🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - திருவருகைக்காலம் முதல் ஞாயிறு - ( ஆண்டு- C) ----- 28-11-2021- ஞாயிற்றுக்கிழமை

 

முதல் வாசகம் : 

                  எரேமியா  33: 14-16

இரண்டாம் வாசகம் : 

                 1தெசலோனிக்கர்    3: 12 - 4: 2

நற்செய்தி:-

      லூக்கா 21: 25-28, 34-36

காத்திருப்போம் வருகைக்காய்...

இந்தியாவில் அதிலும் குறிப்பாக தமிழகத்தில் பிறந்து இன்று உலகம் அறிந்தவர் தான் கூகுள் நிறுவனத்தின் CEO சுந்தர் பிச்சை. இவர் ஒரு முறை தேனீர் நிலையம் ஒன்றுக்கு செல்கிறார். அங்குள்ள உதவியாளரை அழைத்து தேனீரை கேட்கின்றார், அதன் பிறகு அந்த தேனீர் நிலையத்தில் ஆங்காங்கே உட்கார்ந்து தேனீர் குடித்துக் கொண்டிருப்பவர்களை பார்க்கின்றார். ஒரு மேசையில் அமர்ந்திருந்த ஒரு குழுவினர் திடீரென்று கூச்சலிடுவதை பார்க்கின்றார். ஏன் இந்த கூச்சலென்று பார்த்த போது, அங்கு ஒரு கரப்பான்பூச்சி ஒருவர் மேல் உட்கார்ந்திருந்தது. சிறிது நேரத்தில் அந்த கரப்பான் பூச்சி அடுத்த மேசையிலிருந்த ஒருவர் மீது உட்கார அங்கிருந்தவர்களும் எழுந்து பெரும் கூச்சலிட்டனர். இவ்வாறு அந்த கரப்பான் பூச்சி இரண்டு மூன்று நபர்கள் மீது உட்கார அவர்களும் சத்தம் போட ஆரம்பித்தார்கள். அதன் பிறகு அந்த கரப்பான்பூச்சி அங்கிருந்த உதவியாளர் மீது உட்கார்ந்தது. ஆனால், அந்த நபர் எந்த ஒரு சத்தமும் போடவில்லை, சிறிது நேரம் அமைதியாக காத்திருந்தார். அந்த கரப்பான் பூச்சி அவர் மேல் மெல்ல ஏறி நகர்ந்தது. அதன்பின் சிறிது நேரத்தில் அது அமைதியாக உட்கார அவர் அந்த கரப்பான் பூச்சியை பிடித்து வெளியே எடுத்து சென்று அதைக் கொன்று போட்டாராம். இந்நிகழ்வை பற்றி சுந்தர் பிச்சை கூறும் பொழுது, "இன்று உலகில் எவருக்கும் காத்திருக்குமளவுக்கு பொறுமையில்லை, யாருக்கும் காத்திருக்க நேரமுமில்லை. தேனீர் நிலையத்தில் அந்த உதவியாளரை போல மற்றவர்களும் சிறிது நேரம் அமைதியாய் காத்திருந்தால் கரப்பான் பூச்சியை பிடிக்க முடிந்திருக்கும்" என்கிறார். இன்று நாம் அனைவரும் உடனடி உலகத்தில் இருக்கின்றோம். எல்லாமே நமக்கு உடனடியாக நடந்துவிட வேண்டும் மற்றும் உடனடியாக கிடைத்துவிட வேண்டும் என்று எண்ணுகின்றோம். நாம் எதிலும், எதற்காகவும் எத்தகைய சூழலிலும் காத்திருக்க மனமில்லாமல் இருக்கின்றோம். இத்தகைய ஒரு சூழலில் தான் காத்திருப்பதற்கு ஒரு காலம் நமக்குத் தரப்பட்டிருக்கிறது. அதுதான் நாம் அடியெடுத்து வைத்திருக்கும் திருவருகைக்காலம். திருவருகைக் காலத்தில் நாம் ஒவ்வொருவரும் இறைவனுக்காக, அவர் வருகைக்காய் காத்திருக்க இன்றைய இறைவார்த்தையின் வழியாய் அழைக்கப்படுகின்றோம்.

'திருவருகை' அதாவது ஆங்கிலத்தில் 'Advent' என்னும் வார்த்தை இலத்தீன் மொழியின் Advenio என்னும் வார்த்தையிலிருந்து வருகின்றது. இது தமிழில் "வருகிறார்" அல்லது "வந்து கொண்டிருக்கிறார்" என பொருள்படும். திருவருகை காலத்திலே இயேசுவின் வருகைக்காக எதிர்பார்த்து, நம்மை நாமே தயாரித்து காத்து கொண்டிருக்க அழைக்கப்படுகின்றோம். இக்காலம், இறை மகனின் வருகைக்காக நம்மை தயாரிக்கின்ற காலம். விழித்திருந்து நம் மீட்பரை சந்திக்க நம்மை அழைக்கின்ற காலம். அவர் வருகைக்காய் நாம் நம்பிக்கையோடு காத்திருக்க வேண்டிய காலம்.

இயேசுவின் வருகையை மூன்று நிலைகளில் எடுத்துரைக்கலாம். இந்த நிலைகள் மூன்று விதமான காத்திருப்புகளின் வெளிப்பாடு.

‌ 1. வரலாற்றில் வருகை

(இஸ்ராயேல் மக்களின் காத்திருப்பு)

வரலாற்றில் மானிடகுல மீட்புக்காக இறைமகன் இயேசு மானிடத்தின் ஆடையை அணிந்து மனிதனாக இம்மண்ணுலகில் வந்ததை காட்டுகிறது. இது பாலகன் இயேசுவின் வருகையாம் தெய்வம் மனித குழந்தையாக பிறந்ததாகும் (லூக்கா 1:6-7). இது காத்திருப்பின் அடையாளம், மீட்பின் அடையாளம். ஈராயிரம் ஆண்டுகளாக இஸ்ராயேல் மக்கள் காத்திருந்ததன் வெளிப்பாடு. ஆபிரகாம் முதல் மரியா வரை காத்திருந்ததை வெளிப்படுத்துவது தான் இந்த வரலாற்று வருகை(எசாயா 7:14). ஆக, பழைய ஏற்பாட்டின் மையமே வரவிருக்கும் மெசியாவின் வருகைக்காய் காத்திருந்தது தான்.

