக்கான தேடலை நிறுத்தினேன், இன்று மகிழ்ச்சியாக இருக்கின்றேன்" என்றார். இந்த முதியவர் மகிழ்ச்சியை தன்னிலே தேடாமல், அவர் பார்க்கின்ற மனிதர்களிடத்திலும் மற்றும் சமுதாயத்திலும் தேடிக்கொண்டிருந்தார். ஒரு கால கட்டத்தில் அவர் அதை நிறுத்துகின்ற பொழுது தன்னிலே மகிழ்ச்சி இருப்பதை உணர்கின்றார். இது தான் உண்மை, இன்று நாம் எல்லோரும் மகிழ்ச்சியை வெளியே தேடிக் கொண்டிருக்கின்றோம். ஆனால், மகிழ்ச்சி நம்மில் இருக்கிறது, நம்மோடு இருக்கின்றது, இதை நாம் தான் உருவாக்க வேண்டும். மகிழ்ச்சி என்பது கானல் நீரைப் போல அதைத்தேடி நாம் வெளியே சென்றோமென்றால் அது நம்மை விட்டு விலகி தான் செல்லும். கிறிஸ்தவர்களாகிய நம்மில் மகிழ்ச்சி இருக்கிறது, அது கிறிஸ்து தரும் மகிழ்ச்சி, அவரது பிறப்பு, வாழ்வு, இறப்பு மற்றும் உயிர்ப்பு தருகின்ற மகிழ்ச்சி. திருவருகைக் காலத்தில் கிறிஸ்தவத்தில் மற்றும் கிறிஸ்துவின் பிறப்பில் மகிழ்ச்சியை நாம் உணரவும், இந்த மகிழ்ச்சி என்றும் நிலையாய் இருக்க நம்மை நாமே தயாரிக்கவும் இன்றைய திருவழிபாட்டின் வழியாக அழைக்கப்படுகின்றோம்.

கத்தோலிக்கத் திருஅவை ஒவ்வொரு ஆண்டும் திருவருகைக் காலத்தின் மூன்றாம் ஞாயிற்றுக்கிழமையை மகிழ்ச்சியின் ஞாயிறாக கொண்டாடுகிறது. "Gaudete" ('Rejoice' in English) என்னும் இலத்தீன் வார்த்தையிலிருந்து மகிழ்ச்சி என்னும் வார்த்தை வருகின்றது. நவம்பர் மாதம் 11-ஆம் தேதி புனித மார்ட்டின் அவர்களின் திருவிழாவிலிருந்து சரியாக நாற்பது நாட்கள் திருவருகைக் கால நோன்பு கடைபிடித்ததின் நிறைவாக இந்த மகிழ்ச்சியின் ஞாயிறானது கொண்டாடப்படுகிறது. இது கிறிஸ்தவத்தின் மற்றும் நமக்காக மீட்பர் ஒருவர் பிறக்கிறார் என்னும் கிறிஸ்தவர்களின் மகிழ்ச்சி. அதனால் தான் இயேசுவின் பிறப்பில் வானதூதர் இடையர்களிடம், “அஞ்சாதீர்கள், இதோ, எல்லா மக்களுக்கும் பெரும் மகிழ்ச்சியூட்டும் நற்செய்தியை உங்களுக்கு அறிவிக்கிறேன். இன்று ஆண்டவராகிய மெசியா என்னும் மீட்பர் உங்களுக்காகத் தாவீதின் ஊரில் பிறந்திருக்கிறார்" (லூக்கா 2:10,11) என்றார்.

