🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - ஆண்டவரின் விண்ணேற்ற பெருவிழா - ( ஆண்டு- C) -----29-05-2022 - ஞாயிற்றுக்கிழமை

 

முதல் வாசகம்: திருத்தூதர் பணி 1: 1-11

இரண்டாம் வாசகம்: எபிரேயர் 9: 24-28; 10: 19-23

நற்செய்தி:  லூக்கா 24: 46-53

இயேசுவின் விண்ணேற்றம் தந்த மகிழ்ச்சி

இயேசு உயிர்த்தெழுந்து நாற்பதாம் நாள் விண்ணேற்றமடைந்த பெருவிழாவை தான் இன்று கொண்டாடுகின்றோம். இன்றைய விழா கிறிஸ்தவர்களாகிய நம் அனைவரையும் உயிர்த்த ஆண்டவர் விண்ணேற்றத்திற்கு முன் விட்டு செல்லும் மகிழ்ச்சியை பெற்றுக் கொள்ளவும் மற்றும் அதற்காக அவரின் உடனிருப்பை உணரவும் அழைப்பு தருகிறது. ஒருவர் எப்போதுமே மன கஷ்டத்துடன் வாழ்ந்து வந்தார். ஒரு நேரத்தில் அவரால், மனக்கஷ்டத்தை தாங்க முடியவில்லை. அதனால் அவர் ஒரு ஜென் துறவியை நாடி, அதற்கான காரணத்தை அறிய வேண்டும் என்று முடிவெடுத்து, துறவியைப் பார்க்க புறப்பட்டார். துறவி ஒரு மரத்தின் அடியில் தியானம் செய்து கொண்டிருந்தார். அவரிடம் அருகில் சென்று "குருவே! எனக்கு எப்போதுமே மனம் கஷ்டமாக உள்ளது. அதை எப்படி போக்குவது?" என்று கேட்டார். அதற்கு குரு அவரிடம், "ஒவ்வொரு நாளும் காலையில் எழும் போது நீ என்ன நினைப்பாய்?" என்று கேட்டார். அதற்கு வந்தவர், "இன்றும் மனம் கஷ்டமாக இருக்குமோ! என்று நினைத்து எழுவேன்" என்றார். அப்போது குரு "இது தான் தவறு. உன் மனம் கஷ்டமாக இருப்பதற்கு நீ தான் காரணம். காலையில் எழும் போது நான் சந்தோஷமாக இருக்கிறேன் என்று மனதில் நீயாகவே நினைத்தால், கண்டிப்பாக நீ சந்தோஷத்தை உணர்வாய். கஷ்டம் என்று நினைத்தால் கஷ்டத்தை தான் உணர்வாய்" என்று கூறினார். சீடர்களும் இயேசுவின் இறப்புக்கு பிறகு அவரது பிரிவை நினைத்து வருத்தமுற்றார்கள், ஏனெனில் அவர்கள் அவர் உடனிருப்பை உணரவில்லை. ஆனால் அவரின் விண்ணேற்றத்திற்கு பிறகு உடனிருப்பை உணர்ந்து பெருமகிழ்ச்சி கொண்டார்கள். இயேசு சீடர்களிடம் ஒவ்வொருமுறையும் தன்னுடைய இறப்பை பற்றி அறிவிக்கின்ற பொழுதெல்லாம் அவர்கள் அதன் பொருட்டு வருத்தப்பட்டார்கள். இயேசுவின் இறப்புக்கு பிறகும் கூட பயத்திலும், சோகத்திலும் மற்றும் துன்பத்திலும் மூழ்கி கிடந்தார்கள். அதே ஆண்டவர் உயிர்த்து அவர்களுக்கு காட்சி அளித்த பொழுது அவர்கள் மீண்டுமாக புதுப்பொலிவு பெற்று மகிழ்ச்சியுற்றார்கள். இயேசு நாற்பது நாட்கள் கழித்து மீண்டும் அவர்களை பிரியும் போது அதாவது விண்ணேற்றம் அடையும் போது அவர்கள் வருத்தம் அடையாமல், பெருமகிழ்ச்சியோடு எருசலேம் சென்றதாக (லூக்கா 24: 52) இன்றைய நற்செய்தி எடுத்துரைக்கிறது. அவர் பிரிவை கண்டு வருத்தமுற்ற சீடர்கள் பெருமகிழ்ச்சி கொள்வதன் காரணம் இயேசு தனது விண்ணேற்றத்திற்கு முன் "நான் உங்களுக்குக் கட்டளையிட்ட யாவையும் அவர்களும் கடைப்பிடிக்கும்படி கற்பியுங்கள். இதோ! உலக முடிவுவரை எந்நாளும் நான் உங்களுடன் இருக்கிறேன்” (மத்தேயு 28:20) என்று கூறிய உடனிருப்பு வாக்குறுதி.

சாட்சிய வாழ்வு தரும் மகிழ்வு

இயேசுவினுடைய விண்ணேற்றம் இன்றைய நற்செய்தியாக தரப்பட்டிருக்கிறது, இது அவரின் மண்ணுலக பணியை நிறைவு செய்கிறது, அவர் விண்ணேற்றம் அடைவதற்கு முன்பு தன்னுடைய சீடர்களுக்கு எண்ணற்ற வாக்குறுதிகளையும் மற்றும் அழைப்புகளையும் கொடுத்திருந்தாலும், இறுதியாக இறையாசீரையும் மகிழ்ச்சியையும் வழங்குகிறார். விண்ணேற்றமடைந்த இறைமகன் இயேசு கிறிஸ்து நம் ஒவ்வொருவருக்கும் அதே மகிழ்ச்சியை வழங்குகிறார். அன்றைக்கு சீடர்கள் இயேசு தந்த மகிழ்ச்சியை பெற்றதற்கு காரணம் அவரின் அழைப்புக்கு செவி கொடுத்ததாகும். நற்செய்தி அறிவிப்பும் மற்றும் சாட்சிய வாழ்வும் என அவர் கொடுத்த அழைப்பை வாழ்வாக்க தயாராக இருந்தார்கள். இன்றைக்கு நாமும் இவற்றை நமது வாழ்வில் ஏற்றுக்கொள்ள தயாராக இருக்க வேண்டும். இன்றைய முதல் வாசகம் இயேசுவின் விண்ணேற்பு மக்களுக்கு உணர்த்தும் வல்லமையையும் செய்தியையும் எடுத்துரைக்கிறது. அதே நற்செய்தியை அகிலமெங்கும் பறைசாற்ற நமக்கும் அழைப்பு தருகிறது. இன்றைய இரண்டாம் வாசகத்தில் பவுலடிகளார் எபேசு நகர் மக்கள் கிறிஸ்துவை முழுமையாக அறிந்து கொள்ளவும், அவரை வாழ்விலே அனுபவித்து உணரவும் அவர்களுக்காக ஜெபிக்கிறார். இது சாட்சிய வாழ்வுக்கான அழைப்பாகும். இன்றைக்கு நாமும் நமது வாழ்க்கையில் இவ்விரண்டு செயல்பாடுகளையும், நமது இரு கண்களாக ஏற்று கிறிஸ்தவ வாழ்வில் பயணிக்க வேண்டும். "நமக்கோ விண்ணகமே தாய்நாடு; அங்கிருந்து தான் மீட்பராம் ஆண்டவர் இயேசு கிறிஸ்து வருவாரெனக் காத்திருக்கிறோம்". (பிலிப்பியர் 3:20) என்னும் இறைவார்த்தையின் அடித்தளத்தில் நம் தாய் வீடாம் விண்ணகம் செல்ல அடித்தளமாய் இருக்கும் இவற்றை ஏற்று மகிழ்வாக வாழ்வோம். சீடர்கள் இயேசுவின் உடனிருப்பு உணராத தருணங்களில் வருத்தமாக கவலையோடு இருந்தார்கள், அதேபோல தான் நமது வாழ்க்கையிலும் நம் இறைவன் என்றும் நம்மோடு இருக்கின்றார் என்பதை நமது வாழ்வில் உணராத பொழுது மகிழ்ச்சி நிலைத்திருக்காது. மகிழ்ச்சி என்பது நம்மிடம் தான் உள்ளது. நாம் அதை உணர்ந்து பிறரையும் மகிழ்ச்சியாக வைத்துக் கொள்ளவேண்டும் என்கிறார்கள். நம்மில் இம்மகிழ்ச்சியை உணர்வதற்கு சாட்சிய வாழ்வாம் கிறிஸ்தவத்தை வாழ்ந்து காட்ட வேண்டும். இவையனைத்திற்கும் மேலாக இயேசு விண்ணேற்றம் அடைவதற்கு முன்பாக தனது சீடர்களிடம் உங்களுக்காக துணையாளராம் தூய ஆவியை அனுப்புவேன் என்னும் வாக்குறுதியையும், இறையாசீரையும் தருகிறார். இதுவும் சீடர்களின் மகிழ்வுக்கு காரணமாக அமைகின்றது.