2. மாட்சியில் வருகை

(உடனிருந்தவர்களின் காத்திருப்பு)

இயேசுவினுடைய இறப்புக்கு பிறகு அவர் மாட்சியோடு மூன்றாம் நாள் உயிர்த்தெழுந்தது தான் இந்த மாட்சியின் வருகை. தங்களோடு இருந்த இயேசு மாபெரும் அரசராவார் என எதிர்பார்த்த அப்போஸ்தலர்களும், சீடர்களும் அவரது இறப்புக்கு பிறகு என்ன நடக்குமோ என எண்ணி ஏங்கி அவருக்காய் மீண்டும் காத்திருந்தனர். “மானிட மகன் பலவாறு துன்பப்படவும் மூப்பர்கள், தலைமைக் குருக்கள், மறைநூல் அறிஞர் ஆகியோரால் உதறித் தள்ளப்பட்டுக் கொலை செய்யப்படவும் மூன்றாம் நாளில் உயிருடன் எழுப்பப்படவும் வேண்டும்” (லூக்கா 9:22) ) என்று இயேசு சொன்னதன் பின்னணியில் இந்த காத்திருப்பு அமைகிறது. இயேசு உடனிருந்தவர்களை சந்திக்க தனது உயிர்ப்பில் மாட்சியோடு வந்தார்.

3. தீர்ப்பில் வருகை

(கிறிஸ்தவர்களின் காத்திருப்பு)

"நான் உங்களுக்குக் கட்டளையிட்ட யாவையும் அவர்களும் கடைப்பிடிக்கும்படி கற்பியுங்கள். இதோ! உலக முடிவுவரை எந்நாளும் நான் உங்களுடன் இருக்கிறேன்” (மத்தேயு 28:20) என்று கூறிய இயேசு என்றும் நம்மோடு இருக்கிறார், இவர் இறையாட்சிக்குள் நம்மை அழைத்து செல்ல மீண்டும் இரண்டாம் முறை நீதி தீர்ப்பீட வருவார் என ஆவலோடு கிறிஸ்தவர்களாகிய நாம் ஒவ்வொருமே நம்பிக்கையோடு காத்திருக்கின்றோம். இது இறையாட்சிக்குள் அழைத்து செல்ல தீர்ப்பில் இயேசுவின் வருகையை காட்டுகிறது. இன்றைய நற்செய்தி வாசகம்கூட அவரின் இந்த வருகையின் போது நிகழும் மூன்று விதமான அடையாளங்களை காட்டுகிறது.

1. விண்ணில் அடையாளம்: கதிரவன், நிலா மற்றும் விண்மீன்களில் மாற்றம் ஏற்படும் (லூக்கா 21:25) என இன்றைய நற்செய்தி பகுதியில் குறிப்பிடுவது இயேசுவின் வருகையின் போது விண்ணில் ஏற்படும் அடையாளங்களை காட்டுகிறது.

2 மண்ணில் அடையாளம்: மண்ணுலகில் கடல் கொந்தளிப்பும் முழக்கமும் ஏற்படும் (லூக்கா 21:25) என குறிப்பிடுவது இயேசுவின் வருகையின் போது மண்ணில் ஏற்படும் அடையாளங்களை காட்டுகிறது.

3. மனிதரில் அடையாளம்: மக்களிடத்தில் குழப்பம், அச்சம் மற்றும் மயக்கம் ஏற்படும் (லூக்கா 21:25-26) என குறிப்பிடுவது இயேசுவின் வருகையின் போது மனிதரில் ஏற்படும் அடையாளங்களை காட்டுகிறது.

இன்று நாம் ஓடி ஓடி உழைத்துக் கொண்டிருக்கின்ற உடனடி உலகத்தில் சற்று நேரம் காத்திருக்க கற்றுக் கொள்வோம். இந்த காத்திருப்பு நமக்கானது, நம்முடைய வாழ்விற்கானது. இதற்காக நம்மைத் தேடி 'நான் உன்னுடைய உள்ளத்தில், இல்லத்தில் மற்றும் வாழ்க்கையில் வர தயாராக இருக்கின்றேன்' என சொல்லக்கூடிய அந்த இறைவனுக்காக காத்திருப்போம். இஸ்ரயேல் மக்கள் மெசியாவின் வருகைக்காக காத்திருந்தது போல நாமும் காத்திருப்போம். விளக்குகளுடன் அன்று இயேசு மொழிந்த பத்து தோழியர் உவமையில் அக்கன்னியர்கள் காத்திருந்ததை போல நாமும் விளக்குகள் ஏற்றி மணமகனின் வருகைக்காக இந்த திருவருகை காலத்தில் நம்பிக்கையோடு நம்மையே தயார் செய்து காத்திருப்போம். இறைவன் நம்மை ஆசீர்வதிப்பார்.

ஆடியோவாக கேட்க...

                                    https://youtu.be/IX3Hn0OrTlA

அன்புடன்,

அருட்பணி. அ. குழந்தை யேசு ராஜன் CMF

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - கிறிஸ்து அரசர் பெருவிழா - ( ஆண்டு- B) ----- 21-11-2021- ஞாயிற்றுக்கிழமை

 

 

முதல் வாசகம் : 

                  தானியேல்  7: 13-14

இரண்டாம் வாசகம் : 

                  திருவெளிப்பாடு  1: 5-8

நற்செய்தி:-

      யோவான் 18: 33-37

விவிலிய விளக்கம்:-

            இயேசுவின் காலத்தில் யூதர்கள் உரோமையர்களுக்கு கீழ் இருந்தார்கள். யூதர்கள் தனியாக அரசமைக்க அதிகாரம் உரோமையர்களால் வழங்கப்பட்டிருந்தது, ஆனால் யாரையும் கொல்ல அவர்களுக்கு அதிகாரம் தரப்படவில்லை. எருசலேம் நகர் அழிவிற்கு 40 ஆண்டுகளுக்கு முன்பாகவே இந்த அதிகாரமானது இஸ்ராயேல் மக்களிடமிருந்து உரோமையர்களால் எடுக்கப்பட்டது. பாலஸ்தீன நாட்டின் முதல் ஆளுநராக இருந்த கோபோசுஸ் மற்றும் ஜோசபுஸ் கூற்றுப்படி எவரையும் மரண தண்டனைக்கு தீர்ப்பிட அதிகாரம் ஆளுநருக்கு மட்டுமே உள்ளது. யூதர்கள் எவரையாவது கொல்ல வேண்டுமென்றால் இறைவனின் பெயரை பழித்துரைத்தவரை மட்டுமே கல்லால் எறிந்து கொல்ல முடியும். (லேவியர் 24: 16) அதுவும் சாட்சி முதலில் கல் எரிய மற்றவர் அதன்பின் எறிவார்கள் (இனைச்சட்டம் 17:7). எனவே தான் யூதர்கள் இன்றைய நற்செய்தியில் இயேசுவை பிலாத்துவின் முன்பு கொண்டு வந்தார்கள் (யோவான் 18:31).