"மகளே சீயோன்! மகிழ்ச்சியால் ஆர்ப்பரி; இஸ்ரயேலே! ஆரவாரம் செய்; மகளே எருசலேம்! உன் முழு உள்ளத்தோடு அகமகிழ்ந்து அக்களி". (செப்பனியா 3: 14) என இன்றைய முதல் வாசகத்தில் செப்பனியா இறைவாக்கினர் இஸ்ரயேல் மக்களிடம் ஆண்டவராகிய இறைவன் நம் மத்தியிலே இருக்கின்றார். எனவே எதற்கும் அஞ்சாமல் மகிழ்வோடு இருங்கள் என்கின்றார். இது வரவிருக்கும் இறைவன் நமக்காக இருக்கின்றார் என்பதை நினைத்து நாம் மகிழ்வு கொள்ள வேண்டும் என்பதை காட்டுகின்றது. இன்றைய இரண்டாம் வாசகத்தில் பவுல் அடிகளார் பிலிப்பியருக்கு "ஆண்டவரோடு இணைந்து என்றும் மகிழுங்கள்; மீண்டும் கூறுகிறேன், மகிழுங்கள்" (பிலிப்பியர் 4: 4)என்று கூறுகின்றார். எனவே "ஆர்ப்பரித்து அக்களியுங்கள்" என்னும் இன்றைய பதிலுரை பாடலுக்கு ஏற்றவாறு இயேசுவின் பிறப்பை மற்றும் அவர் நம்மில் வாழுகின்றார் என்னும் இந்த கிறிஸ்தவ வாழ்வை நினைத்து மகிழ்ந்து கொள்ள வேண்டும்.

நாங்கள் என்ன செய்ய வேண்டும்?

கிறிஸ்தவர்களிடத்தில் எதிர்நோக்கு மற்றும் தயாரிப்பை வலியுறுத்தும் இன்றைய திருவருகைக்காலத்தில் கிறிஸ்து பிறப்பின் மகிழ்ச்சியில் நிலைத்திருக்க நாம் என்ன செய்ய வேண்டும்? என்ற கேள்விகளுக்கு இன்றைய நற்செய்தி பதில் அளிக்கின்றது. இன்றைய நற்செய்தியில் திருமுழுக்கு யோவானிடம் மூன்று விதமான மனிதர்கள் (மக்கள் கூட்டத்தினர், வரிதண்டுவோர் மற்றும் படைவீரர்) "நாங்கள் என்ன செய்ய வேண்டும்?" (லூக்கா 3:10) என்னும் ஒரே கேள்வியைக் கேட்கின்றார்கள். இதற்கு அவர் மூன்று விதமான நற்செய்தியின் மதிப்பீடுகளை எடுத்துரைக்கின்றார்.

1. பகிர்வு

மக்கள் கூட்டத்தினர் கேட்ட பொழுது திருமுழுக்கு யோவான், “இரண்டு அங்கிகளை உடையவர் இல்லாதவரோடு பகிர்ந்து கொள்ளட்டும்; உணவை உடையவரும் அவ்வாறே செய்யட்டும்” (லூக்கா 3:11) என்றார். இது பகிர்வு என்னும் நற்செய்தியின் மதிப்பீட்டை அவர் எடுத்துரைப்பதை காட்டுகிறது. நமது அன்றாட வாழ்விலும் நம்மால் முடிந்தவரை இல்லாதவரோடு பகிர்ந்து கொள்கின்ற பொழுது, நம்முடைய உள்ளத்தில் ஒரு மகிழ்ச்சி பிறக்கும். இதை நாமும் நமது வாழ்க்கையில் உணர்ந்திருப்போம்.

2. நேர்மை

வரி தண்டுவோரும் திருமுழுக்குப் பெற வந்து, “போதகரே, நாங்கள் என்ன செய்ய வேண்டும்?” என்று அவரிடம் கேட்டனர். அவர், “உங்களுக்குக் குறிக்கப்பட்ட தொகைக்கு அதிகமாக எதையும் தண்டாதீர்கள்” (லூக்கா 3:12,13) என்றார். இது நேர்மையானவர்களாக வாழ்வதற்கு தருகின்ற அழைப்பாகும். நேர்மையும், உண்மையும் நம்மை கிறிஸ்துவின் வழியில் வாழ வைக்கும். கிறிஸ்துவின் வழி- மகிழ்வின் வழி. வரிதண்டுபவரான சக்கேயுவை இயேசு அழைத்த போதும், நேர்மையின் வழியில் வாழ்வதற்கு தான் அழைப்பு தருகின்றார். நேர்மையின் மகிழ்வில், தான் பெற்றதிலிருந்து பல மடங்காக திரும்ப கொடுக்கின்றார்.

