விவிலிய விதைகள் - Biblical Seeds - Tamil Sunday Homily - தமிழ் ஞாயிறு மறையுரைகள் - பாஸ்கா 4-ஆம் ஞாயிறு - (ஆண்டு- A) -30-04-2023 - ஞாயிற்றுக்கிழமை

 

🌱விவிலிய விதைகள்🌱

பாஸ்கா காலத்தின் 4-ஆம் ஞாயிறு

தமிழ் திருவழிபாட்டு மறையுரை

(30 ஏப்ரல் 2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: திபணி 2: 14a, 36-41

இரண்டாம் வாசகம்: 1 பேதுரு  2: 20b-25

நற்செய்தி: யோவான் 10: 1-10

நல்ல ஆயனாக வாழ...

                     அமெரிக்காவில் நியூயார்க் மாநிலத்தில் உச்சகட்ட பாதுகாப்பு கொண்ட சிறைதான் 'சிங் சிங்'. கைதிகளாக அங்கிருந்தோர் மிக ஆபத்தான குற்றவாளிகள் என்பதால் இந்தச் சிறைக்கு பொறுப்பேற்க அதிகாரிகள் மிகவும் தயங்கினர். 1921-ம் ஆண்டு இச்சிறைக்குப் பொறுப்பேற்றார் லூயிஸ் லாஸ் என்கிற அதிகாரி. அவர் பொறுப்பேற்றபோது அவரது மனைவி கேத்தரினிடம் பேசியவர்கள் நீங்கள் இந்த சிறைக்குள் அடியெடுத்து வைப்பது ஆபத்து என்று எச்சரித்தனர். “சிறையில் இருக்கும் கைதிகளைப் பாதுகாப்பது எங்கள் இருவரின் கடமை. எனவே எனக்குக் கவலை சிறிதும் இல்லை” என்றார் கேத்தரின். கைதிகளின் குறைகளைப் பொறுமையாகக் கேட்டு பதிவு செய்தார். பார்க்கும் திறன் இழந்த கைதி ஒருவருக்கு ப்ரெய்ல் முறை மூலம் படிக்கக் கற்றுத் தந்தார். பார்வை இருந்தாலும் பேசவும் கேட்கவும் முடியாத கைதி ஒருவன் சொல்ல நினைத்ததைப் புரிந்துகொள்ள சைகை மொழியைக் கற்றுக்கொண்டார். கைதிகளுக்கு வேண்டியதை வாங்கி தந்தார். அவரது கணவர் சிறைக்குப் பொறுப்பேற்ற நாளிலிருந்து 16 ஆண்டுகளில் சிறைக்கைதிகளை தமது பிள்ளைகள்போல் நடத்திய கேத்தரின், 1937ஆம் ஆண்டு அக்டோபர் 31ஆம் நாள் ஒரு விபத்தில் இறந்தார். கேத்தரின் உடலுக்கு இறுதி மரியாதை செலுத்த தங்களை அனுமதிக்க வேண்டும் என்று கைதிகள் கேட்க, சிறைத் துறையிலிருந்து அனுமதி வழங்கப்பட்டது. நூற்றுக்கணக்கான கைதிகள் வரிசையில் ஏறத்தாழ ஒரு மைல் தூரம் நடந்துபோய், வழி மாறிய அந்த ஆடுகளுக்குத் தாயாக இருந்து அன்பு காட்டிய கேத்தரினுக்கு தங்கள் கண்ணீரைக் காணிக்கையாகச் செலுத்திவிட்டு சிறைக்குத் திரும்பினர். கண்காணிக்க யாருமே இல்லாத சூழலிலும் ஒரு கைதிகூட அங்கேயிருந்து தப்ப முயலவில்லை. நம் பொறுப்பில் இருப்போரை, நம்மை நம்பி நம்மைச் சார்ந்திருப்போரை காத்து வழிநடத்தும் நல்ல ஆயர்களாக வாழ அழைப்பு தருகிறது இன்றைய பாஸ்கா காலத்தின் 4-ஆம் ஞாயிற்றுக்கிழமை. இது நல்ல ஆயன் ஞாயிராகவும் கொண்டாடப்படுகிறது.

விவிலியத்தில் ஆயன்-ஆடுகள்:-

               விவிலியத்தில் தொடக்கத்திலிருந்தே ஆயன் மற்றும் ஆடுகளை பற்றி பல பகுதிகளில் வாசிக்கின்றோம். முதல் பெற்றோரின் மகனான ஆபேல் ஆடுகளை மேய்த்தவன் (தொநூ.4:2.) அன்று முதல் இஸ்ராயேல், ஜோர்டான், சிரியா, லெபனான் மற்றும் எகிப்து போன்ற மத்திய கிழக்கு நாட்டு மக்களின் முக்கிய தொழில் ஆடுகளை மேய்த்தலாகவே இருந்தது. அவை அம்மக்களின் சொத்தாகக் கருதப்பட்டன. பழைய ஏற்பாட்டில் ஆயர்கள் என்றவுடன் பலர் நமது நினைவில் வருவார்கள். ஆபிரகாம் எகிப்தைவிட்டு வந்தபொழுது கால்நடைகளை உடையவராய் இருந்தார் (தொநூ.3:1-5). ஈசாக்கும் திரளான ஆட்டு மற்றும் மாட்டு மந்தையை உடையவராய் இருந்தார் (தொநூ.26: 13-14). மோசே மீதியான் நாட்டில் ஆடுகளை மேய்த்துக்கொண்டிருந்தபொழுது அவரை எரிகின்ற முட்செடியில் இறைவன் அழைத்தார் (விப.3:1-10). தாவீது ஆடுகளை மேய்த்துக் கொண்டிருந்தபொழுது சாமுவேலால் அழைக்கப்பட்டு இஸ்ராயேலின் அரசனாக அருட்பொழிவு செய்யப்பட்டார் (1 சாமு.16:1-13). தெக்கோவா என்னும் ஊர் ஆயர்களுக்குள் இருந்த ஆமோஸ் இறைவனுடைய உண்மையான இறைவாக்கினராக கருதப்பட்டார் (ஆமோஸ்1:1).  புதிய ஏற்பாட்டில் இயேசு தன்னையே நல்ல ஆயனாக எடுத்துரைக்கிறார். ஒத்தமை நற்செய்தியாளர்களான மாற்கு, மத்தேயு மற்றும் லுக்கா இயேசுவை உவமைகளை தருபவராக எடுத்துரைக்கிறார்கள். யோவான் நற்செய்தியாளர் இயேசுவினுடைய உவமைகளை எடுத்துரைக்காமல் இயேசுவையே உவமையாக எடுத்துரைக்கிறார். எடுத்துக்காட்டாக ஒத்தமை நற்செய்தி நூல்கள் திராட்சை தோட்ட குத்தகைக்காரர் உவமையை எடுத்துரைக்கின்ற பொழுது, யோவான் நற்செய்தி "உண்மையான திராட்சை செடி நானே" என இயேசுவையே உவமையாக காட்டுகிறது. அதே போலத்தான் ஒத்தமை நற்செய்தி நூல்கள் காணாமல் போன ஆடு பற்றிய உவமையை எடுத்துரைத்து இயேசுவை உவமைகளை தருபவராக சுட்டிக்காட்டுகிறது. ஆனால், இன்றைய நற்செய்தி பகுதி "நல்ல ஆயன்" என்று இயேசுவை உவமையாக காட்டுகிறது.

மூன்று வகையான ஆயர்கள்:-

            விவிலியத்தில் மூன்று வகையான ஆயர்களை பற்றி நாம் வாசிக்கின்றோம்.

1. கூலிக்காக...

         ஆயர்களில் சிலர் வாழ்வாதாரத்துக்காக ஆடுகளை மேய்த்தவர்கள். அந்த வேலைக்குக் கிடைத்த கூலியில்தான் அவர்கள் கவனம் இருந்ததே தவிர, ஆடுகளின் மீது அவர்களுக்கு அக்கறையில்லை. ஆடுகளுக்கு ஓர் ஆபத்து என்றால், ஆடுகளைப் பாதுகாப்பதில் துளியும் அக்கறையின்றி, தங்களைக் காத்துக் கொள்ள ஆடுகளை விட்டுவிட்டு ஓடிவிடுவார்கள். எனவேதான் இயேசு சொன்னார்: “கூலிக்கு மேய்ப்பவர் ஓநாய் வருவதைக் கண்டு, ஆடுகளை விட்டுவிட்டு ஓடிப்போவார். ஓநாய், ஆடுகளைப் பற்றி இழுத்துக்கொண்டு போய் மந்தையைச் சிதறடிக்கும்.”

2. திருடுவதற்காக...

        இரண்டாவதாக ஆயர்களில் சிலர் தீய மனம் கொண்டு வாழ்ந்தனர். இவர்களின் இலக்கு கூலி அல்ல ஆடுகளே இவர்களின் இலக்கு. ஆடுகளைத் திருடி விற்பது அல்லது அவற்றைக் கொன்று, உண்டு ஏப்பம் விடுவது மட்டுமே இவர்களின் குறிக்கோள். எனவேதான் “திருடுவதற்கும் கொல்வதற்கும் அழிப்பதற்கும் அன்றி வேறு எதற்கும் திருடர் வருவதில்லை” என்றார் இயேசு.

3. ஆடுகளுக்காக...

              ஒரு நல்ல ஆயனுக்கு ஆடுகளை நன்கு தெரியும். ஆடுகளுக்காகத் தன் உயிரையே தரும் அளவுக்கு ஆடுகளின்மீது ஆழ்ந்த அன்பும் அக்கறையும் கொண்டவர். இயேசு நம் பாவங்களிலிருந்து நம்மை மீட்க தன்னுயிர் தந்து நமக்கு நல்ல ஆயனாக இருக்கிறார். நற்செய்தி நூல்கள் ஆயனின் சில பண்புகளை எடுத்துரைக்கின்றது.

அ. ஆடுகளை அறிந்திருத்தல்:

        என் ஆடுகளை நான் அறிந்திருக்கிறேன் என்று இயேசு கூறியதன் பொருள் என்ன? கிரேக்கர்கள் அறிதல் எனில் தெரிந்து கொள்ளுதல் என்று அர்த்தம் கொள்வர். ஆனால் யூதர்கள் அதைவிட சிறந்த பொருளைக் கூறுவர். அதாவது தன்னுடைய ஆடுகளிடம் நெருக்கமான உறவைக் கொண்டுள்ளார் என்பதாகும். இது ஆயனின் தனிப்பட்ட உரிமையையும் ஆழமான கவனிப்பையும் காட்டுகிறது. நல்ல ஆயன் தனது ஆடுகள் அனைத்தின் மீதும் சிறந்த ஆர்வம் வைத்துள்ளார்.

ஆ. பெயர் சொல்லி அழைத்தல்:

            நல்ல ஆயர்களுக்கும் போலி ஆயர்களுக்கும் உள்ள வேறுபாடு தமது ஆடுகளை பெயர் சொல்லி அழைக்கும் விதமாகும். ஆயன் ஆடுகளை பெயர் சொல்லி அழைக்கிறார். பெயர் என்பது ஒருவருடைய அடையாளத்தையும் அவருக்கு நாம் தருகின்ற மதிப்பையும் சுட்டிக்காட்டுகிறது. ஆடுகளும் ஆயனின் குரலுக்கு செவி கொடுக்கிறது. பொழுது சாயத் தொடங்கியதும் ஆயன் குரல் கொடுத்து அழைக்க பல திசைகளில் மேய்ந்து கொண்டிருக்கும் ஆடுகள் ஆயனைப் பின்பற்றத் தொடங்கும். அந்த மேய்ப்பன் தனது வாயினால் மெல்லிய ஒலியை எழுப்பி அவைகளைத் தன் கட்டுப்பாட்டுக்குள் வைத்திருப்பான்.