நம் வாழ்வும் மகிழ்வும்

இன்றைய உலகில் நாம் எல்லோரும் மகிழ்ச்சியை எதிர்பார்க்கின்றோம். வாழ்க்கை என்பது ஒரு முறை தான் அதை மகிழ்ச்சியாக வாழ்ந்து விட வேண்டும் என என்னுகிறோம். எப்பொழுதும் மனதில் மகிழ்ச்சியோடும் புன்சிரிப்போடும் இருக்க பழக வேண்டும். நம்முடைய மகிழ்ச்சி நம் வீட்டினரையும் சுற்றத்தாரையும் மகிழ்ச்சியாக வைத்துக் கொள்ளும். மகிழ்ச்சி தான் நம்முடைய பலம். அதைத் தேடி நாம் அலைய வேண்டாம் அது நம்முள்ளே தான் இருக்கிறது. சந்தோஷமாக இருக்க நாம் எதையோ தேடுகிறோம். ஆனால் அது கிடைத்த பின்னரும் சந்தோஷமாக இருப்பதில்லை. பள்ளிக்குச் செல்லும் ஒரு சிறுவன், தான் கல்லூரிக்குச் சென்ற பின்னர் மேலும் சுதந்திரமாக இருப்பேன் அதனால் மகிழ்ச்சியடைவேன் என்று எண்ணிக் கொள்கின்றான். சந்தோஷமாக இருக்கின்றாயா என்று ஒரு கல்லூரி மாணவனைக் கேட்டால், வேலை கிடைத்த பின்னர் தான் மகிழ்ச்சியுடன் இருப்பேன் என்று கூறுகிறான். நல்ல வேலையில் அல்லது தொழிலில் இருக்கும் ஒருவரிடம் பேசினால், முற்றிலும் சரியான ஒரு வாழ்க்கைத் துணை கிடைத்த பின்னரே மகிழ்ச்சியடைவேன் என்று கூறுகிறான். அத்தகைய துணையுடன் இருப்பவரைக் கேட்டால், ஒரு குழந்தை வேண்டும், அப்போது மகிழ்வடைவேன் என்கிறான். குழந்தைகள் இருப்பவரை மகிழ்வுடன் இருக்கிறீர்களா என்று கேட்டால், அவர், அது எப்படி முடியும், குழந்தைகள் நன்றாக வளர வேண்டும், நல்ல கல்வி கற்க வேண்டும், அவர்கள் சுயமாக நிற்க வேண்டும், அப்போதுதான் சந்தோஷம் என்கிறார். தங்கள் பொறுப்புக்களையெல்லாம் நிறைவேற்றி, ஒய்வு பெற்று விட்டவர்களை மகிழ்ச்சியாக இருக்கிறீர்களா என்று கேளுங்கள். அவர்கள் தங்கள் இளமைக் காலத்தினை எண்ணி ஏங்கிக் கொண்டிருப்பர். இது தான் இன்றைய சூழல், இருப்பதை விட்டு பறப்பதற்கு ஆசைப்படும் நிலை. இதைத்தான் இயேசு "வானத்துப் பறவைகளை நோக்குங்கள்; அவை விதைப்பதுமில்லை; அறுப்பதுமில்லை; களஞ்சியத்தில் சேர்த்து வைப்பதுமில்லை. உங்கள் விண்ணகத் தந்தை அவற்றுக்கும் உணவு அளிக்கிறார். அவற்றைவிட நீங்கள் மேலானவர்கள் அல்லவா!" என கவலையின்றி மகிழ்வாய் வாழ அழைக்கிறார் (மத்தேயு 6:26). வாழ்க்கையில் 80 சதவீதம் சந்தோஷம், 20 சதவீதம் துன்பம். ஆனால் நாம் அந்த 20 சதவீதத்தையே விடாமல் பிடித்துக் கொண்டு, அதை 200 சதவீதமாக்கி விடுகின்றோம் ! உலகில் அதிக ஆயுள் வாழ்ந்தவர்களில் ஒருவர் ஆலிஸ் ஹெர்ஸ். இவர் 108 வயது வரை வாழ்ந்தார். அவரிடம் ஒருமுறை, கடினமான வாழ்க்கைக்கு இடையே எப்படி மகிழ்ச்சியுடன் வாழ்வது என்று கேள்வி கேட்கப்பட்டது. அதற்கு அவர், “நான் நல்லதையே தேடுகிறேன். நல்லதையே தேர்வு செய்கிறேன். இங்கு பல கெட்ட விஷயங்கள் இருந்தாலும், நான் நல்லதையே தேடி ஏற்றுக்கொள்வதால் எனது மகிழ்ச்சி நிலைக்கிறது.” என்றார். அவரது அனுபவம், நமக்கும் மகிழ்ச்சியின் வேரை நினைவுபடுத்துகிறது. இன்று அந்த நல்லவர் தான் இயேசு கிறிஸ்து, அவர் காட்டும் வழிகளும் வாழ்வும் தான் நல்லவைகள். உலகின் மாயைகளை நினையாமல் இயேசுவை நினைப்போம், அவர் தரும் நல்லவைகளை நமது வாழ்வில் உணர்வோம், மகிழ்வில் திளைப்போம். இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

அருட்பணி. அ. குழந்தை யேசு ராஜன் CMF

                     காணொளியில் காண/ஆடியோவில் கேட்க ...