3. நீதி

படைவீரரும் திருமுழுக்கு யோவானை நோக்கி, “நாங்கள் என்ன செய்ய வேண்டும்?” என்று கேட்டனர். அவர், “நீங்கள் எவரையும் அச்சுறுத்திப் பணம் பறிக்காதீர்கள்; யார்மீதும் பொய்க் குற்றம் சுமத்தாதீர்கள்; உங்கள் ஊதியமே போதும் என்றிருங்கள்” (லூக்கா 3:14) என்றார். இது எவரையும் அநீதிக்கு உட்படுத்தாமல் நீதியின் பொருட்டு வாழ்வதற்கு அழைப்பு தருகின்றது. இதைத் தான் மலைப்பொழிவில், "நீதிநிலைநாட்டும் வேட்கை கொண்டோர் பேறுபெற்றோர்; ஏனெனில் அவர்கள் நிறைவுபெறுவர் (மத்தேயு 5:6) என்கிறார், இங்கு நிறைவு மகிழ்வாகும்.

               திருமுழுக்கு யோவான் தரும் இந்த மூன்று நற்செய்தியின் மதிப்பீடுகளும் கிறிஸ்தவ வாழ்வின் மகிழ்வை நமக்கு காட்டுபவை. கிறிஸ்தவ வாழ்வின் முழுமையான மகிழ்வை நம்முடைய உள்ளங்களில் பெறுவதற்கு, இன்று நாம் என்ன செய்ய வேண்டும்? என்னும் அதே கேள்வியை நம்மில் எழுப்புகின்ற போது, நாமும் நற்செய்தியின் மதிப்பிடுகளான பகிர்வு, நேர்மை மற்றும் நீதி இந்த மூன்றையும் நம்முடைய வாழ்க்கையில் வாழ வேண்டும். அப்போது கிறிஸ்துவின் பிறப்பு நமது வாழ்க்கையில் நிலையான மகிழ்ச்சியை தரும்.

   இறைவன் நம்மை ஆசீர்வதிப்பார்.

அன்புடன்,

அருட்பணி. அ. குழந்தை யேசு ராஜன் CMF

வீடியோவாக பார்க்க...

                           

https://youtu.be/BZnTwZLmwq4    

 

  

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - திருவருகைக்காலம் இரண்டாம் ஞாயிறு - ( ஆண்டு- C) ----- 05-12-2021- ஞாயிற்றுக்கிழமை

 

முதல் வாசகம் : 

                  பாரூக்கு  5: 1-9

இரண்டாம் வாசகம் : 

                 பிலிப்பியர் 1: 4-6, 8-11

நற்செய்தி:-

      லூக்கா 3: 1-6

உள்ளதை கூர்மையாக்குங்கள் 

            அவன் ஒரு மரம் வெட்டும் தொழிலாளி பல நாட்களாக வேலையில்லாமல் இருந்தான். ஒரு நாள் கிடைத்தது அதிக ஊதியத்துடன் கூடிய வேலை. மிகுந்த மகிழ்ச்சியுடன் நன்றாக வேலை செய்ய வேண்டும் என தீர்மானித்தான். முதல் நாள் பன்னிரன்டு மரங்களை வெட்டினான். அடுத்த நாள் எட்டு மரங்கள் மட்டுமே அவனால் வெட்ட முடிந்தது. மூன்றாவது நாள் வெறும் ஐந்து மரங்கள் மட்டுமே வெட்டினான். அவனுக்கு ஒன்றுமே புரியவில்லை, ஒவ்வொரு நாளும் ஏன் எனது திறன் குறைந்து கொண்டே வருகிறது என யோசித்தான். பின் அவன் முதலாளியிடம், “ஐயா! என் உடம்பில் பலம் அதிகம் உண்டு. நன்றாக வேலை செய்ய வேண்டும் என்னும் ஆர்வமும் உள்ளது, ஆனால் என்னால் அதிக மரங்கள் வெட்ட முடியவில்லை” என்றான். அதற்கு முதலாளி அவனிடம் நீ கடைசியாக எப்பொழுது உனது மரம் வெட்டும் இரம்பத்தை கூர்மை செய்தாய்?” என்று கேட்க, அந்த தொழிளாளியோ, கூர்மை செய்வதற்கெல்லாம் எனக்கு நேரம் இல்லை, நான் நிறைய மரங்களை வெட்ட வேண்டும் என்று கூறினான். அதற்கு அந்த முதளாளி, “நன்றாக வேலை செய்ய வேண்டும், ஒன்றை அடைய வேண்டும் என்ற இலக்கு மட்டும் போதாது மாறாக அதற்கான தயாரிப்பும் மிக அவசியமாகும். நீ நான்கு மணி நேரம் வேலை செய்தால் மூன்று மணி நேரம் இரம்பத்தை கூர்மை செய்ய பயன்படுத்து” என்று கூறினார்.