 மறையுரை:-

          இறைமைந்தன் இயேசு கிறிஸ்து அகில உலகத்திற்கும் அரசராக இருக்கின்றார் என்னும் சிந்தனையை தரும் கிறிஸ்து அரசர் பெருவிழாவை கொண்டாடி மகிழ்கின்றோம். கத்தோலிக்கத் திருஅவையில் 1925-ஆம் ஆண்டு திருத்தந்தை பதினொன்றாம் பத்திநாதர் அவர்களால் இத்திருவிழா அறிவிக்கப்பட்டது. 

இதன் வரலாறு பல ஆண்டுகள் முன்பே துவங்கி விட்டது எனலாம். திருத்தந்தை பதினொன்றாம் பத்திநாதர் 1922-ஆம் ஆண்டு பிப்ரவரி மாதம் 19-ஆம் தேதி திருத்தந்தையாக அறிவிக்கப்படுகிறார். அதே ஆண்டு டிசம்பர் மாதம் திருத்தந்தை தன்னுடைய முதல் திருத்தூது மடலை திருஅவைக்கு தருகிறார். நான்கு ஆண்டுகளுக்கு முன் நிகழ்ந்த முதல் உலகப்போரின் தாக்கம் இன்னும் இருப்பதாக இதில் குறிப்பிடுகின்றார். இத்தகைய சூழல் முழுவதும் மாற, இவ்வுலகில் அமைதி ஏற்பட அனைவரும் அமைதியின் அரசராம் கிறிஸ்துவை நாட வேண்டும் என்று குறிப்பிடுகின்றார். அமைதியின் அரசராம் கிறிஸ்து மட்டுமே இந்த உலகிற்கு அமைதியை தர முடியும் என்று குறிப்பிடுகின்றார். 1914 முதல் 1918 வரை நிகழ்ந்த முதல் உலகப் போரின் தாக்கம் தொடர்ந்து அதிகரித்துக்கொண்டே இருந்தது. முதல் உலகப்போரின் தாக்கமாக இத்தாலி,ஜெர்மனி, ரஷ்யா மற்றும் பல நாடுகளில் பொதுவுடமை கொள்கையும் மற்றும் மதச்சார்பின்மை கொள்கையும் அதிகமாகி கொண்டே இருந்தது. அதன் விளைவாக கிறிஸ்துவையும், திருஅவையையும் நம்பாத ஒரு சூழல் மக்களிடையே உருவாகியது. இத்தகைய கொள்கையின் அடிப்படையிலேயே நாட்டு தலைவர்கள் இருந்தார்கள். மனித தலைவர்கள் மற்றும் அவர்களின் ஆட்சியை மட்டுமே நம்பி வாழும் சூழலில் மக்கள் மாறினார்கள். இத்தகைய கொள்கைகளோடு அறிவு சார்ந்த கொள்கைகளும் வளர்ச்சி பெற்றது. இதனால் கிறிஸ்துவின் மீதும், திருஅவையின் மீதும் நம்பிக்கையற்ற ஒரு சூழல் தொடர்ந்து நிலவியது. மேலும் பல கிறிஸ்தவர்கள், கத்தோலிக்கர்கள் கூட, கிறிஸ்துவின் அதிகாரத்தையும், திருச்சபையையும் சந்தேகித்தனர்,  கிறிஸ்துவையே சந்தேகித்த ஒரு சூழல் நிலவியது. இத்தருணத்தில் தான் திருத்தந்தை மூன்று ஆண்டுகளுக்குப் பிறகு 1925-ஆம் ஆண்டு அவருடைய மற்றொரு திருத்தூது மடலான Quas Primas-ல் கிறிஸ்து நம் அனைவருக்கும் அரசர் என "கிறிஸ்து அரசர்" பெருவிழாவை கொண்டாட அழைப்பு தருகிறார். இத்திருவிழா திருஅவையில் மூன்று விதமான மாற்றங்களை ஏற்படுத்தும் என திருத்தந்தை பதினொன்றாம் பத்திநாதர் நம்பினார். 

  1. கிறிஸ்துவில் நம்பிக்கை

  2. நிரந்தரமற்ற உலக ஆட்சி

  3. நிலையான இறையாட்சி

 

         இவையே இன்றைய திருவிழாவும், இறைவார்த்தையும் நமக்குத் தருகின்ற அழைப்பாக அமைகின்றது.

 

 1. நம்பிக்கை:-

       முதல் உலகப் போரின் தாக்கமாக கிறிஸ்து மற்றும் திருஅவையின் மீது இருந்த விசுவாசம் குறைந்த தருணத்தில், முழுமையான விசுவாசத்தில் நாம் வளர்வதற்காக திருத்தந்தை இத்திருவிழாவை கொண்டாட அழைப்பு விடுத்தார். (Quas Primas- 31). இன்று இத்திருவிழாவை கொண்டாடும் நாமும் கிறிஸ்துவே நம் அரசர் என்பதை உணர்ந்து அவரில் நம்பிக்கை கொள்ள அழைப்பு பெறுகின்றோம். கிறிஸ்து என்னும் வார்த்தையானது கிறிஸ்துஸ் (Christus) என்னும் கிரேக்க வார்த்தையிலிருந்து வருகிறது. இது அருட்பொழிவு செய்யப்பட்டவர் மற்றும் மெசியா என்று பொருள்படுகிறது. பழைய ஏற்பாட்டில் இஸ்ராயேல் மக்களின் முதல் அரசரான சவுலை சாமுவேல் திருப்பொழிவு செய்கின்றார்.( 1 சாமுவேல் 10:1) அவரை தொடர்ந்து வந்த தாவீதும் திருப்பொழிவு செய்யப்பட்டதை பார்க்கின்றோம்‌. ஆக தனது பெயரின் அர்த்ததிலேயே அருட்பொழிவு செய்யப்பட்டவர் என்பது, இறை மைந்தன் இயேசு கிறிஸ்து என்றும் நம் அரசராக இருக்கின்றார் என்பதை காட்டுகின்றது. அதனால் தான் மாட்டுக் கொட்டகையில் மனிதனாக மற்றும் எளிமையான அரசராக பிறந்தார். ஞானிகள் வந்து பொன், தூபம் மற்றும் வெள்ளைப்போளம் என்னும் அரச காணிக்கைகளை கொடுத்ததும், இவர் ஒரு அரசர் என்பதை நமக்குக் காட்டுகின்றது. ஆக, அரசராம் கிறிஸ்துவில் நம்பிக்கை கொள்ள அழைக்கப்படுகின்றோம்.