புத்தம் புதிய காணிக்கைப் பாடல்

(கேட்டு மகிழுங்கள்)

https://youtu.be/NKp1EXTZLWw

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பாஸ்கா காலம் 6-ஆம் ஞாயிறு - ( ஆண்டு- C) -----22-05-2022 - ஞாயிற்றுக்கிழமை

 

முதல் வாசகம்: திப 15: 1-2, 22-29

இரண்டாம் வாசகம்: 21: 10-14, 22-23

நற்செய்தி:  யோவான் 14: 23-29

இவ்வுலக வாழ்வும் இயேசு தரும் அமைதியும்

சீடன் ஒருவர் சாலையோரோமாக நடந்து கொண்டிருக்கின்ற பொழுது ஒரு பைத்தியக்காரனை சந்திக்கின்றார், அவனை அழைத்து சென்று குருவிடம் காட்டுகின்றார். குரு அவனுக்கு தேவையான உணவு மற்றும் உடைகளை கொடுப்பதற்கு சீடர்களிடம் கூறுகின்றார். மேலும், சிறிது நேரத்தில் அவன் சத்தமிடுவான் என்றும், கல்லெடுத்து எல்லோரையும் அடிக்க துவங்குவான் என்றும், ஆனால் நீங்கள் யாரும் எதையும் செய்யாமல் அமைதியாக இருக்க வேண்டும் என்றும் கூறிவிட்டுச் சென்றார். குரு கூறியவாறே சிறிது நேரத்தில் அந்த பைத்தியக்காரன் சத்தமிட்டு மற்றும் கல்லெடுத்து எல்லோரையும் அடிக்க ஆரம்பித்தான், சீடர்கள் அமைதியாக இருந்தார்கள், சிறிது நேரத்தில் அந்த பைத்தியக்காரன் அமைதியாகி விட்டான். இது ஒவ்வொரு முறையும் நிகழ்ந்தது சீடர்களும் அமைதி காத்தார்கள், இவ்வாறாக மாதங்கள் கழிந்தது ஏறக்குறைய ஓராண்டு கழிந்த பின் அந்த பைத்தியக்காரன் குருவிடம் சென்று எனக்கும் தியானம் செய்ய கற்று கொடுங்கள் என்று கேட்டானாம். அமைதி காப்பதும் ஒருவிதமான வைத்திய முறை தான், இது இன்றளவும் திபெத்தில் பயன்படுத்தப்பட்டு வருவதாக சொல்லப்படுகிறது. நம்மிடையே வெறுப்பையும் மற்றும் கோபத்தையும் காட்டுகிறவர்களுக்கு நாம் அமைதியை கொடுப்போம், அதற்கு நாம் அமைதியில் வாழ்வோம். இயேசுவின் உயிர்ப்பின் மகிழ்ச்சியை அளிக்கும் பாஸ்கா காலத்தில் நாம் ஒவ்வொருவரும் உயிர்த்த ஆண்டவர் தருகின்ற அன்பின் பரிசாம் அமைதியை தமதாக்கி, அதை பிறரும் பெற்று வாழ முயற்சி செய்ய அழைப்பு பெறுகின்றோம். நமது வாழ்வின் பல்வேறு பிரச்சனைகளையும் தீர்த்து வைக்கும் மருந்து இது. இன்று உலக நாடுகள், நமது சமுதாயம், குடும்பங்கள் மற்றும் நமது உள்ளங்கள் அமைதியில் இருக்கின்றதா? என்று சிந்தித்துப் பார்க்க அழைப்பு பெறுகின்றோம்.

இன்றைய நற்செய்தியில் இயேசு நம் ஒவ்வொருவருக்கும் நான்கு வாக்குறுதிகளை அளிக்கின்றார்.

1. நம்மிடையே குடிகொள்ளுதல் (யோவான் 14:23)
2. தூய ஆவியை அனுப்புதல் (யோவான் 14:26)
3. அமைதியை அளித்தல் (யோவான் 14:27)
4. திரும்பி வருவதல் (யோவான் 14:28)

இந்த நான்கு வாக்குறுதிகளில் இன்றைக்கு நம்முடைய சிந்தனைக்கு அமைதியை பற்றி தியானிப்போம். மகிழ்ச்சி பொங்கும் பாஸ்கா காலத்தில் திருஅவையின் திருவழிபாட்டு வாசகங்களில் நாம் அதிகம் தியானிக்கும் இறைவார்த்தை பகுதிகள் உயிர்த்த ஆண்டவரின் காட்சிகள். திருவிவிலியத்தின் அடித்தளத்தில் உயிர்த்த ஆண்டவரின் பத்து காட்சிகள் தரப்பட்டிருக்கிறது.

1 . இயேசு மகதலா மரியாவுக்குத் காட்சி அளித்தல் (யோவான் 20 :11 -18)
2. இயேசு எம்மாவு வழியில் இரண்டு சீடருக்கு காட்சியளித்தல் (லூக்கா 24: 13-35)
3. சீமோனுக்கு காட்சியளித்தல் (லூக்கா 24: 34)
4 . 11-சீடர்களுக்கு காட்சி அளித்தல் (யோவான் 20: 19 -23)
5. தோமா மற்றும் சீடர்களுக்கு காட்சி அளித்தல்( யோவான் 20: 24- 29 )
6. சீடர்கள் ஏழு பேருக்கு காட்சியளித்தல்(யோவான் 21: 1- 14 )
7. கேபாவுக்கும் பன்னிருவருக்கும் காட்சி அளித்தல். (1 கொரிந்தியர் 15: 5)
8. 500க்கும் மேற்பட்ட சகோதர சகோதரிகளுக்கு காட்சி அளித்தல் (1 கொரிந்தியர் 15: 6)
9. யாக்கோபுக்கும் திருத்தூதர்கள் அனைவருக்கும் காட்சி அளித்தல் (1 கொரிந்தியர் 15: 7)
10. விண்ணேற்றத்துக்கு முன்பு சீடர்களுக்கு காட்சி அளித்தல் (லூக்கா 24: 50-53)

திருவிவிலியம் சொல்லும் இந்த பத்து உயிர்த்த ஆண்டவரின் காட்சிகளில் ஐந்து காட்சிகள் இயேசு பேசிய வார்த்தைகளோடு நேர் கூற்றிலும், மற்ற ஐந்து காட்சிகள் இயேசு பேசிய வார்த்தைகள் அல்லாது அவர் காட்சி அளித்ததாக அயர் கூற்றிலும் குறிப்பிடப்பட்டிருக்கிறது. உயிர்ப்புக்கு பிறகு அவர் சீடர்களை சந்திக்கும் இந்த நிகழ்வுகளில் எல்லாம் அவர்களிடம் 'உங்களுக்கு அமைதி உரித்தாகுக' என்று கூறுகின்றார். உயிர்த்த ஆண்டவரின் முதல் செய்தி "அமைதி". இயேசு உயிர்ப்புக்கு பிறகு தன் சீடர்களுக்கு தோன்றி சொன்ன முதல் வார்த்தை "உங்களுக்கு அமைதி உரித்தாகுக" (யோவான் 20: 19 &26). இயேசு ஒவ்வொரு முறையும் சீடர்களுக்கு காட்சி தந்த போது அவர்கள் குழப்பத்தில், கலக்கத்தில், துக்கத்தில் இருந்தார்கள். அவர்களுக்கு இயேசுவின் அமைதி தேவைப்பட்டது. இயேசுவின் பிறப்பு, பணிவாழ்வு, இறப்பு மற்றும் உயிர்ப்பு என அனைத்திலும் இயேசு அமைதியை தருபவராக இருக்கின்றார், இவர் அமைதியின் சின்னம் என்பதை அவரது வாழ்வே நமக்கு எடுத்து காட்டுகின்றது. ஒவ்வொரு முறையும் தன்னுடைய இறப்பை முன்னறிவிக்கின்ற போது இயேசு தனது சீடர்களிடம் "நான் உங்களோடு சிறிது காலமே இருப்பேன்' என்று கூறுகின்றார். ஆனால், இன்றைய நற்செய்தி பகுதியில் "நான் மீண்டும் வருவேன் மற்றும் உங்களுக்காக அமைதியை விட்டு செல்கிறேன்" என்கிறார். அதிலும் அவர் தரும் அமைதி இவ்வுலக அமைதியை போன்றது அல்லாது, என்றும் நிலைத்திருக்கும் அமைதி என்கிறார்.