இ. வழிகாட்டுதல்:

                நானே வாயில் என்பது ஆடுகளுக்கு ஆயனே வழிகாட்டி என்பதாகும், ஏனெனில் ஆயன் தன் ஆடுகள் எப்பொழுது ஆட்டுக் கொட்டிலுக்குள் செல்ல வேண்டும், எப்பொழுது ஆட்டுக் கொட்டிலை விட்டு வெளியே வர வேண்டும் என்பதை தீர்மானிக்கின்றார். ஆயன் ஆடுகளுக்கு வழிகாட்டியாக இருக்கின்றார். சரியான வழியை அறிந்தவரும் அந்த வழி என்னவென்று காட்டுபவரும் அந்த வழியில் தானே முன்செல்பவருமே உண்மையில் நல்ல ஆயன். ஆடுகளை வழி நடத்துவதில் இரண்டு வகைகள் உண்டு. ஒன்று ஆடுகளை முன்னே விட்டு ஆயன் பின்னே செல்வது இப்படி செல்லுகின்ற பொழுது சிங்கமோ ஓநாயோ ஆடுகளை தின்ன வந்தால் முதலில் தாக்கப்படுவது ஆடுகள் தான் இதற்கு மாறாக ஆயன் ஆடுகளுக்கு முன் செல்லும் போது முதலில் தாக்கப்படுவது ஆயன் தான். இதனால் ஆடுகள் பாதுகாப்பாகவும் சரியான வழியிலும் செல்லும்.

ஈ. பாதுகாத்தல்:

            மேய்ப்பன் தனது மந்தையின் தொண்ணூற்றொன்பது ஆடுகளின் மேலும் காணாமல் போன ஆட்டுக்காகவும் அக்கறை உடையவராய் இருக்கிறார். தொண்ணூற்றொன்பது ஆடுகளையும் பத்திரமான ஓரிடத்தில் விட்டுவிட்டு காணாமல்போன ஆட்டைத் தேடிச் செல்லுகிறார். தன்னைப் பற்றியோ தனது பாதுகாப்பைப் பற்றியோ கவலைப்படாது காணமல்போன ஆட்டின் தேவையைப்பற்றியே அவர் கவலைப்பட்டார். காணமற்போன ஆடு கிடைத்ததும் அதனை எடுத்துத் தன் தோளின் மேல் போட்டுக்கொண்டு வீடு திரும்பினார். அத்துடன் அவரது மகிழ்ச்சி நிறைவுபெறவில்லை. வீட்டுக்கு வந்து, நண்பர்களையும், அயலாரையும் அழைத்து மகிழ்கிறான். இவ்வாறாக பகலில் ஓநாய்களிடமிருந்தும் இரவில் திருடர்களிடமிருந்தும் ஆடுகளை பாதுகாப்பவனே நல்ல ஆயன்.

உ. தன்னுயிரை கொடுத்தல்: 

            "நல்ல ஆயன் நானே. நல்ல ஆயர் ஆடுகளுக்காகத் தம் உயிரைக் கொடுப்பார்." (யோவான் 10:11) ஆடுகளுக்கு ஒரு வித்தியாசமான பழக்கம் உண்டு. அவை பொதுவாக சமவெளியிலோ மலையுச்சியிலிருந்து தூரமான இடத்திலோ மேயாது. ஆபத்து எங்கேயோ அவ்விடங்களில் ஆடுகள் மேய்ந்து கொண்டிருப்பதை நாம் பல இடங்களில் காணமுடியும். அச்சூழல்களில் எல்லாம் ஆடுகளை பாதுகாக்க தன்னுயிரை கொடுக்க முன் வருபவனே நல்ல ஆயன். இன்றைய இரண்டாம் வாசகமும் "சிலுவையின் மீது தம் உடலில் நம் பாவங்களை அவரே சுமந்தார். நம் பாவங்களுக்காக இறந்து நமக்கு மீட்பு தந்தார்." என தன்னுயிர் தந்து நல்ல ஆயனாக இயேசு இருக்கிறார் என்பதை எடுத்துரைக்கிறது.

நல்லஆயனாக வாழ...

        ஆயன் இறைவன் என்றால் ஆடுகளோ மானிடரான நாம்தான். இறைவன் நம்மைப் பாதுகாத்து வழிநடத்துபவர்; நமக்காகத் தன்னுயிரைத் தரும் அளவுக்கு நம்மீது அன்பும் அக்கறையும் கொண்டவர்; நமக்கு முன்னே நடந்து நாளை நாம் எதிர்கொள்ளவிருப்பதை எல்லாம் இன்றே சந்தித்து நமக்கு வழிகாட்டும் நல்லவர்; சிந்தை இழந்து அவரது மந்தையைவிட்டு விலகி, துன்பங்களின் முட்புதரில் நாம் சிக்கிக்கொண்டால் மறவாமல் நம்மைத் தேடிவருபவர். அதனால்தான் திருப்பாடல்களில், ஆண்டவரே என் ஆயர்! எனக்கேதும் குறையில்லை. பசும்புல் வெளிமீது என்னை அவர் இளைப்பாறச் செய்வார். அமைதியான நீர்நிலைகளுக்கு என்னை அழைத்துச் செல்வார். அவர் எனக்குப் புத்துயிர் அளிப்பார்'' (திருப்பாடல்கள் 23: 1-2) என்று கூறப்பட்டுள்ளது. நல்ல ஆயனாம் இயேசு ஆடுகளாகிய நம் ஒவ்வொருவரையும் அறிந்து, பெயர் சொல்லி அழைத்து, பாதுகாத்து, வழிநடத்தி மற்றும் நமக்காக தன்னுயிரை தந்து வாழ்வளித்து கொண்டிருக்கிறார். இன்றைக்கு வெறும் ஆடுகளாக மட்டுமல்லாது, இயேசுவை பின்பற்றி நம்மோடு வாழுகின்ற குடும்பத்தாருக்கும், பிறருக்கும் நல்ல ஆயனாக வாழ அழைப்பு பெறுகின்றோம். இன்றைக்கு எப்பேற்பட்ட ஆயராக நாம் வாழ்கின்றோம்? பணத்திற்கு ஆசைக்கொள்ளும் சுயநல ஆயர்களாக இருக்கிறோமா? அல்லது பிறர் உடமைகளுக்கும் பொருளுக்கும் ஆசைக்கொள்ளும் திருட்டு ஆயர்களாக இருக்கின்றோமா? நல்ல ஆயனாம் இயேசுவின் குணநலன்களை பின்பற்றி வாழ்வில் ஒருவர் மற்றவருக்கு நல்ல ஆயனாக வாழ்வோம். "எந்த குழந்தையும் நல்ல குழந்தை தான் மண்ணில் பிறக்கையிலே அவர் நல்லவர் ஆவதும் தீயவராவதும் அன்னை வளர்ப்பினிலே" - என்னும் பாடல் வரிகளுக்கு ஏற்ப ஒவ்வொரு தாயும் தந்தையும் தங்கள் பிள்ளைகளுக்கு வழிகாட்டும் ஆயன்களே என்பதை புரிந்து கொள்ள வேண்டும். அவர்களை நல்வழியில் வளர்க்கும் நல்ல ஆயர்களாக திகழ வேண்டும். ஆக பெற்றோர்கள், ஆசிரியர்கள், முதலாளிகள், அதிகாரிகள், தலைவர்கள், நீதிபதிகள் எல்லோரும் ஆயர்கள்தான். ஆடுகளின்மீது கொண்ட அக்கறையால் அவர்களைப் பாதுகாக்க அனைத்தும் செய்யும் நல்ல ஆயர்கள் எத்தனை பேர்? "ஆண்டவரது வாயில் இதுவே! இது வழியாய் நீதிமான்களே நுழைவர்." (திருப்பாடல்கள் 118:20) என்னும் இறைவார்த்தையின் அடித்தளத்தில் நல்ல ஆயனின் வழியில் வாழ்ந்து, நாமும் பிறர் நல்வழி நடக்க நல்ல ஆயர்களாக மாறுவோம். இறைவன் நம் ஒவ்வொருவரையும் ஆசீர்வதிப்பார்.

விவிலிய விதைகள் - Biblical Seeds - Tamil Sunday Homily - தமிழ் ஞாயிறு மறையுரைகள் - பாஸ்கா 3-ஆம் ஞாயிறு - (ஆண்டு- A) - 23-04-2023 - ஞாயிற்றுக்கிழமை

 

🌱விவிலிய விதைகள்🌱

பாஸ்கா காலத்தின் 3-ஆம் ஞாயிறு

தமிழ் திருவழிபாட்டு மறையுரை

(23 ஏப்ரல் 2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: திபணி 2: 14, 22-33

இரண்டாம் வாசகம்: 1 பேதுரு  1: 17-21

நற்செய்தி: லூக்கா 24: 13-35

நம்மோடு நடக்கிறார்
நம்மோடு தங்குகிறார்

அந்த விதவைத் தாயின் மகன் சூதாடுகிறான் என்று கேள்விப்பட்டு அவனை கண்டித்தாள். அவனோ தாயின் வார்த்தையை கேட்காமல் தொடர்ந்து சூதாடியபோது போலீசால் பிடிக்கப்பட்டான். அவனோடு கூட பிடிப்பட்ட மற்ற இளைஞர்கள் அபராத தொகையை கட்டி விடுதலையாகி வந்தார்கள். ஆனால் அவனுக்கு விதிக்கப்பட்ட அபராதத்தை கட்ட வழி இல்லாததால் சிறையில் அடைக்கப்பட்டான். தன் வார்த்தைக்கு கீழ்ப்படியாமல் மகன் போனான் என்பதற்காக அந்த தாய் அவனை கைவிட்டு விடவில்லை. மாறாக அவனோடு உடன் பயணிக்க விரும்பி காலை முதல் இரவு வரை கல்லுடைத்து, கொஞ்சம் கொஞ்சமாக பணத்தை சேர்த்து, சில மாதங்களுக்குப் பிறகு அபராத தொகையை கட்டி மகனை விடுவித்தாள். இதையெல்லாம் கேள்விப்பட்ட மகன் திருந்தி புது வாழ்வு பெற்றான். தன் வார்த்தையை கேட்காததால் சிறை சென்றான் என்று அவனது தாய் அவனை கைவிட்டு விடாமல் அவனுடைய துன்பமான சூழலிலும் அவனோடிருக்க கல்லுடைத்து அபராதத்தை கட்டி அவன் வாழ்வை மாற்றினாள். இன்றைக்கு நாமும் ஆண்டவரை விட்டு விலகி துன்பமான ஒரு சூழலிலே பயணித்துக் கொண்டிருந்தாலும் அவர் நம்மை கைவிட்டு விடாமல் நம்மோடு உடன் பயணிக்கிறார், நம்மோடு தங்குகிறார் மற்றும் நம் வாழ்வை மாற்றுகிறார் என்ற ஆழமான இறைச்சிந்தனையை நமக்கு தருகிறது இன்றைய பாஸ்கா காலத்தின் மூன்றாவது ஞாயிற்றுக்கிழமை இறைவார்த்தை வழிபாடு.

இன்றைய நற்செய்தியில் எம்மாவு நோக்கி சென்ற சீடர்கள் உரையாடிக்கொண்டும் வினவிக்கொண்டும் சென்றபோது, இயேசு நெருங்கி வந்து அவர்களோடு நடந்து சென்றார் (லூக்கா 24:15). எருசலேமிலிருந்து ஏழு மைல் தொலைவில் எம்மாவு இருந்தது, இதை சாதாரணமாக இரண்டு மணி நேரத்தில் நடந்து செல்லலாம். ஆக இரண்டு மணி நேரத்திற்கும் மேலாக தன்னை யாரென்று கூட முழுமையாக காட்டிக் கொள்ளாமல் அவர்களின் நிலையை மாற்ற அவர்களோடு உடன் நடந்து மற்றும் அவர்களோடு தங்கி புது வாழ்வை தருகிறார். இயேசு அவர்களுடன் நடந்தபோது மூன்று கேள்விகளை கேட்கிறார். இவை அவர்களின் நிலையை அறிந்து மாற்றம் தந்திட படிக்கற்களாக மாறியது.