2. நிரந்தரமற்ற உலக ஆட்சி:-

       

 வரலாற்றில் எண்ணற்ற பேரரசுகளும் பேரரசர்களும் அவர்களின் ஆட்சிகளும் இருந்தபோதும் அனைத்தும் நிலையற்றதாக அழிந்து போய்விட்டது. இவ்வுலகில் அனைத்தும் அழிந்து போகக்கூடிய அரசும் அரசாட்சியுமாக இருக்கின்றது. அனைத்தும் குறிப்பிட்ட சில காலத்திற்கு மட்டுமே தான். அதனால் தான் இன்றைய நற்செய்தியில் இறை மைந்தன் இயேசு கிறிஸ்து பிலாத்துவின் முன்பு நிறுத்தப்பட்ட போது "எனது ஆட்சி இவ்வுலக ஆட்சி போன்று அல்ல" (யோவான் 18: 36) என்று குறிப்பிடுகின்றார். அன்று முதல் உலகப் போரின் தாக்கத்தால் அனைவரும் பொதுவுடமை, மதசார்பின்மை மற்றும் அறிவுச்சார்ந்த கொள்கைகளால் கிறிஸ்துவை விட்டு விலகி, இந்த உலகத்தின் மாயைகளுக்கு அடிமையான ஒரு சூழலில், இந்த மண்ணுலகின் ஆட்சி அனைத்தும் அழிந்து போகும் கிறிஸ்துவே என்றுமே நிலையான அரசர், அவரின் ஆட்சியே நிலையானது என திருத்தந்தை எடுத்துரைத்தது போல இன்று நாம் பார்க்கின்ற மற்றும் பயன்படுத்துகின்ற அனைத்து மின்னணு சாதனங்கள், பணம், பதவி மற்றும் பட்டம் என அனைத்தும் ஒரு நாள் அழிந்து போகும். இந்த உலகமும் இதில் உள்ள யாவும் நிலையற்றவை மற்றும் அழிந்து போக கூடியவை என உணர்ந்து வாழ்வோம்.

3. நிலையான இறையாட்சி:-

           கிறிஸ்து அரசர் நம் உள்ளத்திலும், உடலிலும், இதயங்களிலும், மனதிலும், மற்றும் வாழ்விலும் ஆட்சி செய்வதால் ஒவ்வொரு கிறஸ்தவரும் தங்கள் வாழ்வில் இறைவனது பாதுகாப்பையும், வலிமையையும், தைரியத்தையும் மற்றும் இறையாட்சியையும் உணர்தல் வேண்டும். (Quas Primas

 33) என்னும் திருத்தந்தையின் அழைப்பை ஏற்று நிலையான ஆட்சியாம் கிறிஸ்துவின் ஆட்சியில் நிலைத்திருப்போம். அதனால் தான் கபிரியேல் தூதர் மங்கள வார்த்தை கூற சென்றபொழுது "அவருடைய ஆட்சிக்கு முடிவே இராது" (லூக்கா 1:33) என்றும் கூறுகிறார். இன்றைய நற்செய்தியில் இறைமகன் இயேசு கிறிஸ்து தனது வார்த்தைகளால் இதைத்தான் வெளிப்படுத்துகின்றார். எனவே என்றுமே அழியாத மற்றும் நிலையான கிறிஸ்து அரசர் தருகின்ற இறை ஆட்சிக்குள் நாமும் வாழ்கின்றோம் என்பதை உணர்வோம். நாம் ஒவ்வொருவரும் நமது திருமுழுக்கின் வழியாக திருஅவையில் இணைந்ததன் வழியாக இறையாட்சியின் அங்கத்தினர்களாக வாழ்ந்து கொண்டிருக்கின்றோம் என்பதை உணர்ந்து வாழ்வோம்.

 

             ஒவ்வொரு ஆண்டும் நவம்பர் மாதம் 20- ஆம் தேதியிலிருந்து, 25ஆம் தேதிக்குள் கொண்டாடப்பட்டு வந்த கிறிஸ்து அரசர் பெருவிழா 1970ஆம் ஆண்டு முதல் கத்தோலிக்க திருஅவையில் பொதுக்காலத்தின் இறுதி ஞாயிற்றுக்கிழமையில் கொண்டாட ஆரம்பிக்கப்பட்டது. இது திருவருகைக் காலத்திற்கு முன்பாக, என்றும் நிலையான கிறிஸ்து அரசரை நாம் ஏற்று, அவர் வருகைக்காக நாம் நம்மை முழுமையாக தயாரிக்க  அழைக்கப்படுவதாகும். சிந்திப்போம்!

இறைவன் நம் ஒவ்வொருவரையும் ஆசீர்வதிப்பார்.

ஆடியோவாக கேட்க...

                                    https://youtu.be/56pTaWY1ggk

அன்புடன்,

அருட்பணி. அ. குழந்தை யேசு ராஜன் CMF

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக் காலம் 33-ஆம் வாரம் - ( ஆண்டு- B) ----- 14-11-2021- ஞாயிற்றுக்கிழமை

 

முதல் வாசகம் : 

             தானியேல் 12: 1-3

இரண்டாம் வாசகம் : 

             எபிரேயர் 10: 11-14, 18

நற்செய்தி:-

மாற்கு 13:24-32

விவிலிய விளக்கம்:-

1. இன்றைய நற்செய்தியில் இயேசுவின் வார்த்தைகள் இரண்டு காரணங்களின் பிண்ணனியில் கொடுக்கப்படுகிறது.

1. எருசலேமின் அழிவு

2. இயேசுவின் இரண்டாம் வருகை

2. "கதிரவன் இருண்டுவிடும்; நிலா ஒளிகொடாது" (மாற்கு 13:24) என்னும் இறைவார்த்தை இயேசுவின் இரண்டாம் வருகையில் அவரது மாட்சியால் எவ்விதமான ஒளியும் தெரியாது என்பதன் அடையாளம் (எசாயா 24:23).

3. "அப்போது மிகுந்த வல்லமையோடும் மாட்சியோடும் மானிடமகன் மேகங்கள் மீது வருவதைக் காண்பார்கள்"(மாற்கு 13:26). என்பது தந்தையின் வலப்பக்கம் அமர்ந்த இறைமைந்தன் இயேசு, நம்மை நோக்கி இரண்டாம் முறையாக வருவதைத்தான் மேகங்கள் மீது வருவார் என்று சுட்டிக்காட்டப்படுகிறது.