நீடித்து நிற்கும் அமைதி:-

இயேசு இன்றைய நற்செய்தியில் "நான் உங்களுக்குத் தரும் அமைதி உலகம் தரும் அமைதி போன்றது அல்ல. நீங்கள் உள்ளம் கலங்க வேண்டாம்; மருள வேண்டாம்". (யோவான் 14:2) என்கிறார். இன்றைக்கு நமது சமுதாயத்தில் நாம் பெறுகின்ற அமைதி சிறிது காலமே நம்மோடு இருக்கின்றது. அதன் பிறகு நமக்கு துன்பமும், கவலைகளும் வந்து கொண்டே இருக்கின்றது. நமது வாழ்க்கையில் அமைதி நிரந்தரமாக இருப்பதில்லை, ஆனால் இறைமகன் இயேசு தருகின்ற அமைதி என்றும் நம்மோடு நிலைத்து நிற்கும் அமைதி. எனவே நாம் நமது வாழ்வின் தாக்கங்கள், கவலைகள் மற்றும் கஷ்டங்களை நினைத்து ஒருபோதும் கவலை கொள்ள வேண்டாம் என்கிறார். அவர் தருகின்ற அந்த நீடித்த அமைதியை பெற்றுக் கொள்ள முயலுவோம். இயேசுவின் பிறப்பின் போது, விண்ணகத் தூதர் பேரணி அந்தத் தூதருடன் சேர்ந்து, “உன்னதத்தில் கடவுளுக்கு மாட்சி உரித்தாகுக! உலகில் அவருக்கு உகந்தோருக்கு அமைதி உண்டாகுக!” என்று கடவுளைப் புகழ்ந்தது. (லூக்கா 2:13,14) என மண்ணகத்தில் இறைவனின் அமைதி அன்றே முன்னறிவிக்கப்பட்டது. இயேசு தனது சீடர்களோடு படகில் பயணித்த பொழுது புயற்காற்று வீசி கடல் கொந்தளித்த போது, “இரையாதே, அமைதியாயிரு” என்றார். காற்று அடங்கியது; மிகுந்த அமைதி உண்டாயிற்று. (மாற்கு 4:39) மற்றும் பன்னிரண்டு ஆண்டுகளாக ரத்தப் போக்கினால் அவதியுற்ற பெண் இயேசுவினுடைய ஆடையை தொட்டதும் குணமாகினார். உடனே தன்னிடமிருந்து வல்லமை வெளிப்பட்டதை அறிந்து அதைப்பற்றி கேட்கின்ற பொழுது அதை ஏற்றுக் கொள்கின்றார். அப்போது இயேசு அவரிடம், “மகளே உனது நம்பிக்கை உன்னை நலமாக்கியது. அமைதியுடன் போ”(லூக்கா 8:48) என்றார். இவ்வாறு தனது பணி வாழ்வின் மூலமாக இம்மண்ணுலகில் அமைதியை விதைத்த இயேசு, தனது இறப்புக்கு பிறகும் உங்களுக்கு அமைதியை விட்டு செல்கின்றேன், இந்த அமைதி என்றுமே உங்களிடம் நிலைத்து நிற்கும் என்று கூறுகின்றார். இன்றைய முதல் வாசகத்தில் பிற இனத்தவர்கள் கட்டாயம் விருத்தசேதனம் செய்துகொள்ள வேண்டுமா என்பதை வைத்து பிரச்சினை எழுந்தபோது பவுலும், பர்னபாவும் பல தவறான போதனைகளுக்கு மத்தியில் அல்லல் பட்டனர். அதே சமயம் எருசலேம் சங்கத்தார் சமரச வழியின் மூலம் ஒரு முடிவுக்கு வர விரும்பவில்லை. பெரும் கருத்து வேறுபாடு மற்றும் நெடுநேர விவாதத்திற்குப் பின்பு நீதியான, சரியான முடிவை எடுத்து அமைதியை நிலைநாட்டுவதை பார்க்கின்றோம்.

அமைதியில் வாழ உடனிருக்கும் தூய ஆவி

இயேசு தான் விட்டு செல்கின்ற அமைதியில் நாம் என்றும் நிலைத்திருக்க துணையாளராம் தூய ஆவியை அனுப்புகின்றார். இன்றைக்கும் நமது வாழ்வின் ஒவ்வொரு நிமிடங்களிலும் தூய ஆவியின் அருளை பெற்று வாழ நம்மை முழுமையாக தயாரிக்க வேண்டும். நாம் பங்கெடுக்கின்ற ஒவ்வொரு திருவருட்சாதனங்களிலும் தூய ஆவி நிறைந்திருக்கின்றார். அவரில் நமது வாழ்வை வைப்போம், அமைதியில் திளைப்போம்.

நம் வாழ்வும் அமைதியும்

வாழ்க்கையின் அர்த்தமே மனஅமைதி தான். மனஅமைதியுடன் செய்யும் எந்த காரியமும் வெற்றி பெறும். அமைதியில்லா மனமிருந்தால் எந்த ஒரு செயலையும் நாம் திறம்பட செய்ய முடியாது. பொறுத்தார் பூமியாள்வார் என்பார்கள், இன்று குடும்பங்கள் இடையே பல சண்டை சச்சரவிற்குக் காரணம் பொறுமையின்மை தான். சில நேரங்களில் அமைதியாக இருப்பதே பல பிரச்சினைகளிலிருந்து நாம் விடுபட தீர்வாகும். சிலர் அவசரப்படுவார்கள், பலருக்கு எதிலுமே பொறுமை இருக்காது.. ஆனால் அமைதி காத்துப் பாருங்கள்.. அதை விட மகிழ்ச்சி, நிம்மதி வேறு இருக்காது. யுனெஸ்கோவில் முகவுரை வாசகமானது “மனித உள்ளங்களில்தான் போர் தோன்றுவதானால் மனித உள்ளங்களில்தான் அமைதிக்கான அரண்கள் அமைக்கப்பெற வேண்டும்” என்கிறது. தனிமனித அமைதி ஏற்பட்டாலே சமூக அமைதியும், உலக அமைதியும் எளிதாகும்.