1. வழிநெடுகிலும் நீங்கள் ஒருவரோடு ஒருவர் பேசிக்கொண்டிருப்பது என்ன? (லூக்கா 24:17)

எம்மாவு நோக்கி நடந்த இரண்டு சீடர்களின் மனநிலையை அறியவும் மற்றும் அவர்களோடு உரையாடலை துவங்கவும் ஒரு தொடக்கம்தான் இந்த முதல் கேள்வி. இவர்கள் தங்களோடு உடனிருந்த இயேசு பாடுகள் பட்டு சிலுவையில் இறந்ததால் தங்களுடைய வாழ்வை வெறுத்து எல்லாம் முடிந்தது என நினைத்தனர். நம்பிக்கை இழந்து, துன்பம் என்னும் பள்ளத்தில் விழுந்து தனிமையில் மற்றும் முகவாட்டமாய் (லூக்கா 24:17) எம்மாவு நோக்கி நடந்தனர். இயேசுவின் முதல் கேள்வி இந்த சீடர்களின் நிலையை எடுத்துரைக்கிறது. இன்றைக்கு நம்முடைய வாழ்வின் நிலை என்ன? நாமும் இந்த சீடர்களைப் போல நம்பிக்கையிழந்து மற்றும் வாழ்க்கையை வெறுத்தவர்களாக பயணித்துக் கொண்டிருக்கின்றோமா?

2. என்ன நிகழ்ந்தது? (லூக்கா 24:19)

சீடர்கள் துன்பத்திலும் மற்றும் சோகத்திலும் இருப்பதற்கு அடிப்படை காரணம் என்ன என்பதை எடுத்துரைக்கிறது இயேசுவின் இரண்டாவது கேள்வி. இயேசு மிகப்பெரிய ஆசிரியராக, அரசராக மற்றும் மெசியாவாக இருந்து, மீட்பு தந்து, மக்களின் வாழ்க்கை நிலையை மாற்றுவார் என்ற சீடர்களின் எதிர்பார்ப்பு இயேசுவின் மரணத்தில் அழிந்து போய் ஏமாற்றத்தை தந்தது (லூக்கா 24:19-21). தங்களது வாழ்க்கை முழுவதும் இயேசுவோடு உடன் இருக்கலாம் என்று நினைத்தவர்களின் கனவு சரிந்து போய்விட்டது. சீடர்கள் எம்மாவு நோக்கி பயணித்த அதே நாள் காலையில்தான் பெண்களும் தங்களோடு உடன் இருந்தவர்களும் கல்லறை காலியாக இருக்கிறது எனவும், வானத்தூதரையும், உயிர்த்த இயேசுவையும் கண்டதாக சான்று பகர்ந்தார்கள். ஆனால், அவர்கள் அச்செய்தியை முழுமையாக ஏற்று நம்பவில்லை (லூக்கா 24:22-24). எனவே, எருசலேமிலிருந்து எம்மாவு நோக்கி நடந்தார்கள். சீடர்களோடு உடன் நடந்து அவர்களின் நிலையை மட்டுமல்லாமல் அந்நிலையில் அவர்கள் இருப்பதற்கான காரணத்தையும் அறிந்து கொள்கிறார். இன்றைக்கு நம்முடைய வாழ்வின் துன்பமான மற்றும் சோகமான தருணங்களிலும் இயேசு உடன் நடக்கிறார் என்பதை நாம் உணர்கின்றோமா? நம்மோடு அவர் உரையாடுகின்றார் என்பதை உணர்ந்து அவருடைய உரையாடலுக்கு செவி கொடுக்கின்றோமா? நம் வாழ்வை அவரோடு பகிர்ந்து நம்முடைய இந்நிலைக்கு என்ன காரணம் என்பதை புரிந்து கொள்கின்றோமா?

3. மெசியா தாம் மாட்சி அடைவதற்குமுன் இத்துன்பங்களைப் பட வேண்டுமல்லவா! (லூக்கா 24:26)

இச்சீடர்கள் இந்நிலையில் இருப்பது தவறு என்பதை சுட்டிக் காட்ட இயேசு மூன்றாவது கேள்வியை கேட்டு அவர்களுக்கு விளக்குகிறார். இயேசுவின் வாழ்வில் நடந்த அனைத்தும் ஏற்கனவே முன் அறிவித்தவை என்பதையும், அதை அவர்கள் நம்பாமல் இருக்கிறார்கள் என்பதையும் மிகத் தெளிவாக எடுத்துரைக்கிறார் (லூக்கா 24:25-27). இயேசு தன்னுடைய பாடுகளின் மறைபொருளை அவர்களுக்கு விளக்கி நம்பிக்கையையும் புதுவாழ்வையும் தருகிறார். இன்று நம்மோடு உடன் நடக்கும் இயேசு நாம் இந்நிலையில் இருப்பது சரிதானா? என்னும் கேள்வியை நம்மை பார்த்தும் கேட்கிறார். அவர் நம்மை நம்பிக்கையற்ற நிலையில் விட்டு விடுவதில்லை. அவர் விண்ணகம் எழுந்தது அவரது மகிமைக்காக அல்ல, தம்மோடு நம்மை சேர்த்துக் கொள்வதற்காகவே. அன்று சீடர்களோடு நடந்து சென்றது போல, இன்றும் நம்மோடு அவர் நடக்கிறார். எனவே, நம் எதிர்பார்ப்புகள், கனவுகள் மற்றும் நம்பிக்கைகள் சிதறடிக்கப்படும் போது நம்மோடு உடன் நடக்கும் ஆண்டவரை நம் மனக்கண் முன் கொணர்வோம். அவரோடு உரையாடி

புது வாழ்வு பெறுவோம்.

நம்மோடு நடக்கிறார்

இன்றைய நற்செய்தியில் எம்மாவு நோக்கி பயணித்த இரண்டு சீடர்களில் ஒருவர் பெயர் கிளயோப்பா என்று மட்டுமே சொல்லப்பட்டிருக்கிறது. மற்றொரு சீடரின் பெயர் சொல்லப்படவில்லை, இந்த பெயர் சொல்லாத சீடரின் இடத்தில் நம்முடைய பெயரை எழுதுவோம். நாம் வாழ்வை வெறுத்து யாருமே இல்லை என்று தனியாக பயணிக்கின்ற பொழுதெல்லாம் "நான் இருக்கின்றேன், உம்மோடு நடக்கின்றேன்" என்று நம்மை தேடி வருகிறார் உயிர்த்த இயேசு. எம்மாவு சீடர்கள் விரக்தியோடு நடந்து சென்றார்கள், இயேசு அவர்களை தேடி வந்து, உடன் நடந்து, இறைவார்த்தையாலும் நற்கருணையாலும் அவர்களுடைய கண்களைத் திறந்து புது வாழ்வை தந்தார். அதே போல் இன்று கிறிஸ்தவர்களாகிய நம்முடைய வாழ்வின் நிலையை மாற்ற உடன் நடக்கிறார். இறையாட்சியை பறைசாற்றுவதற்காக பல்வேறு ஊர்களுக்கு நடந்தவர், சிலுவையை சுமந்து கல்வாரி மலை நோக்கி நடந்தவர் மற்றும் எம்மாவு சீடர்களோடு உடன் நடந்தவர், இன்று நமக்காக, நம்மோடு நடக்கிறார். நம் வாழ்வும் மாறுபட நடக்கிறார், நம்மோடு நடக்கும் இயேசுவை நம் வாழ்வில் உணர்வோம், புது வாழ்வை பெறுவோம்.

நம்மோடு நம் துன்ப வேளைகளில் உடன் நடந்த இயேசுவைப் போல நாமும் நம்முடைய குடும்பத்தில் உள்ளவர்களின் துன்ப வேளைகளில் அவர்களோடு உடன் நடக்கின்றோமா? என சிந்திப்போம். பெற்றோர்களாகிய நாம் நம்முடைய பிள்ளைகளின் வளர்ச்சியில் குறிப்பாக தேர்வுக்காக, வேலைக்காக மற்றும் வாழ்க்கைக்காக உழைத்துக் கொண்டிருப்பவர்களுடன் நடக்கின்றோமா? இன்னும் நம்முடைய சகோதர சகோதரிகளோடு, நண்பர்களோடு மற்றும் உறவினர்களோடு உடன் நடக்கின்றோமா? இன்னும் குறிப்பாக வயதான நம் பெற்றோர்களோடு மற்றும் முதியவர்களோடு அவர்களது வாழ்க்கையில் பங்கு கொண்டு உடன் நடக்கின்றோமா? சிந்திப்போம்! இயேசு நம் வாழ்வில் உடன் நடப்பது போல, நாமும் பிறரது வாழ்வில் உடன் நடப்போம்.

நம்மோடு தங்குகிறார்

எம்மாவு நோக்கி பயணித்த இந்த இரண்டு சீடர்களும் இயேசுவை தங்களோடு தங்க வேண்டும் என்று கேட்டுக் கொண்டனர். இயேசுவின் பணி வாழ்வின் துவக்கத்தில் இரண்டு சீடர்கள், “ரபி*, நீர் எங்கே தங்கியிருக்கிறீர்?” என்று கேட்டார்கள். அவர் அவர்களிடம், “வந்து பாருங்கள்” என்றார். அவர்களும் சென்று அவர் தங்கியிருந்த இடத்தைப் பார்த்தார்கள். அப்போது ஏறக்குறைய மாலை நான்கு மணி. அன்று அவர்கள் அவரோடு தங்கினார்கள் (யோவான் 1:38-39). அதேபோல இயேசுவின் உயிர்ப்புக்குப் பிறகும் எம்மாவு நோக்கி நடந்த இரண்டு சீடர்களும் இயேசுவோடு தங்கி அவர் யார் என்று முழுமையாக அறிந்து கொண்டார்கள். இதுவரைக்கும் இயேசுவின் வார்த்தைக்கு செவி கொடுத்தவர்கள், அவரோடு உரையாடியவர்கள், தொடர்ந்து அவருடைய பிரசன்னத்தில் வாழ ஆசைப்பட்டு 'எங்களோடு தங்கும்' என்கிறார்கள். இறைவார்த்தைக்கு செவிகொடுத்தவர்கள் இயேசு ஏற்படுத்திய நற்கருணை என்னும் திருவருட்சாதனத்திற்குள் நுழைகிறார்கள். இந்த நற்கருணை பகிர்வு அவர்கள் இயேசுவை முழுமையாக கண்டுணர செய்தது. அவர்களுக்கு புதுவாழ்வும் கிடைக்க செய்தது. இன்றைக்கு கிறிஸ்தவர்களாகிய நாம் ஒவ்வொருவரும் நம்மோடு உடன் பயணிக்கும் இயேசுவை நம்மோடு தங்குவதற்கு அழைக்க தயாராக இருக்கிறோமா? சிந்திப்போம்!

திருச்சபை இன்று உயிர்த்தெழுந்த இயேசுவின் பணியை தொடர்கிறது. இயேசு தன் பாடுகளிலிருந்து மகிமையடைந்தது போல் கிறிஸ்தவ வாழ்வும் துன்ப துயரங்களிலிருந்து நற்கருணை என்னும் இயேசுவின் உடனிருப்பு வழியாய் புதுவாழ்வு பெறுகிறது. நாம் பங்கேற்கும் நற்கருணை என்னும் திருவருட்சாதனம் இயேசுவை நம்மோடு உறவு கொள்ள வைத்து, அவர் நம்மோடு நடக்கின்றார் மற்றும் தங்குகிறார் என்பதை எடுத்துரைக்கின்றது. இதை உணர்ந்து நம்மோடு உடன் நடக்கும் மற்றும் இருக்கும் இயேசுவை நம் வாழ்வாக்குவோம். இறைவன் நம் ஒவ்வொருவரையும் ஆசீர்வதிப்பார்.