                 இன்று நம்மிடையே இலட்சியம் மற்றும் இலக்கு நிறைய உண்டு, ஆனால் அதற்காக எவ்விதமான தயாரிப்பும் இருப்பதில்லை. கிறிஸ்துமஸ் விழாவை கொண்டாட வேண்டும், இயேசுவை எனது உள்ளத்தில், இல்லத்தில், ஊரில், குடிலில் மற்றும் வாழ்வில் ஏற்க வேண்டும் என ஆசை இருக்கலாம், ஆனால் அதற்கான தயாரிப்பு பல மடங்கு நம்மில் இருக்க வேண்டும் என்கிறது இன்றைய இறைவார்த்தை வழிபாடு. பிறந்திருக்கின்ற இந்த திருவருகை காலம் ஒரு தயாரிப்பின் காலம், வரவிருக்கின்ற இயேசுவை நம்மில் ஏற்பதற்கு நம்மை முழுமையாக தயாரிக்க இது அழைக்கிறது.

    “ஆண்டவருக்காக வழியை ஆயுத்தமாக்குங்கள்; அவருக்காக பாதையைச் செம்மையாக்குங்கள்” (எசாயா 40:3) என்னும் இறைவாக்கினர் எசாயாவின் வார்த்தைகள் இன்றைய நற்செய்தியிலும் தரப்பட்டிருக்கிறது. அன்று இயேசுவின் பிறப்புக்கு முன்பு திருமுழுக்கு யோவான் பாலைவனத்தில் மக்களை தயாரித்தார். இயேசு தனது பணி வாழ்வுக்கு முன் நாற்பது நாட்கள் பாலைவனத்தில் தன்னை முழுமையாக தயாரித்தார்.(மத்தேயு 4:1-2)  இயேசு வாழ்ந்த காலத்தில் யூத சமுதாயத்தில் மெசியாவின் வருகைக்காக தயாரித்து வந்தனர். இன்று, நாமும் ஆண்டவரின் பிறப்புக்காக நம்மை தயாரிக்க அழைக்கப்படுகின்றோம்.

              “The Seven habits of Highly Effective People” அதாவது “அதிக ஆற்றல் வாய்ந்த மனிதர்களின் ஏழு பழக்கங்கள்” என்னும் ஆங்கில புத்தகம் ஸ்டீபன் கோவே அவர்களால் எழுதப்பட்டது. இதில் இவர் குறிப்பிட்டுள்ள ஏழாவது பழக்கம் தான் “Sharpen the Saw” அதாவது “ரம்பத்தை கூர்மைபடுத்து”, அப்படியென்றால் உனது வாழ்வில் வெற்றியடைய தயாரிப்பாக, உடல் உள்ள, ஆன்மீக மற்றும் சமூக நலம் என்னும் நான்கு நிலைகளையும் கவனிக்க வேண்டும் என்று கூறுகிறார். இதில் இன்றைய இறைவார்த்தை எடுத்துரைக்கும் தயாரிப்பு வெறும் நம்முடைய உடல் மற்றும் சமுதாயம் சார்ந்ததல்ல, மாறாக நமது உள்ளம் மற்றும் ஆன்மீகத்தை சார்ந்தது. நமது உள்ளத்தளவில் நாம் இறைவனின் வருகைக்காக நம்மை தயாரிக்க அழைக்கப்படுகின்றோம். மரம் வெட்டுவதற்காக கோடாரியையும், இரம்பத்தையும் கூர்மைப்படுத்துகின்ற நாம், இயேசுவின் வருகைக்காக நம்மை கூர்மைப்படுத்த அதாவது தயாரிக்க அழைக்கப்படுகின்றோம். நமது தயாரிப்பு நான்கு வழிகளில் அமையலாம்.