பல ஆண்டுகளாக நண்பர்களாக இருந்த இரண்டு நாட்டு அரசர்கள் ஒரு முறை ஒன்றாக சந்தித்து மகிழ்ச்சியோடு பேசிக் கொண்டிருக்கின்றார்கள். பேசிக் கொண்டிருக்கின்ற பொழுது அவர்களுக்கிடையே கருத்து வேறுபாடு ஏற்ப்பட்டது. இதுவே அவர்களுக்கிடையே பிரிவு ஏற்பட காரணமானது. இருவரும் பேசாமலிருந்தார்கள், நாளடைவில் ஒருவர் மற்றவரிடம் வந்து மன்னிப்பு கேட்க வேண்டும் என எண்ணிக் கொண்டிருந்தார்கள், யாரும் யாரிடமும் மன்னிப்பு கேட்கவில்லை அவர்கள் தத்தம் கருத்துகளில் உறுதியாக இருந்தார்கள். இவர்களுக்கிடையே இருந்த இந்தப் பிளவு இரு நாடுகளுக்கிடையே பிளவாக மாறி, அதுவே இரு நாட்டிற்குமிடையே போர் எழக் கூடிய சூழ்நிலையை உருவாக்கியது. இதனை அறிந்த இரண்டு நாட்டு அரசர்களுடனிருந்த அமைச்சர்கள் இருவர் ஒருவரை ஒருவர் சந்தித்து இது பற்றி யோசித்தார்கள். பின்பு அவர்கள் இரு நாட்டு அரசர்களையும் ஒரு மரத்தின் அடியில் அழைத்து வந்தார்கள், அந்த மரத்தில் ஒரு அழகிய வாள் ஆனது தொங்கப்பட்டிருந்தது. அதைப் பார்த்த வந்த அரசர், ஆஹா! என்ன அழகு, அதிலும் அதன் மேல் இருக்கின்ற பச்சை நிற கற்கள் மிக அழகாக இருக்கிறது என்று கூறினார். உடனே மறு பக்கத்திலிருந்த மற்றொரு அரசர், வாள் அழகு தான் ஆனால், அதிலிருப்பது பச்சை நிற கற்கள் அல்ல, சிவப்பு நிற கற்கள் என்றார். அவர்களுக்கிடையே மீண்டும் கருத்து வேறுபாடு ஏற்பட்டது, உடனே இரண்டு அமைச்சர்களும் அரசர்களே சற்று அமைதியாக இருங்கள், தாங்கள் இருவரும் கூறுவது சரிதான். இந்த வாளின் ஒரு பக்கத்தில் பச்சை நிற கற்களும் மற்றொரு பக்கத்தில் சிவப்பு நிற கற்களும் இருக்கின்றது. இப்படி தான் வாழ்க்கையிலும் நமது கண்ணோட்டங்களின் அடிப்படையில் நமது கருத்துகள் சரியாக தான் இருக்கின்றது. அதேபோல் மற்றவரின் கருத்துகளும் சரியாக தான் இருக்கும், இதை அமைதி என்னும் கருவி கொண்டு ஏற்றுக்கொள்ள வேண்டும் என்றார்கள். அப்போதுதான் அரசர்களுக்கு தங்களுடைய நிலை முழுமையாக புரிந்தது, அன்று முதல் அவர்கள் மீண்டும் நண்பர்களாகினர், இரு நாடுகளுக்கிடையே ஏற்படவிருந்த போர் நிறுத்தப்பட்டது, அங்கு அமைதி பிறந்தது. இன்றைக்கு நமது குடும்பங்களிலும் கணவன்-மனைவி, பெற்றோர்கள்-பிள்ளை, சகோதர சகோதரிகள் மற்றும் அக்கம் பக்கத்து வீட்டார் என பல வேளைகளில் சிறிய சிறிய கருத்து வேறுபாடுகள் அமைதியற்ற சூழலை நம்முடைய குடும்பங்களிலும் மற்றும் சமுதாயத்திலும் உருவாக்கி விடுகின்றது. நன்றாக யோசித்து, அமைதி என்னும் பொறுமையோடு அவரவர் கருத்துக்களை ஏற்று வாழ்வோம். அப்பொழுது நம் உள்ளத்திலும், இல்லத்திலும், சமுதாயத்திலும் மற்றும் நாட்டிலும் அமைதி பிறக்கும். எனவே, உயிர்த்த இயேசுவின் அமைதியில் குடிகொள்வோம். தூய பிரான்சிஸ் அசீசியார் ஜெபித்தது போல், அன்னை தெரசா ஜெபித்தது போல் "இறைவா என்னை உமது அமைதியின் கருவியாக்கும்" என உயிர்த்த ஆண்டவர் தரும் முதல் செய்தியாம் அமைதியை நம் வாழ்விலும் பெற்றுக் கொள்வோம்.

சிறப்பாக இலங்கை மற்றும் உக்ரைன் நாடுகளில் மீண்டுமாக அமைதி நிலவ இன்றைய நாளிலே செபிப்போம். இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

அருட்பணி. அ. குழந்தை யேசு ராஜன் CMF

                     காணொளியில் காண/ஆடியோவில் கேட்க ...

புத்தம் புதிய காணிக்கைப் பாடல்

(கேட்டு மகிழுங்கள்)

https://youtu.be/NKp1EXTZLWw

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பாஸ்கா காலம் 5-ஆம் ஞாயிறு - ( ஆண்டு- C) -----15-05-2022 - ஞாயிற்றுக்கிழமை

 

முதல் வாசகம்: திப 14: 21b-27

இரண்டாம் வாசகம்: 21: 1-5

நற்செய்தி:  யோவான் 13: 31-33a, 34-35

இயேசு தந்த ID Card...

இன்றைக்கு பள்ளி செல்லும் குழந்தைகள், கல்லூரி செல்லும் இளைஞர்கள் மற்றும் அலுவலகங்கள் செல்வோர் என குழந்தை முதல் பெரியவர் வரை எல்லோருக்கும் கொடுக்கப்பட்டிருப்பது அடையாள அட்டை என்னும் ID Card. இது ஒருவர் யார்? அவர் எந்த பள்ளியை, கல்லூரியை, அலுவலகத்தை சார்ந்தவர் மற்றும் என்ன செய்கிறார்? என்பதை சுட்டிக் காட்டுகின்ற ஒரு அடையாளமாக இருக்கிறது. மனிதன் ஒரு நிறுவனத்தை சார்ந்தவன் என்பதற்கு இந்த அடையாளம் இன்று இன்றியமையாததாகவும் மாறிவிட்டது. அனைத்திற்கும் அடையாள அட்டையை தந்து கொண்டிருக்கின்ற மற்றும் அடையாளத்தை ஏற்படுத்தி கொண்டிருக்கின்ற அடையாள சமுதாயத்தில் கிறிஸ்துவின் சீடத்துவ வாழ்விற்கும் ஒரு அடையாள அட்டை உண்டு என்பதை நினைவுபடுத்துகின்றது இன்றைய இறைவார்த்தை வழிபாடு.