4. "வானதூதரை அனுப்பி, அவர்கள் மண்ணுலகில் ஒரு கோடியிலிருந்து விண்ணுலகில் மறுகோடிவரை நான்கு திசைகளிலிருந்தும் தேர்ந்துகொள்ளப்பட்டவர்களைக் கூட்டிச் சேர்ப்பார்" (மாற்கு 13:27). என்னும் வார்த்தைகள் இயேசு வானதூதர்களின் வழியாய் தேர்ந்து கொள்ளப்பட்ட நம் ஒவ்வொருவரையும் அழைப்பார் மற்றும் தீர்ப்பிடுவார் என்பதை சுட்டிக்காட்டுகிறது (1 தெச.4:17).

5. எருசலேமின் அழிவும் மானிட மகனின் வருகையும் அத்திமர உருவகம் கொண்டு விளக்கப்படுகிறது.

மறையுரை:-

நிகழ்காலத்தில் வாழ்வோம்

(தீர்ப்பும் - வாழ்வும்)

ஒரு முதலாளி தன்னுடைய தொழிலாளியை அடிக்கடி துன்புறுத்தி அதிக வேலை வாங்கிக் கொண்டிருக்கின்றான். இதனால் மனம் நொந்து போன அந்த தொழிலாளி, ஒரு நாள் முதலாளியின் வீட்டை விட்டு 'இந்த வேலையே எனக்கு வேண்டாம்' என்று சென்று விடுகிறான். சென்றவன், எங்கு செல்வது என்று தெரியாமல் காட்டுக்குள் சென்று ஒரு குகையில் வாழ்கின்றான். அந்தக் காட்டில் கிடைக்கும் பழங்களை உண்டு, நீரை அருந்தி உயிர் வாழ்கின்றான். ஒரு நாள் இரவு அவன் குகைக்குள் வருகின்றான், அவனுக்கு ஒரே ஆச்சரியமும், அதிர்ச்சியும் காத்திருக்கிறது. அங்கு ஒரு சிங்கம் காலில் அடிப்பட்டு அவதியுற்று கொண்டிருப்பதை பார்க்கின்றான். அதைக் கண்ட அவன் அந்த சிங்கத்தின் அருகே சென்று அதன் காலுக்கு மருந்து வைத்து அதற்கான முதலுதவியை செய்கின்றான். ஓரிரு நாட்களில் அந்த சிங்கம் நலம் பெற்று அந்த குகையை விட்டு சென்று விடுகின்றது. எவ்வளவு நாள் தான் இந்த குகையிலேயே இருப்பது என்று எண்ணி ஊருக்குள் செல்கின்றான். அங்கு அவன் தன் முதலாளியிடம் மாட்டிக் கொள்கின்றான். முதலாளி அவன் மீது பொய் குற்றம் சுமத்தி அந்த நாட்டு அரசரிடம் ஒப்படைத்து விடுகின்றான். அரசரோ அவனுக்கு மரண தண்டனை விதிக்கின்றான், அந்த நாட்டின் முறைப்படி மரண தண்டனை குற்றவாளிகள் சிங்கத்தின் முன் மைதானத்தில் விடப்படுவர், சிங்கம் அவர்களை கொல்ல அதை அனைவரும் பார்ப்பர், இந்த தொழிலாளியும் அவ்வாறே விடப்பட்ட பொழுது, அங்கு வந்த சிங்கம் அவனை கொல்லாமல் அவனருகே வந்து, அவன் காலை நக்கி கொடுக்கின்றது. சிறிது நேரம் கழித்த பிறகு தான் அவனுக்கு புரிந்தது, அந்த சிங்கத்திற்கு தான் அன்று அவன் முதலுதவி செய்திருந்தான். இதைக் கண்ட அரசனுக்கும் மக்களுக்கும் ஒரே ஆச்சரியம், அதன் பின் அரசர் அவனை அழைத்து நடந்த யாவற்றையும் கேட்டறிகின்றான். அவனும் நடந்த யாவற்றையும் எடுத்துரைக்கின்றான். அரசர் அவனுக்கு பொற் காசுகளை பரிசாக கொடுத்து, அந்த முதலாளியை சிறையில் அடைக்கின்றான். நாம் செய்கின்ற ஒவ்வொரு நல்ல மற்றும் இரக்க செயல்கள், நிச்சயம் ஒரு நாள் நம்மை வாழ வைக்கும். இதைத்தான் இன்றைய இறைவார்த்தை வழிபாடு நமக்கு சொல்கின்ற செய்தியாக இருக்கின்றது.

நிகழ்காலத்தில் நாம் செய்கின்ற ஒவ்வொரு நல்ல செயலுக்கும், பிற்காலத்தில் புது வாழ்வு கிடைக்கும், நிகழ்காலத்தில் நாம் செய்கின்ற ஒவ்வொரு செயலும் பிற்காலத்தில் நம்மை தீர்ப்புக்கு உள்ளாக வைக்கும்.

திருவழிபாட்டு ஆண்டின் இறுதியில் இருக்கின்ற நமக்கு உலக முடிவு மற்றும் இயேசுவின் இரண்டாம் வருகை பற்றிய வாசகம் திருஅவையால் தரப்பட்டிருக்கிறது. இது திருவருகைக் காலம் மற்றும் கிறிஸ்து பிறப்புக்கு நம்மை தயாரிப்பதாக அமைகிறது. கடவுளின் வலப்பக்கத்தில் அமர்ந்திருக்கின்ற இயேசு 'வாழ்வோருக்கும் இறந்தோருக்கும் தீர்ப்பு வழங்குவார்' என நம்பிக்கை அறிக்கையில் நாம் அறிக்கையிடும் வார்த்தைகளுக்கு இன்றைய நற்செய்தி வாசகம் பின்னணியாக அமைகின்றது. நமது எல்லா துன்பமான மற்றும் கஷ்டமான சூழ்நிலைகளிலிருந்து நம்மை மீட்க இயேசு மீண்டும் வருவார் என்பதை இன்றைய முதல் வாசகமும், நற்செய்தி வாசகமும் எடுத்துரைக்கின்றது.