விவிலிய விதைகள் - Biblical Seeds - Tamil Sunday Homily - தமிழ் ஞாயிறு மறையுரைகள் - பாஸ்கா 2-ஆம் ஞாயிறு - (ஆண்டு- A) - 16-04-2023 - ஞாயிற்றுக்கிழமை

🌱விவிலிய விதைகள்🌱

பாஸ்கா காலத்தின் 2-ஆம் ஞாயிறு

தமிழ் திருவழிபாட்டு மறையுரை

(16 ஏப்ரல் 2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: திபணி 2: 42-47

இரண்டாம் வாசகம்: 1 பேதுரு 1: 3-9

நற்செய்தி: யோவான் 20: 19-31

இயேசுவின்
அமைதி தரும் புதுவாழ்வு
(பயத்திலிருந்தும் - ஐயத்திலிருந்து)

        ஜெனீவாவில் பக்தியும் கருணையும் குடிகொண்டிருந்த குடும்பமொன்றில் 1828ம் ஆண்டு மே மாதம் 8ம் தேதி ஹென்றி டியூனண்ட் (Henry Dunant) பிறந்தார். தனது பெற்றோரிடமிருந்து கற்ற அனுபவங்கள் காரணமாக சிறுவயதிலிருந்தே சமூக சேவைகளில் ஆர்வமிக்கவராக விளங்கினார். சிறிய வயதிலே பிறர் படும் இன்னல் கண்டு வேதனையுற்றார். சிறைக் கைதிகள் அனுபவிக்கும் கடும் தண்டனைகளுக்காக மனம் நொந்தார். சிறைக் கூடங்களுக்குச் சென்று கைதிகளுக்கு ஆறுதல் கூறி வந்தார். பின்னர் வங்கித் தொழிலில் ஈடுபட்டு வாழ்க்கையில் முன்னேறினார். 1859 ஜுன் 25ல் அவர் வட இத்தாலிக்குச் சென்றபோது அங்கு சோல்பரினோவில் போர் நடைபெற்று கொண்டிருந்தது. ஆஸ்திரிய, பிரான்ஸிய, இத்தாலிய படைகளின் 3 லட்சம் பேர் போரிட்டதன் விளைவாக 40000 பேர் போர்க்களத்தில் குற்றுயிராய்க் கிடந்தனர். இவ்வாறு குற்றுயிராய்க் கிடந்தவர்களிடத்தே எத்தரப்பினரும் அக்கறை காட்டவில்லை. இந்தக் காட்சி ஹென்றி டியூனண்டின் வாழ்க்கையில் புதிய அத்தியாயத்தைத் தோற்றுவித்தது. அப்பகுதி மக்கள் உதவியுடன் காயப்பட்டோருக்கு எத்தகைய பேதங்களுமின்றி சிகிச்சையளித்தார். பகை நிரம்பிய அச்சூழலில் இவரது பணி புரட்சிகரமானதாகவும், மக்கள் மத்தியில் அமைதியை விதைப்பதாகவும் அமைந்தது. பின்பு ஜெனீவா திரும்பிய டியூனண்ட் ''சோல்பரினோ நினைவுகள்' என்ற நூலை எழுதினார். இந்நூலில் அவர் மனித சமுதாயத்திற்கு உதவக்கூடிய அறிவுரைகளை வழங்கினார். இந்நிகழ்வினையடுத்து நாடு நாடாகச் சென்று போர்களப் பணிகள் பற்றிய அவசியத்தை எடுத்துரைத்தார். உலக செஞ்சிலுவை சங்கத்தை உருவாக்கினார். இச்சங்கம் போர்களினாலும் இயற்கை பேரிடர்களாலும் பாதிப்புறும் மக்களுக்கு இன, மத, மொழி பேதமின்றி உதவி செய்வதும் முரண்பாடுகள் மிக்க தரப்பினரிடையே நடுநிலை வகித்து அமைதியை ஏற்படுத்தியும் வருகிறது. போர்க்களத்தில் உதவுவதற்கும், என்றும் மக்கள் மனதில் அமைதியை விதைப்பதற்கும் ஹென்றி டியூனண்டும் அவர் ஏற்படுத்திய செஞ்சிலுவை சங்கமும் காரணமாக இருந்து புதுவாழ்வை அளித்து வருகிறது. அதேபோல் சீடர்கள் மத்தியில் எழுந்த பயத்தையும் ஐயத்தையும் நீக்கி உயிர்த்த இயேசுவின் அமைதி அவர்களுக்கு புதுவாழ்வை தந்தது. இன்றைக்கு அச்சத்திலும் சந்தேகத்திலும் நிறைந்திருக்கும் நம்முடைய உள்ளங்களுக்கும், இல்லங்களுக்கும் மற்றும் சமுதாயத்திற்கும் உயிர்த்த இயேசு தரும் அமைதி புது வாழ்வை தரும் என்னும் மைய சிந்தனையை எடுத்துரைக்கிறது இன்றைய இறைவார்த்தை வழிபாடு.

இரக்கம் தந்த வாழ்வு

                பாஸ்கா காலத்தின் இரண்டாவது ஞாயிற்றுக்கிழமையை தாயாம் திருஅவையானது இரக்கத்தின் ஞாயிறாக கொண்டாடி மகிழ்கின்றது. இன்றைய இரண்டாம் வாசகம் இறைவனின் இரக்கத்தைப் பற்றி எடுத்துரைக்கிறது. (1 பேதுரு 1:3) இன்றைய நற்செய்தியிலும் இயேசு மக்களின் மீது இரக்கம் கொண்டு அவர்களின் பாவங்களை மன்னிக்கின்ற அதிகாரத்தை சீடர்களுக்கு தருகிறார். இந்நாளில் இறைவன் தரும் இரக்கத்தை நாமும் பெற்று பாவம் என்னும் இருளிலிருந்து

புதுவாழ்வை பெறுவோம்.

        இன்றைய நற்செய்தி இயேசுவின் இரண்டு விதமான காட்சிகளை நமக்கு எடுத்துரைக்கிறது. இவ்விரண்டு காட்சிகளும் புது வாழ்வை தருவதாக அமைகிறது. இயேசு தன்னுடைய உயிர்ப்புக்குப் பிறகு முதல் முறையாக சீடர்களுக்கு (அதாவது யூதாஸ் மற்றும் தோமா அல்லாத பத்து பேருக்கு) தோன்றியது அவர்களின் பயத்திலிருந்து புது வாழ்வை கொடுத்தது. இரண்டாவதாக இயேசு தோமா இருக்கும்போது சீடர்களுக்கு காட்சி கொடுத்தது. இது தோமாவின் ஐயத்திலிருந்து நம்பிக்கை என்னும் புது வாழ்வை கொடுத்தது.

1. பயத்திலிருந்து வாழ்வு

                இயேசுவை கைது செய்தது போல நம்மையும் கைது செய்து விடுவார்களோ என்ற அச்சத்தில் பூட்டிய அறைக்குள் சீடர்கள் இருக்கிறார்கள், இயேசு அவர்கள் முன் தோன்றுகிறார். இயேசு தன்னை இரண்டு அடையாளங்கள் மூலமாக சீடர்களிடம் வெளிப்படுத்தி அவர்களின் பயத்திலிருந்து வாழ்வு தருகிறார்.

அ. உங்களுக்கு அமைதி உரித்தாகுக:

        தன்னை வெளிப்படுத்துவதற்காக யூதர்கள் மத்தியில் பொதுவாக வாழ்த்துச் செய்தியாக சொல்லக்கூடிய "உங்களுக்கு அமைதி உரித்தாகுக!" என்னும் வாழ்த்தை இயேசு சீடர்களிடம் எடுத்துரைக்கிறார்.

ஆ. கைகள் மற்றும் விலா:

                இரண்டாவதாக இயேசு தன்னை வெளிப்படுத்துவதற்காக சீடர்களிடம் தம் கைகளையும் விலாவையும் காட்டுகின்றார். இது சீடர்களுக்கு தங்களோடு உடன் வாழ்ந்து சிலுவையில் அறையுண்டு இறந்த இயேசு மீண்டும் அவர்கள் மத்தியில் உடலோடு வந்திருக்கிறார் என்பதை உறுதி செய்வதாக அமைந்தது.

            இயேசுவின் இந்த இரண்டு விதமான வெளிப்பாடுகளால் பயத்திலும் கலக்கத்திலும் இருந்த சீடர்கள் மகிழ்ச்சி கொண்டார்கள். இயேசுவின் காட்சிகளும் வெளிப்பாடுகளாலும் சீடர்கள் பயத்திலிருந்து வெளிவந்து புது வாழ்வை பெற்றார்கள். தொடர்ந்து இயேசு சீடர்களுக்கு பணி வாழ்வு என்னும் புது உலகத்திற்கு அழைப்பு கொடுத்து அவர்களுக்கு தூய ஆவியை தந்து பாவங்களை மன்னிக்கும் அதிகாரத்தையும் தருகிறார்.

2. ஐயத்திலிருந்து வாழ்வு

    தோமா சீடர்களோடு இல்லாமல் தனித்து வெளியே சென்றிருந்ததால் இயேசுவை கானும் வாய்ப்பை இழந்தார். தோமா எதையும் எளிதில் ஏற்றுக் கொள்பவரும் தமக்கு புரியாத ஒன்றை புரிந்தது போல் காட்டிக் கொள்பவரும் அல்ல. நம்பியது போல் நடிக்கவும் தெரிந்தவர் அல்ல. எனவே தன்னோடு மூன்று ஆண்டுகள் உடன் வாழ்ந்த மற்றச் சீடர்கள் அவரிடம், “ஆண்டவரைக் கண்டோம்”என சான்று பகர்ந்ததை ஏற்றுக் கொள்ளவில்லை. தோமா அவர்களிடம், “அவருடைய கைகளில் ஆணிகளால் ஏற்பட்ட தழும்பைப் பார்த்து, அதில் என் விரலை விட்டு, அவர் விலாவில் என் கையை இட்டாலன்றி நான் நம்பமாட்டேன்” என்றார். (யோவான் 20:25) தோமா இயேசுவை ஒரு சாதாரண மனிதனாக அதாவது ஆசிரியராக, இறைவாக்கினராக மட்டுமே பார்த்தார். அவரை ஒரு இறைமகனாக ஏற்றுக் கொள்ளவில்லை. அதனால்தான் ஐயம் அவரை சூழ்ந்தது. தோமாவின் இத்தகைய ஐயத்திலிருந்து புது வாழ்வை தருவதற்கு இயேசு அவர்முன் தோன்றினார். தம் கைகளையும், விலாவையும் காட்டி விரலை அதில் விடுவதற்கு அழைப்பு தந்தார். இங்கு இயேசுவின் பிரசன்னமும், இறைவார்த்தையும் தோமாவின் ஐயத்தை நீக்கி, அவரை "நீரே என் ஆண்டவர்! நீரே என் கடவுள்!" என்று சொல்ல வைத்தது. இயேசுவின் இரண்டாம் காட்சி தோமாவின் ஐயத்திலிருந்து ஆழ்ந்த நம்பிக்கை என்னும் புது வாழ்வை தருகிறது.