"நீங்கள் ஒருவர் மற்றவருக்குச் செலுத்தும் அன்பிலிருந்து நீங்கள் என் சீடர்கள் என்பதை எல்லாரும் அறிந்து கொள்வர்” (யோவான் 13:35) என்னும் இன்றைய நற்செய்தியில் இயேசுவின் வார்த்தைகள் அவரது இறப்பு மற்றும் உயிர்ப்புக்கு முன்னரே அவருடைய சீடர்களாக நாம் வாழ்வதற்கு அவர் அன்பென்னும் ஒரு அடையாள அட்டையை நம் ஒவ்வொருவருக்கும் வழங்கியிருக்கின்றார் என்பதையும், இந்த அடையாளத்தால் நாம் இறைவனை அன்பு செய்வது மட்டுமல்லாது, நம்முடன் இருக்கின்ற சகோதர சகோதரிகளையும் அன்பு செய்து இயேசுவின் சீடர்கள் என்னும் அடையாளத்தில் நிலைத்திருக்க அழைப்பு பெறுகின்றோம். யோவான் எழுதிய நற்செய்தி இரண்டு பகுதிகளை கொண்டிருக்கின்றது. 1 முதல் 12 வரை உள்ள அதிகாரங்கள் முதல் பகுதியாகவும், 13 முதல் 21 வரை உள்ள அதிகாரங்கள் இரண்டாவது பகுதியாகவும் தரப்பட்டிருக்கிறது. முதல் பகுதியில் இயேசுவின் புதுமைகள் அரும் அடையாளங்கள் என்ற பெயரில் தரப்பட்டிருக்கிறது, இயேசு ஒவ்வொரு அடையாளத்தையும் செய்து இறையாட்சியை அறிவிப்பதை பார்க்கின்றோம். எடுத்துக்காட்டாக ஆறாவது அதிகாரத்தில் இயேசு நற்கருணையை பற்றி எடுத்துரைப்பதற்கு முன்பாக ஐயாயிரம் பேருக்கு உணவளிக்கும் அடையாளம் நிகழ்வதை பார்க்கின்றோம். இவ்வாறாக முதல் 12 அதிகாரத்தில் இயேசுவின் அடையாளங்களை கொடுத்த நற்செய்தியாளர் மீதமுள்ள அதிகாரங்களில் இயேசு நமக்கு நிரந்தரமாக தரவிருக்கின்ற அன்பின் அடையாளத்தை பற்றியும், இந்த அடையாளம் அவரது இறப்பு மற்றும் உயிர்ப்பினால் நிகழவிருக்கின்றது என்பதையும் எடுத்துரைக்கின்றார்,

                    இதைத்தான் இன்றைய நற்செய்தியும் நமக்கு எடுத்தியம்புகிறது. இறைமகன் இயேசு கிறிஸ்து அன்பு என்னும் புதிய கட்டளையை தருகின்றார். இதில் அப்படியென்ன புதியது இருக்கின்றது என சிந்திக்கும் பொழுது பழைய ஏற்பாட்டில் "உன் மீது நீ அன்புகூர்வதுபோல் உனக்கு அடுத்திருப்பவர் மீதும் அன்பு கூர்வாயாக" (லேவியர் 19:18) என்னும் கட்டளையை, புதியதாக "நான் உங்களிடம் அன்பு செலுத்தியது போல நீங்களும் ஒருவர் மற்றவரிடம் அன்பு செலுத்துங்கள்" (யோவான் 13:34) என்கின்றார். பழைய ஏற்பாட்டில் அன்பிற்கான அளவுகோலாக "உன் மீது அன்பு கூர்வது போல..." என நம்மையே கொடுக்கப்பட்டிருந்தது. புதிய ஏற்பாட்டில் அன்பின் அளவு கோலாய் "நான் உங்களிடம் அன்பு செலுத்தியது போல..." என இயேசு தன்னையே தருகிறார். மனிதர்களாகிய நாம் ஒவ்வொருவரும் சாதித்தவர்களை தான் பின்பற்ற விரும்புகின்றோம், இயேசு அன்பில் சாதித்தவர்.

               பழைய ஏற்பாட்டில் இயற்கையில் அடையாளத்தை வெளிப்படுத்திய இறைவன், பின்பு இஸ்ராயேல் மக்களின் மீது தனது அன்பை அடையாளமாய் வெளிப்படுத்த இறைவாக்கினர்களையும், நீதித்தலைவர்களையும் மற்றும் அரசர்களையும் அனுப்பி, புதிய ஏற்பாட்டில் தன் அன்பின் மிகுதியால் "என் அன்பார்ந்த மைந்தர் இவரே, இவர் பொருட்டு நான் பூரிப்படைகிறேன். இவருக்குச் செவிசாயுங்கள்" (மத்தேயு 3:17) என தன் அன்பின் மகனையே இவ்வுலகிற்கு அனுப்பி வைத்தார். அன்பாய் மண்ணுலகில் மனிதனாக உருவெடுத்து, அன்பை விதைத்து, அன்பை வாழ்ந்து காட்டி மற்றும் தனது அன்பின் மிகுதியால் தன்னுயிரையும் தந்து மீண்டும் அன்பையே நமக்கு அடையாளமாக விட்டுச் சென்ற இயேசு அன்பென்னும் அடையாள அட்டையை அணிந்து கொண்டு அன்பின் சமுகத்தை உருவாக்க அழைப்பு தருகிறார். இதைத்தான் இன்றைய இரண்டாம் வாசகத்தில் "புதிய எருசலேம்" என்னும் அன்பின் அடையாளமும், முதல் வாசகத்தில் திருத்தூதர்கள் அன்பினால் கட்டியெழுப்பிய தொடக்க "திருஅவை" என்னும் அடையாளமும் அன்பு சமுதாயத்தின் எடுத்துக்காட்டாக நமக்கு தரப்பட்டிருக்கிறது. "நான் பசியாய் இருந்தேன், நீங்கள் எனக்கு உணவு கொடுக்கவில்லை; தாகமாயிருந்தேன், என் தாகத்தைத் தணிக்கவில்லை.நான் அன்னியனாய் இருந்தேன், நீங்கள் என்னை ஏற்றுக் கொள்ளவில்லை. ஆடையின்றி இருந்தேன், நீங்கள் எனக்கு ஆடை அளிக்கவில்லை. நோயுற்றிருந்தேன், சிறையிலிருந்தேன், என்னைக் கவனித்துக்கொள்ளவில்லை’ (மத்தேயு 25: 42-43) என இயேசு கொடுத்த அடையாளத்தை பயன்படுத்தி நம் சகோதர சகோதரிகளை அன்பு செய்து வாழாமலிருந்த தருணங்களுக்கு ஒரு நாள் பதில் கொடுக்க வேண்டும். இந்த மனித சமுதாயம் என்று அன்பின் சமுதாயமாக மாறுகிறதோ, அன்று வேதனைகள் குறையும், ஆறுதல் கிடைக்கும், நம்பிக்கை பிறக்கும் மற்றும் புதுவாழ்வு மலரும்.

                        நம் எல்லோருக்கும் தேளை காப்பாற்றிய குருவின் கதை நன்றாகவே தெரியும். ஆற்றங்கரைக்கு சென்ற குரு ஆற்றின் ஓரத்திலே தண்ணீரில் தத்தளித்த தேளை கண்டு அதை காப்பாற்ற தூக்குகிறார். அதை தூக்கும் பொழுது தேளானது குருவின் கையில் கொட்டியது, வலியால் அவர் அதை தூக்கிப் போடுகிறார், அது மீண்டும் தண்ணீரில் தத்தளிக்கிறது. சிறிது நேரம் கழித்து அதை காப்பாற்ற குரு தேளை பிடித்து தூக்குகிறார், அது குருவின் கையில் மீண்டும் கொட்டியது. இதைப் பார்த்த அவருடைய சீடர்கள் குருவே தேள் தான் உங்களை கொட்டுகிறதே, ஏன் நீங்கள் அதை காப்பாற்றுகிறீர்கள் என்று கேட்டார்கள். அதற்கு குரு கொட்டுவது தேளின் குணம், காப்பாற்றுவது எனது குணம் என்று கூறினார். யார் எப்படியிருந்தாலும் கிறிஸ்தவர்களின் அதாவது கிறிஸ்தவ சீடர்களின் குணம் அன்பு செய்வதாகும். இன்றைக்கும் திருஅவையில் திருவருட்சாதனங்கள், திருப்பலி, ஜெபமாலை மற்றும் திருவழிபாடுகள் என அனைத்தின் வழியாகவும் இறைவன் நமக்குத் தந்திருக்கும் அன்பென்னும் அடையாள அட்டையை நாம் உணர்ந்து அதை நம் சகோதர சகோதரிகளிடத்தில் வெளிப்படுத்த, உண்மை கிறிஸ்தவ மற்றும் சீடத்துவ வாழ்வை வாழ வழிகள் உண்டு. இதை நாம் அன்றாட வாழ்க்கையில் முறையாக பயன்படுத்தி, நிலையாய் செயல்படுத்தி, வளமாய் வாழ முயற்சிப்போம்.