இன்றைய முதல் வாசகம் இறைவாக்கினர் தானியேல் புத்தகத்திலிருந்து எடுக்கப்பட்டிருக்கிறது. இது கஷ்டமும் துன்பமுமே வாழ்க்கையாக மாறிப்போன யூத மக்களுக்கு வரவிருக்கும் மெசியாவால் புதுவாழ்வு பிறக்கும் என்னும் நம்பிக்கை செய்தியை தருகிறது. இன்றைய இறைவார்த்தை வழிபாடு நிகழ்காலத்தில் நாம் படுகின்ற துன்பங்களுக்கு எதிர்காலத்தில் புது வாழ்வும் மற்றும் நிகழ்காலத்தில் நாம் செய்கின்ற பாவங்களுக்கு எதிர்காலத்தில் தீர்ப்பும் கிடைக்கும் என்பதையும் எடுத்துரைப்பதாக இருக்கிறது. ஆக இயேசுவின் வருகை வாழ்வையும் தீர்ப்பையும் நமக்கு கொடுக்கும். எதிர்காலத்தில் நாம் தீர்ப்பை பெற போகின்றோமா? வாழ்வைப் பெற போகின்றோமா? என்பதை சிந்தித்து நிகழ்காலத்தில் அர்த்தமுள்ள வாழ்வை வாழ அழைக்கிறது இன்றைய இறைவார்த்தை வழிபாடு.

தீர்ப்பு:

     நாம் ஒவ்வொருவரும் இந்த மண்ணுலக வாழ்வின் முடிவில் அவரவர் செயல்களுக்கு ஏற்ப தீர்ப்புக்கு உள்ளாக்கப்படுவோம். இன்று நாம் செய்யும் ஒவ்வொரு செயலுக்கும் அதற்கான வெகுமதிகள் அல்லது தண்டனைகள் உண்டு. “நமது வேலை மற்றும் நேரத்தின்படி அல்ல, மாறாக நமது அன்பின் செயல்களின்படியே நமக்கு வெகுமதி அளிப்பார்” என்கிறார் புனித சியன்னா கேத்தரின். நற்செயல்களுக்கு நிரந்தரமான வெகுமதி உண்டு. இன்று நாம் செய்யும் தீய செயல்களுக்கு அதாவது பாவங்களுக்கு நிச்சயம் ஒரு நாள் அவரால் தீர்ப்பிடப்படுவோம். “நாம் எதை விதைக்கிறோமோ, அதையே அறுவடை செய்வோம்” (கலாத்தியர் 6:7.) நம்மை சோதித்தறிய வேண்டிய நேரம் இது. செய்த தவறுகளுக்குப் பரிகாரம் செய்ய வேண்டிய நேரம் இது. நாம் செய்த பாவங்களுக்கு மன்னிப்பு கேட்போம், அதற்காக நம்மால் முடிந்த இரக்க செயல்களை செய்வோம். எதிர்காலத்திற்காக நிகழ்காலத்தில் அர்த்தமுள்ள முறையில் வாழ்வோம்.

வாழ்வு:

"துயருறுவோர் பேறுபெற்றோர்; ஏனெனில் அவர்கள் ஆறுதல் பெறுவர். நீதியின் பொருட்டுத் துன்புறுத்தப்படுவோர் பேறு பெற்றோர்; ஏனெனில் விண்ணரசு அவர்களுக்குரியது." (மத்தேயு 5:4,10) என்னும் இறைவார்த்தையின் அடித்தளத்தில் நிகழ்காலத்தில் இறைவனுக்காக, இறையாட்சிக்காக, திருஅவையின் எல்லா நலனுக்காக மற்றும் இறைவார்த்தையின்படி வாழ்வதற்காக துன்பங்களை ஏற்றுக்கொள்கின்ற நாம் இறைவனால் இறையாட்சி என்னும் புது வாழ்வுக்கு அழைத்துச் செல்லப்படுவோம். இயேசுவின் தீர்ப்பு உண்மை, அன்பு மற்றும் நீதியின் அடிப்படையில் அமையும். நாம் எப்பொழுதும் நமது தீர்ப்பை எதிர்கொள்ள நன்கு தயாராக இருக்க வேண்டும், நமது அன்றாட வாழ்வில் நாம் இரக்கச் செயல்களோடு, பிறர் மீது அன்பு செலுத்தும் போது நிச்சயம் நாம் இறைவனால் வாழ்வுக்கான நீதித் தீர்ப்புக்கு உள்ளாக்கப்படுவோம்.

        இன்று நாம் வாழும் நமது வாழ்க்கை தான் நாளைய வாழ்வையும் தீர்மானிக்கும். இது தான் உண்மை, ஒவ்வொரு நாளையும் நம் கடைசி நாளாக எண்ணுவோம். இன்று நம்மால் முடிந்த நல்லதைச் செய்வோம், நாளை நமக்கு வாய்ப்பு கிடைக்காமல் போகலாம். எல்லா விதமான கவலை, துன்பம் மற்றும் வருத்தம் என யாவற்றையும் விட்டு விடுவோம். அதிலிருந்து மீண்டு வருவோம். ஒவ்வொரு நாளும், கடந்து செல்லும், ஒவ்வொரு மணி நேரமும் நமது எதிர்காலத்தை தீர்மானிக்கிறது; ஒவ்வொரு நாளையும் கணக்கிடுவோம். வாழ்வின் சாதாரண நிகழ்வுகளில் நாளும் இயேசு நம்மிடம் வருகிறார், நற்கருணையில் மற்றும் நமது சகோதர சகோதரிகளிடத்தில் அவரை வரவேற்போம். நமது அன்பை காட்டுவோம். நம்பிக்கையுடனும் அமைதியுடனும் எதிர்காலத்தை நோக்குவோம், ஏனென்றால் கடவுளின் வலது பக்கத்தில் என்றென்றும் அமர்ந்திருக்கும் இயேசு, இரண்டாம் வாசகத்தில் நாம் கேட்டது போல் சிலுவையில் தம்முடைய பலியின் மூலம் நம்முடைய பாவ மன்னிப்பையும், நம்முடைய தூய மற்றும் புது வாழ்வையும் உறுதி செய்கிறார்.

இறைவன் நம் வாழ்க்கையை வாழ அருள்புரிவாராக; ஒவ்வொரு வாய்ப்பையும் பயன்படுத்தி மற்றவர்களுக்கு நன்மை செய்ய, மகிழ்ச்சியான புதுவாழ்வு வாழ முயலுவோம். இறைவன் நம் ஒவ்வொருவரையும் ஆசீர்வதிப்பார்.

ஆடியோவாக கேட்க...

             https://youtu.be/wAVfzx-MWDI

அன்புடன்,

அருட்பணி. அ. குழந்தை யேசு ராஜன் CMF

🌱விவிலிய விதைகள்🌱 - Biblical Seeds-Tamil Sunday Homily -தமிழ் ஞாயிறு மறையுரைகள் - பொதுக் காலம் 32-ஆம் வாரம் - ( ஆண்டு- B) ----- 07-11-2021- ஞாயிற்றுக்கிழமை

 

நற்செய்தி:-

மாற்கு 12:38-44

விவிலிய விளக்கம்:-

1. ஏழைக் கைம்பெண் காணிக்கைப் பெட்டியில் போட்ட நாணயங்கள், எல்லா நாணயங்களை காட்டிலும் மிகக் குறைவான மதிப்பு கொண்டது.