1. ஜெபத்தில்: கிறிஸ்தவர்கள் அன்றாட வாழ்க்கையில் செய்கின்ற ஒவ்வொரு செபங்களும் அவர்களை இறைவன் முன்பாக கொண்டு சேர்க்கின்றது. திருஅவையில் பலர் ஜெபத்தின் வழியாக இறைவனை நோக்கி சென்றிருக்கிறார்கள். இந்த நாட்களில் நாம் செய்கின்ற ஒவ்வொரு ஜெபமும் இறைவன் நமது உள்ளத்தில் வருவதற்காக நாம் செய்கின்ற தயாரிப்பு. எனவே, ஜெபத்தில் இறைவனை வரவேற்க நம்மை தயாரிப்போம்.

2. ஆன்மீக செயல்களில்: ஜெபத்தோடு நமது அன்றாட ஆன்மிக செயல்பாடுகளாக தினமும் திருப்பலியில் பங்கு கொள்வது, இறைவார்த்தையை வாசிப்பது, ஜெபமாலையில் பங்கேற்பது, அன்பிய கூட்டங்களிலும் பக்த சபைகளிலும் தமது பங்களிப்பை அளிப்பது மற்றும் பிறருக்கு உதவுவது என்னும் ஆன்மீக செயல்பாடுகளும் நம்மை இறைவனின் வருகைக்காக தயாரிக்கின்ற கருவிகளாகும்.

3. பாவ மன்னிப்பில்: இன்றைய நற்செய்தி வாசகம் நாம் செய்த ஒவ்வொரு பாவங்களையும் நினைத்து அதற்காக மன்னிப்பு கேட்டு புதுவாழ்வு பெறுவதற்கு அழைப்பு தருகிறது. பாவமற்ற வாழ்க்கை- தூய்மையான வாழ்க்கை, தூய்மையான வாழ்க்கை- இறைவனுக்கு உகந்த வாழ்க்கை, அத்தகையதொரு வாழ்க்கையை வாழ்வதற்கு நாம் முயற்சி செய்கின்ற பொழுது அதுவே இறைவன் நமது உள்ளத்தில் வருவதற்கான சிறந்த தயாரிப்பாகும்.

 4.   மனமாற்றத்தில்: இருளான நமது பழைய பாவ வாழ்விலிருந்து அதாவது நமது தீய எண்ணங்கள், செயல்கள் மற்றும் வார்த்தைகள் இவற்றிலிருந்து புதியதொரு வாழ்வு வாழ்வதற்கு முயற்சி செய்கின்ற பொழுது, நமது உள்ளத்தில் இறைவனை வரவேற்க நாம் நம்மை தயாரிக்கின்றோம். ஆக மனமாற்றமே திருவருகைக் காலத்தில் கிறிஸ்தவர்களின் சிறந்த தயாரிப்பு.

 நமது வீடுகளில் நடக்கும் திருமண நிகழ்வுகளுக்கு நாம் மேற்கொள்ளுகின்ற தயாரிப்புகள் ஏராளம். வெறும் மண்ணுலக வாழ்விற்கே நாம் எண்ணற்ற முறையில் தயாரிப்புகளை மேற்கொள்கின்ற போது விண்ணுலக வாழ்விற்கு நம்மை அழைத்துச் செல்லுகின்ற இயேசுவின் வருகைக்கு நாம் எத்தகைய முறையில் தயாரிக்க போகின்றோம்? எனவே, இந்த ஆண்டு நமது கிறிஸ்துமஸ் பெருவிழாவின் தயாரிப்பு வெறும் சமூக மற்றும் உடல் சார்ந்த தயாரிப்பாக அல்லாமல், உள்ளம் மற்றும் ஆன்மீகம் சார்ந்த தயாரிப்பாக அமைய நம்மை கூர்மையாக்குவோம்.

     இறைவன் நம்மை ஆசீர்வதிப்பார்.

ஆடியோவாக கேட்க...

                                 https://youtu.be/1pa9t9PGuPQ  

அன்புடன்,

அருட்பணி. அ. குழந்தை யேசு ராஜன் CMF