அமைதி தந்த வாழ்வு

            இன்றைய நற்செய்தியில் இயேசு சீடர்கள் முன் இரண்டு முறை தோன்றினார். இவ்விரண்டு முறையும் "உங்களுக்கு அமைதி உரித்தாகுக!" என்று கூறினார். அமைதி என்பது ஷாலோம் என்னும் எபிரேய சொல்லின் மொழிபெயர்ப்பாகும். இச்சொல்லின் பொருள் 'யாவும் நலமே அமைக' என்பதாகும். எனவே அமைதியின் முழுப்பொருள் நல வாழ்வாகும். வாழ்வை அதுவும் நிறைவாழ்வைக் கொடுப்பதே உயிர்த்த இயேசு சீடர்களுக்கு தோன்றியதன் காரணமாகும். இத்தகைய நல வாழ்வை கொடுப்பதே சீடத்துவத்தின் பணியாகும் அதற்காகவே தூய ஆவியின் துணையோடு அவர்களை அனுப்புகிறார். நிறை வாழ்வை பெற்றுக்கொள்ள தடையாக இருக்கின்ற பாவங்கள் மன்னிக்கப்பட வேண்டும் என்பதற்காகவே சீடர்களுக்கு பாவங்களை மன்னிக்கின்ற அதிகாரத்தையும் தருகிறார். இயேசு தன்னுடைய பணி வாழ்வில் சீடர்களை இருவர் இருவராக அனுப்பும் போது கூட நீங்கள் எந்த வீட்டிற்கு சென்றாலும் உங்களுக்கு அமைதி உரித்தாகுக என்று கூறுங்கள் எனக் கூறியிருக்கிறார். மேலும், "அமைதியை உங்களுக்கு விட்டுச் செல்கிறேன்; என் அமைதியையே உங்களுக்கு அளிக்கிறேன். நான் உங்களுக்குத் தரும் அமைதி உலகம் தரும் அமைதி போன்றது அல்ல. நீங்கள் உள்ளம் கலங்க வேண்டாம்; மருள வேண்டாம்" (யோவான் 14:27) எனவும் எடுத்துரைத்து இருக்கிறார். இன்றைக்கு கிறிஸ்தவர்களாகிய நம்முடைய வாழ்விலும் உயிர்த்த ஆண்டவரின் அமைதி தேவைப்படுகிறது. நடந்து முடிந்த இறந்த கால நிகழ்வுகளைப் பற்றியும் நடக்கவிருக்கும் எதிர்கால நிகழ்வுகளை பற்றியும் நினைத்து நம்முடைய உள்ளங்கள் பயத்திலும் ஐயத்திலும் சீடர்களைப் போல அமைதியற்று இருக்கிறது. நம்முடைய குடும்பங்களும் பயம், ஐயம், பொறாமை, சுயநலம், மண்ணாசை, பொருளாசை, ஆணவம், அகங்காரம், சண்டை மற்றும் சச்சரவுகளால் அமைதியற்று இருக்கிறது. நம்முடைய உள்ளங்கள் மற்றும் இல்லங்கள் போல நமது சமுதாயமும் சாதி, மத, இன, மொழி, சமய மற்றும் அரசியல் சூழ்நிலையால் பிளவுப்பட்டு அமைதியற்று இருக்கிறது. இத்தகைய சூழ்நிலைகள் மாற உயிர்த்த ஆண்டவரின் அமைதி நமது வாழ்க்கையாக மாற வேண்டும். இன்றைய முதல் வாசகம் தொடக்க கிறிஸ்தவர்கள் ஒருமித்த உள்ளத்தோடு, ஒற்றுமை உணர்வோடு, பொருளாதார மற்றும் சமூக அளவில் வேறுபாடு காட்டாமல், நட்புறவோடு ஒற்றுமை, அப்பம் பிடுதல் இறை வேண்டல் மற்றும் பகிர்ந்து கொள்ளுதல் போன்ற நற்பண்புகளில் நிலைத்திருந்ததை எடுத்துரைக்கிறது. இதைப் போல இன்று ஆண்டவரின் அமைதியை பெற்று நமது வாழ்வும் ஒருமித்து அமைய வேண்டும். புனித பிரான்சிஸ் அசிசியார் ஜெபித்தது போல "இறைவா என்னை உமது அமைதியின் கருவியாக்கும்" என நாமும் உயிர்த்த இயேசு தரும் அமைதியின் கருவிகளாக மாற நம்மை அர்ப்பணிப்போம்.

விவிலிய விதைகள் - Biblical Seeds - Tamil Sunday Homily - தமிழ் மறையுரைகள் - ஆண்டவரின் இராவுணவு-06-04-2023 - திருப்பாடுகளின் வெள்ளி-07-04-2023 - ஆண்டவருடைய உயிர்ப்பின் பாஸ்கா ஞாயிறு - 09-04-2023

 

மூன்று மறையுரைகள் 

🌱விவிலிய விதைகள்🌱

ஆண்டவரின் இராவுணவு

தமிழ் திருவழிபாட்டு மறையுரை

(06 ஏப்ரல் 2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: விடுதலைப் பயணம் 12: 1-8, 11-14

இரண்டாம் வாசகம்:  1 கொரிந்தியர் 11: 23-26

நற்செய்தி: யோவான் 13: 1-15

           "இதை என் நினைவாகச் செய்யுங்கள்” - (மத் 22:19)

         நினைவாக... வாழ்வாக... 

ஒரு ஊரில் ஒரு தாயும் ஒரு மகனும் இருந்தார்கள். அந்த மகனுக்குத் திடீரென்று வெளிநாட்டில் வேலை கிடைக்க அவன் புறப்பட்டுப் போய்விட்டான். ஒவ்வொரு மாதமும் அவன் தன் தாய்க்கு ஒரு கடிதம் அனுப்புவான். தான் கண்ட இடங்களையும், ரசித்த நிகழ்வுகளையும் நினைவாக புகைப்படமாகவும், கடிதமாகவும் அனுப்புவான். அப்படி அனுப்பும் ஒவ்வொரு முறையும் அக்கடிதத்தோடு தன் சம்பளப்பணத்தையும் வைத்து அனுப்புவான். இந்தத் தாயும் கடிதம் வந்தவுடன் தான் படித்ததோடு மட்டுமல்லாமல் அதைத் தன்னைச் சுற்றியிருப்பவர்களிடமும் காட்டி மகிழ்வாள். ஐந்து வருடங்கள் வேலை முடித்து வீட்டிற்கு வருகின்றான் மகன். தன் இல்லம் சென்றவுடன் அவனுக்கு அதிர்ச்சி. தான் அனுப்பிய புகைப்படங்கள் அனைத்தையும் தன் இல்லம் முழுவதும் தன் தாய் ஒட்டி வைத்திருக்கக் காண்கிறான். அந்தப் புகைப்படங்களோடு அவன் அனுப்பிய பணக்காகிதங்களையும் அந்தத் தாய் சுவரில் ஒட்டி வைத்திருக்கின்றார். அவன் அம்மாவிடம், ‘இது படம் அல்ல அம்மா. நான் அனுப்பிய பணம்’ என்கிறான். ‘என்னது பணமா? நான் இதுவும் ஏதோ படம் என்றல்லவா நினைத்தேன்’ என்கிறார் தாய்.' ஆம் இயேசு நமக்குத் தந்த நற்கருணையையும் மற்றும் குருத்துவத்தையும் அவர் நினைவாக ஏற்றுக் கொண்ட நாம் அவற்றின் மதிப்பையும், மகத்துவத்தையும் மற்றும் மாண்பையும் அந்த தாயைப்போல உணர்வதே கிடையாது. இன்றைய பெரிய வியாழன் இந்த திருவருட்சாதனங்களை இறைவனின் நினைவாக மட்டுமல்லாது, அவற்றில் அவரின் பிரசன்னம் நிறைந்திருக்கின்றது என்பதையும், அவற்றின் உள்ளார்ந்த அர்த்தங்களையும் புரிந்து ஏற்றுக் கொள்ள அழைப்பு தருகிறது.

திருஅவையின் வரலாற்றில் இன்று மிகவும் சிறப்புமிக்க நாள். ஏனென்றால், இந்த நாளில்தான் ஆண்டவர் இயேசு குருத்துவத்தையும் நற்கருணையையும் ஏற்படுத்தினார். ஆக இன்று நற்கருணை மற்றும் குருத்துவம் என்னும் இரண்டு திருவருட்சாதனங்களின் பிறப்பு விழாவை கொண்டாடுகின்றோம். இந்த நாளில்தான் இயேசு தன்னுடைய சீடர்களின் பாதங்களைக் கழுவி அன்பு கட்டளையை தந்தருளினார். ஆதலால்தான், பெரிய வியாழன் ஒரு வரலாற்றுச் சிறப்பு மிக்க நாளாக கருதப்படுகிறது.

1. நற்கருணை

அ. பலியான உணவு

நற்கருணையில் இயேசு தன்னுடைய உடலையும், இரத்தத்தையும் நமக்கு உணவாகத் தருகின்றார். பழைய ஏற்பாட்டுக் காலத்தில் யூதர்கள் கொண்டாடிய பாஸ்கா விழாவில் ஓர் ஆடானது பலியிடப்பட்டு, அது வீட்டிலுள்ள எல்லோராலும் உண்ணப்பட்டது. ஆனால் இயேசு கொண்டாடிய புதிய பாஸ்கா விழாவில் ஆட்டிற்குப் பதிலாக இயேசு தன்னுடைய உடலையும், இரத்தத்தையும் நமக்கு உணவாகத் தருகின்றார். ஆக இது தன்னை பலியாக்கி தந்த உணவு‌.

ஆ. வாழ்வு தரும் உணவு

மனிதனால் மனிதனுக்கு வாழ்வு தருகின்ற உணவை தர இயலாது, அது இறைவனால் மட்டுமே முடியும். பாலைவனத்தில் இஸ்ராயேல் மக்கள் பசியால் தவித்த போது மோசே அவர்களுக்கு மன்னாவை தரவில்லை மாறாக இறைவன்தான் தந்தார். இறைவன் தரும் இந்த உணவு உடலுக்கானதல்ல மாறாக நம்முடைய உள்ளத்திற்கானது அதாவது ஆன்மாவை வலுப்பெற செய்வது. இது வாழ்வு தரும் உணவு (யோவான் 6:51).

இ. கிறிஸ்துவில் ஒன்றினைக்கும் உணவு

இன்றைய இரண்டாம் வாசகத்தில் திருத்தூதர் பவுல் கொரிந்திய கிறிஸ்தவர்களின் நற்கருணை கொண்டாட்டத்தில் இடம் பெற்றிருந்த குறைகளை தவிர்க்க வலியுறுத்தும் வகையில் இயேசு தான் துன்புறுவதற்கு முந்தின நாள் நற்கருணையை ஏற்படுத்திய நிகழ்வை எடுத்துரைக்கின்றார். நாம் அனைவரும் இயேசுவின் உடல் என்றும், பிளவுகளையும் பிரிவினைகளையும் அகற்றி ஒரே மனதோடும் நோக்கத்தோடும் வாழ்வது அவசியம் என்றும் எடுத்துரைக்கிறார். ஆக இது கிறிஸ்துவில் நம்மை ஒன்றினைக்கின்ற உணவு.

ஈ. அன்பின் நினைவான உணவு

ஷாஜகான் மும்தாஜ் மீது கொண்ட அன்பின் நினைவுதான் தாஜ்மஹால். அதுபோல் இறைவன் நம்மீது கொண்ட எல்லையற்ற அன்பின் நினைவுதான் நற்கருணை. தன்னை அன்பின் அடையாளமாய் விட்டுச் சென்றவர் அவ்வன்பை ஒருவர் மற்றவரோடு பகிர அன்பு கட்டளையை தருகிறார். அன்பு கட்டளை ஏற்கனவே விவிலியத்தில் இடம் பெற்றுள்ளது (லேவியர் 19:18). எனவே வார்த்தை அளவில் இது புதிய கட்டளை அல்ல எனினும் இதன் பொருள், ஆழம் புதிது. அன்பு செலுத்தப்பட வேண்டிய மற்றவர் தம் உறவினரோ, இனத்தாரோ, சமயத்தாரோ அல்ல மாறாக தேவையில் உழல்வோரே அதுபோன்று இயேசு போதிக்கும் அன்பு சொல்லிலும், உணர்விலும் வெளிப்படும் ஒன்று அல்ல, அது செயலில், தியாகத்தில் தம் உயிரையே கையளிக்கும் நிலையில் வெளிப்படுவது. இவ்வாறு இயேசுவின் அன்பு கட்டளை அன்பு செய்யப்பட வேண்டியவரை பொறுத்தவரையிலும் அன்பு செய்யும் தன்மையை பொருத்தவரையிலும் முற்றிலும் புதிதாக அமைகிறது. எனவே இறைவனிடமிருந்து அன்பைப் பெறுகின்ற நாம் அதை ஒருவர் மற்றவருக்குக் கொடுப்பதே அன்புக் கட்டளையின் நோக்கம்.