2. எருசலேம் தேவாலயத்தில் பெண்களுக்கான பகுதியில் மொத்தம் பதிமூன்று காணிக்கை பெட்டிகள் இருந்தன. அவை வெவ்வேறு தேவைகளுக்காக பயன்படுத்தப்பட்டன.

3. யூதர்கள் மத்தியில் ஏழைகளுக்கு உதவுவதற்காக நிதி திரட்டும் பழக்கம் இருந்தது அதற்காக வைக்கப்பட்ட காணிக்கைப் பெட்டியில் தான் இந்த இந்தப் பெண் காசுகளை போட்டிருக்கிறார்.

4. ஒத்தமை நற்செய்தி நூல்களான மத்தேயுவில் இந்தப்பகுதி குறிப்பிடவில்லை, மாறாக லூக்கா நற்செய்தியாளர் இதை பற்றி எடுத்துரைக்கிறார். (லூக்கா 21:1-4)

மறையுரை:-

...இறைவன் நம் உள்ளத்தை பார்க்கிறார்...

"கடற்கரை மணலில் அவர் பாதங்கள்" என்பது ஒரு ஆங்கில கவிதை. இந்த கவிதையின் அடிப்படையில் கதை ஒன்று இவ்வாறாக கூறப்படுகிறது. இறைவன் மீது ஆழ்ந்த பக்தி கொண்ட ஒருவர் ஒருநாள் உறங்குகின்ற போது கனவு ஒன்றை கண்டார். அந்தக் கனவில் அவர் கடற்கரை மணலில் நடந்து கொண்டிருக்கின்ற பொழுது அவர் அருகே மற்றொருவரின் பாதங்களும் காணப்படுகிறது. இருவர் செல்லும் அந்த பாத சுவடுகளில் மற்றொன்று இறைவனுடையது, அவர் என்னோடு நடந்து என்னைப் பார்த்துக் கொண்டிருக்கின்றார் என்பதை அவர் உணர்கின்றார். இது அவருடைய வாழ்வின் எல்லா நிலைகளிலும் இருப்பதையும் அவர் உணர்கின்றார். ஆனால், அவரது வாழ்வின் துன்பமான சூழலில் இறைவனது பாத சுவடுகள் மறைந்து போவதை நினைத்து வருத்தமுற்றவராய் தன்னுடைய செபத்தில் இறைவனிடம் கேட்கின்றார். 'என் வாழ்வின் எல்லா நிலைகளிலும் என்னுடன் இருந்து என்னைப் பார்க்கும் இறைவன் என் துன்பத்தில் என்னை விட்டு விலகுவது ஏன்?' என்கிறார். அதற்கு இறைவன் 'உனது வாழ்வின் எல்லா நிலைகளிலும் நான் உன்னோடு இருக்கிறேன், உன்னை பார்த்துக் கொண்டிருக்கிறேன். உனது துன்பமான காலத்தில் நீ பார்க்கும் அந்த ஒற்றை நபரின் பாதம் உன்னுடையது தான் ஆனால் அச்சூழலில் நான் உன்னோடு பயணிக்கவில்லை மாறாக உன்னிலிருந்து பயணித்தேன். உனது வாழ்வில் நான் உன்னோடு உன்னிலிருந்து உன்னை பார்த்துக் கொண்டிருக்கிறேன். நீ தான் என் பிரசன்னத்தை உணரவில்லை' என்றாராம். இன்று, இறைவன் நம்மோடு நம்முள் வாழ்கின்றார், நம்மை பார்க்கிறார் என்பதை பல வேளைகளில் உணராமல் வாழ்ந்து கொண்டிருக்கின்றோம். இறைவன் நம்மை அதிலும் நம் உள்ளங்களை பார்க்கிறார் என்பதை உணர்ந்து வாழ்வதற்கு இன்றைய இறைவார்த்தை வழிபாடு அழைப்பு தருகிறது.

அவர் நம்மை பார்க்கிறார்:-

"ஆண்டவருடைய கண்கள் எங்கும் நோக்கும்; நல்லாரையும் பார்க்கும், பொல்லாரையும் பார்க்கும்" (நீதிமொழிகள் 15:3) என்னும் இறைவார்த்தையின் அடித்தளத்தில் நம்மைப் படைத்த கடவுள் நாம் செய்யும் ஒவ்வொன்றையும் அறிந்து நம்மை கண்ணோக்கி கொண்டிருக்கிறார். இன்றைய நற்செய்தி பகுதியில் இயேசு காணிக்கைப் பெட்டிக்கு எதிராக அமர்ந்துகொண்டு மக்கள் அதில் செப்புக்காசு போடுவதை உற்று நோக்கிக் கொண்டிருந்தார். (மாற்கு 12:41) இங்கு இயேசுவின் பார்வை ஆலயத்தில் காசுகளை போட்ட ஒவ்வொருவர் மேலும் இருக்கிறது. பழைய ஏற்பாட்டில் சாராவின் பணிப்பெண்ணான ஆகார் பாலைவனத்திற்கு செல்லும்பொழுது ஆண்டவரின் தூதர் அவளுக்குத் தோன்றி குழந்தைக்கு இஸ்மாயில் என பெயரிடவும், மீண்டுமாக சாராவிடம் செல்லவும் கட்டளையிடுகின்றார்.