அன்புடன்:-

அருட்பணி. அ. குழந்தை யேசு ராஜன் CMF

                     காணொளியில் காண/ஆடியோவில் கேட்க ...

புத்தம் புதிய காணிக்கைப் பாடல்

(கேட்டு மகிழுங்கள்)

https://youtu.be/NKp1EXTZLWw

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பாஸ்கா காலம் 4-ஆம் ஞாயிறு - ( ஆண்டு- C) -----08-05-2022 - ஞாயிற்றுக்கிழமை

 

முதல் வாசகம்: திப 13: 14, 43-52

இரண்டாம் வாசகம்: 13: 14, 43-52

நற்செய்தி:  யோவான் 10: 27-30

வாழ்வு தரும் நல்லாயன்

ஒரு ஆசிரியர் தன்னுடைய வகுப்பில் அதிகம் சேட்டை செய்த ஒரு பையனை எழுப்பி, கரும்பலகையில் நூறு என்று எழுதி இது எவ்வளவு என்று கேட்டார். அதற்கு அந்தப் பையன் இதெல்லாம் ஒரு கேள்வியா என நினைத்து நூறு என்று சொன்னான். உடனே ஆசிரியர் அதன் வலது பக்கத்தில் மற்றொரு பூஜ்ஜியத்தை இட்டு, இது எவ்வளவு என்று மீண்டும் கேட்டார். அதற்கு அந்தப் பையன் ஆயிரம் என்றான். உடனே ஆசிரியர் மீண்டும் அதன் வலது பக்கத்தில் மற்றொரு பூஜ்ஜியத்தையிட்டு, இது எவ்வளவு என்று கேட்டார். அதற்கு அவனோ பத்தாயிரம் என்றான். இப்பொழுது ஆசிரியர் பத்தாயிரத்திற்கு இடதுபக்கம் ஒரு பூஜ்ஜியத்தை இட்டு இது எவ்வளவு என்று கேட்டார், அந்தப் பையன் 10,000 தான் என்றான். மீண்டும் ஆசிரியர் இடது பக்கத்தில் மற்றொரு பூச்சியத்தை இட்டு இது எவ்வளவு என்று கேட்டார். அதற்கு அந்தப் பையன் பத்தாயிரம் தான் என்றான். இப்போது ஆசிரியர் அந்த பையனை பார்த்து நூறுக்கு பின்னால் பூஜ்ஜியத்தை சேர்த்து கொண்டே செல்கின்ற பொழுது அதன் மதிப்பு உயர்ந்து கொண்டே சென்றது, ஆனால், அதே பூஜ்ஜியத்தை முன்னால் சேர்க்கும் பொழுது அதன் மதிப்பு அப்படியே இருந்தது, இதை போலத்தான் நமது வாழ்க்கையும் என்றார். உன்னை வழிநடத்துபவர்களை நீ பின்பற்றினால் வாழ்க்கையில் மதிப்பு கூடும், ஆனால் அவர்கள் முன் நீ செல்ல நினைத்தால் வாழ்க்கையில் உனக்கு உயர்வே இராது என்றார். இன்றைய நற்செய்தி வாசகமும் நமக்கு இதைத்தான் எடுத்துரைக்கின்றது. நம்மை வழி நடத்துகின்ற நல்ல ஆயனாம் இயேசுவை நாம் பின்பற்றுகின்ற போது, அவர் நமக்கு நிலைவாழ்வை தருவார். "நல்ல ஆயன் நானே. நல்ல ஆயர் ஆடுகளுக்காகத் தம் உயிரைக் கொடுப்பார்" (யோவான் 10:11) என்றுரைத்து அதை வாழ்ந்து காட்டிய இறைமகன் இயேசு கிறிஸ்து நல்லாயனாக இருக்கின்றார். இந்த நல்லாயனை பின்பற்றினால் நிலை வாழ்வை பெறுவோம் என்னும் சிந்தனையை நம்முன் வைக்கின்றது இன்றைய இறைவார்த்தை வழிபாடு.

ஆயன் - ஆடுகள்:-

பழைய ஏற்பாட்டில் இஸ்ராயேல் மக்களுக்கும் இறைவனுக்கும் உண்டான உறவு ஆயன் மற்றும் ஆடுகளுக்கான உறவை போன்றது என்பதை எசேக்கியேல் இறைவாக்கினர் வழியாக நாம் உணர இயலும். "நானே என் மந்தையை மேய்த்து, இளைப்பாறச் செய்வேன், என்கிறார் தலைவராகிய ஆண்டவர்" (34:15). "நல்ல மேய்ச்சல் நிலத்தில் அவற்றை மேய்ப்பேன். இஸ்ரயேலின் மலையுச்சிகளில் அவற்றின் மேய்ச்சல் நிலம் இருக்கும். அங்கே வளமான மேய்ச்சல் நிலத்தில் அவை இளைப்பாறும். இஸ்ரயேலின் மலைகளின்மேல் செழிப்பான மேய்ச்சல் நிலத்தில் அவை மேயும்" (34:14). "காணாமல் போனதைத் தேடுவேன்; அலைந்து திரிவதைத் திரும்பக் கொண்டு வருவேன்; காயப்பட்டதற்குக் கட்டுப்போடுவேன்; நலிந்தவற்றைத் திடப்படுத்துவேன். ஆனால், கொழுத்ததையும் வலிமையுள்ளதையும் அழிப்பேன். இவ்வாறு நீதியுடன் அவற்றை மேய்ப்பேன்" (34:16) என இறைவன் ஆயனாக இருந்து இஸ்ராயேல் மக்களை வழி நடத்தியதையும், இந்த ஆயனின் பண்பு நலன்களையும் எடுத்துரைக்கின்றார். மேலும், "என் இதயத்திற்கேற்ற மேய்ப்பர்களை உங்களுக்குக் கொடுப்பேன். அவர்கள் உங்களை அறிவுடனும், முன்மதியுடனும் வழிநடத்துவார்கள்" (எரேமியா 3:15) என வரவிருக்கின்ற மெசியா நல்ல ஆயனாக இருப்பார் என்பதையும் இறைவாக்கினர் எரேமியா வழியாக இறைவன் பழைய ஏற்பாட்டிலே முன்அறிவித்திருக்கிறார். புதிய ஏற்பாட்டில் ஏரோது அரசன் யூதர்களின் அரசராக இயேசு பிறக்க போகின்றார் என்பதை ஞானிகளின் வழியாக அறிந்து அதை உறுதிப்படுத்த, தலைமைக் குருக்களையும் மறைநூல் அறிஞர்களையும் அழைத்து கேட்ட போது அவர்கள் ஏரோதிடம், "என் மக்களாகிய இஸ்ரயேலை ஆயரென ஆள்பவர் ஒருவர் உன்னிலிருந்தே தோன்றுவார்" (மத்தேயு 2:5-6) என பிறக்கவிருக்கும் இயேசு ஆயரென தோன்றுவார் என்றனர். இயேசு தனது பணி வாழ்வில் தன்னையே நல்ல ஆயன் என்றுரைத்தும் (யோவான் 10:11), நல்ல ஆயனை போல மக்கள் மீது பரிவு கொண்டு வாழ்ந்தும் (மத்தேயு 14: 13-21) மற்றும் நூறு ஆடுகளில் தொலைந்து போன ஒரு ஆட்டினை கண்டறியும் ஆயனின் உவமையை எடுத்துரைத்தும் வாழ்ந்தார் (லூக் 15:1-9). இவையனைத்திற்கும் மேலாக ஒரு ஆயன் தன்னுடைய ஆடுகளுக்காக தன் உயிரையும் கொடுப்பான் என்பதை கல்வாரி மலையில் தன்னுயிரை சிலுவையில் தந்து செய்தும் காட்டினார் (யோவான் 19: 28-30).