`நற்கருணை என்பது கிறிஸ்தவ வாழ்வின் ஊற்றும் உச்சமும்’ என்றும் “திருச்சபை, தனது வாழ்வை நற்கருணையிலிருந்து பெறுகிறது” என்றும் இரண்டாம் வத்திக்கான் சங்கம் (LG 11) எடுத்துரைக்கின்றது. கிறிஸ்தவர்களாகிய நாம் நம்முடைய வாழ்வுக்கான எல்லா ஆசியையும் அருளையும் நற்கருணையிலிருந்தே பெறுகின்றோம். அன்று முதல் கிறிஸ்தவர்கள் ஆலயத்தில் 'அப்பம் பிட்டனர்', அதாவது, நற்கருணை விருந்தில் பங்கேற்றனர் (திப 2:46), அதே நேரத்தில் வீடுகளிலும் அப்பத்தைப் பிட்டு, மனமகிழ்வோடும் கபடற்ற உள்ளத்தோடும் பகிர்ந்து கொண்டனர். எனவே நற்கருணை நம் வாழ்வின் அங்கம் என உணர்ந்து அப்பிரசன்னத்தை நம் உள்ளங்களிலும் இல்லங்களிலும் ஏற்றுவோம். கிறிஸ்தவம் உள்ளே நுழைவதற்கு மிகவும் சவாலாக இருந்த நாடுகளில் ஒன்றான சீனாவில், நற்கருணை விருந்து எப்படி கொண்டாடப்பட்டது என்பதற்கான ஒரு வரலாற்றுச் செய்தி உண்டு. அங்கு மறைபோதகராகப் பணியாற்றிய குருவானவர் ஒருவர் ஒரு கடைக்காரரைப்போல வேடமணிந்துகொண்டு இருப்பார். அங்கு வரும் கிறிஸ்தவர்களை, அவர்கள் வெளிப்படுத்தும் ஒருவிதமான சைகைகளைக் கொண்டு, இவர்கள் கிறிஸ்தவர்கள்தான் என்று அறிந்துகொண்டு, அவர்களுக்கு ஒரு சோப்புக் கட்டியை தருவார். அதில் நற்கருணை இருக்கும். அதை பெற்றுக் கொள்ளும் கிறிஸ்தவர்கள், தங்களுடைய இல்லங்களுக்குச் சென்று, இறைவேண்டல் செய்துவிட்டு, நற்கருணையை உண்பார்கள். இவ்வாறு அவர்கள் நற்கருணையை உண்டு ஆண்டவர் இயேசுவுக்கு சான்று பகர்ந்து வந்தார்கள். இன்று நாம் எப்படி நற்கருணையை ஏற்றுக் கொள்கின்றோம்? நற்கருணையை வெறுமனே ஒரு சடங்காக, வழிபாட்டுக் கொண்டாட்டமாக மட்டும் பார்க்காமல், அது நம்முடைய வாழ்வுக்கான அடையாளம் என்பதைப் புரிந்துகொள்ள வேண்டும். ஏனென்றால், ஆண்டவர் இயேசு தன்னுடைய உடலையும் இரத்தத்தையும் மானுட மீட்புக்காகத் தந்தார். அவர் எப்படி மானுட மீட்புக்காக தன்னையே தியாகமாகத் தந்தாரோ, அதேபோல நாம் ஒவ்வொருவரும் நம்மையும், நம்மிடம் இருப்பதையும் தியாகமாகத் தர வேண்டும். அதைத்தான் நற்கருணை நமக்கு நினைவூட்டுகிறது.

2. குருத்துவம்

‘இதை என் நினைவாகச் செய்யுங்கள்!’ என சீடர்களின் பாதங்களை கழுவி மற்றும் அப்பம் பிட்டு இயேசு குருத்துவத்தை ஏற்படுத்துகிறார். பாதம் கழுவும் வழக்கம் தொடக்கத்திலிருந்தே பாலஸ்தீன நாட்டில் நிலவி வந்தது. விருந்துகளுக்கு முன் அழைக்கப்பட்ட விருந்தினரின் காலடிகளை கழுவுவது பழக்கமாக இருந்தது. பழைய ஏற்பாட்டில் தொடக்க நூல் 18 :4 தன்னை காண வந்த மூன்று மனிதருக்கு ஆபிரகாம் காலடிகளை கழுவ தண்ணீர் கொண்டு வந்ததை வாசிக்கிறோம். புதிய ஏற்பாட்டில் லூக்கா 7: 44 இயேசு சீமோனை பார்த்து "நான் உம் வீட்டிற்கு வந்த போது நீர் என் பாதங்களை கழுவ தண்ணீர் தரவில்லை. இவரோ தம் கண்ணீரால் என் காலடிகளை நனைத்து அவற்றை தம் கூந்தலால் துடைத்தார்" என்கிறார். இவ்வாறு வீட்டிற்கு விருந்தாளிகள் வருகின்ற போது காலடிகளை கழுவும் செயல் இருந்தது.

அ. அன்பின் அழைப்பு

பாதங்களைக் கழுவுவதை எல்லாராலும் செய்ய முடியாது. அது உள்ளத்தில் உண்மையான அன்பு வைத்திருப்பவர்களால் மட்டுமே செய்ய முடியும். இயேசு சீடர்கள் மீதும், நம் மீதும் உண்மையான அன்பு கொண்டிருந்தார். அதனாலேயே சீடர்களின் பாதங்களைக் கழுவினார். நாமும் நம்மோடு வாழக்கூடிய சகோதர, சகோதரிகளிடத்தில் அன்புகொண்டு வாழ்வோம்.

ஆ. பணிவின் அழைப்பு

“ஆண்டவரும், போதகருமான நான் உங்கள் பாதங்களைக் கழுவுகிறேன் என்றால், நீங்களும் ஒருவர் மற்றவரது காலடிகளைக் கழுவக் கடமைப்பட்டிருக்கிறீர்கள்” என்று தன் முன்மாதிரியைப் பின்பற்ற சீடர்களை அழைக்கின்றார் இயேசு. ஏனெனில் அவர்கள் தங்களில் யார் பெரியவர் என வாதாடினார். நாம் ஒரு மிகப் பெரிய குருவை பின்பற்றுபவர்கள் அல்ல. மாறாக, ஒரு பணியாளனை பின்பற்றுபவர்கள் என்பதை உணர்ந்து கொள்ள சீடர்கள் அழைக்க பெறுகிறார்கள். அதாவது, நாம் ஒவ்வொருவருமே பிறருக்குப் பணிவோடு பணிவிடை செய்து வாழவேண்டும் என்றதொரு அழைப்பினத் தருகின்றார். இன்றைக்கு கிறிஸ்தவர்களாகிய நாம் ஒருவர் மற்றவருக்குப் பணிவோடு பணிவிடை செய்யும் மக்களாக இருக்கின்றோமா? என்று சிந்தித்துப் பார்க்கவேண்டும்.

சகோதர சகோதரிகளே! இன்றைய நாளில் 'இதை என் நினைவாக செய்யுங்கள்!' என்று இயேசு ஏற்படுத்திய நற்கருணையும் குருத்துவமும் வெறும் நம் நினைவில் மட்டுமல்லாது நம் வாழ்விலும் ஏற்றுக் கொள்ள அழைப்பு பெறுகின்றோம். இயேசுவின் அன்பு பரிசாம் நற்கருணையை நம் வாழ்நாளெல்லாம் ஏற்று அவ்வன்பை பிறருக்கும் தருவோம். நம் திருமுழுக்கின் வழியாக கிறிஸ்துவின் பொதுக்குருத்துவத்தில் இணைந்திருக்கின்ற நாம் இயேசுவின் பணி குருத்துவம் காட்டும் அன்பு வழியிலும், பணிவிடை செய்யும் பணிவு வாழ்விலும் நாளும் வளர்வோம். இறைவன் நம் ஒவ்வொருவரையும் ஆசிர்வதிப்பார்.

 🌱விவிலிய விதைகள்🌱

திருப்பாடுகளின் வெள்ளி

தமிழ் திருவழிபாட்டு மறையுரை

(07 ஏப்ரல் 2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: எசாயா 52: 13- 53: 12

இரண்டாம் வாசகம்: எபிரேயர் 4: 14-16; 5: 7-9

நற்செய்தி: யோவான் 18: 1- 19: 42

கிறிஸ்தவமும் கிறிஸ்துவின் துன்பமும்

                          உலகத்தை மீட்க பிறந்த இயேசுவின் மாபெரும் அன்பு வெளிப்படுத்தப்பட்ட நாள்தான் பெரிய வெள்ளி. ஆபிரகாம் லிங்கன், முகமது, வில்லியம் ஷேக்ஸ்பியர், நெப்போலியன், நாசரேத்து இயேசு என வரலாற்றில் தடம் பதித்த பலரின் வாழ்வை பற்றி மேற்கொண்ட ஆய்வில் மிக முக்கியமான அம்சங்களில் ஒன்றாக குறிப்பிடப்பட்டது இயேசுவும் அவருடைய மரணமும்தான். எனவே இன்று, உலக வரலாற்றில் மிக முக்கியமான நபரின் வாழ்க்கையில் நடந்த மிக முக்கியமான நிகழ்வு இயேசுவின் சிலுவை மரணம். அதுவே கிறிஸ்தவத்தின் அடித்தளமாக மாறியிருக்கிறது. மூன்று கேள்விகளைக் கேட்டு இயேசுவின் பாடுகளை பற்றி சிந்திப்போம். 1) எப்படி இயேசு துன்பப்பட்டார்? 2) ஏன் இயேசு துன்பப்பட்டார்? மற்றும் 3) இயேசுவின் துன்பம் நமக்கு சொல்லும் அர்த்தம் என்ன ?

1) எப்படி இயேசு துன்பப்பட்டார்?

              மாற்கு நற்செய்தியாளர் மூன்று விதமான இயேசுவின் பாடுகளை எடுத்துரைக்கிறார். இயேசுவின் உடல் சார்ந்த பாடுகள், உணர்வு சார்ந்த பாடுகள் மற்றும் ஆன்மிக சார்ந்த பாடுகள்.

அ. உடல் சார்ந்த பாடுகள்

          இயேசுவின் உடல் சார்ந்த பாடுகளை சற்று நம் உள்ளங்களில் தியானித்துப் பார்ப்போம். ஒரு தூணில் கைகள் கட்டியப்படி தோலை உறித்தெடுக்கும் கசையடி இயேசுவுக்கு கொடுக்கப்பட்டது. அதில் பொதுவாக செம்மறி எலும்பின் துண்டுகள் மற்றும் கூர்மையான உலோகத் துண்டுகள் பதிக்கப்பட்டிருக்குமாம். இது இன்னும் மிகுந்த வேதனையை தந்து, உடலின் தசைகளை வெளியேற்றி பெரும் காயத்தை இயேசுவுக்கு உண்டாக்கியிருக்கும். இது இயேசுவின் உடலில் எண்ணற்ற இரத்தத்தை வெளிவர செய்து, அவரை பலவீனமாக்கியிருக்கும். இந்தச் சூழ்நிலையில் இயேசுவை ஆளுநரின் மாளிகைக்கு இழுத்துச் சென்றார்கள். அங்கு 'அவர்கள் ஒரு முள்முடி பின்னி அவரது தலையின்மேல் வைத்தனர், அதனால் இரத்தம் வழிந்தது. இயேசுவுடன் சிலுவையில் அறையப்பட்ட கள்வர்களுக்கு முள்முடி சூட்டப்படவில்லை. அதற்கு முன்பாகவும் பின்பாகவும் உரோமையர்கள் பலரை சிலுவையில் அறைந்து கொன்ற போது கூட ஒருவருக்கு கூட முள்முடி வைக்கப்படவில்லை. முள்முடி சூட்டப்பட்டவராய் சிலுவையில் அறையப்பட்டவர் இயேசு கிறிஸ்து மட்டுமே. இஸ்ரயேலில் ஏறக்குறைய 24 வகையான முட்கள் இருந்ததாக குறிப்பிடப்படுகிறது. அதில் மிகவும் கூர்மையான விஷம் நிறைந்த ஒரு வகை முள்ளைத்தான் இயேசுவின் தலையில் வைத்தார்கள். விஷம் நிறைந்த கொடிய முட்கள் அவர் தலையில் ஆழமாய் இறங்கியது. இதே வலியோடும் காயங்களோடும் இயேசு நிலை குலைந்து இருக்கின்ற போது அவர் மீது பாரமான சிலுவை வைக்கப்படுகிறது. அச்சிலுவையை சுமப்பது மட்டுமல்லாது, அதை சுமந்து கொண்டு கல்வாரி மலையை நோக்கி நடக்க வேண்டும், அதில் எண்ணற்ற கசையடிகள், பாரம் தாங்க முடியாமல் வழியில் விழுந்த நிலைகள் என எல்லா துன்பத்தையும் ஏற்று கல்வாரி மலையை அடைகிறார். பொதுவாக சிலுவையில் அறையப்பட்டவரின் மரணத்திற்கான காரணம் மூச்சுத்திணறல் என்கிறார்கள். சிலுவையில் அறையப்பட்டவரின் முழு எடையும் அவரின் மணிக்கட்டில் தொங்குவதால், அவரால் சரியாக மூச்சை வெளியேற்ற முடியாது. அப்படியெனில் இயேசுவின் ஒவ்வொரு மூச்சும் பெரும் வேதனையை அவருக்கு தந்திருக்க வேண்டும். இவை அனைத்திற்கும் மேலாக அவருடைய கரங்களிலும் பாதத்திலும் பதிந்த ஆணிகள் அத்துயரத்தோடு சிலுவையில் தொங்கிய அந்த கடைசி நிமிட வேதனை என இயேசு எண்ணற்ற உடல் சார்ந்த துன்பங்களை அதாவது பாடுகளை அனுபவித்தார்.