அப்பொழுது, ‘என்னைக் காண்பவரை நானும் இங்கே கண்டேன் அல்லவா?’ என்று அவள் சொல்லித் தன்னுடன் பேசிய ஆண்டவரை, ‘காண்கின்ற இறைவன் நீர்’ என்று பெயரிட்டழைத்தாள். (தொடக்க நூல் 16:13) இதே காண்கின்ற இறைவன் தான், அன்று ஆதாம்-ஏவாள் பாவம் செய்த போதும், காயின் ஆபேலை கொன்ற போதும், ஆபிரகாம் குழந்தையின்றி இருந்த போதும், யோசேப்பை அவருடைய சகோதரர்கள் கொல்ல நினைத்த போதும், இஸ்ராயேல் மக்கள் எகிப்திலும் பாலைவனத்திலும் மற்றும் பாலும் தேனும் பொழியும் கானான் தேசத்தில் இருந்த போதும் கண்ணோக்குகின்றார். தொடர்ந்து அரசர்களின் வழியாகவும், இறைவாக்கினர்களின் வழியாகவும், தம் ஒரே மகனாம் இயேசுவின் வழியாகவும் கண்ணோக்கி கொண்டிருந்தார். இன்றும் நமது திருச்சபையை தூய ஆவியின் நிழல் கொண்டு கண்ணோக்கி கொண்டிருக்கிறார். நாம் செய்யும் ஒவ்வொரு செயலும், நாம் பேசுகின்ற ஒவ்வொரு பேச்சும் இறைவனால் பார்க்கப்பட்டு கொண்டிருக்கிறது. தன்னுடைய சாயலாக, நாம் கருவில் உருவாவதற்கு முன்பே நம்மை அறிந்த, நமக்காக நம்முடைய மீட்பிற்காக தன்னுடைய ஒரே மகனையே அனுப்பி சிலுவையில் தன் உயிரை அர்ப்பணிக்க வைத்த இறைவன் நம்மை பார்த்துக் கொண்டிருக்கிறார். நமது மகிழ்வான மற்றும் துன்பமான தருணங்களிலும் நம்மை பார்த்துக் கொண்டிருக்கின்றார்.

அவர் நம் உள்ளத்தை பார்க்கிறார்:-

இறைவன் யாரை பார்க்கின்றார்? எதை பார்க்கின்றார்? நம்மை காண்கின்ற இறைவன் நம்மை ஒரு நாள் தீர்ப்பிடுவார். இறைவனது தீர்ப்பு நமது செயல்களை வைத்து அல்ல மாறாக நம்முடைய உள்ளத்தை மற்றும் நம்பிக்கையை அடிப்படையாய் வைத்து தான் அமையும். இதைத் தான் ஆண்டவர் சாமுவேலிடம், மனிதர் முகத்தைப் பார்க்கின்றனர்; ஆண்டவரோ அகத்தைப் பார்க்கின்றார்” என்றார். (1 சாமுவேல் 16:7) இன்றைய நற்செய்தியில் இயேசு தம் சீடரை வரவழைத்து, “இந்த ஏழைக் கைம்பெண், காணிக்கைப் பெட்டியில் காசு போட்ட மற்ற எல்லாரையும் விட மிகுதியாகப் போட்டிருக்கிறார் என உறுதியாக உங்களுக்குச் சொல்கிறேன். ஏனெனில் அவர்கள் அனைவரும் தங்களுக்கு இருந்த மிகுதியான செல்வத்திலிருந்து போட்டனர். இவரோ தமக்குப் பற்றாக்குறை இருந்தும் தம்மிடம் இருந்த அனைத்தையுமே, ஏன் தம் பிழைப்புக்காக வைத்திருந்த எல்லாவற்றையுமே போட்டு விட்டார்” (மாற்கு 12:43,44) என்று அவர்களிடம் இயேசு அப்பெண்ணின் உள்ளத்தைப் பார்த்ததை எடுத்துரைக்கின்றார். அங்கிருந்தவர்களில் மிகவும் குறைவான மதிப்பு கொண்ட காசை அப்பெண் போட்டிருந்தாலும், அந்த பெண் தன்னிடம் இருந்த யாவற்றையும் போட்டிருக்கிறார். இது ஏழை கைம்பெண் இறைவன் மீது கொண்ட அன்பையும் அவர் இறைவனுக்காக செய்த தியாகத்தையும் எடுத்துரைக்கின்றது. இங்கு அப்பெண்ணின் உள்ளத்திலிருந்த இறை அன்பையும், தியாகத்தையும் இறைவன் பார்க்கின்றார்.

உள்ளத்திலிருந்து செயல்படுவோம்:-

"உலகம் அனைத்தையும் ஆண்டவரின் கண்கள் சுழன்று பார்க்கின்றன". (2 குறிப்பேடு 16:9) ஆக இறைவனது பார்வையில் எதுவும் மற்றும் எவையும் மறைந்து போகலாகாது. மனிதன் அறிந்ததையும் மற்றும் அறியாததையும் இறைவன் அறிந்திருக்கின்றார். மனிதனது முக்காலத்தையும், முக்காலத்தின் செயல்பாடுகளையும் அவற்றின் நன்மை தீமைகளையும் அறிந்தவர் இறைவன், இவை அனைத்தையும் செய்வதற்கு இறைவன் நம்மை அனுமதிக்கின்றார். ஆனால், அவர் நம்மை பார்த்துக் கொண்டிருக்கின்றார் நமது செயல்களை அல்ல மாறாக நம் உள்ளத்தை பார்த்து கொண்டிருக்கின்றார். "உங்கள் தலைமுடியெல்லாம் எண்ணப்பட்டிருக்கின்றது".(மத்தேயு 10:30) என்னும் இறைவார்த்தையின் அடித்தளத்தில் நமது ஒவ்வொரு செயலும் இறைவனால் எண்ணப்பட்டு கொண்டிருக்கிறது. எனவே நமது செயல்கள் பிறருக்காக மற்றும் பெயருக்காக இல்லாது இறைவனுக்காய் நம் உள்ளத்திலிருந்து அமையட்டும். "உன் தந்தையின் கடவுளை அறிந்து, முழு மனத்தோடும், ஆர்வமிக்க உள்ளத்தோடும் அவருக்கு ஊழியம் செய்; ஏனெனில் ஆண்டவர் எல்லா இதயங்களையும் ஆய்ந்தறிகிறார்; எல்லாத் திட்டங்களையும், எல்லா எண்ணங்களையும் பகுத்தறிகிறார்; நீ அவரைத் தேடினால் கண்டடைவாய், நீ அவரைப் புறக்கணித்தால் அவர் உன்னை என்றென்றும் கைவிடுவார்". (1 குறிப்பேடு 28:9) எனவே முழுமனதோடு வாழ்வின் எல்லா நிலைகளிலும் உள்ளத்திலிருந்து அவரை தேடுவோம். இறைவன் எனது வாழ்வில் எண்ணை பார்க்கின்றார், என்னோடு இருக்கின்றார் மற்றும் என்னுள் இருக்கின்றார் என்பதை நாம் முழுமையாக நமது வாழ்வில் உணர்வோம். நமது ஒவ்வொரு செயலும் உள்ளத்திலிருந்து வெளிப்பட இறைவனுக்கு உகந்த வாழ்வை வாழ்வோம்.

இறைவன் நம் ஒவ்வொருவரையும் ஆசீர்வதிப்பார்.

ஆடியோவாக கேட்க...

 https://youtu.be/u5vlkXKgaII                

அன்புடன்,

அருட்பணி. அ. குழந்தை யேசு ராஜன் CMF