ஆயன் தரும் நிலைவாழ்வு

"ஆண்டவரே கடவுள் என்று உணருங்கள்! அவரே நம்மைப் படைத்தவர்! நாம் அவர் மக்கள், அவர் மேய்க்கும் ஆடுகள்!" (திருப்பாடல்கள் 100:3) என்னும் திருப்பாடல் ஆசிரியரின் வார்த்தைகளுக்கு ஏற்ப ஆயனாக இருக்கின்ற இறைமகன் இயேசு கிறிஸ்து நம் ஒவ்வொருவருக்கும் நிலை வாழ்வை தருகின்றார் என்பதை இன்றைய நற்செய்தி வாசகம் உறுதிப்படுத்துகிறது. இன்றைய முதல் வாசகம் திருத்தூதரான பவுல் சிறந்த ஆயன் என்பதை சுட்டிக்காட்டுகிறது. இன்றைய இரண்டாம் வாசகம் நாம் பெறவிருக்கின்ற நிலை வாழ்வு எப்படியிருக்கும் என்பதை நமக்கு குறிப்பிட்டு காட்டுகிறது. அந்த நிலையான வாழ்வில் நமக்கு பசியே மற்றும் தாகமே இராது மற்றும் தேவ ஆட்டுக்குட்டி வாழ்வளிக்கும் நீரூற்றுக்கு நம் ஒவ்வொருவரையும் வழிநடத்தி செல்லும், அங்கு கிறிஸ்துவின் மந்தைகள் மகிழ்வாய் இருக்கும் என்பதையும் எடுத்துரைக்கிறது. ஆயன் தரும் நிலைவாழ்வை நாம் பெற்று கொள்ள இரண்டு நற்பண்புகளை நாம் கொண்டிருக்க வேண்டும் என்கிறார் இறைமகன் இயேசு.

1. அவர் குரலுக்கு செவி கொடுத்தல்
(இறைவார்த்தைக்கு செவி கொடுப்போம்)

ஆடுகள் ஆயனின் குரலுக்கு செவி கொடுத்தால் மட்டுமே, எந்த ஒரு ஆபத்துமின்றி, ஆயனின் வழியில் நலமோடு அதன் கொட்டிலை சென்று அடைய இயலும். கிறிஸ்தவர்களாகிய நாம் நிலைவாழ்வை பெற்றுக் கொள்ள ஆயனாம் இயேசுவின் குரலுக்கு செவி கொடுக்க வேண்டும். நமது அன்றாட வாழ்வில் இயேசுவின் குரலுக்கு செவி கொடுத்தல் என்பது இறை வார்த்தைக்கு செவி கொடுத்தலாகும். உயிருள்ள மற்றும் வாழ்வு கொடுக்கின்ற வார்த்தைகளை ஒவ்வொரு நாளும் கேட்பதற்கு நமக்கு வாய்ப்புகள் பல வழிகளில் தரப்பட்டாலும், நம்முடைய இல்லங்களில் விவிலியங்கள் இருந்தாலும், அதை வாசித்து மற்றும் அதற்கு செவி கொடுத்து அதை வாழ்வாக்குகின்ற கிறிஸ்தவர்களுக்கு தான் நிலைவாழ்வு கிடைக்கும் என்றுரைக்கின்றார். இன்றைக்கு ஆயனின் வார்த்தையாம் இறைவார்த்தைக்கு செவி கொடுத்து வாழ நாம் தயாராக இருக்கின்றோமா? சிந்திப்போம்.

2. அவரை பின்பற்றுதல்
(கிறிஸ்தவ வாழ்வு)

ஆடுகள் ஆயனை பின்பற்றினால் மட்டுமே சரியான பாதையில் ஆட்டுக் கொட்டிலை சென்றடைய இயலும். என்னைப் பின்பற்றி வாருங்கள் என்று கூறிய ஆயனாம் இயேசுவை பின்பற்றுகின்ற கிறிஸ்தவர்களாக நாம் வாழ அழைக்கப்படுகின்றோம், அதுவே நிலை வாழ்வுக்கான வாயிலாக அமைகின்றது. இன்றைக்கு ஆயனாம் இயேசுவை பின்பற்ற திருஅவை நமக்கு எண்ணற்ற வழிகளை ஏற்படுத்தி தந்திருக்கின்றன. திருவருட்சாதனங்கள் நமக்கு திருஅவை தந்த மிகப்பெரிய கருவிகளாக இருக்கின்றது, இன்னும் குறிப்பாக ஒவ்வொரு நாளும் நாம் பங்கேற்க வேண்டிய திருப்பலி மற்றும் குடும்ப ஜெபமாலை நம்மை இயேசுவைப் பின்பற்ற தயாரிக்கின்ற சிறந்த கருவிகளாகும். இவைதான் நமக்கு சிறந்த கிறிஸ்தவ வாழ்வை தரும், அதுவே நிலை வாழ்வுக்கு நம்மை இட்டுச் செல்லும். தினமும் திருப்பலியில் பங்கு கொண்டு மற்றும் செபமாலை செபித்து நல்லதொரு கிறிஸ்தவ வாழ்வை வாழ்ந்து ஆயனை பின்பற்ற தயாராக இருக்கின்றோமா? சிந்திப்போம்.

"ஆண்டவரே என் ஆயர்; எனக்கேதும் குறையில்லை" (திருப்பாடல்கள் 23:1) என்னும் திருப்பாடல் ஆசிரியரின் வார்த்தைகளுக்கு ஏற்ப, நம் ஆயனாம் இயேசு நம்மோடு இருக்கையில் எந்த குறையுமில்லை என்று மகிழ்வோடு வாழ்வோம். ஆயினின் குரலுக்கு செவி கொடுத்து மற்றும் அவரைப் பின்பற்றி அவர் தரும் நிலை வாழ்வைப் பெற்றுக் கொள்வோம். இறைவன் நம் ஒவ்வொருவரையும் ஆசீர்வதிப்பார்.

அன்புடன்:-

அருட்பணி. அ. குழந்தை யேசு ராஜன் CMF

                     காணொளியில் காண/ஆடியோவில் கேட்க ...

புத்தம் புதிய காணிக்கைப் பாடல்

(கேட்டு மகிழுங்கள்)

https://youtu.be/NKp1EXTZLWw