ஆ. உணர்வு சார்ந்த பாடுகள்

                            இயேசு கைது செய்யப்பட்ட பிறகு, அதிகாலையில், யூத மதத் தலைவர்களின் உயர் சபையில் பிலாத்துவிடம் கொண்டு வரப்பட்டார், அவர் கடவுளின் மகன் என்றும் தன்னை ஒரு அரசராக அறிவித்தார் என்றும் விசாரிக்கப்படுகிறார். விசாரணையின் போது, இயேசு குற்றமற்றவர் என்பது பிலாத்துவுக்குத் தெளிவாகிறது (15:14), இருப்பினும், பிலாத்து கூட்டத்தின் விருப்பத்திற்கு ஏற்ப, இயேசுவை சிலுவையில் அறையப்பட மரண தண்டனை விதிக்கிறார். குற்றம் செய்தவரைப் பிடித்து விசாரிப்பது நியாயம். ஒருவரை பிடித்து வைத்துக்கொண்டு குற்றம் தேடியது மிகவும் அநியாயம் (யோவான் 11 : 50, மாற்கு 14 : 1, 55). பொய் சாட்சிகளை உண்டாக்கினார்கள் (மத்தேயு 26 : 60, 61). குற்றவாளியின் சொற்களை அவர்கள் யாரும் கவனிக்கவில்லை (லூக்கா 22 : 67 — 71). ஆலோசனை சங்கமானது இரவில் சட்டப்படி கூட்டப்படக்கூடாது. எனவே அதுவும் தவறு (மத்தேயு 26 : 63 66). ஆலோசனை சங்கம் கூடிய இடம் வீடு. இது முறைப்படி தேவாலயத்துடன் இணைந்திருக்கும் நீதிமன்ற அறையில் கூடித்தான் தீர்ப்பிட வேண்டும். இதுவும் அவர்கள் செய்தது தவறு (லூக்கா 22 : 54). இவ்வாறு இயேசுவுக்கு நிகழ்ந்த நியாமற்ற விசாரணையும், அநியாய தீர்ப்பும், இயேசு கற்பித்த, குணப்படுத்திய, உணவளித்து, காப்பாற்றிய மக்கள் கூட்டம் அவரை மரணத்திற்கு அனுப்பியதும் அவரின் உள்ள மற்றும் உணர்வு சார்ந்த பாடுகளாகும். மேலும் "தாவீதின் மகனுக்கு ஓசன்னா! ஆண்டவர் பெயரால் வருகிறவர் போற்றப்பெறுக! உன்னதத்தில் ஓசன்னா!" என்று ஆர்ப்பரித்து பாடிய மக்கள் (மத் 21:9), பிலாத்திடம் "சிலுவையில் அறையும்! சிலுவையில் அறையும்!" என்று கூறியதும் (மத் 27:22). மேலும் தன் நண்பர்களாக கருதிய சீடர்களுள் யூதாஸ் பணத்திற்காக முத்தமிட்டு காட்டிக் கொடுத்ததும் (மத் 27:48), பேதுரு மூன்று முறை அவரை மறுதலித்ததும் (மத் 26:70) அவரின் உணர்வு சார்ந்த பாடுகளே ஆகும். 'அவர்கள் ஒரு முள்முடி பின்னி அவரது தலையின்மேல் வைத்து, அவருடைய வலக்கையில் ஒரு கோலைக் கொடுத்து அவர்முன் முழந்தாள்படியிட்டு, “யூதரின் அரசரே, வாழ்க!” என்று சொல்லி ஏளனம் செய்ததும் (மத்தேயு 27:29), சிலுவையில் இயேசுவின் இருபுறமும் தண்டனை விதிக்கப்பட்ட குற்றவாளிகளில் கூட ஒருவன் இயேசுவை ஏளனப்படுத்தியதும், அவரை சூழ்ந்து இருந்த படைவீரர்கள் அவரை எள்ளி நகையாடியதும், அவருடைய சீடர்கள் அவர் அருகே இல்லாமல் இருந்ததும் இயேசுவின் உள்ள மற்றும் உணர்வு சார்ந்த பாடுகளே ஆகும்.

இ. ஆன்மீகம் சார்ந்த பாடுகள்

                      இயேசுவின் தலைமீது முள்முடி சூட்டப்படுகிறது. முட்கள் சாபத்தை குறிப்பிடுகிறது, ஆதாம் பாவம் செய்த போது “உன் மனைவியின் சொல்லைக்கேட்டு, உண்ணக்கூடாது என்று நான் கட்டளையிட்டு விலக்கிய மரத்திலிருந்து நீ உண்டதால் உன் பொருட்டு நிலம் சபிக்கப்பட்டுள்ளது; உன் வாழ்நாளெல்லாம் வருந்தி அதன் பயனை உழைத்து நீ உண்பாய். முட்செடியையும் முட்புதரையும் உனக்கு அது முளைப்பிக்கும்" (தொடக்க நூல் 3:17-18). பாவத்தால் சபிக்கப்பட்ட நிலம் விளைவித்த முள் தான் இயேசுவின் தலையில் துன்பமாய் இருக்கிறது. எல்லோரும் இந்த மண்ணுலகில் பிறப்பது வாழ்வதற்காக இயேசு இம்மண்ணுலகில் பிறந்தது இறப்பதற்காக அதாவது இறந்து நம்மை வாழ வைப்பதற்காக. அதனால்தான் கபிரியேல் வானத்தூதர் யோசேப்பிடம் பேசுகின்ற போது, "அவர் ஒரு மகனைப் பெற்றெடுப்பார். அவருக்கு இயேசு எனப் பெயரிடுவீர். ஏனெனில் அவர் தம் மக்களை அவர்களுடைய பாவங்களிலிருந்து மீட்பார்” என்றார். ஆம் நம் பாவங்களிலிருந்து நம்மை மீட்டு வாழ்வு தர இயேசு சுமந்த சிலுவையும் அதனால் எழுந்த எல்லா துன்பமும் அவருக்கு ஆன்மீக துன்பங்களே ஆகும்.

2) ஏன் இயேசு துன்பப்பட்டார்?

அ. இறைத்திட்டத்திற்காய்...

இயேசு பாடுகளை ஏற்றதன் வழியாகவும் சிலுவையில் தன் உயிரை தந்ததன் வழியாகவும் அவர் இறைவனுக்கு அதாவது அவருடைய மீட்பு திட்டத்திற்கு தன்னை முழுவதும் அர்ப்பணித்தார் என்பதை எடுத்துரைக்கிறது. இயேசு கெத்செமனி தோட்டத்தில் ஜெபித்துக் கொண்டிருக்கும் போது, “அப்பா, தந்தையே எல்லாம் உம்மால் இயலும். இத்துன்பக் கிண்ணத்தை என்னிடமிருந்து அகற்றும். ஆனாலும் என் விருப்பப்படி அல்ல; உம் விருப்பப்படியே நிகழட்டும்” என்று (மாற்கு 14:36) ஜெபித்ததும், சிலுவையில் தொங்கியபோது “ஏலி, ஏலி லெமா சபக்தானி?” அதாவது, “என் இறைவா, என் இறைவா, ஏன் என்னைக் கைவிட்டீர்?” (மத்தேயு 27:46) என்று மீண்டுமாக இறைவனை பார்த்து எடுத்துரைத்து இறந்ததும் இறைத்திட்டத்திற்கு தன்னை முற்றிலும் கையளித்ததன் அடையாளமாகும்.

ஆ. பாவங்களுக்காய்...

               மனிதர்கள் தாங்கள் செய்த குற்றங்கள் மற்றும் பாவங்களை மன்னிக்கும்படி கடவுளிடம் முறையிட்டு, அதற்காக ஆடு, மாடுகளை பலி கொடுப்பது, உலகம் முழுவதும் கடைப்பிடிக்கப்படும் ஆயிரங்கால நம்பிக்கை. இதே நம்பிக்கையை கொண்டிருந்த யூத மதத்தில் பிறந்தவர்தான் இயேசு கிறிஸ்து... பிரிவினைவாதமும், பிற்போக்குவாதமும் புரையோடிக் கிடந்த யூத மதத்தில், கண்ணுக்குக் கண், பல்லுக்குப் பல் என்ற கடுமையான சட்ட திட்டங்களுக்கு பஞ்சமில்லை. யூதர்களை தவிர மற்ற இனத்தவர்கள் அனைவரும் கீழானவர்கள் என தீண்டாமையை கற்பித்த யூத மதம், கஷ்டங்களுக்கும், நோய்களுக்கும் பாவமே காரணம் என்றும் போதித்தது. ஆனால், எதிரியையும் அன்பு செய், ஒரு கன்னத்தில் அறைந்தால், மறு கன்னத்தை காட்டு என்ற இயேசுவின் அன்பான அணுகுமுறையும், அனைவரும் சமம் என்று அவர் எடுத்துரைத்த போதனையையும் தாண்டி மனித குலத்தை பாவத்திலிருந்து மீட்க தன்னுயிரை தந்தார். இயேசுவின் விலாவிலிருந்து வந்த தண்ணீரும் இரத்தமும் மானிடர்களின் பாவங்களை கழுவும் ஜீவ ஊற்று ஆகும். எனவேதான் "மானிடமகன் தொண்டு ஏற்பதற்கு அல்ல, மாறாகத் தொண்டு ஆற்றுவதற்கும் பலருடைய மீட்புக்கு ஈடாகத் தம் உயிரைக் கொடுப்பதற்கும் வந்தார்” என்று மாற்கு நற்செய்தியாளர் 10:45-ல் எடுத்துரைக்கிறார்.

இ. இறையன்புக்காய்...

                 தொடக்கத்தில் உலகை படைத்து முதல் பெற்றோரிடம் ஒப்படைத்ததும், அதனைத் தொடர்ந்து பல நேரங்களிலே இஸ்ராயேல் மக்கள் ஆண்டவரை விட்டு பிரிந்து சென்ற போதும் இறைவன் தன்னுடைய அன்பின் நிமித்தமாக நீதிதலைவர்களையும், அரசர்களையும் மற்றும் இறைவாக்கினர்களையும் அனுப்பி வழிநடத்தினார். அதே இறைவன்தான் அன்பின் அடையாளமாய் தம்மகனையே மனிதனாக பிறக்க செய்து சிலுவையில் கையளிக்க செய்தார். இதைத்தான் "தம் ஒரே மகன் மீது நம்பிக்கை கொள்ளும் எவரும் அழியாமல் நிலைவாழ்வு பெறும் பொருட்டு அந்த மகனையே அளிக்கும் அளவுக்குக் கடவுள் உலகின்மேல் அன்பு கூர்ந்தார்." (யோவான் 3:16) என்னும் வார்த்தைகளில் இயேசு தன்னுயிரை கையளித்தது இறைவன் இம்மண்ணுலகின் மீது கொண்டிருந்த அன்பின் அடையாளம் என அறிகிறோம்.

3) இயேசுவின் துன்பம் நமக்கு சொல்லும் அர்த்தம் என்ன ?

             சிலுவையின்றி வாழ்வில்லை, சிலுவையே வாழ்வு என்பதை ஆழமாக ஒவ்வொரு கிறிஸ்தவர்களுக்கும் எடுத்துரைக்கிறது இயேசுவின் பாடுகள். இதைத்தான் "நமக்கு நிறைவாழ்வை அளிக்க அவர் தண்டிக்கப்பட்டார்; அவர்தம் காயங்களால் நாம் குணமடைகின்றோம்." (எசாயா 53:5) என ஏசாயா இறைவாக்கினர் முன்னறிவித்தார். நம்முடைய பாவங்களிலிருந்து மீட்பு என்னும் புதுவாழ்வை தந்த இயேசுவின் பாடுகளும் இறப்பும், இன்றும் நம் வாழ்வின் சவால்களையும், துன்பங்களையும் மற்றும் சோதனைகளையும் ஏற்றுக் கொள்ளுகின்ற போது நிறைவான வாழ்வு கிடைக்கும் என்பதன் அடையாளமாக இருக்கிறது. "நானோ நம் ஆண்டவர் இயேசுகிறிஸ்துவின் சிலுவையை அன்றி, வேறு எதைப்பற்றியும் ஒருபோதும் பெருமை பாராட்ட மாட்டேன்." (கலாத்தியர் 6:14) என்னும் பவுலடிகளாரின் வார்த்தைகள் சிலுவையை முற்றிலும் அவர் வாழ்வாக்கியதை எடுத்துரைக்கிறது. நாமும் சிலுவையை வாழ்வாக்குவோம், வாழ்வு பெறுவோம். மேலும் அன்று இயேசுவுக்கு எதிரே நின்றுகொண்டிருந்த நூற்றுவர் தலைவர், அவர் இவ்வாறு உயிர் துறந்ததைக் கண்டு, “இம்மனிதர் உண்மையாகவே இறைமகன்” என்று (மாற்கு 15:39) அவருக்கு சான்று பகர்ந்தார். கிறிஸ்தவர்களாகிய நாம் ஒவ்வொருவரும் இன்றைக்கு நமக்காக மரித்த இயேசுவுக்கு சான்று பகரக்கூடிய ஒரு வாழ்வை வாழ்வதற்கு அழைக்கப் பெறுகின்றோம். இறைவன் நம் ஒவ்வொருவரையும் ஆசீர்வதிப்பார்.

🌱விவிலிய விதைகள்🌱

ஆண்டவருடைய உயிர்ப்பின் பாஸ்கா ஞாயிறு

தமிழ் திருவழிபாட்டு மறையுரை

(09 ஏப்ரல் 2023, ஞாயிறு)

வழங்குபவர் 

Fr. அ. குழந்தை யேசு ராஜன் CMF

தாம்பரம், சென்னை

முதல் வாசகம்: திருத்தூதர் பணிகள் 10: 34a, 37-43

இரண்டாம் வாசகம்: கொலோசையர் 3: 1-4

நற்செய்தி: யோவான் 20: 1-9 

இயேசுவின் உயிர்ப்பு காட்டும் வெளிப்பாடுகள்

"உயிர்த்தார் கிறிஸ்து உயிர்த்தார்,

இந்த உலகையே உயிர்த்து விட்டார்,

வென்றார் கிறிஸ்து வென்றார்,

இந்த அகிலத்தை வென்று விட்டார்,

ஆர்ப்பரிப்போமே... அல்லேலூயா,

ஆனந்திப்போமே... அல்லேலூயா,

அல்லேலூயா பாடுவோம்"

 

              எனும் பாடல் வரிகளுக்கேற்ப ஆண்டவர் இயேசு கிறிஸ்துவினுடைய உயிர்ப்பு பெருவிழா நம் ஒவ்வொருவருக்கும் ஆர்ப்பரிப்பையும், ஆனந்தத்தையும் வழங்கக் கூடிய  விழா. இது நாம் பயணித்த தவக்காலத்தின் உச்சகட்ட விழா. இதை திருத்தந்தை முதலாம் சிங்கராயர் திருச்சபையின் எல்லா விழாக்களிலும் மேலான பெருவிழா என்று  குறிப்பிடுகின்றார். கிறிஸ்தவர்களுக்கு இது மிகப்பெரிய விழா.  இது பாஸ்கா விழா, யூதர்களின் பாரம்பரிய விழா பழைய ஏற்பாட்டில் இஸ்ரயேல் மக்கள் கொண்டாடிய  விழா, அடிமைத்தனத்திலிருந்து விடுதலை வாழ்வுக்கு கடந்து வந்த ஒரு விழா. புதிய ஏற்பாட்டில் இயேசு இறப்பிலிருந்து உயிர்ப்புக்கு கடந்து வந்த விழா. நம்முடைய பாவங்களிலிருந்து நமக்கு மீட்பை தந்த விழா. வரலாற்றில் சாவை வென்ற ஒரு மனிதர் என்றால் அது இறைமகன் இயேசு கிறிஸ்து தான், ஆக இது வரலாற்றை ஊடுருவி உலுக்கிய ஒரு விழா.  வரலாற்றில் சாவை வென்ற ஒரே ஒரு மனிதர் என்றால் அது இயேசு கிறிஸ்து தான்.  இந்த உலகத்தில் பல தலைவர்கள், அரசர்கள், மதத்தலைவர்கள் என பலர் வாழ்ந்தனர், போதித்தனர், தங்களை கடவுள் எனக் கூறினர், ஆனால் யாரும் உயிர்த்தெழவில்லை.  எகிப்து நாட்டில் பிரமிடுகளில் இறந்தவர்களின் உடல் பதப்படுத்தி வைக்கப்பட்டிருக்கிறது, ஆனால் யாரும் அதில் உயிர்த்தெழவில்லை. சொன்னவாறு உயிர்த்தெழுந்த ஒரே மனிதர் இறைமகன் இயேசு கிறிஸ்து மட்டுமே.

 

              இயேசுவின் உயிர்ப்பு பெருவிழா இன்று கிறிஸ்தவர்களாகிய நம் ஒவ்வொருவருக்கும் நான்கு விதமான வெளிப்பாடுகளைத் தருகிறது.

 

1. விசுவாசத்தின் பிறப்பு

2. ஒவ்வொருவருக்கும் உயிர்ப்பு

3. பாவங்களுக்கு மீட்பு

4. சாட்சிய வாழ்வின் அழைப்பு 

1. விசுவாசத்தின் பிறப்பு

                 இயேசுவினுடைய பிறப்போ அல்லது இறப்போ நமக்கு கிறிஸ்தவ விசுவாசத்தை அளிக்கவில்லை, மாறாக அவருடைய உயிர்ப்பு தான் கிறிஸ்தவ விசுவாசத்தை தருகிறது.  இயேசுவின் பிறப்பு,   நற்செய்தி, சிலுவை,  இறப்பு   மட்டுமே இருந்திருந்தால் இங்கு விசுவாசம் வளர்ந்திருக்காது மாறாக இயேசுவின் உயிர்ப்பு தான் கிறிஸ்தவ விசுவாசத்தை தருகின்றது. சீடர்கள் பயத்திலிருந்து வெளியே வந்தது,  நற்செய்தியை அறிவித்தது இயேசுவினுடைய உயிர்ப்பால், எனவே இன்று நாம் நம் விசுவாசத்தை புதுப்பிக்க அழைக்கப்படுகின்றோம். "கிறிஸ்து உயிருடன் எழுப்பப்படவில்லை என்றால் நாங்கள் பறைசாற்றிய நற்செய்தியும் நீங்கள் கொண்டிருக்கிற நம்பிக்கையும் பொருளற்றதாயிருக்கும்"  (1கொரிந்தியர் 15:14) எனும் பவுலடிகளாரின் வார்த்தைக்கெற்ப இயேசுவின் உயிர்ப்பு நம் விசுவாசத்தின் பிறப்பு.

இயேசுவினுடைய உயிர்ப்புக்கு இரண்டு அடையாளங்களை  எடுத்துக் கூறலாம், அதுவே விசுவாசத்தின் வித்துகளாக மாறுகிறது.

 

A. காலி கல்லறை

              "வாரத்தின் முதல் நாளன்று விடியற்காலையில் இருள் நீங்கும் முன்பே மகதலா மரியா கல்லறைக்குச் சென்றார்; கல்லறை வாயிலில் இருந்த கல் அகற்றப்பட்டிருப்பதைக் கண்டார்"யோவான். 20:1 எனும் இறைவார்த்தைகள் காலியான கல்லறை இயேசுவினுடைய உயிர்ப்பை சுட்டிக் காட்டுகின்ற முதல் அடையாளம் என்பதை காட்டுகின்றது.

 

B. துணிகள்: 

                 பேதுருவும் இயேசுவினுடைய அன்புச் சீடரும் கல்லறைக்குள் நுழைந்து பார்த்தபொழுது கல்லறையில் சுருட்டி கிடந்த துணிகள், இயேசுவினுடைய உயிர்ப்பை சுட்டிக் காட்டுகின்ற இரண்டாம் அடையாளம்.  (யோவான் 20:6,7 )

 2. ஒவ்வொருவருக்கும் உயிர்ப்பு

                 “உயிர்த்தெழுதலும் வாழ்வும் நானே. என்னிடம் நம்பிக்கை கொள்பவர் இறப்பினும் வாழ்வார்". (யோவான் 11:25) என்று கூறிய இயேசு தான் மட்டும் இறந்து உயிருக்கவில்லை மாறாக அவருடைய உயிர்ப்பில் நமக்கும் பங்கு கொடுத்திருக்கின்றார். இதைத் தான் பவுல் அடிகளார் "இறந்தோர் உயிர்த்தெழ மாட்டார் எனில் கிறிஸ்துவும் உயிருடன் எழுப்பப்படவில்லை என்றாகிவிடும்". (1 கொரிந்தியர் 15:13) என்கின்றார். ஆக இயேசுவின் உயிர்ப்பு நம் ஒவ்வொருவருக்கும் உயிர்ப்பு.

 

3. பாவங்களுக்கு மீட்பு

                   இயேசுவினுடைய இந்த உயிர்ப்பு நம் பாவங்களுக்கு மீட்பு தருகின்றது. நம்முடைய வாழ்க்கையில் துன்பங்கள், கஷ்டங்கள், பாரங்கள், பிணி, நோய் மற்றும் பேய் அனைத்தும் இயேசு சாவைக் கடந்து வெற்றி பெற்று உயிர்த்ததை போல, இவை நம் வாழ்வை விட்டு மீட்கப்படுகின்றது.

 

4. சாட்சிய வாழ்வின் அழைப்பு

            ஆண்டவர் இயேசு கிறிஸ்துவினுடைய இந்த உயிர்ப்பு நம் ஒவ்வொருவரையும் சாட்சிய வாழ்வுக்கு   அழைப்பு தருகின்றது. "மகதலா மரியா சீடரிடம் சென்று, “நான் ஆண்டவரைக் கண்டேன்” என்றார்; தம்மிடம் இயேசு கூறியவற்றையும் அவர்களிடம் சொன்னார்". (யோவான். 20:18) எனும் இறை வார்த்தைகளுக்கு ஏற்ப  பெண்ணின் சாட்சியத்தை பெருமையாக ஏற்றுக்கொள்ளாத யூத சமுதாயத்தின் பெண் தான் கண்ட  காட்சியை சாட்சியாக பகிர்ந்து கொள்கின்றார். "இறந்த அவர் உயிர்த்தெழுந்தபின்பு அவரோடு உண்டு, குடித்த நாங்களே இதற்குச் சாட்சிகள்". (திருத்தூதர் பணிகள். 10:41) எனும் பேதுருவின் வார்த்தைகள் உயிர்த்த இயேசுவுக்கு அவர் சாட்சியம் பெற்றதை சுட்டிக் காட்டுகின்றது. இவ்வாறு மகதலா மரியாவும், பேதுருவும் மற்றும் சீடர்களும் இயேசுவின் உயிர்ப்புக்கு சாட்சி பகர்ந்தார்கள். அதைப்போல நாம் ஒவ்வொருவரும் சாட்சி பகர இந்த பெருவிழா நமக்கு அழைப்பு தருகின்றது.

   கிறிஸ்துவில் அன்பார்ந்தவர்களே, நாம் ஒவ்வொருவரும் கிறிஸ்தவர்கள் என்னும் அடையாளத்தை தாங்கி நிற்கின்றோம்.  இயேசுவினுடைய  உயிர்ப்பை நம்பி, இந்த உயிர்ப்பு நமக்கு மீட்பையும், மறுவாழ்வுக்கான உயிர்ப்பையும் தருகின்றது என ஏற்றுக்கொண்டு அவருக்கு சாட்சிய வாழ்வு வாழ்வோம். இறைவன் நம் ஒவ்வொருவரையும் ஆசிர்வதிப்பார்.

•